ಟೆಲ್ ಅವಿವ್: ಪ್ಯಾಲೆಸ್ತೀನ್ನ ಹಮಾಸ್ ವಿರುದ್ಧ ಇಸ್ರೇಲ್ ನಡೆಸುತ್ತಿರುವ ಯುದ್ಧವು ಕೊನೆಯಾದ ಬಳಿಕ ಗಾಜಾದಲ್ಲಿ ಯಾರು ಆಡಳಿತ ನಡೆಸುತ್ತಾರೆ? ಈ ಪ್ರಶ್ನೆಗೆ ಐದು ವಾರಗಳ ಹೋರಾಟದ ನಂತರವೂ ಈವರೆಗೂ ಯಾವುದೇ ಉತ್ತರ ಸಿಗದೆ ಗೊಂದಲದಲ್ಲಿಯೇ ಇದು ಮುಚ್ಚಿಹೋಗಿದೆ.
ಅಂದಹಾಗೆ ಪ್ಯಾಲೆಸ್ತೀನ್ನ ಉಗ್ರ ಸಂಘಟನೆ ಹಮಾಸ್, 2007ರಿಂದಲೂ ಸುಮಾರು 2.4 ಮಿಲಿಯನ್ ಜನರಿರುವ ಗಾಜಾ ಪಟ್ಟಿಯಲ್ಲಿ ಆಡಳಿತ ನಡೆಸುತ್ತಿತ್ತು. ಪ್ಯಾಲೆಸ್ತೀನ್ನ ಆಡಳಿತದೊಂದಿಗೆ ಬೀದಿ ಯುದ್ಧಗಳ ಬಳಿಕ ಹಮಾಸ್ 2007ರಂದು ಗಾಜಾ ಅಧಿಕಾರವನ್ನು ವಶಪಡಿಸಿಕೊಂಡಿತು.
ಅಮೆರಿಕ ವಿದೇಶಾಂಗ ಕಾರ್ಯದರ್ಶಿ ಆಂಟೋನಿ ಬ್ಲಿಂಕೆನ್ ಕಳೆದ ತಿಂಗಳ ಕೊನೆಯಲ್ಲಿ ಹಮಾಸ್ನಿಂದ ಗಾಜಾ ಪಟ್ಟಿಯ ನಿಯಂತ್ರಣವನ್ನು ಪ್ಯಾಲೆಸ್ತೀನ್ ಆಡಳಿತ ಹಿಂಪಡೆಯಬೇಕು ಎಂದು ಹೇಳಿದರು. ಪ್ರಸ್ತುತ ಪ್ಯಾಲೆಸ್ತೀನ್ ಆಡಳಿತವೂ ಇಸ್ರೇಲಿ-ಆಕ್ರಮಿತ ಪಶ್ಚಿಮ ದಂಡೆಯಲ್ಲಿ ಭಾಗಶಃ ಆಡಳಿತಾತ್ಮಕ ನಿಯಂತ್ರಣವನ್ನು ಹೊಂದಿದೆ. ಬ್ಲಿಂಕನ್ ಹೇಳಿದ ಮಾತಿಗೆ ಈ ತಿಂಗಳ ಆರಂಭದಲ್ಲಿ ಅವರೊಂದಿಗೆ ನಡೆದ ಸಭೆಯಲ್ಲಿ ಪ್ಯಾಲೆಸ್ತೀನ್ ಅಧ್ಯಕ್ಷ ಮಹ್ಮದ್ ಅಬ್ಬಾಸ್ ಪ್ರತಿಕ್ರಿಯೆ ನೀಡಿದರು. ಪಶ್ಚಿಮ ದಂಡೆ, ಪೂರ್ವ ಜೆರುಸಲೆಮ್ ಮತ್ತು ಗಾಜಾ ಪಟ್ಟಿ ಒಳಗೊಂಡಂತೆ ದಶಕಗಳಷ್ಟು ಹಳೆಯದಾದ ಇಸ್ರೇಲ್-ಪ್ಯಾಲೆಸ್ತೀನ್ ಸಂಘರ್ಷಕ್ಕೆ “ಸಮಗ್ರ ರಾಜಕೀಯ ಪರಿಹಾರ” ಕಂಡುಬಂದರೆ ಮಾತ್ರ ನಾವು ಗಾಜಾದಲ್ಲಿ ಅಧಿಕಾರವನ್ನು ಪಡೆದುಕೊಳ್ಳಬಹುದು ಎಂದು ಹೇಳಿದರು. ಇದರ ನಡುವೆ ಕಳೆದ ಬುಧವಾರ ಬ್ಲಿಂಕೆನ್ ಮತ್ತೊಮ್ಮೆ ಪ್ಯಾಲೆಸ್ತೀನ್ ಆಡಳಿತಕ್ಕೆ ಪಶ್ಚಿಮ ದಂಡೆಯೊಂದಿಗೆ ಏಕೀಕೃತ ಗಾಜಾ ಕುರಿತು ಮಾತನಾಡಿದರು.
