ಶತಮಾನದ ಕಟ್ಟಡ ನೆಲಸಮ!: ತಿರುವೈಲು ಶಾಲೆ ಕೆಡವಲು ಮುಂದಾದ ಜಿಲ್ಲಾಡಳಿತ : ಶಾಲಾ ಆಡಳಿತದಿಂದ ಸಮ್ಮತಿ

ಧನಂಜಯ ಗುರುಪುರ

ವಾಮಂಜೂರು ತಿರುವೈಲು ಸರ್ಕಾರಿ ಪ್ರೌಢಶಾಲೆಯ ಸಭಾಗೃಹ, ಸ್ಮಾರ್ಟ್‌ಕ್ಲಾಸ್ ಸಹಿತ ಒಟ್ಟು 10 ತರಗತಿ ಕೊಠಡಿ ಒಳಗೊಂಡ ಹಳೇ ಕಟ್ಟಡ ನೆಲಸಮಗೊಳಿಸಲು ಮುಂದಾದ ಜಿಪಂ/ ತಾಪಂ ಕಚೇರಿ ಶಾಲಾ ಆಡಳಿತಕ್ಕೆ ನೋಟಿಸ್ ಜಾರಿ ಮಾಡಿದೆ.

ವಿಸ್ತರಣೆಗೊಳ್ಳುತ್ತಿರುವ ಎನ್‌ಎಚ್ 169ರ ಕೆತ್ತಿಕಲ್ ಹತ್ತಿರದಲ್ಲಿ ಈ ವರ್ಷ ಶತಮಾನೋತ್ಸವ ಆಚರಿಸಿರುವ ತಿರುವೈಲು ಸರ್ಕಾರಿ ಶಾಲೆ ಕಟ್ಟಡವಿದೆ. ಹೆದ್ದಾರಿಗೆ ಪಕ್ಕದಲ್ಲಿ, ವಿಶಾಲ ಮುರ ಕಲ್ಲಿನ ಮೇಲೆ ನಿರ್ಮಾಣಗೊಂಡ ಹಳೇ ಕಟ್ಟಡ ಇನ್ನೂ 50 ವರ್ಷ ಬಾಳಿಕೆ ಬರುವಂತಿದ್ದರೂ, ಶಾಲಾ ಮಕ್ಕಳ ಸುರಕ್ಷತೆ ಮತ್ತು ಹಳೇ ಕಟ್ಟಡ ಹೆದ್ದಾರಿಗೆ ಬೀಳಬಹುದೆಂಬ ದೂರದೃಷ್ಟಿಯಿಂದ ಜಿಪಂ/ತಾಪಂ ಕೆಡವಲು ಮುಂದಾಗಿದೆ ಎಂದು ಶಾಲೆ ಹಿರಿಯ ಹಳೇ ವಿದ್ಯಾರ್ಥಿಗಳು ಮಾಹಿತಿ ನೀಡಿದರು.

