ಮನಸ್ಸಿನ ಮೇಲೆ ನಿಯಂತ್ರಣ ಸಾಧಿಸಲು ಸಹಕಾರಿಯಾದ ಯೋಗಾಸನವೆಂದರೆ ‘ಅಷ್ಟವಕ್ರಾಸನ’. ಅಷ್ಟವಕ್ರ ಮುನಿಯ ಹೆಸರನ್ನು ಈ ಯೋಗಾಸನಕ್ಕೆ ಇಡಲಾಗಿದೆ. ಈ ಆಸನವನ್ನು ಮಾಡಲು, ಸೊಂಟ ಮತ್ತು ಕೈಕಾಲುಗಳ ಬಲದ ಅವಶ್ಯಕತೆ ಇರುತ್ತದೆ. ಆರಂಭದಲ್ಲಿ ಸರಳ ಆಸನಗಳನ್ನು ಕಲಿತು ಮಾಡಿ, ನಂತರ ಅಷ್ಟವಕ್ರಾಸನವನ್ನು ಕಲಿಯಬಹುದು.
ಪ್ರಯೋಜನಗಳು: ದೇಹದ ನರಗಳ ಮೇಲೆ ಹಾಗೂ ಮನಸ್ಸಿನ ಮೇಲೆ ನಿಯಂತ್ರಣ ಸಾಧಿಸಲು ಈ ಆಸನ ಸಹಕಾರಿ. ವಿಶೇಷವಾಗಿ, ತೋಳುಗಳ, ಭುಜಗಳ, ಕಾಲುಗಳ ಮತ್ತು ಉದರದ ಸ್ನಾಯುಗಳು ಬಲಗೊಳ್ಳುತ್ತವೆ. ಬೆನ್ನುಮೂಳೆ ಬಲಗೊಳ್ಳುತ್ತದೆ. ದೇಹಕ್ಕೆ ಸಮತೋಲನ ಉಂಟಾಗುವಲ್ಲಿಯೂ ಇದರ ಅಭ್ಯಾಸ ಸಹಕಾರಿ.
ಇದನ್ನೂ ಓದಿ: ಶರಾವತಿ ಸಂತ್ರಸ್ತರ ಜಮೀನಿಗೆ ಹಕ್ಕುಪತ್ರಕ್ಕೆ ಪ್ರತಿಭಟನೆ
ಅಭ್ಯಾಸ ಕ್ರಮ: ಜಮಖಾನದ ಮೇಲೆ ಕುಳಿತುಕೊಳ್ಳುವುದು. ಮೊದಲಿಗೆ ಎಡಗಾಲನ್ನು ಎಡಗೈ ಮೇಲಿನಿಂದ ತಂದು ಮಡಿಸುವುದು. ಕೈಗಳನ್ನು ಊರಿ ನಿಧಾನವಾಗಿ ಎರಡೂ ಕಾಲುಗಳನ್ನು ಪಕ್ಕಕ್ಕೆ ಚಾಚುವುದು. ಒಂದು ಕೈ ಕಾಲುಗಳ ಮಧ್ಯೆ ಇರಬೇಕು ಮತ್ತು ಅಂಗಾಲುಗಳನ್ನು ಪರಸ್ಪರ ಹೆಣೆಯಬೇಕು. ದೇಹವನ್ನು ಮುಂದಕ್ಕೆ ಬಾಗಿಸಿ ಸಮತೋಲನ ಸಾಧಿಸುವುದು. ಈ ಸ್ಥಿತಿಯಲ್ಲಿ ಸಹಜ ಉಸಿರಾಟ ನಡೆಸಬೇಕು. ನಂತರ ಉಸಿರನ್ನು ಬಿಡುತ್ತಾ ಕಾಲುಗಳನ್ನು ವಾಪಸ್ ತಂದು ನೆಲದ ಮೇಲೆ ವಿಶ್ರಮಿಸಬೇಕು.
ಇದೊಂದು ಕ್ಲಿಷ್ಟಕರ ಭಂಗಿಯಾಗಿದ್ದು, ಗುರುಮುಖೇನ ಹೆಚ್ಚಿನ ಸಲಹೆಗಳನ್ನು ಪಡೆದು ಅಭ್ಯಾಸ ಮಾಡುವುದು ಒಳ್ಳೆಯದು. ಆರಂಭದಲ್ಲಿ ಕಷ್ಟವೆನಿಸಿದರೂ, ನಿಯಮಿತ ಅಭ್ಯಾಸದಿಂದ ಕರಗತ ಮಾಡಿಕೊಳ್ಳಬಹುದು. ಮಣಿಕಟ್ಟು ನೋವು, ತೋಳಿನ ಗಾಯ, ಸೊಂಟ ಅಥವಾ ಕಾಲಿನ ನೋವು ಇರುವವರು ಈ ಆಸನ ಮಾಡಬಾರದು.
‘ಗಂಡಸಿನಂಥ ದೇಹದವಳು ತಾಪ್ಸೀನೇ’ ಎಂದ ಟ್ವೀಟ್ಗೆ ನಟಿ ನೀಡಿದ ಉತ್ತರ ನೋಡಿ!