IPL 2025 : ಐಪಿಎಲ್ ಇತಿಹಾಸದಲ್ಲೇ ರಿಷಭ್ ಪಂತ್ ಹೊಸ ದಾಖಲೆ ಬರೆದಿದ್ದಾರೆ. ನಿನ್ನೆ (ನ.24) ನಡೆದ ಮೊದಲ ದಿನದ ಮೆಗಾ ಹರಾಜಿನಲ್ಲಿ ಪಂತ್ ಅವರು ಅತ್ಯಂತ ದುಬಾರಿ ಆಟಗಾರನೆಂಬ ಹೆಗ್ಗಳಿಕೆ ಗಳಿಸಿದ್ದಾರೆ. ಪಂತ್ಗಾಗಿ ಮೂರು ಫ್ರಾಂಚೈಸಿಗಳು ಬಿಡ್ ಮಾಡಿದವು. ಡೆಲ್ಲಿ ಕಾಪಿಟಲ್ಸ್ ಆರ್ಟಿಎಂ ಕಾರ್ಡ್ ಬಳಸಲು ಸಹ ನಿರ್ಧರಿಸಿತು. ಆದರೆ, ಲಖನೌ ಸೂಪರ್ ಜೈಂಟ್ಸ್ ( ಎಲ್ಎಸ್ಜಿ ) ಫ್ರಾಂಚೈಸಿ, ಬೆಲೆಯನ್ನು 27 ಕೋಟಿ ರೂ.ಗೆ ಹೆಚ್ಚಿಸಿತು. ಈ ಮೂಲಕ ಐಪಿಎಲ್ ಇತಿಹಾಸದಲ್ಲೇ ಅತ್ಯಂತ ದುಬಾರಿ ಆಟಗಾರನನ್ನಾಗಿ ಮಾಡಿದೆ. ಇದರ ನಡುವೆ ಆರ್ಸಿಬಿ ತಂಡವನ್ನು ಎಲ್ಎಸ್ಜಿ ಟ್ರೋಲ್ ಮಾಡಿದೆ.
11.25 ಕೋಟಿ ರೂ.ವರೆಗೂ ಆರ್ಸಿಬಿ ಮತ್ತು ಎಲ್ಎಸ್ಜಿ ನಡುವೆ ಬಿಡ್ಡಿಂಗ್ ನಡೆಯಿತು. ಆದರೆ, ಆರ್ಸಿಬಿ ಬಿಡ್ಡಿಂಗ್ ಮುಂದುವರಿಸಲಿಲ್ಲ. ಅಂತಿಮವಾಗಿ ಪಂತ್, ಎಲ್ಎಸ್ಜಿ ಪಾಲಾದರು. ಬಿಡ್ಡಿಂಗ್ ನಡುವೆಯೇ ಆರ್ಸಿಬಿ, ತನ್ನ ಎಕ್ಸ್ ಖಾತೆಯಲ್ಲಿ ಸ್ಪೈಡರ್ಮ್ಯಾನ್ ಜಿಐಎಫ್ ಬಳಸಿ, ಬಹುಶಃ ಚಿನ್ನಸ್ವಾಮಿಯ ಕಡೆಗೆ? ಎಂದು ಅಡಿಬರಹ ನೀಡಿತ್ತು. ಪರೋಕ್ಷವಾಗಿ ಪಂತ್ ಉಲ್ಲೇಖಿಸಿ ಆರ್ಸಿಬಿ ಈ ಪೋಸ್ಟ್ ಮಾಡಿತು. ಆದರೆ, ಬಿಡ್ಡಿಂಗ್ನಲ್ಲಿ ಪಂತ್ ಅವರನ್ನು ತಮ್ಮ ತಂಡಕ್ಕೆ ಸೆಳೆದುಕೊಂಡ ಎಲ್ಎಸ್ಜಿ, ಆರ್ಸಿಬಿ ಟ್ವೀಟ್ಗೆ ರೀಟ್ವೀಟ್ ಮಾಡಿ ಕ್ಷಮಿಸಿ, ಮಕ್ಕಳೆ ( Sorry Kid ) ಎಂದು ಪೋಸ್ಟ್ ಮಾಡುವ ಮೂಲಕ ಕಾಲೆಳೆದಿದೆ. ಈ ಪೋಸ್ಟ್ಗೆ ಎಲ್ಎಸ್ಜಿ ಮಾರ್ವೆಲ್ ಫ್ರ್ಯಾಂಚೈಸಿಯ ಡಾಕ್ಟರ್ ಸ್ಟ್ರೇಂಜ್ ಜಿಐಎಫ್ ಬಳಸಿತು. ನೀವದನ್ನು ಈ ಕೆಳಗೆ ನೋಡಬಹುದು.
