ನ್ಯೂಯಾರ್ಕ್: ವರ್ಷದ 4ನೇ ಹಾಗೂ ಅಂತಿಮ ಗ್ರಾಂಡ್ ಸ್ಲಾಂ ಎನಿಸಿರುವ ಯುಎಸ್ ಓಪನ್ ಟೆನಿಸ್ ಟೂರ್ನಿಗೆ ಸೋಮವಾರ ಚಾಲನೆ ದೊರೆಯಲಿದ್ದು, ಇತ್ತೀಚೆಗೆ ಪ್ಯಾರಿಸ್ ಒಲಿಂಪಿಕ್ಸ್ನಲ್ಲಿ ಸ್ವರ್ಣ ಪದಕ ಗೆದ್ದು ವೃತ್ತೀಜಿವನದ ಗೋಲ್ಡನ್ ಸ್ಲಾಂ ಸಾಧಿಸಿರುವ ಸೆರ್ಬಿಯಾದ ತಾರೆ ನೊವಾಕ್ ಜೋಕೊವಿಕ್ ಪುರುಷರ ಸಿಂಗಲ್ಸ್ನಲ್ಲಿ ಹಾಲಿ ಚಾಂಪಿಯನ್ ಆಗಿ ಕಣಕ್ಕಿಳಿಯಲಿದ್ದಾರೆ. ಮಹಿಳಾ ವಿಭಾಗದಲ್ಲಿ ಆತಿಥೇಯ ಅಮೆರಿಕದ ತಾರೆ ಕೋಕೋ ಗೌಫ್ ತನ್ನ ಚೊಚ್ಚಲ ಗ್ರಾಂಡ್ ಸ್ಲಾಂ ಪ್ರಶಸ್ತಿಯನ್ನು ಉಳಿಸಿಕೊಳ್ಳವ ನಿರೀಕ್ಷೆಯಲ್ಲಿದ್ದಾರೆ.
ಒಲಿಂಪಿಕ್ಸ್ ಬಳಿಕ ಮೊದಲ ಬಾರಿಗೆ ಅಂಗಣದಲ್ಲಿ ಕಾಣಿಸಲಿರುವ 24 ಗ್ರಾಂಡ್ ಸ್ಲಾಂ ಒಡೆಯ ಜೋಕೊವಿಕ್, ಹಾಲಿ ಋತುವಿನ ಮೊದಲ ಹಾಗೂ ದಾಖಲೆಯ 25ನೇ ಗ್ರಾಂಡ್ ಸ್ಲಾಂ ಪ್ರಶಸ್ತಿಯ ಮೇಲೆ ಕಣ್ಣಿಟ್ಟಿದ್ದಾರೆ. ಆದರೆ ಇವರಿಗೆ ಅಗ್ರ ಶ್ರೇಯಾಂಕಿತ ಇಟಲಿಯ ಜನ್ನಿಕ್ ಸಿನ್ನರ್, ಸ್ಪೇನ್ ಯುವ ತಾರೆ ಕಾಲೋರ್ಸ್ ಅಲ್ಕರಾಜ್ ಪ್ರಬಲ ಎದುರಾಳಿಗಳಾಗಿದ್ದಾರೆ. ಟೂರ್ನಿಯ ಎರಡನೇ ಶ್ರೇಯಾಂಕಿತ ಎನಿಸಿರುವ ಜೋಕೊವಿಕ್ ಹಾಗೂ ಒಲಿಂಪಿಕ್ಸ್ ರಜತ ವೀರ, 4 ಗ್ರಾಂಡ್ ಸ್ಲಾಂ ಒಡೆಯ ಅಲ್ಕರಾಜ್ ಫೈನಲ್ಗೇರಿದರೆ ಮಾತ್ರ ಮುಖಾಮುಖಿಯಾಗುವಂಥ ಡ್ರಾ ಪಡೆದುಕೊಂಡಿದ್ದಾರೆ. ಮೊಣಕಾಲು ಶಸ್ತ್ರಚಿಕಿತ್ಸೆಯಿಂದ ಚೇತರಿಸಿಕೊಂಡು ಒಲಿಂಪಿಕ್ಸ್ನಲ್ಲಿ ಸ್ವರ್ಣ ಬೇಟೆಯಾಡಿರುವ 37 ವರ್ಷದ ಜೋಕೊವಿಕ್, 2023ರಲ್ಲಿ ಅಮೆರಿಕದಲ್ಲಿ ಕೊನೆಯದಾಗಿ ಗ್ರಾಂಡ್ ಸ್ಲಾಂ ಕಿರೀಟ ಜಯಿಸಿದ್ದು, 2024ರ ಋತು ಜೋಕೋ ಪಾಲಿಗೆ ತುಸು ಕಠಿಣ ಎನಿಸಿದ್ದರೂ, ಐದನೇ ಬಾರಿಗೆ ಯುಎಸ್ ಕಿರೀಟದ ತವಕದಲ್ಲಿದ್ದಾರೆ. ಮೊದಲ ಸುತ್ತಿನಲ್ಲಿ ಜೋಕೋ, ಮಾಲ್ಡೋವಾದ ರಾಡು ಆಲ್ಬೋಟ್ ಎದುರು ಕಣಕ್ಕಿಳಿಯಲಿದ್ದಾರೆ. ಒಲಿಂಪಿಕ್ಸ್ ಕಂಚಿನ ಪದಕ ವಿಜೇತ, ಇಟಲಿಯ ಲೊರೆಂಜೊ ಮುಸೆಟ್ಟಿ, ಅಮೆರಿಕನ್ ರೈಲಿ ಒಪೆಲ್ಕಾ ಎದುರು ಅಭಿಯಾನ ಆರಂಭಿಸಲಿದ್ದಾರೆ.
