ಬೆಂಗಳೂರು: ಭಾರತೀಯ ಕ್ರಿಕೆಟ್ ಲೋಕದ ಮೊದಲ ಬ್ಯಾಟಿಂಗ್ ಸೂಪರ್ಸ್ಟಾರ್ ಸುನೀಲ್ ಗಾವಸ್ಕರ್ ಅವರಿಗೆ ಶುಕ್ರವಾರ 71ನೇ ಜನ್ಮದಿನದ ಸಂಭ್ರಮ. ಸಚಿನ್ ತೆಂಡುಲ್ಕರ್, ವಿರಾಟ್ ಕೊಹ್ಲಿಗೆ ಮುನ್ನ ಜಾಗತಿಕ ಕ್ರೀಡಾಲೋಕದಲ್ಲಿ ಭಾರತದ ಬ್ಯಾಟಿಂಗ್ನ ಶಕ್ತಿಯನ್ನು ಪರಿಚಯಿಸಿದ್ದ ಗಾವಸ್ಕರ್, ಸನ್ನಿ ಮತ್ತು ಲಿಟ್ಟಲ್ ಮಾಸ್ಟರ್ ಆಗಿ ಖ್ಯಾತಿ ಪಡೆದಿದ್ದರು. ವೀಕ್ಷಕವಿವರಣೆಯ ಮೂಲಕ ವಿಶ್ಲೇಷಕರಾಗಿ ಈಗಲೂ ಕ್ರಿಕೆಟ್ನಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿದ್ದಾರೆ.
1949ರ ಜುಲೈ 10ರಂದು ಜನಿಸಿದ ಸುನೀಲ್ ಗಾವಸ್ಕರ್, 1971ರಿಂದ 1987ರ ನಡುವೆ ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಹಲವು ದಾಖಲೆಗಳನ್ನು ನಿರ್ಮಿಸಿದ್ದರು. ಟೆಸ್ಟ್ ಕ್ರಿಕೆಟ್ ಇತಿಹಾಸದಲ್ಲಿ 10 ಸಾವಿರ ರನ್ ದಾಟಿದ ಮೊದಲ ಬ್ಯಾಟ್ಸ್ಮನ್ ಎಂಬ ಹೆಗ್ಗಳಿಕೆ ಅವರದು. ಅವರ 34 ಟೆಸ್ಟ್ ಶತಕಗಳು ಈ ಹಿಂದೆ ವಿಶ್ವದಾಖಲೆಯಾಗಿತ್ತು. ಒಟ್ಟಾರೆ 125 ಟೆಸ್ಟ್ ಪಂದ್ಯಗಳಲ್ಲಿ 10,122 ರನ್ ಬಾರಿಸಿದ್ದಾರೆ. 108 ಏಕದಿನ ಪಂದ್ಯಗಳನ್ನು ಆಡಿ ಏಕೈಕ ಶತಕದ ಸಹಿತ 3,092 ರನ್ ಗಳಿಸಿದ್ದಾರೆ. ಟೆಸ್ಟ್, ಏಕದಿನದಲ್ಲಿ ತಲಾ ಒಂದೊಂದು ವಿಕೆಟ್ ಕೂಡ ಗಳಿಸಿದ್ದಾರೆ. 1983ರಲ್ಲಿ ಏಕದಿನ ವಿಶ್ವಕಪ್ ಜಯಿಸಿ ಭಾರತೀಯ ಕ್ರಿಕೆಟ್ನ ಚಹರೆಯನ್ನೇ ಬದಲಿಸಿದ ಕಪಿಲ್ ದೇವ್ ಬಳಗದಲ್ಲಿ ಸುನೀಲ್ ಗಾವಸ್ಕರ್ ಕೂಡ ಆಟಗಾರರಾಗಿದ್ದರು.
ಇದನ್ನೂ ಓದಿ: ಅಭಿಮಾನಿಗೆ ಸಹಾಯಹಸ್ತ ಚಾಚಿದ ಟೆನಿಸ್ ತಾರೆ ಬೌಚಾರ್ಡ್!
ಟೆಸ್ಟ್ ಪಂದ್ಯದ ಎರಡೂ ಇನಿಂಗ್ಸ್ಗಳಲ್ಲಿ ಶತಕ ಸಿಡಿಸಿದ ಸಾಧನೆಯನ್ನು 3 ಬಾರಿ ಮಾಡಿದ ಏಕೈಕ ಬ್ಯಾಟ್ಸ್ಮನ್ ಎಂಬ ಹೆಗ್ಗಳಿಕೆ ಈಗಲೂ ಗಾವಸ್ಕರ್ ಹೆಸರಿನಲ್ಲಿದೆ. ವೇಗದ ಬೌಲಿಂಗ್ ವಿರುದ್ಧ, ಅದರಲ್ಲೂ ವೆಸ್ಟ್ ಇಂಡೀಸ್ನ ಅಪಾಯಕಾರಿ ವೇಗಿಗಳ ವಿರುದ್ಧದ ಪ್ರದರ್ಶಿಸಿದ ಅಮೋಘ ಬ್ಯಾಟಿಂಗ್ ತಂತ್ರಗಾರಿಕೆಗಾಗಿ ಗಾವಸ್ಕರ್ ಟೆಸ್ಟ್ ಕ್ರಿಕೆಟ್ನ ಅತ್ಯುತ್ತಮ ಬ್ಯಾಟ್ಸ್ಮನ್ಗಳಲ್ಲಿ ಒಬ್ಬರಾಗಿ ಗುರುತಿಸಲ್ಪಡುತ್ತಾರೆ. ವಿಂಡೀಸ್ನ ಪ್ರಚಂಡ ವೇಗಿಗಳ ಎದುರು ಅವರು 65.45 ಸರಾಸರಿಯಲ್ಲಿ ರನ್ ಗಳಿಸಿದ್ದರು ಎಂಬುದು ಗಮನಾರ್ಹ. ಭಾರತ ತಂಡದ ನಾಯಕರಾಗಿಯೂ ಕಾರ್ಯನಿರ್ವಹಿಸಿದ್ದರೂ, ಅವರ ಸಾರಥ್ಯದಲ್ಲಿ ಹೆಚ್ಚಿನ ಯಶಸ್ಸು ಲಭಿಸಿಲ್ಲ.
ಪದ್ಮಶ್ರೀ, ಪದ್ಮಭೂಷಣ ಗೌರವಕ್ಕೆ ಪಾತ್ರರಾಗಿರುವ ಗಾವಸ್ಕರ್, ಐಸಿಸಿಯ ಹಾಲ್ ಆಫ್ ಫೇಮ್ಗೂ ಸೇರ್ಪಡೆಗೊಂಡಿದ್ದಾರೆ. ಬಿಸಿಸಿಐನಿಂದ 2012ರಲ್ಲಿ ಜೀವಮಾನ ಸಾಧನೆಗಾಗಿ ಕರ್ನಲ್ ಸಿಕೆ ನಾಯ್ಡು ಪ್ರಶಸ್ತಿಗೆ ಭಾಜನರಾಗಿದ್ದರು.