ಬೆಂಗಳೂರು: ನಾಳೆ ಬೆಳ್ಳಂಬೆಳಗ್ಗೆ ಊರ್ವಶಿ ಬಳಿ ಹುಲಿಹಿಂಡು ಕಾಣಿಸಿಕೊಳ್ಳಲಿವೆ. ಅರ್ಥಾತ್, ಗಾಂಧಿನಗರದ ಊರ್ವಶಿ ಥಿಯೇಟರ್ ಬಳಿ ಟೈಗರ್ ಡಾನ್ಸ್ ನೋಡುವ ಸೌಭಾಗ್ಯ ಸಿನಿಪ್ರಿಯರದ್ದಾಗಿರಲಿದೆ. ಹೌದು.. ಸಾಮಾನ್ಯವಾಗಿ ಹುಲಿಕುಣಿತ ಎಂದರೆ ಕರಾವಳಿಯಲ್ಲಿ, ಅದೂ ನವರಾತ್ರಿ ಸಂದರ್ಭದಲ್ಲಷ್ಟೇ ಹೆಚ್ಚಾಗಿ ಕಾಣಿಸಿಕೊಳ್ಳುವಂಥದ್ದು. ಅದನ್ನೀಗ ಬೆಂಗಳೂರಿನಲ್ಲೂ ನೋಡುವ ಅವಕಾಶ ಕಲಾಪ್ರಿಯರದ್ದಾಗಲಿದೆ.
ಅಷ್ಟಕ್ಕೂ ಊರ್ವಶಿ ಬಳಿ ‘ಹುಲಿ’ ಕಾಣಿಸಿಕೊಳ್ಳಲು ಕಾರಣ, ಗರುಡ ಮತ್ತು ವೃಷಭ. ಅಂದರೆ ರಾಜ್ ಬಿ ಶೆಟ್ಟಿ ನಿರ್ದೇಶನ ಹಾಗೂ ಅವರು ಮತ್ತು ರಿಷಬ್ ಶೆಟ್ಟಿ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿರುವ ‘ಗರುಡ ಗಮನ, ವೃಷಭ ವಾಹನ’ ಸಿನಿಮಾದ ಬಿಡುಗಡೆಯ ವಿಶೇಷ ಆಕರ್ಷಣೆಯಾಗಿ ಚಿತ್ರತಂಡ ಈ ವ್ಯವಸ್ಥೆ ಮಾಡಿದೆ. ಸಿನಿಮಾ ಶೀರ್ಷಿಕೆಯಲ್ಲಿ ಪ್ರಾಣಿಗಳ ಮೊರೆ ಹೋಗಿರುವ ಚಿತ್ರತಂಡ, ಇದೀಗ ಸಿನಿಮಾ ಬಿಡುಗಡೆಯಲ್ಲಿ ಹುಲಿಗಳ ಮೊರೆ ಹೋದಂತಾಗಿದೆ.
ಇದನ್ನೂ ಓದಿ: ಗರುಡ ಗಮನ, ವೃಷಭ ವಾಹನ: ಹರಿ ಇದ್ದಾನೆ, ಶಿವ ಇದ್ದಾನೆ, ‘ಅವಳಿಲ್ಲ’..!
ಈ ಹಿಂದೆ ರಕ್ಷಿತ್ ಶೆಟ್ಟಿ ನಿರ್ದೇಶನದ ‘ಉಳಿದವರು ಕಂಡಂತೆ’ ಸಿನಿಮಾ ಹಾಡೊಂದರಲ್ಲಿ ಹುಲಿ ಕುಣಿತವಿತ್ತು. ಈಗ ರಕ್ಷಿತ್ ಶೆಟ್ಟಿ ಅವರ ‘ಪರಮ್ವಾ ಪಿಕ್ಚರ್ಸ್’ ಮೂಲಕ ನಿರ್ಮಾಣಗೊಂಡಿರುವ ಈ ಸಿನಿಮಾದ ಬಿಡುಗಡೆಯಲ್ಲಿ ರಿಯಲ್ ಆಗಿ ಹುಲಿ ಕುಣಿತ ಇರಲಿದೆ. ನಾಳೆ ಅಂದರೆ ನ. 19ರಂದು ‘ಗರುಡ ಗಮನ, ವೃಷಭ ವಾಹನ’ದ ಮೊದಲ ದಿನದ ಮೊದಲ ಪ್ರದರ್ಶನಕ್ಕೂ ಮುನ್ನ ಪರಿಣತ ಹುಲಿವೇಷ ತಂಡದಿಂದ ಟೈಗರ್ ಡಾನ್ಸ್ ಇರಲಿದ್ದು, ಆ ಮೂಲಕ ಬಿಡುಗಡೆಗೆ ವಿಶೇಷ ಸೆಳೆತ ಕಲ್ಪಿಸುವ ಯೋಜನೆಯನ್ನು ಸಿನಿಮಾತಂಡ ಹಾಕಿಕೊಂಡಿದೆ.
ಬೆಡ್ ಕೇಳಿದ ನಟಿಗೆ ಸಿಕ್ಕಿದ್ದು ಅರ್ಧಮಂಚ; ಒಂದು ಕೊಟ್ಟು ಇನ್ನೊಂದು ಕೊಟ್ಟಿಲ್ಲ ಎಂದು ಬೇಸರ..