ರಾಹುಲ್ ಅವರು ಲಖನೌ ಸೂಪರ್ಜೈಂಟ್ಸ್ ತಂಡವನ್ನು ತೊರೆಯುತ್ತಾರೆ ಎಂಬುದು ಗೊತ್ತಾದ ಕೂಡಲೇ ಆರ್ಸಿಬಿಗೆ ಬರುತ್ತಾರೆ ಎಂಬ ಚರ್ಚೆ ಶುರುವಾಯಿತು. ಕನ್ನಡಿಗನಾದ್ದರಿಂದ ರಾಹುಲ್, ಆರ್ಸಿಬಿಗೆ ಬಂದರೆ ಚೆನ್ನಾಗಿರುತ್ತದೆ ಎಂದು ಎಲ್ಲರೂ ಭಾವಿಸಿದ್ದರು. ಆದರೆ, ಹರಾಜಿನಲ್ಲಿ ಆರ್ಸಿಬಿ ಮ್ಯಾನೇಜ್ಮೆಂಟ್ ರಾಹುಲ್ರನ್ನು ಕೈಬಿಟ್ಟಿದೆ. ಆರಂಭದಲ್ಲಿ ಬಿಡ್ ಮಾಡಿದರೂ ಕೂಡ ಅತಿ ಹೆಚ್ಚು ಹಣವನ್ನು ವ್ಯಯಿಸಲು ಇಷ್ಟಪಡದ ಆರ್ಸಿಬಿ ಕೊನೆಯಲ್ಲಿ ಬಿಡ್ನಿಂದ ಹಿಂದೆ ಸರಿಯಿತು. ಅಂತಿಮವಾಗಿ ರಾಹುಲ್ ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಪಾಲಾದರು. ಇದರಿಂದ ಆರ್ಸಿಬಿ ಅಭಿಮಾನಿಗಳಿಗೆ ನಿರಾಸೆಯಾಗಿದ್ದು, ಇಂಥಾ ಕಳಪೆ ಫ್ರಾಂಚೈಸಿಯನ್ನು ನಾವೆಂದೂ ನೋಡೇ ಇಲ್ಲ ಎಂದು ಅಸಮಾಧಾನ ಹೊರಹಾಕಿದ್ದಾರೆ.
