ಡೆಹ್ರಾಡೂನ್: ಕರ್ನಾಟಕದ ಕ್ರೀಡಾಪಟುಗಳು ಬೆಟ್ಟಗಳ ರಾಜ್ಯ ಉತ್ತರಾಖಂಡದಲ್ಲಿ ನಡೆಯುತ್ತಿರುವ 38ನೇ ರಾಷ್ಟ್ರೀಯ ಕ್ರೀಡಾಕೂಟದ ಆರನೇ ದಿನವಾದ ಸೋಮವಾರ 7 ಸ್ವರ್ಣ ಪದಕಗಳನ್ನು ಗೆದ್ದು ಬೀಗಿದ್ದಾರೆ. ಇದರೊಂದಿಗೆ ಕರ್ನಾಟಕ ತಂಡ 22 ಚಿನ್ನ, 10 ಬೆಳ್ಳಿ, 10 ಕಂಚಿನ ಸಹಿತ ಒಟ್ಟಾರೆ 42 ಪದಕಗಳೊಂದಿಗೆ ಕೂಟದ ಪದಕಪಟ್ಟಿಯಲ್ಲಿ ಮತ್ತೆ ಅಗ್ರಸ್ಥಾನಕ್ಕೆ ಮರಳಿದೆ. ಕರ್ನಾಟಕದ ಈಜುಪಟುಗಳು ಮತ್ತೆ 5 ಚಿನ್ನ, 1 ಬೆಳ್ಳಿ, 1 ಕಂಚು ಜಯಿಸುವ ಮೂಲಕ ಕೂಟದಲ್ಲಿ ಪ್ರಾಬಲ್ಯವನ್ನು ಮುಂದುವರಿಸಿದ್ದರು. ಪ್ಯಾರಿಸ್ ಒಲಿಂಪಿಕ್ಸ್ನಲ್ಲಿ ಸ್ಪರ್ಧಿಸಿದ್ದ ರಾಜ್ಯದ ಈಜುತಾರೆಯರಾದ ಶ್ರೀಹರಿ ನಟರಾಜ್ ಮತ್ತು ಧಿನಿಧಿ ದೇಸಿಂಘು ಮತ್ತೆ 2 ಚಿನ್ನದ ಪದಕಗಳನ್ನು ಗೆಲ್ಲುವ ಮೂಲಕ ಕೂಟದಲ್ಲಿ ಗೆದ್ದ ತಮ್ಮ ಸ್ವರ್ಣ ಪದಕಗಳ ಸಂಖ್ಯೆಯನ್ನು ತಲಾ 7ಕ್ಕೆ ಏರಿಸಿಕೊಂಡಿದ್ದಾರೆ. ಶೂಟಿಂಗ್ನಲ್ಲಿ ರಾಜ್ಯದ 15 ವರ್ಷದ ಬಾಲಕ ಜೊನಾಥನ್ ಆಂಥೋನಿ ಚಿನ್ನಗೆ ಗುರಿಯಿಟ್ಟು ಗಮನಸೆಳೆದರು. ಸೈಕ್ಲಿಂಗ್ನಲ್ಲಿ ರಾಜ್ಯದ ಕೀರ್ತಿ ರಂಗಸ್ವಾಮಿ ಇನ್ನೊಂದು ಸ್ವರ್ಣ ಪದಕ ಗೆದ್ದುಕೊಟ್ಟರು.
ಈಜಿನಲ್ಲಿ ಮತ್ತೆ ಪ್ರಾಬಲ್ಯ: ಪುರುಷರ 50 ಮೀ. ಬ್ಯಾಕ್ಸ್ಟ್ರೊಕ್ನಲ್ಲಿ ಕರ್ನಾಟಕ ಚಿನ್ನ, ಬೆಳ್ಳಿ ಪದಕಗಳನ್ನು ಒಲಿಸಿಕೊಂಡಿತು. ಶ್ರೀಹರಿ ನಟರಾಜ್ 26.9 ಸೆಕೆಂಡ್ಗಳಲ್ಲಿ ಸ್ಪರ್ಧೆ ಮುಗಿಸಿ ಚಿನ್ನ ಗೆದ್ದರೆ, ಆಕಾಶ್ ಮಣಿ 26.42 ಸೆಕೆಂಡ್ಗಳಲ್ಲಿ ಈಜಿ ಬೆಳ್ಳಿ ಗಳಿಸಿದರು. ಮಹಾರಾಷ್ಟ್ರದ ರಿಷಭ್ ದಾಸ್ (26.45 ಸೆ) ಕಂಚಿಗೆ ತೃಪ್ತಿಪಟ್ಟರು. ಪುರುಷರ 200 ಮೀ. ಮೆಡ್ಲೆಯಲ್ಲಿ ಸೋನ್ ಗಂಗೂಲಿ 2 ನಿಮಿಷ, 6.61 ಸೆಕೆಂಡ್ಗಳಲ್ಲಿ ಸ್ಪರ್ಧೆ ಮುಗಿಸುವ ಮೂಲಕ ಒಲಿಂಪಿಯನ್ ಸಾಜನ್ ಪ್ರಕಾಶ್ರನ್ನು (2ನಿ, 8.17ಸೆ) ಹಿಂದಿಕ್ಕಿ ಸ್ವರ್ಣ ಪದಕ ಗೆದ್ದುಕೊಂಡರು.
