ಮುಂಬೈ: ನೇರವಾಗಿ ಫೈನಲ್ಗೇರುವ ಅವಕಾಶದಿಂದ ವಂಚಿತವಾಗಿರುವ ಮಾಜಿ ಚಾಂಪಿಯನ್ ಮುಂಬೈ ಇಂಡಿಯನ್ಸ್ ಮತ್ತು ಇದೇ ಮೊದಲ ಬಾರಿಗೆ ಪ್ಲೇಆಫ್ ಹಂತಕ್ಕೇರಿರುವ ಗುಜರಾತ್ ಜೈಂಟ್ಸ್ ತಂಡಗಳು ಮೂರನೇ ಆವೃತ್ತಿಯ ವುಮೆನ್ಸ್ ಪ್ರೀಮಿಯರ್ ಲೀಗ್ನಲ್ಲಿ ಗುರುವಾರ "ಸೆಮಿಫೈನಲ್' ಮಾದರಿಯ ಎಲಿಮಿನೇಟರ್ ಪಂದ್ಯದಲ್ಲಿ ಸೆಣಸಲಿವೆ. ಗೆದ್ದ ತಂಡಕ್ಕೆ ಶನಿವಾರ ಡೆಲ್ಲಿ ಕ್ಯಾಪಿಟಲ್ಸ್ ಎದುರು ಪ್ರಶಸ್ತಿಗಾಗಿ ಹೋರಾಡುವ ಅವಕಾಶ ಲಭಿಸಲಿದೆ.
ಕಳೆದೆರಡು ಆವೃತ್ತಿಗಳಲ್ಲೂ ಎಲಿಮಿನೇಟರ್ ಪಂದ್ಯದಲ್ಲಿ ಆಡಿದ್ದ ಹರ್ಮಾನ್ಪ್ರೀತ್ ಕೌರ್ ಪಡೆ ಈ ಪೈಕಿ ಚೊಚ್ಚಲ ಆವೃತ್ತಿಯಲ್ಲಿ ಎಲಿಮಿನೇಟರ್ನಲ್ಲಿ ಗೆದ್ದು ಬಳಿಕ ಫೈನಲ್ನಲ್ಲೂ ಯಶಸ್ಸು ಸಾಧಿಸುವ ಮೂಲಕ ಪ್ರಶಸ್ತಿ ಗೆದ್ದಿತ್ತು. ಅದೇ ಸಾಧನೆಯನ್ನು ಈ ಸಲವೂ ಮರುಕಳಿಸುವ ಹಂಬಲ ಮುಂಬೈ ಇಂಡಿಯನ್ಸ್ ತಂಡದ್ದಾಗಿದೆ.
ಮತ್ತೊಂದೆಡೆ ಗುಜರಾತ್ ಜೈಂಟ್ಸ್ ತಂಡ ಈ ಬಾರಿ ನಾಯಕತ್ವ ಬದಲಾವಣೆಯಿಂದ ಮೊದಲ ಬಾರಿ ಪ್ಲೇಆಫ್ಗೇರುವ ಅದೃಷ್ಟ ಪಡೆದಿದ್ದು, ಅನುಭವಿ ಆಶ್ಲೆ ಗಾರ್ಡ್ನರ್ ಸಾರಥ್ಯದಲ್ಲಿ ಮೊದಲ ಬಾರಿ ಪ್ರಶಸ್ತಿ ಸುತ್ತಿಗೇರಿದ ಸಾಧನೆಯನ್ನೂ ಮಾಡುವ ಹಂಬಲದಲ್ಲಿದೆ. ಆದರೆ ಗುಜರಾತ್ ಎದುರು ಅಜೇಯ ದಾಖಲೆ ಹೊಂದಿರುವುದು ಮುಂಬೈಗೆ ಹೆಚ್ಚಿನ ಆತ್ಮವಿಶ್ವಾಸ ತುಂಬಲಿದೆ.
