ನವದೆಹಲಿ: ಇತ್ತೀಚೆಗಷ್ಟೇ ಮುಕ್ತಾಯಗೊಂಡ ಏಕದಿನ ವಿಶ್ವಕಪ್ ಟೂರ್ನಿಯಲ್ಲಿ ವಿರಾಟ್ ಕೊಹ್ಲಿ ಮತ್ತು ರೋಹಿತ್ ಶರ್ಮ ತೋರಿದ ಅಮೋಘ ಪ್ರದರ್ಶನ ಅವರಿಬ್ಬರ ಖ್ಯಾತಿಯನ್ನು ಹೊಸ ಎತ್ತರಕ್ಕೆ ಕೊಂಡೊಯ್ದಿದೆ. ಅಕ್ಟೋಬರ್ ಮತ್ತು ನವೆಂಬರ್ ತಿಂಗಳಲ್ಲಿ ಅತಿಹೆಚ್ಚು ಮಂದಿ ಸ್ಟಾರ್ ಕ್ರಿಕೆಟಿಗರನ್ನು ಹುಡುಕಿಕೊಂಡು ವಿಕಿಪೀಡಿಯಾ ಪೇಜ್ಗೆ ಸುನಾಮಿಯಂತೆ ನುಗ್ಗಿದ್ದಾರೆ.
ವಿಶ್ವಕಪ್ನಲ್ಲಿ ಕೊಹ್ಲಿ ಮತ್ತು ರೋಹಿತ್ ಪ್ರಮುಖ ಪಾತ್ರ ವಹಿಸಿದರು. ಈ ಮೂಲಕ ಹೆಚ್ಚು ಖ್ಯಾತಿ ಗಳಿಸಿದ ಸ್ಟಾರ್ ಕ್ರಿಕೆಟಿಗರು ಪುಟ್ಬಾಲ್ ತಾರೆಗಳಾದ ಕ್ರಿಶ್ಚಿಯಾನೋ ರೊನಾಲ್ಡೋ ಮತ್ತು ಲಿಯೋನೆಲ್ ಮೆಸ್ಸಿ ಅವರನ್ನು ವಿಕಿಪೀಡಿಯಾದಲ್ಲಿ ಹಿಂದಿಕ್ಕಿದ್ದಾರೆ.
ಕೊಹ್ಲಿ ವಿಕಿಪೀಡಿಯಾ ಪೇಜ್ಗೆ 5 ಮಿಲಿಯನ್ಗೂ ಅಧಿಕ ಮಂದಿ ಭೇಟಿ ನೀಡಿದರೆ, ರೋಹಿತ್ ಪೇಜ್ಗೆ 4.7 ಮಿಲಿಯನ್ ಅಧಿಕ ಮಂದಿ ಬಂದು ಹೋಗಿದ್ದಾರೆ. ಉಳಿದಂತೆ ರೊನಾಲ್ಡೋ (4.4 ಮಿಲಿಯನ್+) ಮತ್ತು ಮೆಸ್ಸಿ (4.3 ಮಿಲಿಯನ್+) ಕ್ರಮವಾಗಿ ಮೂರು ಮತ್ತು ನಾಲ್ಕನೇ ಸ್ಥಾನದಲ್ಲಿದ್ದಾರೆ.
ವಿರಾಟ್ ಕೊಹ್ಲಿ ಅವರು ವೈಯಕ್ತಿಕ 765 ರನ್‌ಗಳೊಂದಿಗೆ ಪ್ಲೇಯರ್ ಆಫ್ ವರ್ಲ್ಡ್ಕಪ್ ಎಂಬ ಗೌರವಕ್ಕೆ ಭಾಜನರಾದರು. 597 ರನ್‌ಗಳೊಂದಿಗೆ ವಿಶ್ವಕಪ್ನಲ್ಲಿ ಅತಿ ಹೆಚ್ಚು ರನ್ ಗಳಿಸಿದ ಎರಡನೇ ಆಟಗಾರ ಎಂಬ ಕೀರ್ತಿಯನ್ನು ರೋಹಿತ್ ಗಳಿಸಿದರು. ಹೆಚ್ಚು ರನ್ ಗಳಿಸಿದ ಪಟ್ಟಿಯಲ್ಲಿ ಮೊದಲು ಮತ್ತು ಎರಡನೇ ಸ್ಥಾನದಲ್ಲಿ ಭಾರತದ ಆಟಗಾರರೇ ಇದ್ದರೂ ಫೈನಲ್ ಪಂದ್ಯದಲ್ಲಿ ಭಾರತವು, ಪ್ರವಾಸಿ ಆಸ್ಟ್ರೇಲಿಯಾ ವಿರುದ್ಧ 6 ವಿಕೆಟ್‌ಗಳಿಂದ ಸೋಲನ್ನು ಅನುಭವಿಸಿತು. ಇದು ಅಸಂಖ್ಯಾತ ಭಾರತೀಯ ಕ್ರೀಡಾಪಟುಗಳನ್ನು ದುಃಖ ಸಾಗರಕ್ಕೆ ನೂಕಿದ್ದನ್ನು ಮರೆಯುವಂತಿಲ್ಲ.
