ಸ್ತ್ರೀಯರಿಗೆ ಸಂಬಂಧಿಸಿದ ಮುಟ್ಟಿನ ದೋಷ ಮತ್ತು ಮೆನೋಪಾಸ್ ಸಮಸ್ಯೆಗಳ ನಿಯಂತ್ರಣಕ್ಕೆ ಉಪಯುಕ್ತವಾದ ಯೋಗಾಸನವೆಂದರೆ ಪರಿವೃತ್ತ ಜಾನುಶೀರ್ಷಾಸನ. ಲಿವರ್ ಮತ್ತು ಕಿಡ್ನಿಯ ಆರೋಗ್ಯಕ್ಕೆ ಉತ್ತಮವಾದ ಈ ಆಸನವು ಕುಳಿತುಕೊಂಡು ಪಾರ್ಶ್ವಕ್ಕೆ ಬಾಗುವ ಭಂಗಿಯಾಗಿದೆ.
ಪ್ರಯೋಜನಗಳು: ಲಿವರ್ ಮತ್ತು ಕಿಡ್ನಿಯ ಆರೋಗ್ಯ ಉತ್ತಮಗೊಳ್ಳುತ್ತದೆ. ಮೂತ್ರಕೋಶ ಸುಸ್ಥಿತಿಯಲ್ಲಿರುತ್ತದೆ. ವಿಶೇಷವಾಗಿ, ಕಶೇರುಕಗಳ ಭಾಗ, ಭುಜಗಳ, ಮಂಡಿಗಚ್ಚು ಮತ್ತು ತೊಡೆಗಳ ಭಾಗಗಳು ಎಳೆತಕ್ಕೊಳಗಾಗಿ ಸ್ನಾಯುಗಳು ಬಲಗೊಳ್ಳುತ್ತವೆ. ತೊಡೆಯ ಕೀಲುಗಳು ಬಲಗೊಳ್ಳುತ್ತವೆ. ಮಹಿಳೆಯರ ಮೆನೋಪಾಸ್ ಸಮಯದ ಸಮಸ್ಯೆಗಳ ನಿಯಂತ್ರಣಕ್ಕೆ ಈ ಯೋಗಾಸನದ ಅಭ್ಯಾಸ ಸಹಕಾರಿಯಾಗಿದೆ.
ಇದನ್ನೂ ಓದಿ: ಚೌತಿ ನೆಪ ಮಾತ್ರ.. ಇವರು ಖರ್ಗೆಯನ್ನು ಭೇಟಿ ಮಾಡಲಿಕ್ಕೆಂದು ಬಂದ ವಿಷಯವೇ ಬೇರೆ..!
ಅಭ್ಯಾಸಕ್ರಮ: ಜಮಖಾನದ ಮೇಲೆ ಕಾಲು ಚಾಚಿ ಕುಳಿತುಕೊಳ್ಳಬೇಕು. ಕಾಲುಗಳನ್ನು ಜೋಡಿಸಿ, ನಂತರ ಬಲಗಾಲನ್ನು ಮಡಿಸಿಕೊಂಡು ಎಡತೊಡೆಯ ಮೂಲಕ್ಕೆ ಸೇರಿಸಬೇಕು. ಮುಂದಕ್ಕೆ ಬಾಗಿಕೊಂಡು ಎಡಗೈನಿಂದ ಎಡಗಾಲಿನ ಹೆಬ್ಬೆಟ್ಟನ್ನು ಹಿಡಿದುಕೊಳ್ಳಬೇಕು. ನಿಧಾನವಾಗಿ ಪಾರ್ಶ್ವಕ್ಕೆ ಬಾಗಿ ಬಲಗೈಯನ್ನು ಮೇಲಿನಿಂದ ತಂದು ಎಡಗಾಲಿನ ಹೆಬ್ಬೆರಳನ್ನೇ ಹಿಡಿದುಕೊಳ್ಳಬೇಕು. ಈ ಸ್ಥಿತಿಯಲ್ಲಿ ಸಹಜ ಉಸಿರಾಟ ನಡೆಸಬೇಕು. ನಂತರ ಉಸಿರನ್ನು ತೆಗೆದುಕೊಳ್ಳುತ್ತಾ ನಿಧಾನವಾಗಿ ಮೇಲೆ ಬರಬೇಕು. ಈಗ ಎಡಗಾಲನ್ನು ಮಡಿಸಿಕೊಂಡು ಮತ್ತೊಂದು ಪಾರ್ಶ್ವಕ್ಕೆ ಇದೇ ರೀತಿಯಾಗಿ ಅಭ್ಯಾಸ ಮಾಡಬೇಕು.
ಆರಂಭದಲ್ಲಿ ಕೆಲವು ಸರಳ ಆಸನಗಳನ್ನು ಮಾಡಿಕೊಂಡು ನಂತರ ಈ ಆಸನ ಮಾಡಿದರೆ ಒಳ್ಳೆಯದು. ತೀರಾ ಸೊಂಟ ನೋವು ಇರುವವರು ಮಾಡಬಾರದು.
ಗಣಪ ಮೂರ್ತಿ ಎತ್ತರ: ಸರ್ಕಾರಿ ಆದೇಶಕ್ಕೆ ಸೆಡ್ಡು ಹೊಡೆದ ವಿಶ್ವ ಹಿಂದೂ ಪರಿಷತ್!