Rohit Sharma Remark: ಟೀಮ್ ಇಂಡಿಯಾ ಕ್ಯಾಪ್ಟನ್ ರೋಹಿತ್ ಶರ್ಮರನ್ನು ದಡೂತಿ ಕ್ರಿಕೆಟಿಗ, ತೂಕ ಇಳಿಸಿಕೊಳ್ಳಬೇಕು ಎಂದೆಲ್ಲಾ ಟೀಕಿಸಿದ ಕಾಂಗ್ರೆಸ್ ವಕ್ತಾರೆ ಶಮಾ ಮೊಹಮ್ಮದ್, ತಮ್ಮ ಹೇಳಿಕೆಯಿಂದ ಭಾರೀ ವಿವಾದಕ್ಕೆ ಗುರಿಯಾಗಿದ್ದಾರೆ. ಟೀಮ್ ಇಂಡಿಯಾ ನಾಯಕ ರೋಹಿತ್ ಶರ್ಮ ಅವರನ್ನು ಟೀಕಿಸುವ ಭರದಲ್ಲಿ ವಿವಾದ ಸುಳಿಗೆ ಸಿಲುಕಿರುವ ಶಮಾ, ಸದ್ಯ ಕ್ರಿಕೆಟ್ ಅಭಿಮಾನಿಗಳು ಸೇರಿದಂತೆ ವಿಪಕ್ಷಗಳ ಕೆಂಗಣ್ಣಿಗೆ ಗುರಿಯಾಗಿದ್ದಾರೆ. ಆದರೆ, ಇಂತಹ ಟೀಕೆ, ವ್ಯಂಗ್ಯವಾಡುವ ಮನಸ್ಥಿತಿ ಶಮಾಗೆ ಮೊದಲೇನಲ್ಲ ಎಂಬುದಕ್ಕೆ ವೈರಲ್ ಆದ ಈ ಹಳೆಯ ಪೋಸ್ಟ್ ಸಾಕ್ಷಿ.
ರೋಹಿತ್ ಒಬ್ಬ ದಢೂತಿ ದೇಹದ ಕ್ರಿಕೆಟಿಗ ಎಂಬ ಶಮಾ ಹೇಳಿಕೆಗೆ ಸದ್ಯ ದೇಶವ್ಯಾಪಿ ಕ್ರಿಕೆಟ್ ಪ್ರಿಯರು ಮತ್ತು ರಾಜಕೀಯ ವಲಯದಿಂದ ವ್ಯಾಪಕ ಖಂಡನೆ, ಆಕ್ರೋಶಗಳು ವ್ಯಕ್ತವಾಗುತ್ತಿವೆ. ಭಾರೀ ವಿರೋಧಗಳ ಬಳಿಕ ತನ್ನ ಹೇಳಿಕೆಯನ್ನು ಸಮರ್ಥಿಸಿಕೊಂಡ ಶಮಾ ಮೊಹಮ್ಮದ್, "ಒಬ್ಬ ಕ್ರಿಕೆಟಿಗನ ಫಿಟ್ನೆಸ್ ಬಗ್ಗೆ ನಾನು ಅಭಿಪ್ರಾಯ ಹೊರಹಾಕಿದ್ದೇನೆ. ಇದರಲ್ಲಿ ತಪ್ಪೇನಿದೆ. ನಮಗೆ ಮಾತನಾಡುವ ಸ್ವಾತಂತ್ರ್ಯವಿಲ್ಲವೇ" ಎಂದು ಹೇಳಿದ್ದಾರೆ. ಅಸಲಿಗೆ ಶಮಾ ರೋಹಿತ್ ವಿರುದ್ಧ ಮಾತ್ರ ಮಾತನಾಡಿಲ್ಲ. ಈ ಹಿಂದೆ ಟೀಮ್ ಇಂಡಿಯಾ ಸ್ಟಾರ್ ಬ್ಯಾಟರ್ ವಿರಾಟ್ ಕೊಹ್ಲಿ ವಿರುದ್ಧವೂ ಟೀಕಿಸಿದ್ದಾರೆ.
