ಬೆಂಗಳೂರು: ಜೀ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುತ್ತಿರುವ ಜೊತೆ ಜೊತೆಯಲಿ ಧಾರಾವಾಹಿ ಈಗ ಭಾರಿ ಸುದ್ದಿಯಾಗುತ್ತಿದೆ. ಇದರ ನಾಯಕ ನಟ ಆರ್ಯವರ್ಧನ್ ಪಾತ್ರಧಾರಿ ಅನಿರುದ್ಧ್ ಜತ್ಕರ್ ಅವರನ್ನು ಪಾತ್ರದಿಂದ ಕೈಬಿಟ್ಟಿರುವುದು ಮಾತ್ರವಲ್ಲದೇ ಕನ್ನಡ ಕಿರುತೆರೆಯಲ್ಲಿ 2 ವರ್ಷಗಳ ಕಾಲ ಅವರನ್ನು ಯಾವುದೇ ಧಾರಾವಾಹಿ ಅಥವಾ ರಿಯಾಲಿಟಿ ಶೋಗಳಲ್ಲಿ ಬಳಸಿಕೊಳ್ಳದಂತೆ ಕನ್ನಡ ಕಿರುತೆರೆಯ ನಿರ್ಮಾಪಕರ ಸಂಘ ನಿರ್ಧರಿಸಿರುವುದು ಭಾರಿ ವಿವಾದಕ್ಕೆ ಕಾರಣವಾಗಿದೆ.
ಅನಿರುದ್ಧ್ ಅವರ ಜಾಗದಲ್ಲಿ ಬೇರೆ ಯಾರನ್ನೂ ಊಹಿಸಿಕೊಳ್ಳಲು ಸಾಧ್ಯವಿಲ್ಲ ಎಂದು ಅವರ ಅಪಾರ ಸಂಖ್ಯೆಯ ಅಭಿಮಾನಿಗಳು ಅಭಿಯಾನವನ್ನೇ ಶುರು ಮಾಡಿದ್ದರೆ, ಈ ಧಾರಾವಾಹಿಯ ಟಿಆರ್ಪಿ ಕುಸಿಯಲು ಅನಿರುದ್ಧ್ ಅವರೇ ಕಾರಣ ಎಂದಿದ್ದರು ನಿರ್ದೇಶಕ ಆರೂರು ಜಗದೀಶ್. ಅನಿರುದ್ಧ್ ಸದಾ ಕಿರಿಕ್ ಮಾಡುತ್ತಿದ್ದರು, ಆದ್ದರಿಂದ ಟಿಆರ್ಪಿ ಕುಸಿಯಲು ಅವರೇ ನೇರ ಕಾರಣ ಎಂದು ಅವರ ಮೇಲೆ ಮಾಧ್ಯಮಗೋಷ್ಠಿಯಲ್ಲಿ ಆರೋಪಗಳ ಸುರಿಮಳೆಯನ್ನೇ ಗೈದರು.
ಆದರೆ ಇದೇ ಆರೂರು ಜಗದೀಶ್ ಅವರು ಈ ವಿವಾದಕ್ಕೂ ಮುನ್ನ ವ್ಯಕ್ತಿಯೊಬ್ಬರ ಜತೆ ಮಾತನಾಡಿರುವ ಆಡಿಯೋ ‘ದಿಗ್ವಿಜಯ ನ್ಯೂಸ್’ಗೆ ಲಭ್ಯವಾಗಿದೆ. ಅದರಲ್ಲಿ ಅವರು ಅನಿರುದ್ಧ್ ಅವರನ್ನು ಹಾಡಿ ಹೊಗಳಿದ್ದಾರೆ. ಈಗ ಏಕಾಏಕಿ ಯೂಟರ್ನ್ ತೆಗೆದುಕೊಂಡಿರುವುದು ಇನ್ನಷ್ಟು ಗೊಂದಲಕ್ಕೆ ಕಾರಣವಾಗಿದೆ.
ಏನಿದೆ ಆಡಿಯೋದಲ್ಲಿ?
