ಹಿಂದೂಸ್ತಾನ್ ಕೋಕಾ-ಕೋಲಾ ಸಂಸ್ಥೆಯಿಂದ ಐಪಿಒಗೆ ಸೆಬಿಗೆ ಕರಡು ದಾಖಲೆ ಸಲ್ಲಿಕೆ!

ಭಾರತದ ಅತಿದೊಡ್ಡ ಸಾಫ್ಟ್ ಡ್ರಿಂಕ್ಸ್ ಮತ್ತು ಪ್ಯಾಕೇಜ್ಡ್ ಪಾನೀಯ ಕಂಪನಿಗಳಲ್ಲಿ ಒಂದಾದ ಹಿಂದೂಸ್ತಾನ್ ಕೋಕಾ-ಕೋಲಾ ಹೋಲ್ಡಿಂಗ್ಸ್ ಲಿಮಿಟೆಡ್ (HCCH), ತನ್ನ ಉದ್ದೇಶಿತ ಆರಂಭಿಕ ಸಾರ್ವಜನಿಕ ಕೊಡುಗೆ (IPO) ಗಾಗಿ ಭಾರತೀಯ ಷೇರುಪೇಟೆ ನಿಯಂತ್ರಣ ಮಂಡಳಿ (SEBI)ಗೆ ಕರಡು ರೆಡ್ ಹೆರಿಂಗ್ ಪ್ರಾಸ್ಪೆಕ್ಟಸ್ (DRHP) ಸಲ್ಲಿಸಿದೆ. TKC ವರದಿಯ ಪ್ರಕಾರ, 2026ನೇ ಹಣಕಾಸು ವರ್ಷದಲ್ಲಿ ಆದಾಯದ ಆಧಾರದ ಮೇಲೆ ಭಾರತದಲ್ಲಿ ಮಾತ್ರ ಕಾರ್ಯನಿರ್ವಹಿಸುವ ಅತಿದೊಡ್ಡ ನಾನ್-ಆಲ್ಕೊಹಾಲಿಕ್ ರೆಡಿ-ಟು-ಡ್ರಿಂಕ್ (NARTD) ಪಾನೀಯ ಕಂಪನಿಯಾಗಿದೆ.

ಈ ಐಪಿಒ ಸಂಪೂರ್ಣವಾಗಿ ಷೇರು ಮಾರಾಟ ಕೊಡುಗೆ (Offer for Sale) ರೂಪದಲ್ಲಿದ್ದು, ಕಂಪನಿಯ ಪ್ರವರ್ತಕ ಷೇರುದಾರರಾದ ಹಿಂದೂಸ್ತಾನ್ ಕೋಕಾ-ಕೋಲಾ ಓವರ್‌ಸೀಸ್ ಹೋಲ್ಡಿಂಗ್ಸ್ ಪ್ರೈವೇಟ್ ಲಿಮಿಟೆಡ್, ತಲಾ ₹10 ಮುಖಬೆಲೆಯ ಗರಿಷ್ಠ 99.74 ಕೋಟಿ ಈಕ್ವಿಟಿ ಷೇರುಗಳನ್ನು ಮಾರಾಟ ಮಾಡಲಿದೆ. ಕಂಪನಿಯ ಷೇರುಗಳನ್ನು ಬಾಂಬೆ ಸ್ಟಾಕ್ ಎಕ್ಸ್‌ಚೇಂಜ್ (BSE) ಮತ್ತು ನ್ಯಾಷನಲ್ ಸ್ಟಾಕ್ ಎಕ್ಸ್‌ಚೇಂಜ್ (NSE)ನಲ್ಲಿ ಪಟ್ಟಿ ಮಾಡಲು ಉದ್ದೇಶಿಸಲಾಗಿದೆ.

