ಪ್ಯಾರಿಸ್: ಗಾಯದ ಸಮಸ್ಯೆಗಳ ಬಳಿಕ ಪುಟಿದೆದ್ದಿರುವ ಮಾಜಿ ವಿಶ್ವ ನಂ. 1 ಜೋಡಿಯಾಗಿರುವ ಭಾರತದ ಸಾತ್ವಿಕ್ ಸಾಯಿರಾಜ್ ರಾಂಕಿರೆಡ್ಡಿ ಮತ್ತು ಕರ್ನಾಟಕ ಮೂಲದ ಚಿರಾಗ್ ಶೆಟ್ಟಿ ಜೋಡಿ ವಿಶ್ವ ಬ್ಯಾಡ್ಮಿಂಟನ್ ಚಾಂಪಿಯನ್ಷಿಪ್ನಲ್ಲಿ ಸೆಮಿಫೈನಲ್ ಪ್ರವೇಶಿಸುವ ಮೂಲಕ ಪದಕ ಖಚಿತಪಡಿಸಿಕೊಂಡಿದೆ. ಇದರೊಂದಿಗೆ ಭಾರತ ಕೂಟದಲ್ಲಿ 2011ರ ನಂತರ ಸತತವಾಗಿ ಪದಕ ಗೆದ್ದುಕೊಂಡು ಬಂದಿರುವ ದಾಖಲೆಯನ್ನೂ ಕಾಯ್ದುಕೊಂಡಿದೆ.
ವಿಶ್ವ ನಂ. 9 ಸಾತ್ವಿಕ್&ಚಿರಾಗ್ ಜೋಡಿ ಪುರುಷರ ಡಬಲ್ಸ್ ವಿಭಾಗದಲ್ಲಿ ಶುಕ್ರವಾರ ರಾತ್ರಿ ನಡೆದ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ಮಲೇಷ್ಯಾದ ಆರೋನ್ ಚಿಯಾ ಮತ್ತು ಸೋಹ್ ವೂಯಿ ಯಿಕ್ ಜೋಡಿಯನ್ನು 21-12, 21-19 ನೇರಗೇಮ್ಗಳಿಂದ 43 ನಿಮಿಷಗಳಲ್ಲಿ ಮಣಿಸಿತು. 2 ಬಾರಿಯ ಒಲಿಂಪಿಕ್ಸ್ ಪದಕ ವಿಜೇತ ಮಲೇಷ್ಯಾ ಜೋಡಿಗೆ ಸೋಲುಣಿಸುವ ಮೂಲಕ ಸಾತ್ವಿಕ್-ಚಿರಾಗ್ 2ನೇ ಬಾರಿ ವಿಶ್ವ ಚಾಂಪಿಯನ್ಷಿಪ್ ಪದಕ ಒಲಿಸಿಕೊಂಡರು. ಅವರು ಈ ಮುನ್ನ 2002ರ ಆವೃತ್ತಿಯಲ್ಲಿ ಕಂಚಿನ ಪದಕ ಗೆದ್ದುಕೊಂಡಿದ್ದರು. ಈ ಬಾರಿ ಪದಕದ ಬಣ್ಣ ಬದಲಾಯಿಸಿಕೊಳ್ಳುವ ಅವಕಾಶವೂ ಸಾತ್ವಿಕ್-ಚಿರಾಗ್ ಜೋಡಿಯ ಮುಂದಿದೆ.
2011ರಲ್ಲಿ ಜ್ವಾಲಾ ಗುಟ್ಟಾ ಮತ್ತು ಕನ್ನಡತಿ ಅಶ್ವಿನಿ ಪೊನ್ನಪ್ಪ ಮಹಿಳಾ ಡಬಲ್ಸ್ನಲ್ಲಿ ಕಂಚಿನ ಪದಕ ಗೆದ್ದುಕೊಂಡಿದ್ದರು. ನಂತರ ಭಾರತ ವಿಶ್ವ ಚಾಂಪಿಯನ್ಷಿಪ್ನ ಪ್ರತಿ ಆವೃತ್ತಿಯಲ್ಲೂ ಕನಿಷ್ಠ ಒಂದಾದರೂ ಪದಕ ಗೆಲ್ಲುತ್ತ ಬಂದಿದೆ. ಏಷ್ಯನ್ ಗೇಮ್ಸ್ ಚಾಂಪಿಯನ್ಗಳಾದ ಸಾತ್ವಿಕ್-ಚಿರಾಗ್ಗೆ ಸೆಮಿಫೈನಲ್ನಲ್ಲಿ ವಿಶ್ವ ನಂ. 11 ಚೀನಾದ ಚೆನ್ ಬೊ ಯಾಂಗ್&ಲಿಯು ಯಿ ಜೋಡಿಯ ಸವಾಲು ಎದುರಾಗಲಿದೆ. ಸಾತ್ವಿಕ್-ಚಿರಾಗ್ ಈಗ ಕೂಟದಲ್ಲಿ ಭಾರತದ ಕೊನೇ ಆಶಾಕಿರಣವಾಗಿದ್ದಾರೆ.
