ವೆಲ್ಲಿಂಗ್ಟನ್: ನ್ಯೂಜಿಲೆಂಡ್ ನೆಲದಲ್ಲಿ ಟಿ20 ಮತ್ತು ಏಕದಿನ ಸರಣಿಗಳಲ್ಲಿ ಗೆದ್ದು ಇತಿಹಾಸ ನಿರ್ಮಿಸಿದ ಬಳಿಕ ಭಾರತ ತಂಡವೀಗ ಟೆಸ್ಟ್ ಸರಣಿಯಲ್ಲೂ ಜಯಿಸಿ ಕ್ಲೀನ್ಸ್ವೀಪ್ ಸಾಧಿಸುವ ತವಕದಲ್ಲಿದೆ. ಆತಿಥೇಯ ನ್ಯೂಜಿಲೆಂಡ್ ವಿರುದ್ಧದ ಎರಡು ಪಂದ್ಯಗಳ ಟೆಸ್ಟ್ ಸರಣಿಗೆ ಗುರುವಾರ ಬೇಸಿನ್ ರಿಸರ್ವ್ ಮೈದಾನದಲ್ಲಿ ಚಾಲನೆ ಸಿಗಲಿದೆ. ಶುಭಮಾನ್ ಗಿಲ್ ಬಳಗಕ್ಕೆ ಐಸಿಸಿ ವಿಶ್ವ ಟೆಸ್ಟ್ ಚಾಂಪಿಯನ್ಷಿಪ್ ಫೈನಲ್ಗೇರುವ ಆಸೆ ಜೀವಂತವಿಟ್ಟುಕೊಳ್ಳುವ ನಿಟ್ಟಿನಲ್ಲಿ ಇದು ಮಹತ್ವದ ಸರಣಿಯಾಗಿದೆ. ಜತೆಗೆ 2024ರಲ್ಲಿ ತವರಿನಲ್ಲಿ ಕಿವೀಸ್ ಎದುರು ಅನುಭವಿಸಿದ್ದ ಟೆಸ್ಟ್ ಸರಣಿ ಸೋಲಿಗೂ ಸೇಡು ತೀರಿಸಿಕೊಳ್ಳುವ ಅವಕಾಶ ಟೀಮ್ ಇಂಡಿಯಾ ಮುಂದಿದೆ.
ನ್ಯೂಜಿಲೆಂಡ್ ತಂಡ ಟಿ20, ಏಕದಿನ ಸರಣಿಯಲ್ಲಿ ಸೋತಿದ್ದರೂ, ಟೆಸ್ಟ್ ಸರಣಿಯಲ್ಲಿ ಫೇವರಿಟ್ ಆಗಿಯೇ ಕಣಕ್ಕಿಳಿಯಲಿದೆ. ಇಂಗ್ಲೆಂಡ್ನಲ್ಲಿ ಆಡಿದ ಕೊನೇ ಟೆಸ್ಟ್ ಸರಣಿಯಲ್ಲಿ 2-1ರಿಂದ ಗೆದ್ದಿರುವುದು ಇದಕ್ಕೆ ಪ್ರಮುಖ ಕಾರಣ. ಜತೆಗೆ ಹಾಲಿ ಡಬ್ಲ್ಯುಟಿಸಿ ಅಂಕಪಟ್ಟಿಯಲ್ಲೂ ಕಿವೀಸ್ ಸದ್ಯ ಅಗ್ರಸ್ಥಾನದಲ್ಲಿದೆ. ಇನ್ನು ಭಾರತ ತಂಡದಲ್ಲಿ ರಿಷಭ್ ಪಂತ್ ಹೊರತಾಗಿ ಎಲ್ಲ ಬ್ಯಾಟರ್ಗಳು ಇದೇ ಮೊದಲ ಬಾರಿಗೆ ಕಿವೀಸ್ ನೆಲದಲ್ಲಿ ಟೆಸ್ಟ್ ಆಡಲಿದ್ದಾರೆ. ಕಳೆದ ವರ್ಷ ಇಂಗ್ಲೆಂಡ್ ನೆಲದಲ್ಲಿ ತೋರಿದ ನಿರ್ವಹಣೆಯನ್ನೇ ಭಾರತೀಯ ಬ್ಯಾಟರ್ಗಳು ಪುನರಾವರ್ತಿಸಿದರೆ ಕಿವೀಸ್ಗೂ ಸೆಡ್ಡು ಹೊಡೆಯಬಹುದು.
