ಫುಲ್​ ಸಿಗ್ನಲ್​ ಇದ್ರೂ ಸಿಗ್ತಿಲ್ವಾ ಇಂಟರ್ನೆಟ್​? ನಿಮ್ಮ ಮೊಬೈಲ್​ನಲ್ಲಿ ಈ ಸೆಟ್ಟಿಂಗ್​ ಬದಲಿಸಿ ಸಾಕು

Internet Error: ಹೊಟ್ಟೆಗೆ ಹಿಟ್ಟಿಲ್ಲದಿದ್ದರೂ ಜುಟ್ಟಿಗೆ ಮಲ್ಲಿಗೆ ಹೂ ಎಂಬಂತೆ ಮನುಷ್ಯನ ಅವಿಭಾಜ್ಯ ಅಂಗವಾಗಿರುವ ಫೋನ್‌ನಲ್ಲಿ ನೆಟ್​ ಇರಲೇಬೇಕಿದೆ. ಎಷ್ಟೇ ಅತ್ಯಾಧುನಿಕ ಫೀಚರ್​ಗಳಿದ್ದರೂ 5ಜಿ ಸ್ಪೀಡ್​ನ ಇಂಟರ್ನೆಟ್ ಸಿಗುತ್ತಿಲ್ಲ ಅಥವಾ ವರ್ಕ್​ ಆಗದಿದ್ದರೆ ಬಳಕೆದಾರರ ಪಿತ್ತ ನೆತ್ತಿಗೇರುತ್ತದೆ. ಕೆಲ ನಿಮಿಷಗಳು ಇಂಟರ್ನೆಟ್ ಸಿಗದಿದ್ದರೆ ತಲೆಕೆಡಿಸಿಕೊಳ್ಳುವ ಜನರು, ಅದೇ ಒಂದು ಗಂಟೆಗೂ ಹೆಚ್ಚು ಸಮಯ ಸಿಗದೆ ಹೋದರಂತು ಕೇಳೋದೇ ಬೇಡ. 

ಅನೇಕ ಟೆಲಿಕಾಮ್​ ಕಂಪನಿಗಳು ನೀಡುವ ಜಿಬಿ ಡೇಟಾಗಳು ನಮ್ಮ ಜನರಿಗೆ ಸಾಲುವುದಿಲ್ಲ. ಅದಕ್ಕೆಂದೆ ಈಗ 5ಜಿ ನೆಟ್​ವರ್ಕ್​ಗಳಲ್ಲಿ ಅನ್​ಲಿಮಿಟೆಡ್​ ಆಫರ್​ಗಳು ನಡೆಯುತ್ತಿವೆ. ಆರು ಇಂಚಿನ ಆಕರ್ಷಕ ಹಾಗೂ ದುಬಾರಿ ಫೋನ್​ಗಳನ್ನು ಖರೀದಿಸುವ ಜನರು, ಅಂತೆಯೇ ಒಳ್ಳೆ ನೆಟ್​ವರ್ಕ್​ ಸಿಗುವ ಸಿಮ್​ಗಳನ್ನು ಕೊಳ್ಳುತ್ತಾರೆ. ಅದಕ್ಕೆ ತಕ್ಕಂತೆ ಹೆಚ್ಚಿನ ಡೇಟಾ ಲಭ್ಯವಿರುವ ಆಫರ್​ಗಳನ್ನೇ ಆಯ್ಕೆ ಮಾಡಿಕೊಳ್ಳುತ್ತಾರೆ. ಆದರೂ ಅಲ್ಲಲ್ಲಿ ಇಂತಹ ಸಮಸ್ಯೆಗಳು ಕಾಣಿಸಿಕೊಳ್ಳುತ್ತವೆ.

