ನ್ಯೂಯಾರ್ಕ್: ಯೂಟ್ಯೂಬ್ ವಿಡಿಯೋಗಾಗಿ ತನ್ನ ವಿಮಾನವನ್ನೇ ಪತನ ಮಾಡಿದ ಮಾಜಿ ಒಲಿಂಪಿಯನ್ ಹಾಗೂ ಯೂಟ್ಯೂಬರ್ ಟ್ರೆವೊರ್ ಜಾಕೋಬ್, 20 ವರ್ಷಗಳ ಕಠಿಣ ಕಾರಾಗೃಹ ಶಿಕ್ಷೆಗೆ ಗುರಿಯಾಗುವ ಸಾಧ್ಯತೆ ಇದೆ ಎಂದು ಯುನೈಟೆಡ್ ಸ್ಟೇಟ್ಸ್ ಅಧಿಕಾರಿಗಳು ಗುರುವಾರ ತಿಳಿಸಿದ್ದಾರೆ.
ಈಗಾಗಲೇ ಜಾಕೋಬ್ ಅವರ ಖಾಸಗಿ ಪೈಲಟ್ ಪ್ರಮಾಣ ಪತ್ರವನ್ನು ಯುನೈಟೆಡ್ ಸ್ಟೇಟ್ಸ್ ಫೆಡರಲ್ ಅವಿಯೇಷನ್ ಅಡ್ಮಿನಿಸ್ಟ್ರೇಷನ್ (ಎಫ್ಎಎ) ರದ್ದು ಮಾಡಿದೆ. ಸದ್ಯ ಜಾಕೋಬ್ ತನ್ನ ತಪ್ಪನ್ನು ಒಪ್ಪಿಕೊಂಡಿದ್ದು ಶಿಕ್ಷೆಗೆ ಗುರಿಯಾಗುವ ಸಾಧ್ಯತೆ ಇದೆ.
ಅಂದಹಾಗೆ ಜಾಕೋಬ್ ತಮ್ಮ ಯೂಟ್ಯೂಬ್ನಲ್ಲಿ ಪೋಸ್ಟ್ ಮಾಡಿರುವ ವಿಡಿಯೋ 3 ಮಿಲಿಯನ್ಗೂ ಅಧಿಕ ವೀಕ್ಷಣೆಯನ್ನು ಪಡೆದುಕೊಂಡಿದೆ.
ಇದನ್ನೂ ಓದಿ: ಪತ್ನಿಯ ಶೋಕಿಗೆ ಬಲಿಯಾಯ್ತು ಸುಂದರ ಕುಟುಂಬ; ಮಕ್ಕಳೊಂದಿಗೆ ಪ್ರಾಣಬಿಟ್ಟ ತಂದೆ
ನನ್ನ ವಿಮಾನವನ್ನು ಪತನ
ನ್ಯೂಯಾರ್ಕ್ ಟೈಮ್ಸ್ ಪ್ರಕಾರ ಸಾಮಾಜಿಕ ಜಾಲತಾಣದ ವೀವ್ಸ್ಗಾಗಿ 2021ರಲ್ಲಿ ವಿಮಾನವನ್ನು ಪತನ ಮಾಡಿದ ಆರೋಪದಡಿಯಲ್ಲಿ ಮಿ. ಜಾಕೋಬ್ ಅವರು ತನಿಖೆಯನ್ನು ಎದುರಿಸುತ್ತಿದ್ದಾರೆ. ತನ್ನ ವಿಡಿಯೋಗೆ ” ನಾನು ನನ್ನ ವಿಮಾನವನ್ನು ಪತನ ಮಾಡುತ್ತೇನೆ” ಎಂದು ಶೀರ್ಷಿಕೆ ನೀಡಿದ್ದು, ದೋಷಪೂರಿತ ಎನ್ನಲಾದ ನಾಗರಿಕ ವಿಮಾನದಿಂದ ಪ್ಯಾರಚೂಟ್ ಮೂಲಕ ಜಾಕೋಬ್ ಹೊರ ಜಿಗಿಯುವುದು ಮತ್ತು ವಿಮಾನವೂ ಕ್ಯಾಲಿಫೋರ್ನಿಯಾದಲ್ಲಿರುವ ಲಾಸ್ ಪಡ್ರೆಸ್ ರಾಷ್ಟ್ರೀಯ ಅರಣ್ಯದಲ್ಲಿ ಬೀಳುವುದನ್ನು ವಿಡಿಯೋದಲ್ಲಿ ನೋಡಬಹುದಾಗಿದೆ.
