ಜಲಂಧರ್: ಪಂಜಾಬ್ನ ಶತಾಯುಷಿ ಮ್ಯಾರಥಾನ್ ಓಟಗಾರ ಫೌಜಾ ಸಿಂಗ್ ಸೋಮವಾರ ಸಂಜೆ ವಾಕಿಂಗ್ಗೆ ಹೋಗಿದ್ದ ವೇಳೆ ಕಾರು ಡಿಕ್ಕಿಯಾಗಿ ಮೃತಪಟ್ಟಿದ್ದಾರೆ. ವಿಶ್ವದ ಅತಿಹಿರಿಯ ಮ್ಯಾರಥಾನ್ ಓಟಗಾರ ಎನಿಸಿದ್ದ ಅವರಿಗೆ 114 ವರ್ಷ ವಯಸ್ಸಾಗಿತ್ತು.
ಜಲಂಧರ್ ಜಿಲ್ಲೆಯ ಬಿಯಾಸ್ ಹಳ್ಳಿಯ ರಸ್ತೆಯಲ್ಲಿ ನಡೆದುಕೊಂಡು ಹೋಗುತ್ತಿದ್ದಾಗ ಕಾರು ಡಿಕ್ಕಿಯಾಗಿ ಅವರ ತಲೆಗೆ ಗಾಯವಾಗಿತ್ತು. ಕೂಡಲೆ ಸಮೀಪದ ಖಾಸಗಿ ಆಸ್ಪತ್ರೆಗೆ ಅವರನ್ನು ಕರೆದೊಯ್ದರೂ, ಚಿಕಿತ್ಸೆ ಫಲಿಸದೆ ಮೃತಪಟ್ಟರು. ಅಪಘಾತದ ನಂತರ ಕಾರು ಚಾಲಕ ಪರಾರಿಯಾಗಿದ್ದು, ಆತನ ಪತ್ತೆಗೆ ಜಲಂಧರ್ ಪೊಲೀಸರು ಹುಡುಕಾಟ ನಡೆಸಿದ್ದಾರೆ. ಜತೆಗೆ ಚಾಲಕನ ವಿರುದ್ಧ ಅತಿವೇಗ ಮತ್ತು ರ್ನಿಲಕ್ಷ್ಯದ ಚಾಲನೆ ಪ್ರಕರಣ ದಾಖಲಿಸಲಾಗಿದೆ.
1911ರಲ್ಲಿ ರೈತರ ಕುಟುಂಬದಲ್ಲಿ ಜನಿಸಿದ್ದ ಫೌಜಾ ಸಿಂಗ್ , ಬಾಲ್ಯದಲ್ಲಿ ಅತ್ಯಂತ ದುರ್ಬಲ ಕಾಲುಗಳನ್ನು ಹೊಂದಿದ್ದ ಕಾರಣ 5ನೇ ವಯಸ್ಸಿನ ವೇಳೆಗೆ ನಡೆಯಲು ಆರಂಭಿಸಿದ್ದರು. ವೃದ್ದಾಪ್ಯದಲ್ಲಿ ಹಲವಾರು ಅಂತಾರಾಷ್ಟ್ರೀಯ ಮ್ಯಾರಥಾನ್ ಸ್ಪರ್ಧೆಗಳಲ್ಲಿ ಭಾಗವಹಿಸಿ ಜಾಗತಿಕವಾಗಿಯೂ ಗಮನಸೆಳೆದಿದ್ದರು. ಜತೆಗೆ ಟರ್ಬನ್ಡ್ ಟೊರ್ನಾಡೊ (ಪೇಟ ತೊಟ್ಟ ಸುಂಟರಗಾಳಿ) ಎಂದೇ ಹೆಸರಾಗಿದ್ದರು. ಜೀವನೋತ್ಸಾಹಕ್ಕೆ ಸ್ಫೂರ್ತಿಯಾಗಿದ್ದ ಜತೆಗೆ ಅವರ ದೈಹಿಕ ಸಹಿಷ್ಣುತೆ ಮತ್ತು ಕ್ರೀಡಾ ಮನೋಭಾವವೂ ಎಲ್ಲರ ಹೃದಯ ಗೆದ್ದಿತ್ತು. ಪತ್ನಿ, ಪುತ್ರಿ ಮೃತಪಟ್ಟ ಬಳಿಕ 1990ರಿಂದ ಪುತ್ರನೊಂದಿಗೆ ಲಂಡನ್ನಲ್ಲಿ ನೆಲೆಸಿದ್ದ ಅವರು ಮೂರು ವರ್ಷಗಳ ಹಿಂದೆಯಷ್ಟೇ ತವರೂರಿಗೆ ಮರಳಿದ್ದರು. 2012ರ ಲಂಡನ್ ಒಲಿಂಪಿಕ್ಸ್ನ ಕ್ರೀಡಾಜ್ಯೋತಿ ಹಿಡಿದವರಲ್ಲಿ ಒಬ್ಬರಾಗಿದ್ದರು ಮತ್ತು ಬ್ರಿಟನ್ ರಾಣಿಯಿಂದಲೂ ಗೌರವ ಪಡೆದಿದ್ದರು.