2026ರ ಜೂನ್ 30ಕ್ಕೆ ಅಂತ್ಯಗೊಂಡ ಮೂರು ತಿಂಗಳ ಅವಧಿಯಲ್ಲಿ ಕಂಪನಿಯ ಕಾರ್ಯಾಚರಣೆಗಳಿಂದ ಬಂದ ಆದಾಯ ₹4,310.17 ಕೋಟಿ ತಲುಪಿದ್ದು, ಹಿಂದಿನ ವರ್ಷದ ಇದೇ ಅವಧಿಗೆ ಹೋಲಿಸಿದರೆ ಶೇ.20.46ರಷ್ಟು ಬೆಳವಣಿಗೆ ದಾಖಲಿಸಿದೆ. ಒಟ್ಟು ಮಾರಾಟ ಪ್ರಮಾಣ ಶೇ.18.61ರಷ್ಟು ಹೆಚ್ಚಾಗಿದೆ. ಇದೇ ಅವಧಿಯಲ್ಲಿ EBITDA ಮಾರ್ಜಿನ್ ಶೇ.13.76ರಿಂದ ಶೇ.17.20ಕ್ಕೆ ಏರಿಕೆಯಾಗಿದೆ.

ಕಂಪನಿಯು ಸ್ಪಾರ್ಕ್ಲಿಂಗ್ ಪಾನೀಯಗಳು, ಹೈಡ್ರೇಷನ್ ಮತ್ತು ಜ್ಯೂಸ್ ಸೇರಿದಂತೆ ಸ್ಟಿಲ್ಸ್ ವಿಭಾಗಗಳಲ್ಲಿ ವೈವಿಧ್ಯಮಯ ಉತ್ಪನ್ನಗಳನ್ನು ಹೊಂದಿದೆ. 2026ರ ಜೂನ್ 30ರ ವೇಳೆಗೆ 41 ವಿವಿಧ ಪಾನೀಯ ಬ್ರ್ಯಾಂಡ್‌ಗಳು ಹಾಗೂ ಹಲವು ಬೆಲೆ ಮತ್ತು ಪ್ಯಾಕೇಜಿಂಗ್ ಆಯ್ಕೆಗಳನ್ನು ಹೊಂದಿತ್ತು. ಥಮ್ಸ್ ಅಪ್ ಸ್ಪಾರ್ಕ್ಲಿಂಗ್ ಪಾನೀಯ ವಿಭಾಗದಲ್ಲಿ, ಮಜಾ ಜ್ಯೂಸ್ ವಿಭಾಗದಲ್ಲಿ ಹಾಗೂ ಕಿನ್ಲೆ ಪ್ಯಾಕೇಜ್ಡ್ ಕುಡಿಯುವ ನೀರಿನ ವಿಭಾಗದಲ್ಲಿ ಪ್ರಮುಖ ಬ್ರ್ಯಾಂಡ್‌ಗಳಾಗಿವೆ.

ಹಿಂದೂಸ್ತಾನ್ ಕೋಕಾ-ಕೋಲಾ ಬೆವರೇಜಸ್ ಪ್ರೈವೇಟ್ ಲಿಮಿಟೆಡ್ ಮೂಲಕ ಕಾರ್ಯನಿರ್ವಹಿಸುವ ಕಂಪನಿಯು ಭಾರತದ 10 ರಾಜ್ಯಗಳು ಮತ್ತು 4 ಕೇಂದ್ರಾಡಳಿತ ಪ್ರದೇಶಗಳಲ್ಲಿ ತನ್ನ ವ್ಯಾಪಾರ ಜಾಲವನ್ನು ಹೊಂದಿದೆ. ಈ ಪ್ರದೇಶಗಳ ಒಟ್ಟು ಜನಸಂಖ್ಯೆ ಸುಮಾರು 61.69 ಕೋಟಿಯಾಗಿದೆ. ಕಂಪನಿಯು 2,273 ವಿತರಕರ ಮೂಲಕ ಸುಮಾರು 17 ಲಕ್ಷ ಚಿಲ್ಲರೆ ಮಾರಾಟ ಮಳಿಗೆಗಳಿಗೆ ಉತ್ಪನ್ನಗಳನ್ನು ತಲುಪಿಸುತ್ತಿದೆ.

