ಮುಂಬೈ: ಕಳೆದ ವರ್ಷ ಕರೊನಾದ ಮೊದಲ ಅಲೆ ಉತ್ತುಂಗದಲ್ಲಿ ಇರುವ ಸಂದರ್ಭದಲ್ಲಿ ಬಾಲಿವುಡ್ ನಟ ಸುಶಾಂತ್ ಸಿಂಗ್ ರಜಪೂತ್ ಆತ್ಮಹತ್ಯೆ ಮಾಡಿಕೊಂಡು ನಿಧನರಾದರು. ಮುಂಬೈನ ತಮ್ಮ ಮನೆಯಲ್ಲಿ ಫ್ಯಾನ್ಗೆ ನೇಣು ಹಾಕಿಕೊಂಡು ಸುಶಾಂತ್ ಇನ್ನಿಲ್ಲವಾಗಿ ಒಂದು ವರ್ಷವೇ ಆಗಿದೆ. ಈಗ ಅವರ ಮನೆಯು ಬಾಡಿಗೆಗಿದ್ದು, ಅದರ ಬಗ್ಗೆ ಸಿಕ್ಕಾಪಟ್ಟೆ ಚರ್ಚೆಯಾಗುತ್ತಿದೆ.
ಇದನ್ನೂ ಓದಿ: ಸೋಷಿಯಲ್ ಮೀಡಿಯಾದಲ್ಲೇ ಕಂಬನಿ ಮಿಡಿದ ಸ್ಟಾರ್ ನಟರು …
ಸುಶಾಂತ್ ಸಿಂಗ್ ನಿಧನರಾದಾಗಿನಿಂದ ಇಲ್ಲಿಯವರೆಗೂ ಮುಂಬೈನ ಬಾಂದ್ರಾದಲ್ಲಿರುವ ಅವರ ಫ್ಲಾಟ್ ಖಾಲಿಯಾಗಿಯೇ ಇದೆ. ಸುಶಾಂತ್ ಈ ಮನೆಯನ್ನು 2019ರ ಕೊನೆಗೆ ಬಾಡಿಗೆಗೆ ಪಡೆದಿದ್ದರು. ಮೂರು ವರ್ಷಗಳ ಕಾಲ ಅಗ್ರೀಮೆಂಟ್ ಇದ್ದು, 2022ಕ್ಕೆ ಮನೆ ಖಾಲಿ ಮಾಡಬೇಕಿತ್ತು ಅಥವಾ ಅಗ್ರೀಮೆಂಟ್ ನವೀಕರಿಸಬೇಕಿತ್ತು. ಈ ಮನೆಗೆ, ಪ್ರತಿ ತಿಂಗಳು ನಾಲ್ಕೂವರೆ ಲಕ್ಷ ರೂಪಾಯಿ ಬಾಡಿಗೆ ಕಟ್ಟುತ್ತಿದ್ದರಂತೆ ಸುಶಾಂತ್. ಅವರು ಕೊನೆಯುಸಿರೆಳೆದ ನಂತರ ಮನೆ ಖಾಲಿಯಾಗಿದ್ದು, ಆ ಮನೆಯನ್ನು ಬೇರೆಯವರಿಗೆ ಬಾಡಿಗೆ ಕೊಡುವ ಪ್ರಯತ್ನ ನಡೆಯುತ್ತಿದೆ.
ಬಾಂದ್ರಾದ ಮಾಂಟ್ ಬ್ಲಾಂಕ್ ಬಿಲ್ಡಿಂಗ್ನಲ್ಲಿರುವ 3600 ಚದರಡಿ ಇರುವ ಈ ಡ್ಯುಪ್ಲೆ ಮನೆ ಆರನೇ ಮಹಡಿಯಲ್ಲಿದೆ. ಈ ಮನೆಗೆ ಮೂರು ಕಾರ್ ಪಾರ್ಕಿಂಗ್ ಸಹ ನೀಡಲಾಗಿದೆ. ಈ ಮನೆಗೆ ಸುಶಾಂತ್ ಸಿಂಗ್ ಪ್ರತಿ ತಿಂಗಳು ನಾಲ್ಕೂವರೆ ಲಕ್ಷ ರೂ.ಗಳನ್ನು ಬಾಡಿಗೆ ಕೊಡುತ್ತಿದ್ದರು. ಮುಂದಿನ ವರ್ಷಕ್ಕೆ ಆ ಬಾಡಿಗೆ ಇನ್ನಷ್ಟು ಹೆಚ್ಚುತ್ತಿತ್ತು. ಆದರೆ, ಕಳೆದ ಒಂದು ವರ್ಷದಿಂದ ಮನೆ ಖಾಲಿ ಇರುವುದರಿಂದ ಮತ್ತು ಕರೊನಾದಿಂದ ರಿಯಲ್ ಎಸ್ಟೇಟ್ ವ್ಯವಹಾರದಲ್ಲಿ ಇಳಿಮುಖವಾಗಿರುವುದರಿಂದ, ಬಾಡಿಗೆ ಸಹ ಕಡಿಮೆ ಆಗಿದೆ.
ಇದನ್ನೂ ಓದಿ: ಸಂಚಾರಿ ವಿಜಯ್ ಅಭಿನಯದ ‘ತಲೆದಂಡ’ ಚಿತ್ರದ ಟ್ರೇಲರ್ ಬಿಡುಗಡೆ
ಈಗ ಈ ಮನೆಯ ಬಾಡಿಗೆ ನಾಲ್ಕು ಲಕ್ಷ ರೂ.ಗಳಾಗಿದ್ದು, ಕಳೆದ ಕೆಲವು ತಿಂಗಳುಗಳಿಂದ ಸೂಕ್ತ ಬಾಡಿಗೆದಾರರಿಗೆ ಹುಡುಕಾಟ ನಡೆಸಲಾಗುತ್ತಿದೆ. ಆದರೆ, ಇದುವರೆಗೂ ಸುಶಾಂತ್ ಇದ್ದ ಮನೆಗೆ ಬಾಡಿಗೆದಾರರು ಬಂದಿಲ್ಲ. ಬಾಲಿವುಡ್ನ ಕೆಲವು ನಟ-ನಟಿಯರಿಗೆ ಈ ಮನೆ ತೋರಿಸಲಾಗಿದೆಯಾದರೂ, ಮನೆಗೆ ಬರುವುದಕ್ಕೆ ಇದುವರೆಗೂ ಯಾರೂ ಆಸಕ್ತಿ ತೋರಿಸಿಲ್ಲವಂತೆ.
ಜನ ನಾವು ಹೇಗಿದ್ರೂ ಮಾತನಾಡ್ತಾರೆ; ಬಾಡಿ ಶೇಮಿಂಗ್ ಬಗ್ಗೆ ಪ್ರಿಯಾಮಣಿ ಹೇಳಿದ್ದಿಷ್ಟು!