ವಿಂಬಲ್ಡನ್ ಹಾಗೂ ಫ್ರೆಂಚ್ ಓಪನ್ ಚಾಂಪಿಯನ್ 21 ವರ್ಷದ ಅಲ್ಕರಾಜ್, ಆಸ್ಟ್ರೆಲಿಯನ್ ಓಪನ್ ಚಾಂಪಿಯನ್ ಜನ್ನಿಕ್ ಸಿನ್ನರ್ ಸೆಮಿಫೈನಲ್ನಲ್ಲಿ ಎದುರಾಗುವ ನಿರೀಕ್ಷೆ ಇದೆ. ಕ್ವಾರ್ಟರ್ಫೈನಲ್ನಲ್ಲಿ ಸಿನ್ನರ್ ಹಾಗೂ 2021ರ ಚಾಂಪಿಯನ್ ಡೇನಿಯಲ್ ಮೆಡ್ವೆಡೆವ್ ಎದುರಾದರೆ, ಜೋಕೊವಿಕ್ಗೆ ವಿಶ್ವ ನಂ.6 ಆಂಡ್ರೆ ರುಬ್ಲೆವ್, ಅಲ್ಕರಾಜ್ಗೆ ವಿಶ್ವ ನಂ.7 ಹಬರ್ಟ ಹರ್ಕಾಜ್ ಮತ್ತು 2020ರ ರನ್ನರ್ ಅಪ್ ಅಲೆಕ್ಸಾಂಡರ್ ಜ್ವೆರೆವ್ಗೆ, ಕ್ಯಾಸ್ಪರ್ ರುಡ್ ಮುಖಾಮುಖಿಯಾಗುವ ನಿರೀಕ್ಷೆ ಇದೆ. 2021ರ ಚಾಂಪಿಯನ್ ರಷ್ಯಾದ ಡೇನಿಯಲ್ ಮೆಡ್ವೆಡೇವ್, ಆಂಡ್ರೆ ರುಬ್ಲೆವ್, ಐದನೇ ಶ್ರೇಯಾಂಕಿತ ಸ್ಟಿಫಾನೋಸ್ ಸಿಸಿಪಾಸ್ ಟೂರ್ನಿಯ ಪ್ರಮುಖ ಆಕರ್ಷಣೆಯಾಗಿದ್ದಾರೆ.
ಹೊಸ ಚಾಂಪಿಯನ್ಗೆ ಹಾದಿ...
