ನವದೆಹಲಿ: ಇಲ್ಲಿನ ಪ್ರಾವಿಡೆನ್ಸ್ ಕ್ರೀಡಾಂಗಣದಲ್ಲಿ ನಡೆದ ಟಿ20 ವಿಶ್ವಕಪ್ನ ಎರಡನೇ ಸೆಮಿಫೈನಲ್ನಲ್ಲಿ ಟೀಮ್ ಇಂಡಿಯಾ ಗೆದ್ದು ಬೀಗಿದ್ದು, 2022ರಲ್ಲಿನ ಸೋಲಿನ ಸೇಡನ್ನು ತೀರಿಸಿಕೊಂಡಿದೆ. 17ನೇ ಆವೃತ್ತಿಯ ಐಪಿಎಲ್ನಲ್ಲಿ ಭರ್ಜರಿ ಬ್ಯಾಟಿಂಗ್ ಮೂಲಕ ಆರೆಂಜ್ ಕ್ಯಾಪನ್ನು ತಮ್ಮದಾಗಿಸಿಕೊಳ್ಳುವ ಮೂಲಕ ಹಲವು ದಾಖಲೆಗಳನ್ನು ಬರೆದಿದ್ದ ವಿರಾಟ್ ಕೊಹ್ಲಿ ಟಿ20 ವಿಶ್ವಕಪ್ನಲ್ಲೂ ಟಾಪ್ ರನ್ ಸ್ಕೋರರ್ ಆಗಲಿದ್ದಾರೆ ಎಂದು ನಿರೀಕ್ಷಿಸಲಾಗಿತ್ತು. ಆದರೆ, ಚುಟುಕು ವಿಶ್ವಸಮರದಲ್ಲಿ ವಿರಾಟ್ ಯಾಕೋ ಮಂಕಾದಂತೆ ಕಾಣುತ್ತಿದ್ದು, ನಿರೀಕ್ಷಿತ ಪ್ರದರ್ಶನವನ್ನು ನೀಡುತ್ತಿಲ್ಲ.
ಇಂಗ್ಲೆಂಡ್ ವಿರುದ್ಧದ ಪಂದ್ಯದಲ್ಲೂ ವಿರಾಟ್ ರನ್ ಗಳಿಸಲು ಪರದಾಡಿದ್ದು, ಕೊಹ್ಲಿ ಫಾರ್ಮ್ ಟೀಮ್ ಇಂಡಿಯಾವನ್ನು ಚಿಂತೆಗೆ ದೂಡಿದೆ. ಇನ್ನೂ ಈ ಕುರಿತು ಮಾತನಾಡಿರುವ ಮಾಜಿ ಕ್ರಿಕೆಟಿಗ ಅಂಬಾಟಿ ರಾಯುಡು ಕೊಹ್ಲಿ ಹೆಚ್ಚು ರನ್ ಗಳಿಸದಿರುವುದೇ ರೋಹಿತ್ ಶಾಂತವಾಗಿರಲು ಕಾರಣ ಎಂದು ಹೇಳಿದ್ದಾರೆ. ಈ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ಪರ-ವಿರೋಧದ ಚರ್ಚೆ ನಡೆಯುತ್ತಿದೆ.
ಖಾಸಗಿ ವಾಹಿನಿಗೆ ನೀಡಿದ ಸಂದರ್ಶನದಲ್ಲಿ ಈ ಕುರಿತು ಮಾತನಾಡಿದ ರಾಯುಡು, ಟೀಮ್ ಇಂಡಿಯಾದಲ್ಲಿ ಅದ್ಭುತ ವಾತವರಣವಿದ್ದು, ಎಲ್ಲರೂ ಸಂಯೋಜಿತರಾಗಿ ಆಟವಾಡುತ್ತಿದ್ದಾರೆ. ಆಟಗಾರರು ಆಡುತ್ತಿರುವ ರೀತಿ ನೋಡಿದರೆ ಎಲ್ಲರೂ ಸಿದ್ದರಾಗಿ ಹೋದಂತೆ ಕಾಣುತ್ತಿದೆ. ರೋಹಿತ್ ಶಾಂತವಾಗಿದ್ದು, ತಂಡದಲ್ಲಿ ಇತರರ ಪಾತ್ರದ ಬಗ್ಗೆ ತಿಳಿದಿದ್ದಾರೆ. ನಿಸ್ವಾರ್ಥದ ಆಟಕ್ಕೆ ಅದೃಷ್ಟ ಇವರ ಕೈ ಹಿಡಿಯಲಿದ್ದು, ಈ ಬಾರಿ ಭಾರತ ಕಪ್ ಗೆಲ್ಲುವುದು ಕನ್ಫರ್ಮ್.
ವಿರಾಟ್ ಹೆಚ್ಚು ರನ್ ಗಳಿಸಿಲ್ಲ ಎಂಬ ಕಾರಣಕ್ಕೆ ರೋಹಿತ್ ಶಾಂತವಾಗಿದ್ದಾರೆ. ವಿರಾಟ್ ಚೆಂಡನ್ನು ಹೊಡೆಯುವ ರೀತಿ ಮತ್ತು ಎದುರಾಳಿಗಳನ್ನು ಅಂದಾಜಿಸುವ ರೀತಿ ದೊಡ್ಡ ಆಟದ ಮುನ್ಸೂಚನೆ ನೀಡುತ್ತದೆ. ಹಾಗೆಂದ ಮಾತ್ರಕ್ಕೆ ಹೆಚ್ಚು ರನ್ ಗಳಿಸಬೇಕೆಂದೆನಿಲ್ಲ. ಕೊಹ್ಲಿ ರೀತಿ ಆಡಲು ಅದೃಷ್ಟ ಇರಬೇಕು. ವಿರಾಟ್ ಮುಂದಿನ ದಿನಗಳಲ್ಲಿ ಹೆಚ್ಚ ರನ್ ಗಳಿಸುತ್ತಾರೆ. ಶತಕೋಟಿ ಜನರ ಪ್ರಾರ್ಥನೆ ಅವರ ಕೈ ಹಿಡಿಯಲಿದೆ ಎಂದು ಅಂಬಾಟಿ ರಾಯುಡು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.