1999ರಲ್ಲಿ ಚಾರಿಟಿಗಾಗಿ ತನ್ನ 89ನೇ ವಯಸ್ಸಿನಲ್ಲಿ ಮ್ಯಾರಥಾನ್ ಓಡಲು ಆರಂಭಿಸಿದ್ದ ಫೌಜಾ ಸಿಂಗ್, ಪ್ರತಿಷ್ಠಿತ ಲಂಡನ್, ನ್ಯೂಯಾರ್ಕ್, ಹಾಂಕಾಂಗ್ ಮ್ಯಾರಥಾನ್ಗಳಲ್ಲೂ ಓಡಿದ್ದರು. ಟೊರಾಂಟೊದ ಆಹ್ವಾನಿತ ಓಟದ ಸ್ಪರ್ಧೆಗೆ ಅವರದೇ ಹೆಸರಿಡಲಾಗಿದೆ. ತಮ್ಮ ವಯೋಮಿತಿ ವಿಭಾಗದಲ್ಲಿ ಅವರು ಹಲವಾರು ವಿಶ್ವದಾಖಲೆಗಳನ್ನೂ ಬರೆದಿದ್ದಾರೆ. ಆದರೆ ತಮ್ಮ ವಯಸ್ಸು ಖಚಿತಪಡಿಸುವ ಜನನ ಪ್ರಮಾಣಪತ್ರ ಹೊಂದಿರದ ಕಾರಣ ಈ ದಾಖಲೆಗಳು ಗಿನ್ನೆಸ್ ವರ್ಲ್ಡ್ ರೆಕಾರ್ಡ್ಸ್ನಲ್ಲಿ ಸ್ಥಾನ ಪಡೆದಿಲ್ಲ.
ಸಿಖ್ ಸಂಸತಿಯನ್ನು ಎಲ್ಲರಿಗೂ ಮನದಟ್ಟು ಮಾಡುವ ಗುರಿಯನ್ನೂ ಹೊಂದಿದ್ದರು. ಪಂಜಾಬ್ನ ಮಾಜಿ ಮಾಹಿತಿ ಆಯುಕ್ತ ಮತ್ತು ಲೇಖಕ ಖುಶ್ವಂತ್ ಸಿಂಗ್ "ದಿ ಟರ್ಬನ್ಡ್ ಟೊರ್ನಾಡೊ' ಹೆಸರಿನಲ್ಲಿ ಫೌಜಾ ಸಿಂಗ್ ಸಿಂಗ್ ಅವರ 114 ಪುಟಗಳ ಜೀವನಚರಿತ್ರೆಯನ್ನೂ ಬರೆದಿದ್ದರು.
ಪ್ರಧಾನಿ ಮೋದಿ ಸಂತಾಪ
ಫೌಜಾ ಸಿಂಗ್ ರಸ್ತೆ ಅಪಘಾತದಲ್ಲಿ ಮೃತಪಟ್ಟ ಬಗ್ಗೆ ಪ್ರಧಾನಿ ನರೇಂದ್ರ ಮೋದಿ ಕಂಬನಿ ಮಿಡಿದಿದ್ದು, "ವಿಶಿಷ್ಟ ವ್ಯಕ್ತಿತ್ವ ಮತ್ತು ಫಿಟ್ನೆಸ್ ವಿಷಯದಲ್ಲಿ ಭಾರತದ ಯುವಕರನ್ನು ಪ್ರೇರೇಪಿಸಿದ ರೀತಿಯಿಂದಾಗಿ ಅವರು ಅಸಾಧಾರಣವಾಗಿದ್ದರು. ಫೌಜಾ ಸಿಂಗ್ ಜೀ ಸಾವಿನಿಂದ ತೀವ್ರ ದುಃಖವಾಗಿದೆ' ಎಂದಿದ್ದಾರೆ.