ಸರಣಿಯಲ್ಲಿ ಉಭಯ ತಂಡಗಳ ವೇಗಿಗಳ ಸಮರವನ್ನೂ ನಿರೀಸಲಾಗಿದೆ. ಜಸ್ಪ್ರೀತ್ ಬುಮ್ರಾ, ಮೊಹಮದ್ ಸಿರಾಜ್, ವೈಟ್ಬಾಲ್ ಸರಣಿಯಲ್ಲಿ ಮಿಂಚಿದ ಗುರ್ನೂರ್ ಬ್ರಾರ್, ಅಂಶುಲ್ ಕಂಬೋಜ್ ಹಾಜರಿಯಿಂದ ಭಾರತ ಕೂಡ ಬಲಿಷ್ಠ ವೇಗದ ಬೌಲಿಂಗ್ ಪಡೆ ಹೊಂದಿದ್ದರೆ, ಮ್ಯಾಟ್ ಹೆನ್ರಿ, ಜೇಮಿಸನ್, ನಾಥನ್ ಸ್ಮಿತ್, ಜೇಕಬ್ ಡಫಿ ಭಾರತೀಯ ಬ್ಯಾಟರ್ಗಳನ್ನು ಕಂಗೆಡಿಸಲು ಸಜ್ಜಾಗಿದ್ದಾರೆ.
2009ರಲ್ಲಿ ಕಿವೀಸ್ ನೆಲದಲ್ಲಿ ಕಂಡ ಕೊನೇ ಟೆಸ್ಟ್ ಸರಣಿ ಗೆಲುವಿನಲ್ಲಿ ಆರಂಭಿಕ ಬ್ಯಾಟರ್ ಆಗಿ ಪ್ರಮುಖ ಪಾತ್ರ ನಿರ್ವಹಿಸಿದ್ದ ಗೌತಮ್ ಗಂಭೀರ್ಗೆ ಈಗ ಮುಖ್ಯ ಕೋಚ್ ಆಗಿ ತನ್ನ ವರ್ಚಸ್ಸು ವೃದ್ಧಿಸಿಕೊಳ್ಳಲು ಇದು ಮಹತ್ವದ ಸರಣಿಯಾಗಿದೆ.