ತುರ್ತು ಸಭೆಯಲ್ಲಿ ಚರ್ಚೆ: ಜಿಪಂ/ತಾಪಂ ಈಗಾಗಲೇ ಕಳುಹಿಸಿರುವ ನೋಟಿಸ್‌ಗೆ ಉತ್ತರವಾಗಿ ಶಾಲಾಭಿವೃದ್ಧಿ ಹಾಗೂ ಮೇಲುಸ್ತುವಾರಿ ಸಮಿತಿ, ಹಳೇ ವಿದ್ಯಾರ್ಥಿ ಸಂಘ, ವಿದ್ಯಾಬೋಧಿನಿ ಎಜುಕೇಶನ್ ಟ್ರಸ್ಟ್ ಮತ್ತು ಶಾಲಾ ಶತಮಾನೋತ್ಸವ ಸಮಿತಿ ಜಂಟಿಯಾಗಿ ಭಾನುವಾರ ತುರ್ತು ಸಭೆಯಲ್ಲಿ ಚರ್ಚಿಸಿ ಕೆಲವು ಮಹತ್ವದ ನಿರ್ಣಯ ಕೈಗೊಳ್ಳಲಾಗಿದೆ. ಎಸ್‌ಡಿಎಂಸಿ ಅಧ್ಯಕ್ಷ ರಾಕೇಶ್ ಶೆಟ್ಟಿ, ಹಳೇ ವಿದ್ಯಾರ್ಥಿ ಸಂಘದ ಅಧ್ಯಕ್ಷ ಗಿರೀಶ್ ಆಚಾರ್ಯ, ವಿದ್ಯಾಬೋಧಿನಿ ಎಜುಕೇಶನ್ ಟ್ರಸ್ಟ್ ಅಧ್ಯಕ್ಷ ರಘು ಸಾಲ್ಯಾನ್, ಸಂಘ-ಸಂಸ್ಥೆಗಳು, ಟ್ರಸ್ಟ್ ಹಾಗೂ ಶಾಲಾ ಸಮಿತಿ ಪದಾಧಿಕಾರಿಗಳು, ನಿವೃತ್ತ ಶಿಕ್ಷಕ ಗೋಪಾಲ್ ಯು., ನಿವೃತ್ತ ಮುಖ್ಯಶಿಕ್ಷಕಿ ಪುಷ್ಪಾವತಿ, ಪ್ರಭಾರ ಮುಖ್ಯ ಶಿಕ್ಷಕಿ ವಿದ್ಯಾ, ಶಿಕ್ಷಕಿಯರು, ಮಕ್ಕಳ ಪಾಲಕರು, ಹಳೇ ವಿದ್ಯಾರ್ಥಿಗಳು, ಶಿಕ್ಷಣ ಪ್ರೇಮಿಗಳು ಇದ್ದು, ಶಾಲೆಯ ಭವಿಷ್ಯದ ಹಿತದೃಷ್ಟಿಯಿಂದ ಕೈಗೊಳ್ಳಲಾದ ನಿರ್ಣಯಕ್ಕೆ ಸಮ್ಮತಿ ವ್ಯಕ್ತಪಡಿಸಿದರು.

ನಿರ್ಣಯ ಹೀಗಿದೆ: ಶಾಲಾ ಹಳೇ ಕಟ್ಟಡ ನೆಲಸಮಗೊಳಿಸಲು ಎಸ್‌ಡಿಎಂಸಿಯ ಪೂರ್ಣ ಅನುಮತಿ ಇದೆ. ಆ ಕಾರ್ಯ ಜಿಪಂನಿಂದಾಗಬೇಕು. ಎಸ್‌ಡಿಎಂಸಿ ಜವಾಬ್ದಾರಿ ತೆಗೆದುಕೊಳ್ಳುವುದಿಲ್ಲ. ಶಾಲಾ ಮಕ್ಕಳ ಸುರಕ್ಷತೆ ದೃಷ್ಟಿಯಿಂದ ಕಟ್ಟಡ ಕೆಡವಲಾದ ಜಾಗದಲ್ಲಿ ತುರ್ತಾಗಿ ಆವರಣ ಗೋಡೆ ನಿರ್ಮಿಸಬೇಕು. ಶಾಲೆಯಲ್ಲಿ ಈಗ ಮಕ್ಕಳ ಸಂಖ್ಯೆ 350 ದಾಟಿರುವುದರಿಂದ ಹೊಸ ಶೌಚಗೃಹ ನಿರ್ಮಿಸಿದ ಬಳಿಕ ಹಳೇ ಶೌಚಗೃಹ ಕಟ್ಟಡ ನೆಲಸಮಗೊಳಿಸಬೇಕು. ಜತೆಗೆ ಈಗಾಗಲೇ ಮಂಜೂರಾತಿಯಾಗಿರುವ ಅನುದಾನದಲ್ಲಿ ಶಾಲಾ ಆವರಣದಲ್ಲಿ ಹೊಸ ಕಟ್ಟಡ ನಿರ್ಮಿಸಲು ಕ್ರಮ ಜರುಗಿಸಬೇಕು.