ಬೆಂಗಳೂರು ಐಟಿಎಫ್​ ಟೆನಿಸ್: ಅಚ್ಚರಿಯ ಗೆಲುವಿನೊಂದಿಗೆ ಸೆಮಿಫೈನಲ್​ಗೇರಿದ ವೈಷ್ಣವಿ

ಭಾರತದ ಯುವ ಆಟಗಾರ್ತಿ ವೈಷ್ಣವಿ ಅಡ್ಕರ್ (vaishnavi adkar)​ ವೃತ್ತೀಜಿವನದ ಅತಿದೊಡ್ಡ ಗೆಲುವು ದಾಖಲಿಸುವ ಮೂಲಕ ಕೆಪಿಬಿ ಟ್ರಸ್ಟ್​ ಐಟಿಎಫ್​​ ವುಮೆನ್ಸ್​ ಓಪನ್​ ಡಬ್ಲ್ಯು100 ಬೆಂಗಳೂರು ಟೆನಿಸ್​ ಟೂರ್ನಿಯ ಸಿಂಗಲ್ಸ್​ (ITF Women’s Open Bengaluru) ವಿಭಾಗದಲ್ಲಿ ಸೆಮಿಫೈನಲ್​ಗೇರಿದರು. ಡಬಲ್ಸ್​ ವಿಭಾಗದಲ್ಲಿ ಭಾರತದ ಅಂಕಿತಾ ರೈನಾ ಇಂಡೋನೇಷ್ಯಾದ ಪ್ರಿಸ್ಕಾ ಮ್ಯಾಡೆಲಿನ್​ ನುಗ್ರೋಹೊ ಜತೆಗೂಡಿ ಪ್ರಶಸ್ತಿ ಸುತ್ತಿಗೇರಿದರು.

ಎಸ್​.ಎಂ. ಕೃಷ್ಣ ಟೆನಿಸ್​ ಸ್ಟೇಡಿಯಂನಲ್ಲಿ ನಡೆಯುತ್ತಿರುವ ಟೂರ್ನಿಯಲ್ಲಿ ಶುಕ್ರವಾರ ನಡೆದ ಕ್ವಾರ್ಟರ್​ಫೈನಲ್​ನಲ್ಲಿ ಪುಣೆಯ 21 ವರ್ಷದ ವೈಷ್ಣವಿ ವಿಶ್ವ ನಂ. 148 ಹಾಗೂ 4ನೇ ಶ್ರೇಯಾಂಕಿತೆ ಆಸ್ಟ್ರೆಲಿಯಾದ ಟೇಲಹ್​ ಪ್ರೆಸ್ಟನ್​ ವಿರುದ್ಧ 6-3, 1-6, 6-4 ಸೆಟ್​ಗಳಿಂದ ಅಚ್ಚರಿಯ ಗೆಲುವು ಸಾಧಿಸಿದರು. ವೈಷ್ಣವಿ ಮೊದಲ ಸೆಟ್​ ಗೆಲುವಿನ ಬಳಿಕ 2ನೇ ಸೆಟ್​ನಲ್ಲಿ ಮುಗ್ಗರಿಸಿದರು. ನಿರ್ಣಾಯಕ ಸೆಟ್​ನಲ್ಲಿ ವೈಷ್ಣವಿ 3-3 ಸಮಬಲದ ಬಳಿಕ ಗೆಲುವು ಒಲಿಸಿಕೊಂಡರು.

ವೈಷ್ಣವಿ ಇನ್ನು ಉಪಾಂತ್ಯದಲ್ಲಿ 2ನೇ ಶ್ರೇಯಾಂಕಿತೆ ಥಾಯ್ಲೆಂಡ್​ನ ಲಾನ್​ಲಾನಾ ತಾರಾರುದೀ ವಿರುದ್ಧ ಸೆಣಸಲಿದ್ದಾರೆ. ಇನ್ನೊಂದು ಸೆಮೀಸ್​ನಲ್ಲಿ 3ನೇ ಶ್ರೇಯಾಂಕಿತೆ ಬೆಲ್ಜಿಯಂನ ಹನ್ನೆ ವಂದೆವಿಂಕೆಲ್​ ಮತ್ತು ಅಗ್ರ ಶ್ರೇಯಾಂಕಿತೆ ತಲಿಯಾ ಗಿಬ್ಸನ್​ಗೆ ಆಘಾತ ನೀಡಿದ ರಷ್ಯಾದ ಪೊಲಿನಾ ಇಯಾಟ್ಸೆಂಕೊ ಸೆಣಸಲಿದ್ದಾರೆ.

3ನೇ ಶ್ರೇಯಾಂಕಿತ ಅಂಕಿತಾ ರೈನಾ-ಪ್ರಿಸ್ಕಾ ಜೋಡಿ ಡಬಲ್ಸ್​ ಸೆಮಿಸ್​ನಲ್ಲಿ ಫಿನ್​ಲ್ಯಾಂಡ್​ನ ಅನಾಸ್ಟೆಸಿಯಾ ಕುಲಿಕೋವಾ ಮತ್ತು ರಷ್ಯಾದ ಕ್ರಿಸ್ಟಿಯಾನಾ ಸಿಡೊರೋವಾ ಜೋಡಿಯನ್ನು 6-2, 3-6, 10-5ರಿಂದ ಮಣಿಸಿ ಫೈನಲ್​ಗೇರಿದರು. ನೆದರ್ಲೆಂಡ್​ನ ಜಿಸ್ಮಿನ್​ ಗಿಂಬ್ರೆರೆ ಜತೆಗೂಡಿ ಆಡಿದ ಭಾರತದ ಪ್ರಾರ್ಥನಾ ಥೊಂಬಾರೆ ಸೆಮೀಸ್​ನಲ್ಲಿ ಮುಗ್ಗರಿಸಿದರು.