ಮಹಿಳೆಯರ 50 ಮೀ. ಬ್ಯಾಕ್ಸ್ಟ್ರೊಕ್ನಲ್ಲಿ ರಾಜ್ಯದ ವಿದಿತಾ ನಯನಾ 31.46 ಸೆಕೆಂಡ್ಗಳಲ್ಲಿ ಈಜಿ ಚಿನ್ನ ಜಯಿಸಿದರೆ, ರಾಜ್ಯದ ಇನ್ನೋರ್ವ ಈಜುಪಟು ಶಾಲಿನಿ ಆರ್. ದೀತ್ 4ನೇ ಸ್ಥಾನಕ್ಕೆ ತೃಪ್ತಿಪಟ್ಟರು. ಮಿಶ್ರ 4/100 ಮೀ. ಫ್ರೀಸ್ಟೆ$ಲ್ ರಿಲೇ ಸ್ಪರ್ಧೆಯಲ್ಲಿ ಶ್ರೀಹರಿ, ಧಿನಿಧಿ, ಆಕಾಶ್ ಮಣಿ ಮತ್ತು ನೀನಾ ವೆಂಕಟೇಶ್ ಒಳಗೊಂಡ ರಾಜ್ಯ ತಂಡ 3 ನಿಮಿಷ, 41.03 ಸೆಕೆಂಡ್ಗಳಲ್ಲಿ ಈಜಿ ಸ್ವರ್ಣ ಪದಕಕ್ಕೆ ಕೊರಳೊಡ್ಡಿತು. ಮಹಾರಾಷ್ಟ್ರ ಬೆಳ್ಳಿ ಮತ್ತು ತಮಿಳುನಾಡು ಕಂಚು ಜಯಿಸಿತು. ಪುರುಷರ 800 ಮೀ. ಫ್ರೀಸ್ಟೆ$ಲ್ ವಿಭಾಗದಲ್ಲಿ ಕರ್ನಾಟಕದ ಅನೀಶ್ ಎಸ್. ಗೌಡ 8 ನಿಮಿಷ, 24.39 ನಿಮಿಷಗಳಲ್ಲಿ ಈಜಿ ಕಂಚಿಗೆ ತೃಪ್ತಿಪಟ್ಟರೆ, ದೆಹಲಿಯ ಕುಶಾಗ್ರ ರಾವತ್ ಚಿನ್ನ ಮತ್ತು ಆರ್ಯನ್ ನೆಹ್ರಾ ಬೆಳ್ಳಿ ಪದಕ ಗೆದ್ದುಕೊಂಡರು.
ಧಿನಿಧಿ ಕೂಟ ದಾಖಲೆ
ಒಲಿಂಪಿಯನ್ ಈಜುತಾರೆ ಧಿನಿಧಿ ದೇಸಿಂಘು ಮಹಿಳೆಯರ 400 ಮೀ. ಫ್ರೀಸ್ಟೆ$ಲ್ ವಿಭಾಗದಲ್ಲಿ 4 ನಿಮಿಷ, 24.60 ಸೆಕೆಂಡ್ಗಳಲ್ಲಿ ಸ್ಪರ್ಧೆ ಮುಗಿಸುವ ಮೂಲಕ ಹೊಸ ಕೂಟ ದಾಖಲೆಯೊಂದಿಗೆ ಚಿನ್ನದ ಪದಕಕ್ಕೆ ಕೊರಳೊಡ್ಡಿದರು. ಇದು 14 ವರ್ಷದ ಧಿನಿಧಿಗೆ ಕೂಟದಲ್ಲಿ ಒಲಿದ 7ನೇ ಸ್ವರ್ಣ ಪದಕವಾಗಿದೆ. ಇದರೊಂದಿಗೆ ಅವರು ಕೂಟದಲ್ಲಿ ಅತಿಹೆಚ್ಚು ಸ್ವರ್ಣ ಪದಕ ಗೆದ್ದ ಕ್ರೀಡಾಪಟುಗಳಲ್ಲಿ ಕರ್ನಾಟಕದ ಇನ್ನೋರ್ವ ಒಲಿಂಪಿಯನ್ ಈಜುಪಟು ಶ್ರೀಹರಿ ನಟರಾಜ್ ಜತೆಗೆ ಸಮಬಲ ಸಾಧಿಸಿದ್ದಾರೆ. 24 ವರ್ಷದ ನಟರಾಜ್ ಸೋಮವಾರ ಮಿಶ್ರ 4/100 ಮೀ. ಫ್ರೀಸ್ಟೆ$ಲ್ ರಿಲೇಯಲ್ಲಿ ಧಿನಿಧಿ ಜತೆಗೆ ಚಿನ್ನ ಗೆದ್ದರೆ, 50 ಮೀ. ಬ್ಯಾಕ್ಸ್ಟ್ರೊಕ್ನಲ್ಲಿ ತನ್ನ 7ನೇ ಸ್ವರ್ಣ ಪದಕ ಒಲಿಸಿಕೊಂಡರು. ಕರ್ನಾಟಕ ಕೂಟದ ಈಜು ಸ್ಪರ್ಧೆಯಲ್ಲೇ ಇದುವರೆಗೆ 18 ಚಿನ್ನ, 10 ಬೆಳ್ಳಿ, 5 ಕಂಚಿನ ಸಹಿತ 33 ಪದಕಗಳನ್ನು ಗೆದ್ದುಕೊಂಡಿದೆ.