ಟೀಮ್ ನ್ಯೂಸ್:
ಭಾರತ: ಅಗ್ರ 6 ಕ್ರಮಾಂಕ ಖಚಿತವಿದೆ. 7ನೇ ಕ್ರಮಾಂಕದಲ್ಲಿ ಜಡೇಜಾ ಆಡುವ ಸಾಧ್ಯತೆ ಹೆಚ್ಚಿದ್ದರೂ, ಕಿವೀಸ್ನ ಅಗ್ರ ನಾಲ್ವರು ಎಡಗೈ ಬ್ಯಾಟರ್ಗಳಾಗಿರುವುದರಿಂದ, ಆ್ ಸ್ಪಿನ್ನರ್ ವಾಷಿಂಗ್ಟನ್ ಸುಂದರ್ ಆಡಿಸುವ ಲೆಕ್ಕಾಚಾರವೂ ಇದೆ. ನಾಲ್ವರು ವೇಗಿಗಳನ್ನು ಆಡಿಸುವೆವು ಎಂದು ನಾಯಕ ಗಿಲ್ ಈಗಾಗಲೆ ಘೋಷಿಸಿದ್ದಾರೆ. ಈ ಪೈಕಿ ಬುಮ್ರಾ, ಸಿರಾಜ್ ಸ್ಥಾನ ಖಚಿತವಿದೆ. 3ನೇ ವೇಗದ ಬೌಲರ್ ಸ್ಥಾನಕ್ಕೆ ಕನ್ನಡಿಗ ಪ್ರಸಿದ್ಧಕೃಷ್ಣ ಮತ್ತು ಏಕದಿನ ಸರಣಿಯಲ್ಲಿ ಮಿಂಚಿದ ಗುರ್ನೂರ್ ಸ್ಪರ್ಧೆಯಲ್ಲಿದ್ದರೆ, 4ನೇ ವೇಗದ ಬೌಲರ್ ಸ್ಥಾನಕ್ಕೆ ಆಲ್ರೌಂಡರ್ ನಿತೀಶ್ ರೆಡ್ಡಿ ಜತೆಗೆ ಅಂಶುಲ್ ಕಂಬೋಜ್ ಮತ್ತು ಬ್ಯಾಟಿಂಗ್ನಲ್ಲೂ ಮಿಂಚಬಲ್ಲ ಆಕಾಶ್ ದೀಪ್ ಪೈಪೋಟಿಯಲ್ಲಿದ್ದಾರೆ.
ಸಂಭಾವ್ಯ ತಂಡ: ಜೈಸ್ವಾಲ್, ರಾಹುಲ್, ಪಡಿಕ್ಕಲ್, ಗಿಲ್ (ನಾಯಕ), ಪಂತ್ (ವಿ.ಕೀ), ಜುರೆಲ್, ಜಡೇಜಾ/ವಾಷಿಂಗ್ಟನ್, ನಿತೀಶ್ ರೆಡ್ಡಿ/ಕಂಬೋಜ್/ಆಕಾಶ್ದೀಪ್, ಬುಮ್ರಾ, ಸಿರಾಜ್, ಪ್ರಸಿದ್ಧಕೃಷ್ಣ/ಗುರ್ನೂರ್.
ನ್ಯೂಜಿಲೆಂಡ್: ಕಾನ್ವೇ, ರಚಿನ್ ರವೀಂದ್ರ ಫಿಟ್ ಆಗಿರುವುದರಿಂದ ಕಿವೀಸ್ ಕೂಡ ಅಗ್ರ 6 ಕ್ರಮಾಂಕದ ಖಚಿತತೆಯಲ್ಲಿದೆ. ಸ್ಯಾಂಟ್ನರ್ ಗಾಯದಿಂದ ಅಲಭ್ಯರಾಗಿರುವುದರಿಂದ ಗ್ಲೆನ್ ಫಿಲಿಪ್ಸ್ ಸ್ಪಿನ್ ಬೌಲಿಂಗ್ ಆಲ್ರೌಂಡರ್ ಆಗಿ 7ನೇ ಕ್ರಮಾಂಕದಲ್ಲಿ ಆಡಲಿದ್ದಾರೆ. ನಾಲ್ವರು ವೇಗಿಗಳ ಪೈಕಿ ಮ್ಯಾಟ್ ಹೆನ್ರಿ, ಜೇಮಿಸನ್ ಮತ್ತು ನಾಥನ್ ಸ್ಮಿತ್ ಸ್ಥಾನ ಖಚಿತವಿದೆ. 4ನೇ ವೇಗದ ಬೌಲರ್ ಸ್ಥಾನಕ್ಕೆ ಜೇಕಬ್ ಡಫಿ ಮತ್ತು ಬ್ಲೇರ್ ಟಿಕ್ನರ್ ಪೈಪೋಟಿಯಲ್ಲಿದ್ದಾರೆ.