ಮುಂಬೈಗೆ ವಿದೇಶಿಯರ ಬಲ
ಮುಂಬೈಗೆ ವಿದೇಶಿ ಆಟಗಾರ್ತಿಯರಾದ ನ್ಯಾಟ್ ಸೀವರ್&ಬ್ರಂಟ್ ಮತ್ತು ಹ್ಯಾಲಿ ಮ್ಯಾಥ್ಯೂಸ್ ಆಲ್ರೌಂಡ್ ಆಟ ಹಾಲಿ ಆವೃತ್ತಿಯಲ್ಲಿ ಹೆಚ್ಚಿನ ಬಲ ತುಂಬಿದೆ. ಸೀವರ್ ಟೂರ್ನಿಯಲ್ಲಿ ಇದುವರೆಗೆ 4 ಅರ್ಧಶತಕಗಳ ಸಹಿತ ಸರ್ವಾಧಿಕ 416 ರನ್ ಸಿಡಿಸಿದ್ದಾರೆ. ಜತೆಗೆ 8 ವಿಕೆಟ್ ಕಬಳಿಸಿದ್ದಾರೆ. ಇನ್ನು ಮ್ಯಾಥ್ಯೂಸ್ ಟೂರ್ನಿಯಲ್ಲಿ ಸರ್ವಾಧಿಕ 14 ವಿಕೆಟ್ ಕಬಳಿಸಿದ್ದಾರೆ. ಜತೆಗೆ 227 ರನ್ ಬಾರಿಸಿದ್ದಾರೆ. ಇನ್ನು ಕಿವೀಸ್ ಸ್ಪಿನ್ನರ್ ಅಮೆಲಿಯಾ ಕೆರ್ ಕೂಡ 14 ವಿಕೆಟ್ ಕಬಳಿಸಿದ್ದರೆ, ದಣ ಆಫ್ರಿಕಾದ ವೇಗಿ ಶಬ್ನಿಮ್ ಇಸ್ಮಾಯಿಲ್ 7 ವಿಕೆಟ್ ಗಳಿಸಿದ್ದಾರೆ. ನಾಯಕ ಹರ್ಮಾನ್ಪ್ರೀತ್ ಅಸ್ಥಿರ ನಿರ್ವಹಣೆಯ ನಡುವೆಯೂ ಟೂರ್ನಿಯಲ್ಲಿ ಇದುವರೆಗೆ ಒಂದು ಅರ್ಧಶತಕ ಸಹಿತ 200 ರನ್ ರನ್ ಬಾರಿಸಿದ್ದಾರೆ. ಇನ್ನು ಅಮನ್ಜೋತ್ ಕೌರ್ ಕೂಡ ಆಲ್ರೌಂಡ್ ನಿರ್ವಹಣೆಯೊಂದಿಗೆ ಗಮನಸೆಳೆದಿದ್ದಾರೆ. ಭಾರತೀಯರಿಂದ ಇನ್ನಷ್ಟು ಕೊಡುಗೆ ಬಂದರೆ ಮುಂಬೈಗೆ ಫೈನಲ್ಗೇರುವ ಅವಕಾಶ ಹೆಚ್ಚಲಿದೆ.
ಗುಜರಾತ್ ಜೈಂಟ್ಸ್ಗೆ ಶಕ್ತಿ ತುಂಬಿದ ಭಾರತೀಯರು
ದೇಶಬಾಂಧವೆ ಬೆನ್ ಮೂನಿ ಅವರಿಂದ ನಾಯಕತ್ವವನ್ನು ಪಡೆದುಕೊಂಡ ಬಳಿಕ ಆಸೀಸ್ ತಾರೆ ಗಾರ್ಡ್ನರ್ ಈ ಬಾರಿ ಗುಜರಾತ್ ತಂಡವನ್ನು ಸಮರ್ಥವಾಗಿ ಮುನ್ನಡೆಸುತ್ತಿದ್ದಾರೆ. ಜತೆಗೆ 235 ರನ್ ಮತ್ತು 8 ವಿಕೆಟ್ ಗಳಿಸುವ ಮೂಲಕ ಆಲ್ರೌಂಡ್ ನಿರ್ವಹಣೆ ತೋರಿದ್ದಾರೆ. ಬೆತ್ ಮೂನಿ (231 ರನ್), ಡಿಯೇಂಡ್ರಾ ಡಾಟಿನ್ (142 ರನ್, 9 ವಿಕೆಟ್) ಕೂಡ ಉತ್ತಮ ನಿರ್ವಹಣೆ ತೋರಿದ್ದಾರೆ. ಆದರೆ ಇದೆಲ್ಲಕ್ಕಿಂತ ಗುಜರಾತ್ ತಂಡಕ್ಕೆ ಈ ಬಾರಿ ಭಾರತೀಯರ ಅತ್ಯುತ್ತಮ ನಿರ್ವಹಣೆ ಹೆಚ್ಚಿನ ಬಲ ತುಂಬಿದೆ. ಹರ್ಲೀನ್ ಡಿಯೋಲ್ (224 ರನ್), ಭಾರತಿ ಫುಲ್ಮಲಿ (103 ರನ್) ಬ್ಯಾಟಿಂಗ್ನಲ್ಲಿ ಸಾಥ್ ನೀಡಿದ್ದರೆ, ಬೌಲಿಂಗ್ನಲ್ಲಿ ಕಾಶ್ವಿ ಗೌತಮ್ (10 ವಿಕೆಟ್), ತನುಜಾ ಕನ್ವರ್ (8 ವಿಕೆಟ್), ಪ್ರಿಯಾ ಮಿಶ್ರಾ (6 ವಿಕೆಟ್), ಮೇಘನಾ ಸಿಂಗ್ (4 ವಿಕೆಟ್) ಗಮನಸೆಳೆದಿದ್ದಾರೆ.
*ಆರಂಭ: ರಾತ್ರಿ 7.30
*ನೇರಪ್ರಸಾರ: ಸ್ಟಾರ್ ಸ್ಪೋರ್ಟ್ಸ್, ಜಿಯೋ ಹಾಟ್ಸ್ಟಾರ್.
*ಮುಖಾಮುಖಿ: 6
ಮುಂಬೈ ಇಂಡಿಯನ್ಸ್: 6
ಗುಜರಾತ್ ಜೈಂಟ್ಸ್: 0