2026ರ ಜೂನ್ ವೇಳೆಗೆ ಕಂಪನಿಯು 14 ಉತ್ಪಾದನಾ ಘಟಕಗಳು ಮತ್ತು 8 ಸಹಭಾಗಿ ಉತ್ಪಾದನಾ ಘಟಕಗಳನ್ನು ಹೊಂದಿದ್ದು, ಒಟ್ಟು 90 ಬಾಟ್ಲಿಂಗ್ ಲೈನ್‌ಗಳ ಮೂಲಕ ಉತ್ಪಾದನೆ ನಡೆಸುತ್ತಿದೆ.

2025ರ ಜುಲೈನಲ್ಲಿ ಜುಬಿಲೆಂಟ್ ಬೆವರೇಜಸ್ ಕಂಪನಿಯ ಪ್ರವರ್ತಕರಲ್ಲಿ ಒಂದಾಯಿತು. ಪ್ರಸ್ತುತ ದಿ ಕೋಕಾ-ಕೋಲಾ ಕಂಪನಿಯು ಶೇ.60ರಷ್ಟು ಮತ್ತು ಜುಬಿಲೆಂಟ್ ಬೆವರೇಜಸ್ ಲಿಮಿಟೆಡ್ ಶೇ.40ರಷ್ಟು ಷೇರುಗಳನ್ನು ಹೊಂದಿವೆ.

ಅನುಭವಿ ನಿರ್ವಹಣಾ ತಂಡದ ನೇತೃತ್ವದಲ್ಲಿ ಕಂಪನಿಯು ವಿತರಣಾ ಜಾಲ ವಿಸ್ತರಣೆ, ಉತ್ಪನ್ನಗಳ ವೈವಿಧ್ಯೀಕರಣ ಮತ್ತು ಮಾರುಕಟ್ಟೆ ಕಾರ್ಯತಂತ್ರಗಳ ಸುಧಾರಣೆಗೆ ಆದ್ಯತೆ ನೀಡುತ್ತಿದೆ. 2026ರಲ್ಲಿ ಟಾಪ್ ಎಂಪ್ಲಾಯರ್ಸ್ ಇನ್‌ಸ್ಟಿಟ್ಯೂಟ್‌ನಿಂದ ಭಾರತದಲ್ಲಿ ಪ್ರಮುಖ ಉದ್ಯೋಗದಾತ ಸಂಸ್ಥೆ ಎಂಬ ಮಾನ್ಯತೆಯನ್ನೂ ಪಡೆದುಕೊಂಡಿದೆ.

ಈ ಐಪಿಒಗೆ ಕೋಟಕ್ ಮಹೀಂದ್ರಾ ಕ್ಯಾಪಿಟಲ್, ಸಿಟಿಗ್ರೂಪ್, ಜೆ.ಪಿ. ಮಾರ್ಗನ್, ಮಾರ್ಗನ್ ಸ್ಟ್ಯಾನ್ಲಿ, ಆಕ್ಸಿಸ್ ಕ್ಯಾಪಿಟಲ್, ಗೋಲ್ಡ್‌ಮನ್ ಸ್ಯಾಕ್ಸ್ ಮತ್ತು ಐಐಎಫ್‌ಎಲ್ ಕ್ಯಾಪಿಟಲ್ ಸರ್ವೀಸಸ್ ಬುಕ್ ರನ್ನಿಂಗ್ ಲೀಡ್ ಮ್ಯಾನೇಜರ್‌ಗಳಾಗಿ ಕಾರ್ಯನಿರ್ವಹಿಸಲಿವೆ. ಕೆಫಿನ್ ಟೆಕ್ನಾಲಜೀಸ್ ರಿಜಿಸ್ಟ್ರಾರ್ ಆಗಿದೆ.