2018ರಲ್ಲಿ ಎಕ್ಸ್ ಖಾತೆಯಲ್ಲಿ ಪೋಸ್ಟ್ ಹಾಕಿದ್ದ ಶಮಾ ಮೊಹಮ್ಮದ್, ಆ ವರ್ಷದಲ್ಲಿ ಟೀಮ್ ಇಂಡಿಯಾವನ್ನು ಕ್ಯಾಪ್ಟನ್ ಆಗಿ ಮುನ್ನಡೆಸುತ್ತಿದ್ದ ವಿರಾಟ್ರನ್ನು ಭಾಷಾ ವಿಚಾರಕ್ಕೆ ಟೀಕಿಸಿದ್ದರು. ಕ್ರಿಕೆಟ್ ಅಭಿಮಾನಿಯೊಬ್ಬನ ಸಂದೇಶಕ್ಕೆ ಪ್ರತಿಕ್ರಿಯಿಸಿದ್ದ ವಿರಾಟ್, "ಇಂಗ್ಲಿಷ್ ಮತ್ತು ಆಸ್ಟ್ರೇಲಿಯಾದ ಬ್ಯಾಟ್ಸ್ಮನ್ಗಳನ್ನು ಇಷ್ಟಪಡುವವರು ಭಾರತದಲ್ಲಿ ವಾಸಿಸಬಾರದು" ಎಂದು ಹೇಳಿದ್ದರು. ಇದಕ್ಕೆ ವಿರಾಟ್ರನ್ನು ತರಾಟೆಗೆ ತೆಗೆದುಕೊಂಡಿದ್ದ ಶಮಾ, ವಿರಾಟ್ ವಿರುದ್ಧವೂ ಕಿಡಿಕಾರಿದ್ದರು.
ಇದನ್ನೂ ಓದಿ: ಅನಂತ್ ಅಂಬಾನಿ ಅವರ ವನ್ಯಜೀವಿ ರಕ್ಷಣೆ ಮತ್ತು ಪುನರ್ವಸತಿ ಕೇಂದ್ರ ಉದ್ಘಾಟಿಸಿದ ಪ್ರಧಾನಿ ಮೋದಿ! Vantara
"ಬ್ರಿಟಿಷ್ ಕಂಡುಹಿಡಿದ ಆಟವನ್ನು ಆಡುತ್ತಿರುವ ವಿರಾಟ್, ವಿದೇಶಿ ಬ್ರ್ಯಾಂಡ್ಗಳನ್ನು ಅನುಮೋದಿಸುವ ಮೂಲಕ ಕೋಟಿಗಟ್ಟಲೆ ಹಣ ಸಂಪಾದಿಸುತ್ತಾರೆ. ಇಟಲಿಯಲ್ಲಿ ಮದುವೆ ಆಗ್ತಾರೆ. ಹರ್ಷೆಲ್ ಗಿಬ್ಸ್ ತಮ್ಮ ನೆಚ್ಚಿನ ಕ್ರಿಕೆಟಿಗ ಮತ್ತು ಏಂಜೆಲಿಕ್ ಕೆರ್ಬರ್ರನ್ನು ಅತ್ಯುತ್ತಮ ಟೆನಿಸ್ ಆಟಗಾರ್ತಿ ಎಂದು ಹೆಸರಿಸುತ್ತಾರೆ. ಆದರೆ, ವಿದೇಶಿ ಆಟಗಾರರನ್ನು ಪ್ರೀತಿಸುವ ಭಾರತೀಯರಿಗೆ ದೇಶ ತೊರೆಯುವಂತೆ ಹೇಳುತ್ತಾರೆ" ಎಂದು ಟ್ವೀಟ್ ಮಾಡಿದ್ದರು. ಕೊಹ್ಲಿ ಬಗ್ಗೆ ಶಮಾ ಮಾಡಿದ್ದ ಹಳೆಯ ಟ್ವೀಟ್ ಸದ್ಯ ವೈರಲ್ ಆಗಿದ್ದು, ಟೀಕೆಯ ಪಟ್ಟಿಯಲ್ಲಿ ರೋಹಿತ್ ಮಾತ್ರವಲ್ಲ ಕೊಹ್ಲಿ ಕೂಡ ಇದ್ದಾರೆ ಎಂದು ನೆಟ್ಟಿಗರು ಅಸಮಾಧಾನ ಹೊರಹಾಕಿದ್ದಾರೆ,(ಏಜೆನ್ಸೀಸ್).