ಋತುವಿನ ಅಂತಿಮ ಗ್ರಾಂಡ್ ಸ್ಲಾಂನಲ್ಲಿ ಮಹಿಳಾ ಸಿಂಗಲ್ಸ್ ಕಿರೀಟ ಜಯಿಸಲು ಪ್ರಮುಖ ಫೇವರಿಟ್ ಆಟಗಾರ್ತಿಯನ್ನು ಹೆಸರಿಸುವುದು ಕಷ್ಟ ಎನಿಸಿದೆ. 2012ರಿಂದ 2023ರ ವರೆಗೂ ಪ್ರತಿ ಬಾರಿಯೂ ಹೊಸ ಚಾಂಪಿಯನ್ ಉದಯಕ್ಕೆ ನ್ಯೂಯಾರ್ಕ್ ಸಾಯಾಗಿದೆ. ಹಾಲಿ ಋತುವಿನಲ್ಲಿ ಲಯ ಕಂಡುಕೊಳ್ಳಲು ಪರದಾಡುತ್ತಿರುವ ಕೋಕೋ ಗೌಫ್ ಹಾಲಿ ಚಾಂಪಿಯನ್ ಆಗಿ ಕಣಕ್ಕಿಳಿಯಲಿದ್ದು, ಪ್ಯಾರಿಸ್ನಲ್ಲಿ ಕಂಚಿನ ಪದಕಕ್ಕೆ ತೃಪ್ತಿಪಟ್ಟಿದ ವಿಶ್ವ ನಂ.1 ಪೋಲೆಂಡ್ನ ಸ್ವಿಯಾಟೆಕ್ ಜತೆಗೆ ವಿಶ್ವ ನಂ.3 ಅರಿನಾ ಸಬಲೆಂಕಾ ಕಠಿಣ ಸವಾಲೊಡ್ಡುವ ನಿರೀೆ ಇದೆ. ಇವರಿಬ್ಬರು ವರ್ಷದ 2ನೇ ಗ್ರಾಂಡ್ ಸ್ಲಾಂ ಪ್ರಶಸ್ತಿ ಜಯಿಸುವ ವಿಶ್ವಾಸದಲ್ಲಿದ್ದಾರೆ. ಈ ವರ್ಷದ ವಿಂಬಲ್ಡನ್ ಮತ್ತು ಫ್ರೆಂಚ್ ರನ್ನರ್ ಅಪ್ ಇಟಲಿಯ ಜಾಸ್ಮಿನ್ ಪಾವೋಲಿನಿ ಚೊಚ್ಚಲ ಗ್ರಾಂಡ್ ಸ್ಲಾಂ ಪ್ರಶಸ್ತಿಯ ಗೆಲ್ಲುವ ಹಂಬಲದಲ್ಲಿದ್ದಾರೆ. ಎರಡು ಬಾರಿ ಚಾಂಪಿಯನ್ ಜಪಾನ್ನ ನವೋಮಿ ಒಸಾಕ, ಬ್ರಿಟನ್ನ ಎಮ್ಮಾ ರಾಡುಕಾನು ಮರಳಿ ಕಣಕ್ಕಿಳಿಯಲಿದ್ದಾರೆ. ಕ್ವಾರ್ಟರ್ಫೈನಲ್ನಲ್ಲಿ ಇಗಾ ಸ್ವಿಯಾಟೆಕ್- ವಿಶ್ವ ನಂ. 6 ಜೆಸ್ಸಿಕಾ ಪೆಗುಲಾ, ಸಬಲೆಂಕಾ ವಿರುದ್ಧ ಒಲಿಂಪಿಕ್ ಚಿನ್ನದ ಪದಕ ವಿಜೇತೆ ಝೆಂಗ್ ಕ್ವಿನ್ವೆನ್, ಗೌಫ್ ವಿರುದ್ಧ ಎರಡು ಗ್ರಾಂಡ್ ಸ್ಲಾಂ ಚಾಂಪಿಯನ್ ಬಾರ್ಬೊರಾ ಕ್ರೆಜ್ಸಿಕೋವಾ, 2022ರ ವಿಂಬಲ್ಡನ್ ಚಾಂಪಿಯನ್ ಎಲೆನಾ ರೈಬಾಕಿನಾಗೆ ಪಾವೋಲಿನಿ ಎದುರಾಗುವ ನಿರೀಕ್ಷೆ ಇದೆ.
ಆರಂಭ: ರಾತ್ರಿ 8.30
ನೇರಪ್ರಸಾರ: ಸೋನಿ ಸ್ಪೋರ್ಟ್ಸ್ ನೆಟ್ವರ್ಕ್
‘ಬಹುಮಾನ ಮೊತ್ತ
ಟೂರ್ನಿಯ ಒಟ್ಟು ಬಹುಮಾನ ಮೊತ್ತ 628 ಕೋಟಿ ರೂ. (75 ದಶಲಕ್ಷ ಡಾಲರ್) ಆಗಿದೆ. ಸಿಂಗಲ್ಸ್ ವಿಭಾಗದ ವಿಜೇತರು 30.17 ಕೋಟಿ ರೂ. ಮತ್ತು ರನ್ನರ್ಅಪ್ 15.08 ಕೋಟಿ ರೂ. ಬಹುಮಾನ ಪಡೆಯಲಿದ್ದಾರೆ. ಸಿಂಗಲ್ಸ್ ವಿಭಾಗದ ಮೊದಲ ಸುತ್ತಿನಲ್ಲಿ ಹೊರಬಿದ್ದರೂ 83.81 ಲಕ್ಷ ರೂ. ಬಹುಮಾನ ಲಭಿಸಲಿದೆ. ಪುರುಷ-ಮಹಿಳಾ ಡಬಲ್ಸ್ ವಿಜೇತ ಜೋಡಿಗೆ 6.28 ಕೋಟಿ ರೂ. ಹಾಗೂ ಮಿಶ್ರ ಡಬಲ್ಸ್ ವಿಭಾಗದ ವಿಜೇತ ಜೋಡಿಗೆ 1.67 ಕೋಟಿ ರೂ. ಬಹುಮಾನ ಲಭಿಸಲಿದೆ.
