ಚೆನ್ನೈ: ಒಂದು ಕಾಲದಲ್ಲಿ ಶ್ರೀಲಂಕಾವನ್ನೇ ನಡುಗಿಸಿದ್ದ ವ್ಯಕ್ತಿ ಪ್ರಭಾಕರನ್. ಟೈಗರ್ ಪ್ರಭಾಕರನ್ ಎಂದೇ ಹೆಸರು ಗಳಿಸಿದ್ದಾತ. ಭಾರತದ ಮಾಜಿ ಪ್ರಧಾನಿ ರಾಜೀವ್ ಗಾಂಧಿ ಹತ್ಯೆಯಲ್ಲಿ ಈತನ ಎಲ್ಟಿಟಿಇ ಕೈವಾಡವಿತ್ತು. ಲಿಬರೇಶನ್ ಟೈಗರ್ಸ್ ಆಫ್ ತಮಿಳ್ ಈಳಂ (ಎಲ್ಟಿಟಿಇ) ಮುಖ್ಯಸ್ಥನಾಗಿದ್ದ ಪ್ರಭಾಕರನ್ ಪ್ರತ್ಯೇಕ ರಾಷ್ಟ್ರದ ಬೇಡಿಕೆ ಇಟ್ಟುಕೊಂಡು ಶ್ರೀಲಂಕಾದ ವಿರುದ್ಧ ಯುದ್ಧವನ್ನೇ ಸಾರಿದ. ಶ್ರೀಲಂಕಾದಲ್ಲಿ ತಮಿಳರನ್ನು ದ್ವಿತೀಯ ದರ್ಜೆಯ ಪ್ರಜೆಗಳನ್ನಾಗಿ ಪರಿಗಣಿಸಿದ್ದನ್ನು ವಿರೋಧಿಸಿ ಈ ಹೋರಾಟ ಕೈಗೊಂಡಿದ್ದ. ಶ್ರೀಲಂಕಾದ ಜಾಫ್ನಾ ಪ್ರದೇಶವನ್ನು ಕೇಂದ್ರವನ್ನಾಗಿ ಪ್ರತ್ಯೇಕ ಆಡಳಿತ ನಡೆಸಿದವ. ಶ್ರೀಲಂಕಾಕ್ಕೆ ಭಾರತವು ಶಾಂತಿ ಪಾಲನೆ ಪಡೆಯನ್ನು ಕಳುಹಿಸಿದ್ದರಿಂದ ಎಲ್ಟಿಟಿಇಗೆ ಹಿನ್ನಡೆಯಾಯಿತು ಎಂದು ಕುಪಿತಗೊಂಡು ರಾಜೀವ್ ಗಾಂಧಿಯನ್ನೇ ಆ ಉಗ್ರ ಸಂಘಟನೆ ಹತ್ಯೆ ಮಾಡಿತು. ಪ್ರಭಾಕರನ್ ನಿಧನಾನಂತರ ಎಲ್ಟಿಟಿಇ ಹೋರಾಟ ಬಹುತೇಕವಾಗಿ ಅಂತ್ಯಗೊಂಡಿತು.
ಆದರೆ, ಉಗ್ರ ಪ್ರಭಾಕರನ್ ಈಗ ಮತ್ತೆ ಜನರ ನೆನಪಿಗೆ ಬಂದಿದ್ದಾನೆ.
ಎಲ್ಟಿಟಿಇ ಕಾರ್ಯಕರ್ತರ ತ್ಯಾಗವನ್ನು ಸ್ಮರಿಸುವುದಕ್ಕಾಗಿ ವಿಶ್ವಾದ್ಯಂತ ಶ್ರೀಲಂಕಾ ತಮಿಳರು “ಮಾವೀರರ್ ನಾಲ್” ಆಚರಿಸುತ್ತಾರೆ. ಈಗ ಇದರ ಆಚರಣೆ ಸಂದರ್ಭದಲ್ಲಿ, ಪ್ರಭಾಕರನ್ ಮಗಳು ಎಂದು ಹೇಳಿಕೊಳ್ಳುವ ಮಹಿಳೆಯೊಬ್ಬರ ವಿಡಿಯೋವೊಂದು ಸಾಮಾಜಿಕ ಮಾಧ್ಯಮದಲ್ಲಿ ಕಾಣಿಸಿಕೊಂಡಿದೆ,
ತನ್ನನ್ನು ದ್ವಾರಕಾ ಪ್ರಭಾಕರನ್ ಎಂದು ಗುರುತಿಸಿಕೊಂಡಿರುವ ಈ ಮಹಿಳೆ ತನ್ನ ಗುರುತನ್ನು ಮಹತ್ವದ ದಿನದಂದು ಜಗತ್ತಿಗೆ ಬಹಿರಂಗಪಡಿಸುವ ಇಚ್ಛೆಯನ್ನು ವ್ಯಕ್ತಪಡಿಸಿದ್ದಾರೆ.
“ಹಲವು ಕಷ್ಟಗಳು ಮತ್ತು ದ್ರೋಹಗಳನ್ನು ಮೀರಿ ನಾನು ಇಲ್ಲಿದ್ದೇನೆ. ಒಂದು ದಿನ, ನಾನು ಈಳಮ್‌ಗೂ ಭೇಟಿ ನೀಡಿ ನನ್ನ ಜನರಿಗೆ ಸೇವೆ ಸಲ್ಲಿಸುತ್ತೇನೆ” ಎಂದು ಸೀರೆಯುಟ್ಟ ಮಹಿಳೆ ಹೇಳುವುದನ್ನು ವೀಡಿಯೊದಲ್ಲಿ ಕೇಳಬಹುದು.