ಜಿಯೋಸಿನಿಮಾದೊಂದಿಗೆ ಮಾತನಾಡಿದ ಉತ್ತಪ್ಪ, ಆರ್ಸಿನಿ ಅಭಿಮಾನಿಗಳು ತುಂಬಾ ಬೇಸರ ಅನುಭವಿಸುತ್ತಾರೆ. ಏಕೆಂದರೆ, ಆರ್ಸಿಬಿ ತನ್ನ ಪರ್ಸ್ನಲ್ಲಿ ಅತಿ ಹೆಚ್ಚು ಹಣ ಉಳಿಸಿಕೊಂಡಿರುವ ಎರಡನೇ ತಂಡವಾಗಿತ್ತು. ಭಾರಿ ಬೇಡಿಕೆ ಇರುವ ಆಟಗಾರರ ಹಿಂದೆ ಬೀಳದ ಆರ್ಸಿಬಿಯ ಮನಸ್ಥಿತಿಯನ್ನು ಅರ್ಥಮಾಡಿಕೊಳ್ಳಲು ಸಾಧ್ಯವಿಲ್ಲ. ನಾನು ಸ್ಥಳೀಯ ಹುಡುಗ. ಆರ್ಸಿಬಿ ಬಿಡ್ಡಿಂಗ್ ನೋಡಿ ನಾನು ಗೊಂದಲಕ್ಕೆ ಒಳಗಾಗಿದ್ದೇನೆ. ಮೊದಲ ಎರಡು ಮಾರ್ಕ್ಯೂ ಸೆಟ್ಗಳಲ್ಲಿ ನೀವು ಒಂದಕ್ಕಿಂತ ಹೆಚ್ಚು ಆಯ್ಕೆಯನ್ನೇ ಮಾಡಲಿಲ್ಲ. ಒಂದು ಕಡೆ ನೀವು ತಂಡವನ್ನು ಮರು ನಿರ್ಮಾಣ ಮಾಡಲು ಪ್ರಯತ್ನಿಸಿರುವಾಗ ಮತ್ತು ನಿಮ್ಮದೇಯಾದ ಲೆಕ್ಕಾಚಾರ ಮಾಡುವಾಗ ಇಷ್ಟು ವರ್ಷಗಳಿಂದ ನಿಮ್ಮನ್ನು ಬೆಂಬಲಿಸಿಕೊಂಡು ಬರುತ್ತಿರುವ ಅಭಿಮಾನಿಗಳ ಭಾವನೆಗಳಿಗೂ ನೀವು ಬೆಲೆ ಕೊಡಬೇಕಿತ್ತು. ಈ ರೀತಿ ಮಾಡಬಾರದಿತ್ತು. ಅಭಿಮಾನಿಗಳ ಟ್ವೀಟ್ಗಳನ್ನು ನೋಡಿದಾಗ ನನಗೆ ನಿಜಕ್ಕೂ ಬೇಸರವಾಯಿತು. ನಾನು ಒಬ್ಬ ಆರ್ಸಿಬಿಯ ಅಭಿಮಾನಿಯಾಗಿ ಮತ್ತು ಮಾಜಿ ಆಟಗಾರನಾಗಿ ಹೇಳುವುದಾದರೆ ಆರ್ಸಿಬಿ ತಂತ್ರವನ್ನು ಕಳೆದುಕೊಂಡಿದೆ ಅನಿಸುತ್ತಿದೆ ಎಂದು ಉತ್ತಪ್ಪ ಬೇಸರ ಹೊರಹಾಕಿದರು.
ನಿನ್ನೆ ಹರಾಜಿನಲ್ಲಿ ಆರ್ಸಿಬಿ ತಂಡ ಜೋಶ್ ಹ್ಯಾಸಲ್ವುಡ್ (12.50 ಕೋಟಿ ರೂ.), ಫಿಲ್ ಸಾಲ್ಟ್ (11.50 ಕೋಟಿ ರೂ.), ಜಿತೇಶ್ ಶರ್ಮ (11 ಕೋಟಿ ರೂ.), ಲಿಯಾಮ್ ಲಿವಿಂಗ್ಸ್ಟೋನ್ (8.75 ಕೋಟಿ ರೂ.) ರಸಿಕ್ ಸಲಾಂ (6 ಕೋಟಿ ರೂ.) ಹಾಗೂ ಸುಯಾಶ್ ಶರ್ಮ (2.60 ಕೋಟಿ ರೂ.) ಅವರನ್ನು ಖರೀದಿ ಮಾಡಿದ್ದು, ತನ್ನ ಪರ್ಸ್ನಲ್ಲಿ 30.65 ಕೋಟಿ ರೂ. ಉಳಿಸಿಕೊಂಡಿದೆ. ಇಂದು ಎರಡನೇ ದಿನ ಅಥವಾ ಕೊನೆಯ ದಿನದ ಹರಾಜು ನಡೆಯಲಿದೆ. (ಏಜೆನ್ಸೀಸ್)