ದಾಖಲೆ ವೀಕ್ಷಣೆ
ಬರೋಬ್ಬರಿ 518 ಮಿಲಿಯನ್ ಅಭಿಮಾನಿಗಳು ಟಿವಿಯಲ್ಲಿ ಸ್ಟಾರ್ ಸ್ಪೋರ್ಟ್ಸ್ ಚಾನೆಲ್ ಮೂಲಕ ವಿಶ್ವಕಪ್ ಪಂದ್ಯಗಳನ್ನು ವೀಕ್ಷಿಸಿದ್ದಾರೆ ಮತ್ತು 295 ಮಿಲಿಯನ್ ಜನರು ಒಟಿಟಿ ಪ್ಲಾಟ್‌ಫಾರ್ಮ್ ಡಿಸ್ನಿ+ಹಾಟ್‌ಸ್ಟಾರ್‌ನಲ್ಲಿ ವೀಕ್ಷಿಸಿದ್ದಾರೆ. ಟೂರ್ನಮೆಂಟ್ ಸಮಯದಲ್ಲಿ ಉಭಯ ಮಿಡಿಯಾ ವೇದಿಕೆಗಳು ಹೆಚ್ಚು ವೀಕ್ಷಕರ ನೋಂದಣಿಯನ್ನು ಹೊಂದಿವೆ. ಭಾರತ ಮತ್ತು ಆಸ್ಟ್ರೇಲಿಯಾ ನಡುವಿನ ಫೈನಲ್ ಪಂದ್ಯದದಲ್ಲಿ ಆತಿಥೇಯ ಭಾರತದ ಸೋಲಿನ ಹೊರತಾಗಿಯೂ, ಡಿಸ್ನಿ+ಹಾಟ್‌ಸ್ಟಾರ್‌ನಲ್ಲಿ ಸುಮಾರು 5.9 ಕೋಟಿ ವೀಕ್ಷಣೆ ಕಂಡಿದೆ. ಇದು ಭಾರತ-ನ್ಯೂಜಿಲೆಂಡ್ ಸೆಮಿಫೈನಲ್ ಪಂದ್ಯದಲ್ಲಿ ದಾಖಲಾದ 5.3 ಕೋಟಿ ವೀಕ್ಷಕರ ದಾಖಲೆಯನ್ನು ಮುರಿದಿದೆ.
ವಿಶ್ವಕಪ್ ಟೂರ್ನಿಯಲ್ಲಿ ಕಳೆದ ತಿಂಗಳು ಸಾಂಪ್ರದಾಯಿಕ ಎದುರಾಳಿಗಳಾದ ಭಾರತ ಮತ್ತು ಪಾಕಿಸ್ತಾನ ನಡುವೆ ನಡೆದ ಲೀಗ್ ಪಂದ್ಯವು 3.5 ಕೋಟಿಯ ಗರಿಷ್ಠ ಕಾನ್ಕರೆನ್ಸಿ ವೀಕ್ಷಕರನ್ನು ದಾಖಲಿಸಿತ್ತು. (ಏಜೆನ್ಸೀಸ್)
ಮತ್ತೆ ಶುರುವಾಗುವುದೇ ಎಲ್ಟಿಟಿಇ ಯುದ್ಧ?; ಸೋಷಿಯಲ್ ಮೀಡಿಯಾದಲ್ಲಿ ಕಾಣಿಸಿದವಳು ಪ್ರಭಾಕರನ್ ಮಗಳೇ?
ಚಿನ್ನ ಬೇಡ ಪ್ಲಾಟಿನಂ ಬೇಕು! ಯುವಕರಿಂದ ಸೃಷ್ಟಿಯಾಯ್ತು ಹೊಸ ಟ್ರೆಂಡ್, ಹೆಣ್ಣು ಹೆತ್ತವರ ನಿಟ್ಟುಸಿರು