ಶ್ರೀನಗರ : ದೇಶದ ಅತಿದೊಡ್ಡ ಶಸ್ತ್ರಾಸ್ತ್ರ ಪರವಾನಗಿ ಹಗರಣವನ್ನು ಕೇಂದ್ರೀಯ ತನಿಖಾ ದಳ(ಸಿಬಿಐ) ಬೆಳಕಿಗೆ ತಂದಿದೆ. ಜಮ್ಮು ಮತ್ತು ಕಾಶ್ಮೀರದ ಹಲವು ಜಿಲ್ಲಾ ಮ್ಯಾಜಿಸ್ಟ್ರೇಟ್(ಡಿಎಂ)ಗಳು ಕಳೆದ ಕೆಲವು ವರ್ಷಗಳಲ್ಲಿ ಲಕ್ಷಾಂತರ ಅಕ್ರಮ ಗನ್ ಲೈಸೆನ್ಸ್ಗಳನ್ನು ನೀಡಿದ್ದಾರೆ. ಈ ರೀತಿಯಾಗಿ ದೇಶದ ವಿವಿಧ ಭಾಗಗಳ ಜನರಿಗೆ ಇಲ್ಲಿ ಗನ್ ಲೈಸೆನ್ಸ್ಗಳನ್ನು ನೀಡಲಾಗಿದೆ ಎಂಬ ಸ್ಫೋಟಕ ಮಾಹಿತಿಯನ್ನು ಸಿಬಿಐ ನೀಡಿದೆ.
ಶಸ್ತ್ರಾಸ್ತ್ರಗಳ ಡೀಲರ್ಗಳೊಂದಿಗೆ ಕೈಜೋಡಿಸಿದ್ದ ರಾಜ್ಯದ ಹಲವು ಡಿಎಂಗಳು ಹಣಕ್ಕಾಗಿ 2 ಲಕ್ಷಕ್ಕೂ ಹೆಚ್ಚು ಕಾನೂನುಬಾಹಿರವಾದ ಗನ್ ಲೈಸೆನ್ಸ್ಗಳನ್ನು ನೀಡಿದ್ದಾರೆ ಎನ್ನಲಾಗಿದೆ. ಶನಿವಾರದಂದು, ಈ ತನಿಖೆಯ ಅಂಗವಾಗಿ, ಸಿಬಿಐ ಅಧಿಕಾರಿಗಳ ತಂಡವು 20 ಗನ್ ಹೌಸ್ಗಳೂ ಸೇರಿದಂತೆ 40 ಸ್ಥಳಗಳಲ್ಲಿ ಜಮ್ಮು-ಕಾಶ್ಮೀರದಲ್ಲಿ ಮತ್ತು ದೆಹಲಿಯಲ್ಲಿ ಶೋಧ ಕಾರ್ಯ ನಡೆಸಿತು. ಎಂಟು ಜನ ಮಾಜಿ ಡಿಎಂಗಳನ್ನು ವಿಚಾರಣೆಗೆ ಒಡ್ಡಲಾಗಿದೆ ಎಂದು ಎನ್ಡಿಟಿವಿ ವರದಿ ಮಾಡಿದೆ.
ಇದನ್ನೂ ಓದಿ: ಜಮ್ಮು-ಕಾಶ್ಮೀರದ ಶಾಲೆಗಳಿಗೆ ತ್ರಿವರ್ಣ ಫಲಕಗಳು
ಜಮ್ಮು ಮತ್ತು ಕಾಶ್ಮೀರದ ವಿಶೇಷ ಸ್ಥಾನಮಾನವನ್ನು ರದ್ದುಗೊಳಿಸುವ ಮುಂಚಿನ ಅವಧಿಯ, 2012ನೇ ಸಾಲಿನಷ್ಟು ಹಿಂದಿನ ಗನ್ ಲೈಸೆನ್ಸ್ಗಳ ಬಗ್ಗೆ ಸಿಬಿಐ ತನಿಖೆ ಕೈಗೊಂಡಿದೆ. ಈ ಹಗರಣದ ವಿವಿಧ ಮಜಲುಗಳನ್ನೂ, ಯಾವ್ಯಾವ ಅಧಿಕಾರಿಗಳು ಈ ಅಕ್ರಮದಲ್ಲಿ ತೊಡಗಿದ್ದರು ಎಂಬುದನ್ನೂ ಸಿಬಿಐ ಆಳವಾಗಿ ತನಿಖೆ ನಡೆಸುತ್ತಿದೆ ಎನ್ನಲಾಗಿದೆ.
ಆರ್ಮ್ಸ್ ಲೈಸೆನ್ಸ್ ರಾಕೆಟ್ ನಡೆಯುತ್ತಿದೆ ಎಂಬ ವಿಚಾರವನ್ನು ರಾಜಸ್ತಾನ ಪೊಲೀಸರ ಆ್ಯಂಟಿ ಟೆರರಿಸಂ ಸ್ಕ್ವಾಡ್ 2017 ರಲ್ಲಿ ಮೊದಲ ಬಾರಿಗೆ ಬೆಳಕಿಗೆ ತಂದಿತ್ತು. ಆಗ ರಾಜಸ್ತಾನದ ಕೆಲವು ಕ್ರಿಮಿನಲ್ಗಳು ಜಮ್ಮುಕಾಶ್ಮೀರದ ಗನ್ ಲೈಸೆನ್ಸ್ಗಳನ್ನು ಹೊಂದಿರುವುದು ಪತ್ತೆಯಾಗಿತ್ತು. ಜಮ್ಮು-ಕಾಶ್ಮೀರದಲ್ಲಿ 2018 ರಲ್ಲಿ ರಾಜ್ಯಪಾಲರ ಆಡಳಿತ ವಿಧಿಸಲಾದ ನಂತರ ಆಗಿನ ರಾಜ್ಯಪಾಲರಾಗಿದ್ದ ಎನ್.ಎನ್.ವೋಹ್ರ ಅವರು ಈ ಬಗೆಗಿನ ತನಿಖೆಯನ್ನು ಸಿಬಿಐಗೆ ವಹಿಸಿದ್ದರು. (ಏಜೆನ್ಸೀಸ್)
ಅಪರಾಧ ತಡೆಯಲು ಹೊಯ್ಸಳಕ್ಕೆ ಹೊಸ ಹುರುಪು! ದಕ್ಷತೆ ಹೆಚ್ಚಿಸಲು ತಯಾರಿ
ಬೆನ್ನು ಮೂಳೆಯ ಆರೋಗ್ಯಕ್ಕೆ ಬಹು ಉಪಕಾರಿ ಈ ಆಸನ!