ಇನ್ನು 18 ವರ್ಷಗಳ ಕಾಲ ಪ್ಯಾಲೆಸ್ತೀನ್ ಸರ್ಕಾರದ ನೇತೃತ್ವ ವಹಿಸಿದ 88 ವರ್ಷದ ಅಬ್ಬಾಸ್, ಅಷ್ಟೊಂದು ಪ್ರಬಲ ನಾಯಕರಲ್ಲ. ಇಸ್ರೇಲಿ ವಸಾಹತುಗಳ ತ್ವರಿತ ವಿಸ್ತರಣೆ ಮತ್ತು ಪಶ್ಚಿಮ ದಂಡೆಯಲ್ಲಿ ಮಿಲಿಟರಿ ನಿಯಂತ್ರಣ ಹಾಗೂ ಪೂರ್ವ ಜೆರುಸಲೆಮ್ ಅನ್ನು ಸ್ವಾಧೀನಪಡಿಸಿಕೊಳ್ಳುವ ವಿರುದ್ಧ ಅಬ್ಬಾಸ್ ಅವರು ಶಕ್ತಿಹೀನರಾಗಿದ್ದಾರೆ.
ಗಾಜಾ ಆಕ್ರಮಿಸುವ ಯೋಜನೆ ಇಲ್ಲ
ಗಾಜಾವನ್ನು ತಮ್ಮ ವಶಕ್ಕೆ ಪಡೆಯುವ ಕುರಿತು ಸ್ಪಷ್ಟನೆ ನೀಡಿರುವ ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೇತನ್ಯಾಹು, ಗಾಜಾವನ್ನು ಮತ್ತೆ ಆಕ್ರಮಿಸಿಕೊಳ್ಳುವ ಯಾವುದೇ ಪ್ಲ್ಯಾನ್ ಅನ್ನು ನಾವು ಮಾಡಿಲ್ಲ. ಗಾಜಾದಲ್ಲಿ ಆಡಳಿತ ನಡೆಸುವ ಆಲೋಚನೆ ಸಹ ಇಲ್ಲ. ಆಕ್ರಮಿಸಿಕೊಳ್ಳಲು ನೋಡದೆ, ಅದಕ್ಕೆ ಉತ್ತಮ ಭವಿಷ್ಯವನ್ನು ನೀಡಲು ಪ್ರಯತ್ನಿಸುತ್ತೇವೆ ಎಂದಿದ್ದಾರೆ.
ಅಂದಹಾಗೆ ಇಸ್ರೇಲ್ 1967ರಲ್ಲಿ ಗಾಜಾವನ್ನು ತನ್ನ ವಶಕ್ಕೆ ಪಡೆದುಕೊಂಡಿತ್ತು. 2005 ರಲ್ಲಿ ಗಾಜಾವನ್ನು ಪ್ಯಾಲೆಸ್ತೀನ್ ವಶಕ್ಕೆ ಬಿಟ್ಟುಕೊಟ್ಟಿತು. ಗಾಜಾದ ಭವಿಷ್ಯದ ಬಗ್ಗೆ ಮಾತನಾಡಿರುವ ನೇತನ್ಯಾಹು, ಬಡ ಮತ್ತು ದಿಗ್ಬಂಧನ ಪ್ರದೇಶವನ್ನು ಸೈನ್ಯರಹಿತಗೊಳಿಸಬೇಕು, ಮತ್ತು ಮರುನಿರ್ಮಾಣ ಮಾಡಬೇಕು ಎಂದು ಹೇಳಿದ್ದಾರೆ.
ಅಕ್ಟೋಬರ್ 7ರಂದು ಇಸ್ರೇಲ್ ಮೇಲೆ ಹಮಾಸ್ 5 ಸಾವಿರ ರಾಕೆಟ್ಗಳಿಂದ ದಿಢೀರ್ ದಾಳಿ ನಡೆಸಿದ್ದಕ್ಕೆ ಪ್ರತಿಯಾಗಿ ಇಸ್ರೇಲ್ ಹಮಾಸ್ ವಿರುದ್ಧ ನಿರಂತರವಾಗಿ ದಾಳಿ ಮಾಡುತ್ತಿದೆ. ಹಮಾಸ್ ಮತ್ತು ಇಸ್ರೇಲ್ ನಡುವಿನ ಯುದ್ಧ ಒಂದು ತಿಂಗಳು ಕಳೆದಿದೆ. ಈವರೆಗೂ ಯುದ್ಧದಲ್ಲಿ 11 ಸಾವಿರಕ್ಕೂ ಅಧಿಕ ಜನರು ಸಾವನ್ನಪ್ಪಿದ್ದಾರೆ. (ಏಜೆನ್ಸೀಸ್)
ಹೀನಾಯ ಸೋಲಿನೊಂದಿಗೆ ವಿಶ್ವಕಪ್ನಿಂದ ಹೊರಬಿದ್ದ ಪಾಕ್: ಗೆಲುವಿನೊಂದಿಗೆ ಆಂಗ್ಲರ ಪ್ರವಾಸ ಅಂತ್ಯ
2019ರ ಸೋಲಿನ ಮುಖಭಂಗ! ಕಿವೀಸ್ ವಿರುದ್ಧ ಸೇಡು ತೀರಿಸಿಕೊಳ್ಳಲು ಭಾರತಕ್ಕೆ ಸುವರ್ಣಾವಕಾಶ