ಮುಲ್ಲಿವೈಕ್ಕಲ್ ಯುದ್ಧದ ಅಂತಿಮ ದಿನಗಳಲ್ಲಿ ಪ್ರಭಾಕರನ್ ಮತ್ತು ಅವರ ಕುಟುಂಬವು ಸತ್ತಿದೆ ಎಂದು ಶ್ರೀಲಂಕಾ ಮಿಲಿಟರಿ ಘೋಷಿಸಿದ ಅಂದಾಜು 14 ವರ್ಷಗಳ ನಂತರ ಈ ವೀಡಿಯೊವನ್ನು ಸಾಮಾಜಿಕ ಮಾಧ್ಯಮ ವೇದಿಕೆಗಳಲ್ಲಿ ಹಂಚಿಕೊಳ್ಳಲಾಗಿದೆ.
ಶ್ರೀಲಂಕಾದ ತಮಿಳಿನಲ್ಲಿ ತಮ್ಮ 12 ನಿಮಿಷಗಳ ಸುದೀರ್ಘ ಭಾಷಣದಲ್ಲಿ ಈ ಮಹಿಳೆಯು, ಶ್ರೀಲಂಕಾ ಸರ್ಕಾರವು ಎಲ್‌ಟಿಟಿಇಯನ್ನು ನೇರವಾಗಿ ಎದುರಿಸಲು ಸಾಧ್ಯವಾಗದಿದ್ದಾಗ ಪ್ರಬಲ ರಾಷ್ಟ್ರಗಳಿಂದ ಬೆಂಬಲವನ್ನು ಕೋರಿತು ಎಂದು ಹೇಳಿದ್ದಾರೆ.
ರಾಜಕೀಯ ಅಗತ್ಯಗಳಿಗಾಗಿ ವೈವಿಧ್ಯತೆಯಲ್ಲಿ ಏಕತೆಯನ್ನು ಒತ್ತಿಹೇಳುತ್ತಾ, ಸ್ವಾತಂತ್ರ್ಯಕ್ಕಾಗಿ ಎಲ್‌ಟಿಟಿಇಯ ಹೋರಾಟ ಮುಂದುವರಿಯುತ್ತದೆ ಎಂದೂ ಹೇಳಿದ್ದಾರೆ.
ವಿದೇಶದಲ್ಲಿರುವ ಲಂಕನ್ನರನ್ನು ಉದ್ದೇಶಿಸಿ ಮಾತನಾಡಿದ ಈ ಮಹಿಳೆ, ಶ್ರೀಲಂಕಾದಲ್ಲಿ ಸಂಕಷ್ಟದಲ್ಲಿರುವ ತಮಿಳರ ಬಗ್ಗೆ ಕಾಳಜಿ ವಹಿಸುವಂತೆ ಒತ್ತಾಯಿಸಿದ್ದಾರೆ. ಪ್ರತ್ಯೇಕ ತಮಿಳು ಈಳಂ ಸ್ವಾಯತ್ತತೆಯು, ಅಭಿವೃದ್ಧಿಯನ್ನು ಒದಗಿಸುತ್ತದೆ ಎಂಬ ನಂಬಿಕೆಯನ್ನು ವ್ಯಕ್ತಪಡಿಸಿದ್ದಾರೆ.
ತಮಿಳು ಹೋರಾಟವು ಸಿಂಹಳೀಯ ಜನರ ವಿರುದ್ಧವಲ್ಲ, ಆದರೆ, ಅಮಾಯಕರನ್ನು ತಮ್ಮ ವಿರುದ್ಧ ದುರುಪಯೋಗಪಡಿಸಿಕೊಂಡ ಸರ್ಕಾರ ಮತ್ತು ಭ್ರಷ್ಟ ರಾಜಕಾರಣಿಗಳ ವಿರುದ್ಧ ಎಂದು ಮಹಿಳೆ ಸ್ಪಷ್ಟಪಡಿಸಿದ್ದಾರೆ.
ಸಿಂಹಳೀಯರು ತಮ್ಮ ಕಾರಣವನ್ನು ಅರ್ಥ ಮಾಡಿಕೊಳ್ಳುತ್ತಾರೆ ಎಂದು ಆಶಿಸಿದ್ದಾರೆ.
ಕೃತಕ ಬುದ್ಧಿಮತ್ತೆ ಬಳಕೆ ಸಾಧ್ಯತೆ:
ದ್ವಾರಕಾ ಪ್ರಭಾಕರನ್ ಎಂದು ಹೇಳಿಕೊಳ್ಳುವ ವೀಡಿಯೊವನ್ನು ರಚಿಸಲು ಕೃತಕ ಬುದ್ಧಿಮತ್ತೆ (AI) ಬಳಸಿರುವ ಮಾಹಿತಿಯನ್ನು ತಾನು ಸ್ವೀಕರಿಸಿದ್ದಾರೆ ಎಂದು ಶ್ರೀಲಂಕಾ ಸರ್ಕಾರದ ಮೂಲಗಳು ತಿಳಿಸಿವೆ. ಈ ಬಗ್ಗೆ ಶ್ರೀಲಂಕಾ ಸರ್ಕಾರ ಪರಿರಿಶೀಲನೆ ನಡೆಸುತ್ತಿದೆ ಎಂದೂ ಮೂಲಗಳು ಹೇಳಿವೆ.