'ಲವ್​ ಮಾಕ್ಟೇಲ್​ 2' ಚಿತ್ರತಂಡದಿಂದ ಹೊರನಡೆದ ರಘು ದೀಕ್ಷಿತ್​

ಬೆಂಗಳೂರು: 'ಲವ್​ ಮಾಕ್ಟೇಲ್​' ಚಿತ್ರದ ಒಂದು ಹೈಲೈಟ್​ ಎಂದರೆ, ಅದರ ಹಾಡುಗಳು. ರಘು ದೀಕ್ಷಿತ್​ ಚಿತ್ರಕ್ಕೆ ಸಂಗೀತ ಸಂಯೋಜಿಸಿದ್ದು, ಹಾಡುಗಳು ಯಶಸ್ವಿಯಾಗಿದ್ದವು. ಅದೇ ಕಾರಣಕ್ಕೆ ರಘು ದೀಕ್ಷಿತ್​ ಅವರೇ 'ಲವ್​ ಮಾಕ್ಟೇಲ್​ 2' ಚಿತ್ರಕ್ಕೆ ಸಂಗೀತ ಸಂಯೋಜಿಸಬೇಕು ಎಂದು ಹೇಳಿ, ಅವರಿಗೆ ಸಂಗೀತ ನಿರ್ದೇಶನದ ಜವಾಬ್ದಾರಿಯನ್ನು ವಹಿಸಿದ್ದರು ನಟ-ನಿರ್ದೇಶಕ-ನಿರ್ಮಾಪಕ ಕೃಷ್ಣ.

ಇದೀಗ 'ಲವ್​ ಮಾಕ್ಟೇಲ್​' ಚಿತ್ರತಂಡದಿಂದ ರಘು ದೀಕ್ಷಿತ್​ ಹೊರ ನಡೆದಿದ್ದಾರೆ ಎಂಬ ಸುದ್ದಿಯೊಂದು ಬಂದಿದೆ. ಅದಕ್ಕೆ ಕಾರಣ ಹಣಕಾಸಿನ ಸಮಸ್ಯೆ ಎಂಬುದು ವಿಶೇಷ.

ಇದನ್ನೂ ಓದಿ: ಐವರು ನಿರ್ದೇಶಕರು ಸೇರಿ ನಿರ್ದೇಶಿಸಲಿದ್ದಾರೆ ‘ಪೆಂಟಗನ್​’

ಈ ಕುರಿತು ಮಾತನಾಡಿರುವ ಕೃಷ್ಣ, 'ರಘು ಅವರು ಈ ಚಿತ್ರಕ್ಕೂ ಸಂಗೀತ ಸಂಯೋಜಿಸಬೇಕಿತ್ತು. ಆದರೆ, ಹಣಕಾಸಿನ ವಿಷಯದಲ್ಲಿ ಒಮ್ಮತ ಮೂಡದಿದ್ದರಿಂದ ಅವರು ಚಿತ್ರದಿಂದ ಹೊರನಡೆದಿದ್ದಾರೆ. ಅವರ ಬದಲು ಸೂಕ್ತ ಸಂಗೀತ ನಿರ್ದೇಶಕರೊಬ್ಬರ ಹುಡುಕಾಟ ನಡೆದಿದ್ದು, ಇನ್ನಷ್ಟೇ ಆಯ್ಕೆಯಾಗಬೇಕಿದೆ' ಎನ್ನುತ್ತಾರೆ.

'ಲವ್​ ಮಾಕ್ಟೇಲ್​' ಚಿತ್ರದಲ್ಲಿ ಲಿಪ್​ ಸಿಂಕ್​ ಹಾಡುಗಳಿರಲಿಲ್ಲ. ಬರೀ ಮಾಂಟೇಜ್​ ಹಾಡುಗಳಿದ್ದವು. ಅದೇ ಕಾರಣಕ್ಕೆ ಚಿತ್ರೀಕರಣ ಮೊದಲು, ಸನ್ನಿವೇಶದ ಮೂಡ್​ಗೆ ತಕ್ಕ ಹಾಗೆ ಕೊನೆಯಲ್ಲಿ ಹಾಡುಗಳನ್ನು ಸಂಯೋಜಿಸಲಾಗಿತ್ತು. ಈ ಬಾರಿ ಸಹ ಅದೇ ಮುಂದುವರೆಯಲಿದೆಯಂತೆ. ಮೊದಲು ಚಿತ್ರೀಕರಣವೆಲ್ಲಾ ಮುಗಿದ ನಂತರ, ಆ ನಂತರ ಎಡಿಟ್​ ಮಾಡಿಸಿ, ಅವಶ್ಯಕತೆ ಇದ್ದ ಕಡೆ ಹಾಡುಗಳನ್ನು ಸೇರಿಸಲಾಗುತ್ತದೆ ಎನ್ನುತ್ತಾರೆ ಕೃಷ್ಣ.

ಇದನ್ನೂ ಓದಿ: ‘ಓಂ ಶಾಂತಿ ಓಂ..’: ದೀಪಿಕಾ ಪಡುಕೋಣೆಗೆ ಖುಷಿ, ಅರ್ಜುನ್​ ರಾಮ್​​ಪಾಲ್​ಗೆ ಮಂಡೆಬಿಸಿ!

ಸದ್ಯ ಶೇ 70ರಷ್ಟು ಮಾತ್ರ ಚಿತ್ರೀಕರಣ ಮುಗಿದಿದ್ದು, ಕೃಷ್ಣ ಬೇರೆ ಚಿತ್ರಗಳಲ್ಲಿ ಬ್ಯುಸಿ ಇರುವುದರಿಂದ ಡೇಟ್ಸ್​ ಹೊಂದಿಸಿಕೊಂಡು ಚಿತ್ರೀಕರಣ ಮುಗಿಸುವುದಾಗಿ ಹೇಳುತ್ತಾರೆ. ಇದಲ್ಲದೆ, 'ಶ್ರೀಕೃಷ್ಣ ಅಟ್​ ಜಿಮೇಲ್​ ಡಾಟ್​ಕಾಮ್​' ಮತ್ತು 'ವರ್ಜಿನ್​' ಚಿತ್ರಗಳ ತಮ್ಮ ಬಹುತೇಕ ಚಿತ್ರೀಕರಣ ಮುಗಿಸಿರುವ ಅವರು, ಅವನ್ನೆಲ್ಲಾ ಮುಗಿಸಿದ ಮೇಲೆ, 'ಲವ್​ ಮಾಕ್ಟೇಲ್​ 2' ಚಿತ್ರವನ್ನು ಕೈಗೆತ್ತಿಕೊಳ್ಳುವುದಾಗಿ ಹೇಳುತ್ತಾರೆ.

https://www.vijayavani.net/puneeth-rajkumar/