ಸಬ್‌ಸ್ಟೇಷನ್ ಕಾಮಗಾರಿ ಆರಂಭ : ಕೈೊಲದಲ್ಲಿ ಬಹುಕಾಲದ ಬೇಡಿಕೆಗೆ ಚಾಲನೆ : 33ಸಾವಿರ ವೋಲ್ಟೇಜ್ ಸಾಮರ್ಥ್ಯದ ಉಪಕೇಂದ್

ಕಡಬ: ಕೈೊಲ, ರಾಮಕುಂಜ ಭಾಗದ ಜನರನ್ನು ನಿರಂತರ ಕಾಡುತ್ತಿದ್ದ ವಿದ್ಯುತ್ ಕಡಿತ, ವೋಲ್ಟೇಜ್ ಸಮಸ್ಯೆ ನಿವಾರಣೆಗೆ ಕಾಲ ಕೂಡಿ ಬಂದಿದೆ.. 33 ಕೆವಿ ಉಪಕೇಂದ್ರ ನಿರ್ಮಾಣದ ಕಾಮಗಾರಿ ಆರಂಭಗೊಂಡಿದೆ. ಈ ಭಾಗದ ವಿದ್ಯುತ್ ಬಳಕೆದಾರರ ಬಹುಕಾಲದ ಬೇಡಿಕೆಯೊಂದು ಈಡೇರುವಂತಿದೆ.

ಕೈೊಲದಲ್ಲಿ ರಾಜ್ಯ ಹೆದ್ದಾರಿ ಮಗ್ಗುಲಲ್ಲಿ ಪಶುಸಂವರ್ಧನಾ ಮತ್ತು ತರಬೇತಿ ಕೇಂದ್ರದ ಅಂಚಿನಲ್ಲಿ 1 ಎಕರೆ ಜಾಗ ಮೆಸ್ಕಾಂ ಇಲಾಖೆಗೆ ಮಂಜೂರು ಆಗಿದ್ದು, 33 ಕೆವಿ ಸಾಮರ್ಥ್ಯದ ವಿದ್ಯುತ್ ಉಪಕೇಂದ್ರ ನಿರ್ಮಾಣ ಆಗಲಿದೆ.

ಉಪ್ಪಿನಂಗಡಿ ಸಮೀಪದ ಕರ‌್ವೇಲ್‌ನ 110 ಕೆವಿ ಉಪಕೇಂದ್ರದಿಂದ 33 ಕೆವಿ ವಿದ್ಯುತ್ ಕೈೊಲಕ್ಕೆ ಬರಲಿದೆ. ಕೈೊಲ ಉಪಕೇಂದ್ರದಿಂದ ಕೊಲ, ರಾಮಕುಂಜ, ಹಳೆನೇರೆಂಕಿ, ಹಿರೇಬಂಡಾಡಿ, ಬಜತ್ತೂರು ಈ 5 ಗ್ರಾಮ ವ್ಯಾಪ್ತಿಗೆ ಒಟ್ಟು 11 ಕೆವಿ ಹಂಚಿಕೆಯಾಗಲಿದೆ. ಈ ರೀತಿಯಾಗಿ ಕೈೊಲ, ರಾಮಕುಂಜ ಭಾಗದ ಬಳಕೆದಾರರಿಗೆ ಗುಣಮಟ್ಟದ ವಿದ್ಯುತ್ ದೊರಕುವ ಆಶಾಭಾವನೆ ವ್ಯಕ್ತವಾಗಿದೆ.

ಕೈೊಲ ಭಾಗಕ್ಕೆ ಪುತ್ತೂರಿನಿಂದ ಬೆಳಿಪ್ಪಾಡಿ ಮೂಲಕ ಕಾಡು ಹಾದಿಯಾಗಿ ನದಿಯನ್ನು ದಾಟಿ ವಿದ್ಯುತ್ ಸಂಪರ್ಕದ ಲೈನ್ ಬರುತ್ತಿದ್ದು, ಮಳೆಗಾಲದಲ್ಲಿ ಮರದ ರೆಂಬೆ, ಕೊಂಬೆ ತುಂಡಾಗಿ ಬಿದ್ದು ವಿದ್ಯುತ್ ಸಂಪರ್ಕ ಕಡಿತ, ಬೇಸಿಗೆಯಲ್ಲಿ ಲೋ ವೋಲ್ಟೇಜ್ ಸಮಸ್ಯೆ ಮೊದಲಾದ ಕಾರಣಗಳಿಂದ 365 ದಿನಗಳೂ ವಿದ್ಯುತ್ ಸಮಸ್ಯೆ ಎದುರಿಸುವಂತಾಗಿತ್ತು. ಉಪಕೇಂದ್ರ ನಿರ್ಮಾಣದಿಂದ ಸಮಸ್ಯೆ ಬಗೆಹರಿಯಲಿದೆ ಎಂಬ ಆಶಾಭಾವ ಈ ಭಾಗದ ಜನರಲ್ಲಿ ಮೂಡಿದೆ.

ಸಬ್‌ಸ್ಟೇಷನ್ ಕಾಮಗಾರಿಗೆ ರಾಜ್ಯ ಸರ್ಕಾರದಿಂದ 13.11 ಕೋಟಿ ರೂಪಾಯಿ ಮಂಜೂರು ಆಗಿದೆ. ಡಿಸೆಂಬರ್ ತಿಂಗಳ ಆರಂಭದಲ್ಲಿ ಕಾಮಗಾರಿ ಪ್ರಾರಂಭಗೊಂಡಿದೆ. ಬೆಂಗಳೂರು ಇಟಾ ಇಂಜಿನಿಯರ್ಸ್‌ ಬೆಂಗಳೂರು ಸಂಸ್ಥೆ ಕಾಮಗಾರಿ ನಿರ್ವಹಣೆ ವಹಿಸಿಕೊಂಡಿದೆ.