ಅಹಮದಾಬಾದ್: ಐಪಿಎಲ್ 18ರಲ್ಲಿ ಶನಿವಾರ ನಡೆಯಲಿರುವ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್ ಮತ್ತು ಗುಜರಾತ್ ಟೈಟಾನ್ಸ್ ಮುಖಾಮುಖಿ ಆಗಲಿದ್ದು, ಈ ವೇಳೆ ರೋಹಿತ್ ಶರ್ಮ-ಮೊಹಮದ್ ಸಿರಾಜ್ ಮುಖಾಮುಖಿ ಕುತೂಹಲ ಕೆರಳಿಸಿದೆ.
ಕಳೆದ ಚಾಂಪಿಯನ್ಸ್ ಟ್ರೋಫಿಗೆ ವೇಗಿ ಮೊಹಮದ್ ಸಿರಾಜ್ ಅವರನ್ನು ಭಾರತ ತಂಡದಿಂದ ಕಡೆಗಣಿಸಿದ ವೇಳೆ ನಾಯಕ ರೋಹಿತ್ ಶರ್ಮ, ಹೊಸ ಚೆಂಡಿನಲ್ಲಷ್ಟೇ ಸಿರಾಜ್ ಯಶ ಕಂಡಿದ್ದು, ಹಳೆಯ ಚೆಂಡಿನಲ್ಲಿ ಪರಿಣಾಮಕಾರಿ ಎನಿಸಿಲ್ಲ ಎಂಬ ಸಮರ್ಥನೆ ನೀಡಿದ್ದರು. ಇತ್ತೀಚೆಗೆ ಈ ಬಗ್ಗೆ ಪ್ರತಿಕ್ರಿಯಿಸಿದ್ದ ಸಿರಾಜ್, ವಿಶ್ವದ ಅಗ್ರ 10 ವೇಗಿಗಳ ಪೈಕಿ ಕಳೆದೊಂದು ವರ್ಷದಲ್ಲಿ ನಾನೇ ಗರಿಷ್ಠ ವಿಕೆಟ್ ಗಳಿಸಿರುವೆ. ಎಕಾನಮಿ ಕೂಡ ಕಡಿಮೆಯಾಗಿದೆ. ಅಂಕಿ-ಅಂಶಗಳೇ ಎಲ್ಲವನ್ನು ಹೇಳುತ್ತಿವೆ. ನಾನು ಹೊಸ-ಹಳೆಯ ಚೆಂಡಿನಲ್ಲಿ ಉತ್ತಮ ನಿರ್ವಹಣೆ ತೋರಿರುವೆ ಎಂದಿದ್ದರು. ನಂತರ ಇದಕ್ಕೆ ತೇಪೆ ಹಚ್ಚಿ, ರೋಹಿತ್ ತಂಡದ ಒಳಿತಿಗಾಗಿ ನಿರ್ಧಾರ ಕೈಗೊಂಡರು. ದುಬೈನ ಸ್ಪಿನ್ ಸ್ನೇಹಿ ಪಿಚ್ನಲ್ಲಿ ಅವರಿಗೆ ನನ್ನ ಅಗತ್ಯವಿರಲಿಲ್ಲ ಎಂದಿದ್ದರು.
ಗುಜರಾತ್ ಪರ ಆಡಿದ ಮೊದಲ ಪಂದ್ಯದಲ್ಲಿ ಸಿರಾಜ್ 4 ಓವರ್ಗಳಲ್ಲಿ 54 ರನ್ ಬಿಟ್ಟುಕೊಟ್ಟಿದ್ದರು. ಅದರಲ್ಲೂ ಇನಿಂಗ್ಸ್ನ ಅಂತಿಮ ಓವರ್ ಒಂದರಲ್ಲೇ ಬರೋಬ್ಬರಿ 23 ರನ್ ನೀಡಿದ್ದರು. ಹೀಗಾಗಿ ರೋಹಿತ್ ಹೇಳಿಕೆ ಸರಿಯೇ ಅಥವಾ ಸಿರಾಜ್ ಅದನ್ನು ಸುಳ್ಳಾಗಿಸುವರೇ ಎಂಬುದು ಇವರಿಬ್ಬರ ಮುಖಾಮುಖಿಯಲ್ಲಿ ಸ್ಪಷ್ಟವಾಗಬೇಕಿದೆ.