ಸಂಭಾವ್ಯ ತಂಡ: ಲಾಥಮ್ (ನಾಯಕ), ಕಾನ್ವೇ, ನಿಕೋಲ್ಸ್, ರಚಿನ್, ಡೆರಿಲ್ ಮಿಚೆಲ್, ಬ್ಲಂಡೆಲ್ (ವಿ.ಕೀ), ಫಿಲಿಪ್ಸ್, ನಾಥನ್ ಸ್ಮಿತ್, ಜೇಮಿಸನ್, ಹೆನ್ರಿ, ಡಫಿ/ಟಿಕ್ನರ್.
*ಆರಂಭ: ಮುಂಜಾನೆ 3.30
*ನೇರಪ್ರಸಾರ: ಸೋನಿ ಸ್ಪೋರ್ಟ್ಸ್, ಸೋನಿ ಲಿವ್.
ಮುಖಾಮುಖಿ: 65
ಭಾರತ: 22
ನ್ಯೂಜಿಲೆಂಡ್: 16
ಡ್ರಾ: 27
ನ್ಯೂಜಿಲೆಂಡ್ನಲ್ಲಿ: 25
ಭಾರತ: 5
ನ್ಯೂಜಿಲೆಂಡ್: 10
ಡ್ರಾ: 10
3ನೇ ಬಾರಿ ಸರಣಿ ಗೆಲುವಿನ ಕನಸು
ಭಾರತ ತಂಡ ನ್ಯೂಜಿಲೆಂಡ್ ನೆಲದಲ್ಲಿ 11ನೇ ಬಾರಿ ಟೆಸ್ಟ್ ಸರಣಿ ಆಡಲಿದೆ. ಈ ಹಿಂದಿನ 10 ಸರಣಿಗಳಲ್ಲಿ ಎರಡರಲ್ಲಿ ಗೆದ್ದಿರುವ ಭಾರತ, ಆರರಲ್ಲಿ ಸೋಲುಂಡಿದೆ. ಎರಡರಲ್ಲಿ ಸಮಬಲ ಸಾಧಿಸಿದೆ. 1967-68ರ ಮೊಟ್ಟಮೊದಲ ನ್ಯೂಜಿಲೆಂಡ್ ಪ್ರವಾಸದ ಟೆಸ್ಟ್ ಸರಣಿಯಲ್ಲಿ 3-1ರಿಂದ ಗೆದ್ದಿದ್ದ ಭಾರತ ಬಳಿಕ 2008-09ರಲ್ಲಿ ಧೋನಿ ಸಾರಥ್ಯದಲ್ಲಿ 41 ವರ್ಷಗಳ ಬಳಿಕ 2ನೇ ಬಾರಿ ಸರಣಿ ಜಯಿಸಿತ್ತು. ಆಗ ಸರಣಿಯ 2ನೇ ಪಂದ್ಯದ 2ನೇ ಇನಿಂಗ್ಸ್ನಲ್ಲಿ ಬರೋಬ್ಬರಿ 436 ಎಸೆತ ಆಡಿ ಭಾರತದ ಸೋಲು ತಪ್ಪಿಸಿ ಸರಣಿ ಗೆಲುವಿಗೆ ನೆರವಾಗಿದ್ದ ಗೌತಮ್ ಗಂಭೀರ್ ಈಗ ತಂಡದ ಮುಖ್ಯ ಕೋಚ್ ಆಗಿದ್ದಾರೆ. ಈ ಬಾರಿ ಭಾರತ 17 ವರ್ಷಗಳ ಬಳಿಕ ಕಿವೀಸ್ ನೆಲದಲ್ಲಿ ಸರಣಿ ಜಯಿಸುವ ಕನಸಿನಲ್ಲಿದೆ. 2008&09ರ ನಂತರದಲ್ಲಿ ಕಿವೀಸ್ ನೆಲದಲ್ಲಿ ಆಡಿದ 2 ಟೆಸ್ಟ್ ಸರಣಿಗಳಲ್ಲೂ ಭಾರತ ಸೋತಿತ್ತು.