ಆರೂರು ಜಗದೀಶ್ ಅವರೇ ಮಾತನಾಡಿದ್ದಾರೆ ಎನ್ನಲಾದ ಈ ಆಡಿಯೋದಲ್ಲಿ ಅವರು ‘ಅನಿರುದ್ಧ್ ಸರ್ ಯಾವತ್ತಿದ್ದರೂ ಹೀರೋನೇ. ವಿಲನ್ ಆಗಲು ಸಾಧ್ಯವೇ ಇಲ್ಲ. ಟಿ.ಆರ್‌.ಪಿ ಕಮ್ಮಿ ಆಗ್ತಿದೆ ಎನ್ನೋ ಫೀಲ್‌ನ ಬಿಟ್ಟುಬಿಡಿ. ಕಥೆಯನ್ನು ಕಥೆಯಾಗಿ ನೋಡಿ’ ಎಂದಿದ್ದಾರೆ. ಅನಿರುದ್ಧ್ ಅವರನ್ನು ಈ ಧಾರಾವಾಹಿಯ ಕೆಲ ಪಾರ್ಟ್ಗಳಲ್ಲಿ (ಫ್ಲ್ಯಾಶ್ ಬ್ಯಾಕ್‌ ಕಥೆ) ವಿಲನ್ ಆಗಿ ಪರಿವರ್ತನೆ ಮಾಡಿರುವುದನ್ನು ಸಹಿಸದ ಅವರ ಅಭಿಮಾನಿಯೊಬ್ಬರು ಫೋನ್ ಮಾಡಿದಾಗ ಜಗದೀಶ್ ಅವರು ಈ ಸ್ಪಷ್ಟನೆ ಕೊಟ್ಟಿರಬಹುದು ಎನ್ನಲಾಗಿದೆ. ಫ್ಲ್ಯಾಶ್ ಬ್ಯಾಕ್‌ ಕಥೆಯಲ್ಲಿ ಆರ್ಯವರ್ಧನ್ನನ್ನು ಕೊಲೆಗಾರನಂತೆ ಬಿಂಬಿಸಲಾಗಿದೆ. ಅದನ್ನು ಅಭಿಮಾನಿ ಸಹಿಸದೇ ಈ ಕರೆ ಮಾಡಿರಬಹುದು ಎನ್ನಲಾಗುತ್ತಿದೆ.
‘’ಒಂದು ಧಾರಾವಾಹಿಯನ್ನು ಕಥೆಯಾಗಿ ನೋಡಬೇಕು. ಒಂದೇ ಒಂದು ಕ್ಯಾರೆಕ್ಟರ್‌ನಿಂದ ನೋಡಿದರೆ ಹೀಗೆನಿಸುತ್ತದೆ. ನಾವೀಗ ಫ್ಲ್ಯಾಶ್ ಬ್ಯಾಕ್‌ಗೆ ಹೋಗಿಬಿಟ್ಟಿದ್ದೀವಿ. ಆಲ್ರೆಡಿ ಶೂಟಿಂಗ್ ಎಲ್ಲಾ ಮುಗಿದುಬಿಟ್ಟಿದೆ. ಈ ಕಥೆಯಲ್ಲಿ ರಾಜನಂದಿನಿ (ನಾಯಕನ ಮೊದಲ ಪತ್ನಿ) ಎಂಟ್ರಿನೂ ಆಗಿಹೋಗಿದೆ. ಆದ್ದರಿಂದ ಸದ್ಯ ಯಾವುದೇ ಬದಲಾವಣೆ ಮಾಡಲು ಆಗುವುದಿಲ್ಲ. ಹಾಗಾಗಿ, ಕಥೆಯಾಗಿ ನೋಡಿ ಎಂದು ಹೇಳಿರೋ ಆರೂರು ಜಗದೀಶ್ ಅವರು, ಅನಿರುದ್ಧ್ ಸರ್ ಯಾವತ್ತಿದ್ದರೂ ಹೀರೋನೇ. ವಿಲನ್ ಅಲ್ಲ ಎಂದು ಅವರನ್ನು ಹೊಗಳಿದ್ದಾರೆ.