ಸೇಡು ತೀರಿಸಿದ ಸತ್ಚಿ
"ಸತ್ಚಿ' ಖ್ಯಾತಿಯ ಸಾತ್ವಿಕ್&ಚಿರಾಗ್ ಜೋಡಿ ಪ್ಯಾರಿಸ್ ಒಲಿಂಪಿಕ್ಸ್ನಲ್ಲಿ ಕಂಡ ಕ್ವಾರ್ಟರ್ಫೈನಲ್ ಸೋಲಿಗೆ ಸರಿಸುಮಾರು ಒಂದು ವರ್ಷದ ವಿರುದ್ಧ ಅದೇ ಸ್ಥಳದಲ್ಲಿ, ಅದೇ ಹಂತದಲ್ಲಿ ಮತ್ತು ಅದೇ ಜೋಡಿಯ ವಿರುದ್ಧ ಗೆದ್ದು ಸೇಡು ತೀರಿಸಿಕೊಂಡಿರುವುದು ವಿಶೇಷವಾಗಿದೆ. "ಇದು ಒಲಿಂಪಿಕ್ಸ್ನ ರೀಮ್ಯಾಚ್ ಆಗಿತ್ತು. ಕೊನೆಗೂ ನಾವು ಪುಟಿದೆದ್ದಿದ್ದೇವೆ. ವರ್ಷದ ಹಿಂದೆ ಸೋಲು ಕಂಡಿದ್ದ ಅದೇ ಕೋರ್ಟ್, ಅದೇ ಅರೇನಾದಲ್ಲಿ ಗೆದ್ದಿದ್ದೇವೆ. ಅವರ ವಿರುದ್ಧ ಆಡುವುದು ಯಾವಾಗಲೂ ಸವಾಲಿನಿಂದ ಕೂಡಿರುತ್ತದೆ. ಇದೀಗ ದೊಡ್ಡ ಟೂರ್ನಿಯೊಂದರಲ್ಲಿ ಅವರ ವಿರುದ್ಧ ಗೆದ್ದಿರುವುದು ಹೆಚ್ಚಿನ ಖುಷಿ ತಂದಿದೆ' ಎಂದು ಉಡುಪಿ ಮೂಲದ ಚಿರಾಗ್ ಹೇಳಿದ್ದಾರೆ. ವಿಶ್ವ ನಂ. 2 ಚಿಯಾ&ಸೋಹ್ ಜೋಡಿಯ ವಿರುದ್ಧ ಹಾಲಿ ವರ್ಷ ಸಿಂಗಾಪುರ ಮತ್ತು ಚೀನಾ ಓಪನ್ನಲ್ಲೂ "ಸತ್ಚಿ' ಸೋಲು ಕಂಡಿದ್ದರು.
15: ವಿಶ್ವ ಚಾಂಪಿಯನ್ಷಿಪ್ನಲ್ಲಿ ಭಾರತಕ್ಕೆ ಒಲಿದ 15ನೇ ಪದಕ ಇದಾಗಿದೆ. ಸಾತ್ವಿಕ್-ಚಿರಾಗ್ ವಿಶ್ವ ಬ್ಯಾಡ್ಮಿಂಟನ್ನಲ್ಲಿ ಒಂದಕ್ಕಿಂತ ಹೆಚ್ಚು ಪದಕ ಗೆದ್ದ 3ನೇ ಭಾರತೀಯ ಸಾಧಕರಾಗಿದ್ದಾರೆ. ಪಿವಿ ಸಿಂಧು 5 ಪದಕ ಗೆದ್ದಿರುವುದು ದಾಖಲೆ. ಸೈನಾ ನೆಹ್ವಾಲ್ 2 ಪದಕ ಗೆದ್ದ ಮತ್ತೋರ್ವ ಭಾರತೀಯ ಸಾಧಕಿ.