ಡಬ್ಲ್ಯುಟಿಸಿ ಫೈನಲ್ ಲೆಕ್ಕಾಚಾರ
ಐಸಿಸಿ ವಿಶ್ವ ಟೆಸ್ಟ್ ಚಾಂಪಿಯನ್ಷಿಪ್ (ಡಬ್ಲ್ಯುಟಿಸಿ) 2025-27ರ ಸಾಲಿನ ಅಂಕಪಟ್ಟಿಯಲ್ಲಿ ಭಾರತ ಸದ್ಯ ಶೇ.51.52 ಅಂಕಗಳೊಂದಿಗೆ 4ನೇ ಸ್ಥಾನದಲ್ಲಿದೆ. ಈ ಸರಣಿಯ 2 ಪಂದ್ಯಗಳ ಬಳಿಕ ಭಾರತ ಮುಂದಿನ ವರ್ಷಾರಂಭದಲ್ಲಿ ತವರಿನಲ್ಲಿ ಆಸೀಸ್ ವಿರುದ್ಧ 5 ಟೆಸ್ಟ್ ಆಡಲಿದೆ. ಈ ಉಳಿದ 7ರಲ್ಲಿ ಎಲ್ಲದರಲ್ಲೂ ಗೆದ್ದರೆ ಭಾರತ ಶೇ.70.37 ಅಂಕಗಳೊಂದಿಗೆ ಫೈನಲ್ಗೇರುವ ಅವಕಾಶ ಹೆಚ್ಚಿದೆ. 6 ಜಯ, 1 ಡ್ರಾ ಕಂಡರೆ ಶೇ.66.67 ಅಂಕದೊಂದಿಗೆ ಇತರ ಫಲಿತಾಂಶಗಳನ್ನೂ ಅವಲಂಬಿಸಬೇಕಾಗುತ್ತದೆ. 6ರಲ್ಲಿ ಗೆದ್ದು, 1ರಲ್ಲಿ ಸೋತರೆ ಶೇ.64.81 ಅಂಕದೊಂದಿಗೆ ಕ್ಷೀಣ ಅವಕಾಶ ಹೊಂದಿರಲಿದೆ. ನ್ಯೂಜಿಲೆಂಡ್ (ಶೇ.72.22) ಸದ್ಯ ಅಂಕಪಟ್ಟಿಯ ಅಗ್ರಸ್ಥಾನದಲ್ಲಿದ್ದರೆ, ಹಾಲಿ ಚಾಂಪಿಯನ್ ದಕ್ಷಿಣ ಆಫ್ರಿಕಾ (ಶೇ.71.43) ಮತ್ತು ಆಸ್ಟ್ರೆಲಿಯಾ (ಶೇ.69.23) ನಂತರದಲ್ಲಿವೆ. ಕಿವೀಸ್ಗೆ ಹಾಲಿ ಆವೃತ್ತಿಯಲ್ಲಿ ಇನ್ನು 10 ಟೆಸ್ಟ್ ಬಾಕಿ ಇದ್ದು, ಫೈನಲ್ಗೇರಲು ಕನಿಷ್ಠ 7ರಲ್ಲಿ ಗೆಲ್ಲಬೇಕಿದೆ. ಆಸೀಸ್ ವಿರುದ್ಧದ ತವರಿನ ಸರಣಿ ಗೆಲುವಿನ ಬಳಿಕ ದಣ ಆಫ್ರಿಕಾ ಫೈನಲ್ಗೇರುವ ನೆಚ್ಚಿನ ತಂಡವೆನಿಸಿದೆ. ಆಸೀಸ್ಗೆ ಭಾರತ ವಿರುದ್ಧದ ಸರಣಿ ನಿರ್ಣಾಯಕವಾಗಲಿದೆ.