ಈ ಫ್ಲ್ಯಾಶ್ ಬ್ಯಾಕ್‌ನಿಂದ ಬಂದ ಮೇಲೆ ಹೀರೋಯಿಸಂ ಅನ್ನು ನಾವು ಇನ್ನಷ್ಟು ರಿವೀಲ್ ಮಾಡ್ತೀವಿ. ಕಥೆಯಲ್ಲಿ ಹಲವು ಟ್ವಿಸ್ಟ್‌ಗಳಿವೆ. ಈಗ ತಾತ್ಕಾಲಿಕವಾಗಿ ವಿಲನ್ ಎನಿಸುತ್ತಾರೆ ಅಷ್ಟೇ. ಇದ್ದಕ್ಕಿದ್ದಂತೆ ದಿಢೀರ್ ಅಂತ ನಾವು ಬದಲಾಯಿಸೋಕೂ ಆಗಲ್ಲ. ಕ್ಯಾರೆಕ್ಟರ್‌ನಲ್ಲಿ ವಿಭಿನ್ನತೆ ಇರಬೇಕು. ಇಲ್ಲಾಂದ್ರೆ ಯಾರೂ ನೋಡಲ್ಲ. ನಾಯಕ-ನಾಯಕಿಯ ರೊಮಾನ್ಸ್ ಜಾಸ್ತಿ ಆಗೋಯ್ತು. ರಾಜನಂದಿನಿ ಬರಬೇಕು ಅನ್ನೋ ತರಹ ಜನ ಫೀಲ್ ಮಾಡಿದ್ದರು. ಹಾಗಾಗಿ ಕಥೆಯಾಗಿ ನೋಡಿ.. ನಿಮಗೆ ಇಷ್ಟ ಆಗುತ್ತೆ ಖಂಡಿತ’ ಎಂದು ಅದರಲ್ಲಿ ಅವರು ಹೇಳಿದ್ದಾರೆ.
‘ಧಾರಾವಾಹಿಯಲ್ಲಿ ಚಿಕ್ಕ ಕ್ಯಾರೆಕ್ಟರ್ ಮಾಡಿದರೂ ಜನರು ಅವರನ್ನು ಗುರುತಿಸುವಷ್ಟರ ಮಟ್ಟಿಗೆ ಧಾರಾವಾಹಿ ಜನಪ್ರಿಯವಾಗಿದೆ. ಆದ್ದರಿಂದ ಟಿಆರ್ಪಿ ಎಲ್ಲಾ ಬಿಟ್ಟುಬಿಡಿ. ಟಿಆರ್ಪಿ ನೋಡಲು ಒಂದು ಹತ್ತು ಕಡೆ ಮಷಿನ್ ಇಟ್ಟಿರುತ್ತಾರೆ ಅಷ್ಟೇ. ಆದರೆ ಅದೇ ಟಿಆರ್ಪಿ ಆಗಲ್ಲ, ಕರ್ನಾಟಕದ ಆರೇಳು ಕೋಟಿ ಜನ ಧಾರಾವಾಹಿ ನೋಡುತ್ತಾರೆ ಎನ್ನುವುದು ನೆನಪಿರಲಿ, ಆರ್ಯವರ್ಧನ್ (ನಾಯಕ) ಎಂದಿಗೂ ಇದರಲ್ಲಿ ಹೀರೋನೇ ಎಂದಿದ್ದಾರೆ. (ದಿಗ್ವಿಜಯ ನ್ಯೂಸ್)
ಅಡಿಯೋ ಇಲ್ಲಿದೆ ಕೇಳಿ:
ಹೆಣ್ಣುಮಕ್ಕಳಿಗೆ ವಯಸ್ಸು ಕೇಳೋ ಮುನ್ನ ಎಚ್ಚರ! ಡೊಮಿನೋಸ್ ಪಿಜ್ಜಾಗೆ 3.78 ಲಕ್ಷ ರೂ. ದಂಡ
ಪ್ರವಾದಿ ಮೊಹಮ್ಮದ್ ವಿರುದ್ಧ ಹೇಳಿಕೆ ನೀಡಿ ಕೆಲಸ ಕಳೆದುಕೊಂಡ ಬಿಜೆಪಿ ಶಾಸಕ- ಪಕ್ಷದಿಂದ ಅಮಾನತು
ದೇವಾಲಯ ಪ್ರವೇಶಿಸಿದ ಸಚಿವ ಮನ್ಸೂರಿ: ಮೈತ್ರಿ ಸರ್ಕಾರಕ್ಕೆ ಶುರುವಾಯ್ತು ಸಂಕಟ! ಆಗಿದ್ದೇನು ನೋಡಿ…
ನಿಜ ಹೇಳಬೇಕು ಅಂದ್ರೆ ನಾನು ಅಂದು ನಾಟಿ ಕೋಳಿ ಸಾಂಬಾರ್ ತಿಂದೇ ಇರಲಿಲ್ಲ: ಸಿದ್ದರಾಮಯ್ಯ ಯೂ ಟರ್ನ್