ಪ್ರಸ್ತುತ ಕಾಲಘಟ್ಟದಲ್ಲಿ ಆನ್​ಲೈನ್​ ಶಾಪಿಂಗ್​, ಡಿಜಿಟಲ್​ ಪೇಮೆಂಟ್ಸ್​, ವಿಡಿಯೋ ಕಾಲ್​ ಮತ್ತು ಇತರ ಅಗತ್ಯಗಳಿಗೆ ಇಂಟರ್ನೆಟ್ ಬೇಕೇ ಬೇಕು. ಹೀಗಿರುವಾಗ, ನೆಟ್​ವರ್ಕ್​ ಫುಲ್​ ಇದ್ದರೂ ಕೆಲವೊಮ್ಮೆ ಡೇಟಾ ವರ್ಕ್​ ಆಗದಿರುವುದಕ್ಕೆ ನಿಮಗೆ ಗೊತ್ತಿರದ ಒಂದಷ್ಟು ಕಾರಣಗಳಿರುತ್ತವೆ. ಅದನ್ನು ಚೆಕ್​ ಹಾಗೂ ಸರಿಪಡಿಸಿಕೊಳ್ಳಲು ಇಲ್ಲಿದೆ ನೋಡಿ ಸಿಂಪಲ್ ಸೆಟ್ಟಿಂಗ್​ ಬದಲಾವಣೆ. ​ 

ನಿಮ್ಮ ಮೊಬೈಲ್​ನಲ್ಲಿ ಮೊದಲು ಡೇಟಾ ಆನ್​ ಇದೆಯೇ ಎಂಬುದನ್ನು ಚೆಕ್​ ಮಾಡಿ. ಈ ಸಮಸ್ಯೆಯು ಹೆಚ್ಚಾಗಿ ಪ್ರಿಪೇಯ್ಡ್ (ಇಂಟರ್ನೆಟ್ ಸಮಸ್ಯೆ) ಬಳಕೆದಾರರಿಗೆ ಕಾಡುತ್ತದೆ. ದೈನಂದಿನ ಡೇಟಾ ಮಿತಿ ನೋಡಿ. ಕೆಲವೊಮ್ಮೆ, ಇದು ಮುಗಿದಿದ್ದರೆ ಇಂಟರ್ನೆಟ್ ಸಮಸ್ಯೆ ಉಂಟಾಗುತ್ತದೆ. ಅಲ್ಲದೆ, ನಿಮ್ಮ ಫೋನ್ ಸೆಟ್ಟಿಂಗ್‌ಗಳಲ್ಲಿ ಡೇಟಾ ರೋಮಿಂಗ್ ಅನ್ನು ಆಫ್ ಮಾಡಿದರೂ, ಇಂಟರ್ನೆಟ್ ಕಟ್​ ಆಫ್​ ಸಾಧ್ಯತೆಗಳಿರುತ್ತವೆ. ಇಂತಹ ಸಮಯದಲ್ಲಿ, ನಿಮ್ಮ ಫೋನ್ ಸೆಟ್ಟಿಂಗ್‌ಗಳಿಗೆ ಹೋಗಿ 'ಮೊಬೈಲ್ ಇಂಟರ್ನೆಟ್'ನಲ್ಲಿ ಡೇಟಾ ರೋಮಿಂಗ್ ಟಾಗಲ್ ಅನ್ನು ಆನ್ ಮಾಡಿ. 

ಇಂಟರ್ನೆಟ್ ಲೋಡ್​ ಆಗುತ್ತಿಲ್ಲ 10 ನಿಮಿಷಗಳ ಕಾಲ ಏರ್​ಪ್ಲೇನ್​ ಮೋಡ್​ಗೆ ಹಾಕಿ, ಬಳಿಕ ಆಫ್​ ಮಾಡಿ ನೋಡಿ. ಇಲ್ಲವೇ ತಕ್ಷಣವೇ ನಿಮ್ಮ ಫೋನ್ ಅನ್ನು ರೀ-ಸ್ಟಾರ್ಟ್​ ಮಾಡಿ. ಆಗ ನೆಟ್​ವರ್ಕ್​ ಸಮಸ್ಯೆಗಳು ಬಗೆಹರಿಯುತ್ತದೆ. ಇದನ್ನೂ ಮೀರಿ ಲಭ್ಯವಾಗುತ್ತಿಲ್ಲ ಎಂದಾದರೆ ನಿಮ್ಮ ಹತ್ತಿರದ ಟೆಲಿಕಾಂ ಆಪರೇಟರ್‌ನ ಗ್ರಾಹಕ ಸೇವೆಯನ್ನು ಸಂಪರ್ಕಿಸುವುದು ಅಥವಾ ಕಚೇರಿಗೆ ಭೇಟಿ ಕೊಡುವುದು ಉತ್ತಮ,(ಏಜೆನ್ಸೀಸ್).