ನವದೆಹಲಿ: ಜಗತ್ತನ್ನು ಅತಿಕ್ರಮಿಸಿರುವ ಕರೊನಾ ವೈರಸ್ ಅಮೆರಿಕದಲ್ಲಿ ತುಂಬ ಹೆಚ್ಚಾಗಿ ಬಾಧಿಸಿದೆ. ಯುಎಸ್ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರಂತೂ ಕೊವಿಡ್-19 ವಿಚಾರವಾಗಿ ಚೀನಾ ವಿರುದ್ಧ ಮೊದಲಿನಿಂದಲೂ ಕಿಡಿಕಾರುತ್ತಲೇ ಇದ್ದಾರೆ.
ಪ್ರಾರಂಭದಲ್ಲಿ ಇದನ್ನು ವುಹಾನ್ ವೈರಸ್ ಎಂದೇ ಟ್ರಂಪ್ ಕರೆಯುತ್ತಿದ್ದರು. ಬಳಿಕ ವುಹಾನ್ ವೈರಸ್ ಎಂದು ಕರೆಯದಂತೆ ಚೀನಾ ಜಗತ್ತಿಗೇ ಮನವಿ ಮಾಡಿತ್ತು. ಅದಾದ ಮೇಲೆ ಟ್ರಂಪ್ ಕೂಡ ವುಹಾನ್ ವೈರಸ್ ಎಂದು ಉಲ್ಲೇಖಿಸುವುದನ್ನ ನಿಲ್ಲಿಸಿದ್ದರು.
ಆದರೆ ಇದೀಗ ಮತ್ತೊಮ್ಮೆ ಡೊನಾಲ್ಡ್ ಟ್ರಂಪ್ ಅವರು ಚೀನಾ ವಿರುದ್ಧ ಆಕ್ರೋಶ ಭರಿತ ಮಾತುಗಳನ್ನಾಡುತ್ತಿದ್ದಾರೆ. ಇಂದು ವೈಟ್ ಹೌಸ್ನಲ್ಲಿ ಮಾತನಾಡಿದ ಟ್ರಂಪ್, ಕೊವಿಡ್-19ನ್ನು ಚೀನಾದಿಂದ ಬಂದ ಪ್ಲೇಗ್ ಎಂದು ಹೇಳಿದ್ದಾರೆ. ಅಷ್ಟೇ ಅಲ್ಲ, ಅದು ಇಷ್ಟು ದೊಡ್ಡ ಮಟ್ಟರದಲ್ಲಿ ಹರಡಲು ಅವಕಾಶ ಮಾಡಿಕೊಟ್ಟಿದ್ದೇ ಬೀಜಿಂಗ್ ಎಂದಿದ್ದಾರೆ. ಇದನ್ನೂ ಓದಿ:ಸಿಡಿಲು ಬಡಿತಕ್ಕೆ ಇಂದು ಒಂದೇ ದಿನ 22 ಮಂದಿ ಸಾವು; ಮೃತರ ಕುಟುಂಬಕ್ಕೆ 4 ಲಕ್ಷ ರೂ.ಪರಿಹಾರ
ಭಾರತ ಸೇರಿ ಹಲವು ರಾಷ್ಟ್ರಗೊಳೊಂದಿಗೆ ಚೀನಾ ಗಡಿ, ಭೂಪ್ರದೇಶಕ್ಕೆ ಸಂಬಂಧಪಟ್ಟ ಸಂಘರ್ಷವನ್ನು ಹೊಂದಿದೆ. ಆಕ್ರಮಣಕಾರಿ ಮನೋಭಾವ ತೋರಿಸುತ್ತಿದೆ. ಇದು ಕಮ್ಯುನಿಸ್ಟ್ ಪಕ್ಷದ ನಿಜ ಸ್ವಭಾವ ಎಂಬುದು ಸ್ಪಷ್ಟವಾಗುತ್ತದೆ ಎಂದು ಈ ಹಿಂದೆ ಟ್ರಂಪ್ ಚೀನಾ ವಿರುದ್ಧ ಮಾತನಾಡಿದ್ದರು.
ಅಲ್ಲದೆ, ಮಂಗಳವಾರ ಟ್ವೀಟ್ ಮಾಡಿ, ಕರೊನಾ ಇಷ್ಟೊಂದು ದೊಡ್ಡ ಪ್ರಮಾಣದಲ್ಲಿ ಹರಡುತ್ತಿರುವ ಬೆನ್ನಲ್ಲೇ, ಚೀನಾದ ಮೇಲಿನ ಸಿಟ್ಟು ಕೂಡ ಹೆಚ್ಚುತ್ತಿದೆ ಎಂದಿದ್ದರು. (ಏಜೆನ್ಸೀಸ್)