ಉದ್ದೇಶಪೂರ್ವಕವಾಗಿಯೇ ಪತನ
ವಿಡಿಯೋವೂ ವಾಯುಯಾನ ಉತ್ಸಾಹಿಗಳ ಕೆಂಗಣ್ಣಿಗೆ ಗುರಿಯಾಗಿದ್ದು, ಜಾಕೋಬ್ ಟೀಕೆಗಳನ್ನು ಎದುರಿಸುತ್ತಿದ್ದಾರೆ. ಈ ಸಂಬಂಧ ವರದಿ ಒಂದನ್ನು ಎಫ್ಎಎ ಸಿದ್ಧಪಡಿಸಿದ್ದು, ಇಂಜಿನ್ ಫೇಲ್ ಆಗಿದೆ ಎಂದು ಜಾಕೋಬ್ ಹೇಳುವುದಕ್ಕೂ ಮುಂಚೆಯೇ ಆತ ಪ್ಯಾರಚೂಟ್ ಸಿದ್ಧಪಡಿಸಿಕೊಂಡು ವಿಮಾನದ ಎಡಗಡೆ ಇರುವ ಬಾಗಿಲನ್ನು ತೆರೆದರು. ಹೀಗಾಗಿ ಜಾಕೋಬ್ ಉದ್ದೇಶಪೂರ್ವಕವಾಗಿಯೇ ವಿಮಾನವನ್ನು ಪತನ ಮಾಡಿದ್ದಾರೆ ಎಂಬುದು ಇದರಿಂದಲೇ ಗೊತ್ತಾಗುತ್ತದೆ ಎಂದು ವರದಿ ಹೇಳಿದೆ.
ಸೇಫ್ ಆಗಿ ಲ್ಯಾಂಡ್ ಮಾಡಬಹುದಾಗಿತ್ತು
ಇದಿಷ್ಟೇ ಅಲ್ಲದೆ, ಜಾಕೋಬ್ ಸಹಾಯಕ್ಕಾಗಿ ಏರ್ ಟ್ರಾಫಿಕ್ ಕಂಟ್ರೋಲ್ ಅನ್ನು ಸಂಪರ್ಕಿಸುವ ಪ್ರಯತ್ನವನ್ನು ಮಾಡಿಲ್ಲ. ಅಲ್ಲದೆ, ಇಂಜಿನ್ ಅನ್ನು ಮರು ಆರಂಭಿಸುವ ಪ್ರಯತ್ನವನ್ನು ಜಾಕೋಬ್ ಮಾಡಿಲ್ಲ. ಪ್ರಯತ್ನ ಮಾಡಿದ್ದರೆ ಇಂಜಿನ್ ಫೇಲ್ ಆಗಿದ್ದರೂ ವಿಮಾನವನ್ನು ಸೇಫ್ ಆಗಿ ಲ್ಯಾಂಡ್ ಮಾಡಬಹುದಾಗಿತ್ತು ಎಂದು ಎಫ್ಎಎ ಜಾಕೋಬ್ ವಿರುದ್ಧ ವರದಿ ನೀಡಿದೆ.
ಇದನ್ನೂ ಓದಿ: ಸೊಳ್ಳೆ ಕಡಿತದಿಂದ ಪುತ್ರನ ಸಾವು, ವಿಮೆ ಹಣಕ್ಕಾಗಿ ಹೈಕೋರ್ಟ್ ಮೆಟ್ಟಿಲೇರಿದ ತಾಯಿ: ಆಮೇಲೇನಾಯ್ತು?
ಜಾಕೋಬ್ ಅವರು ಫೆಡರಲ್ ಅವಿಯೇಷನ್ ನಿಯಮಗಳನ್ನು ಉಲ್ಲಂಘಿಸಿದ್ದಾರೆ ಎಂದು ಅವರ ಖಾಸಗಿ ಪೈಲಟ್ ಪ್ರಮಾಣ ಪತ್ರವನ್ನು ರದ್ದು ಮಾಡಿದೆ. ಸಂಸ್ಥೆಯ ಯಾವುದೇ ವಿಮಾನವನ್ನು ನಿರ್ವಹಿಸಲು ಇರುವ ಅನುಮತಿಯನ್ನು ಸಹ ಕೊನೆಗೊಳಿಸಿದೆ. ಆದೇಶವನ್ನು ಅನುಸರಿಸದಿದ್ದರೆ ಮುಂದಿನ ಕಾನೂನು ಜಾರಿ ಕ್ರಮವನ್ನು ಎದುರಿಸಬೇಕಾಗುತ್ತದೆ ಎಂದು ಎಚ್ಚರಿಕೆಯನ್ನು ಈ ಹಿಂದೆಯೇ ನೀಡಲಾಗಿತ್ತು. (ಏಜೆನ್ಸೀಸ್)
ವಿಡಿಯೋಗೋಸ್ಕರ ವಿಮಾನವನ್ನೇ ಪತನ ಮಾಡಿದ ಪೈಲಟ್ಗೆ ಶಾಕ್: ಎದೆ ಝಲ್ ಎನಿಸುವ ದೃಶ್ಯವಿದು!