*7: ಜೋಕೊವಿಕ್ ಈ ಸಲ ಯುಎಸ್ ಓಪನ್ ಗೆಲ್ಲದಿದ್ದರೆ, 7 ವರ್ಷಗಳ ಬಳಿಕ ವರ್ಷದಲ್ಲಿ ಒಂದೂ ಗ್ರಾಂಡ್ ಸ್ಲಾಂ ಪ್ರಶಸ್ತಿ ಗೆಲ್ಲದ ನಿರಾಸೆ ಅನುಭವಿಸಲಿದ್ದಾರೆ. ಜೋಕೋ 2017ರಲ್ಲಿ ಕೊನೆಯದಾಗಿ ಒಂದೂ ಗ್ರಾಂಡ್ ಸ್ಲಾಂ ಗೆದ್ದಿರಲಿಲ್ಲ.
*25: ಜೋಕೋ ಪ್ರಶಸ್ತಿ ಗೆದ್ದರೆ ಸಿಂಗಲ್ಸ್ ವಿಭಾಗದಲ್ಲಿ 25 ಗ್ರಾಂಡ್ ಸ್ಲಾಂ ಜಯಿಸಿದ ಮೊದಲಿಗ ಎನಿಸಲಿದ್ದಾರೆ. ಸದ್ಯ ಆಸೀಸ್ ಆಟಗಾರ್ತಿ ಮಾರ್ಗರೇಟ್ ಕೋರ್ಟ್ (24) ಜತೆಗೆ ಸಮಬಲದಲ್ಲಿದ್ದಾರೆ.
*5: ಜೋಕೊವಿಕ್ ಪ್ರಶಸ್ತಿ ಗೆದ್ದರೆ ಮುಕ್ತ ಟೆನಿಸ್ ಯುಗದಲ್ಲಿ ಗರಿಷ್ಠ 5 ಬಾರಿ ಯುಎಸ್ ಓಪನ್ ಗೆದ್ದ ಜಿಮ್ಮಿ ಕಾನರ್ಸ್, ಪೀಟ್ ಸಾಂಪ್ರಸ್ ಮತ್ತು ರೋಜರ್ ಫೆಡರರ್ ದಾಖಲೆ ಸರಿಗಟ್ಟಲಿದ್ದಾರೆ.
ನಗಾಲ್ಗೆ ಗ್ರೀಕ್ಸ್ಪೂರ್ ಎದುರಾಳಿ
ಭಾರತದ ಅಗ್ರ ಸಿಂಗಲ್ಸ್ ಆಟಗಾರ ಸುಮಿತ್ ನಗಾಲ್ ಮೊದಲ ಸುತ್ತಿನಲ್ಲಿ ವಿಶ್ವ ನಂ. 40 ನೆದರ್ಲೆಂಡ್ ಆಟಗಾರ ಟ್ಯಾಲ್ ಗ್ರೀಕ್ಸ್ಪೂರ್ ವಿರುದ್ಧ ಆಡಲಿದ್ದಾರೆ. ವಿಶ್ವ ನಂ. 72 ನಗಾಲ್ಗಿಂತ ಗ್ರೀನ್ಸ್ಪೂರ್ ಉನ್ನತ ಶ್ರೇಯಾಂಕಿತನಾಗಿದ್ದರೂ, ಸದ್ಯ ಉತ್ತಮ ಲಯದಲ್ಲಿರುವ ನಗಾಲ್ರಿಂದ ಸಕಾರಾತ್ಮಕ ಫಲಿತಾಂಶ ನಿರೀಸಬಹುದಾಗಿದೆ. ಡಬಲ್ಸ್ನಲ್ಲಿ ರೋಹನ್ ಬೋಪಣ್ಣ ಕಣಕ್ಕಿಳಿಯಲಿದ್ದಾರೆ.