*8: ಭಾರತ ತಂಡ ವೆಲ್ಲಿಂಗ್ಟನ್ನಲ್ಲಿ ಇದುವರೆಗೆ 8 ಟೆಸ್ಟ್ ಆಡಿದ್ದು, 5ರಲ್ಲಿ ಸೋತು, 2ರಲ್ಲಿ ಡ್ರಾ ಸಾಧಿಸಿದೆ. 1968ರಲ್ಲಿ ಏಕಮಾತ್ರ ಟೆಸ್ಟ್ ಜಯಿಸಿದೆ. ಕಿವೀಸ್ ಇಲ್ಲಿ ಆಡಿರುವ 70 ಟೆಸ್ಟ್ಗಳಲ್ಲಿ 24ರಲ್ಲಿ ಗೆದ್ದು, 22ರಲ್ಲಿ ಸೋತಿದೆ. 24ರಲ್ಲಿ ಡ್ರಾ ಸಾಧಿಸಿದೆ.
ಪಿಚ್ ರಿಪೋರ್ಟ್
ಬೇಸಿನ್ ರಿಸರ್ವ್ ಮೈದಾನ ಟೆಸ್ಟ್ ಪಂದ್ಯಕ್ಕೆ ಯಾವಾಗಲೂ ಹಸಿರು ಪಿಚ್ ಹೊಂದಿರುತ್ತದೆ. ಆದರೆ ಕೆಲವೊಮ್ಮೆ ಇದು ಮೊದಲ ಅವಧಿಯ ಬಳಿಕ ಫ್ಲ್ಯಾಟ್ ಪಿಚ್ನಂತೆ ವರ್ತಿಸುತ್ತದೆ. ಸಾಮಾನ್ಯವಾಗಿ ಪಂದ್ಯದ ಮೊದಲ 2 ದಿನ ಬೌಲರ್ಗಳಿಗೆ ಹೆಚ್ಚಿನ ಸಹಕಾರ ನೀಡುತ್ತದೆ. ಹೀಗಾಗಿ ಉಭಯ ತಂಡಗಳ ಮೊದಲ ಇನಿಂಗ್ಸ್ ಪಂದ್ಯದ ಲಿತಾಂಶದಲ್ಲಿ ನಿರ್ಣಾಯಕವೆನಿಸುತ್ತದೆ. ವೆಲ್ಲಿಂಗ್ಟನ್ನಲ್ಲಿ ಗಾಳಿ ಹೆಚ್ಚಿರುವುದು ಕೂಡ ಬ್ಯಾಟರ್ಗಳಿಗೆ ಹೆಚ್ಚಿನ ಸವಾಲೊಡ್ಡುತ್ತದೆ. ಪಂದ್ಯದ ಕೊನೇ 2 ದಿನ ಮೋಡ ಕವಿದ ವಾತಾವರಣ ಇರಲಿದ್ದರೂ, ಮಳೆ ಕಾಡುವ ಭೀತಿ ಇಲ್ಲ.
9: ಭಾರತದ ಗರಿಷ್ಠ ಟೆಸ್ಟ್ ವಿಕೆಟ್ ಸಾಧಕ ಬೌಲರ್ಗಳ ಪಟ್ಟಿಯಲ್ಲಿ ಬುಮ್ರಾ (234) ಸದ್ಯ 11ನೇ ಸ್ಥಾನದಲ್ಲಿದ್ದಾರೆ. ಈ ಸರಣಿಯಲ್ಲಿ ಅವರು ಕನ್ನಡಿಗರಾದ ಜಾವಗಲ್ ಶ್ರೀನಾಥ್ (236) ಮತ್ತು ಬಿಎಸ್ ಚಂದ್ರಶೇಖರ್ರನ್ನು (242) ಹಿಂದಿಕ್ಕಿ 9ನೇ ಸ್ಥಾನಕ್ಕೇರುವ ಅವಕಾಶ ಹೊಂದಿದ್ದಾರೆ.