ವಿಜಯವಾಣಿ ಸುದ್ದಿಜಾಲ ಬೆಂಗಳೂರು
ಗಣಿತಶಾಸ್ತ್ರದ ಪ್ರಕಾರ ಇನ್ನೂ ಪ್ಲೇಆ್ ಅವಕಾಶ ಉಳಿಸಿಕೊಂಡಿರುವ ತಂಡಗಳಾದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಮತ್ತು ಹಾಲಿ ರನ್ನರ್ಅಪ್ ಗುಜರಾತ್ ಟೈಟಾನ್ಸ್ ತಂಡಗಳು ಐಪಿಎಲ್-17ರಲ್ಲಿ ಶನಿವಾರ ಮರುಮುಖಾಮುಖಿ ಆಗಲಿವೆ. ಲೋಕಸಭಾ ಚುನಾವಣೆಯ ಮತದಾನದಿಂದಾಗಿ 18 ದಿನಗಳಿಂದ ತವರಿನಿಂದ ದೂರವಿದ್ದ ಆರ್ಸಿಬಿ ಇದೀಗ ಮತ್ತೆ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಕಣಕ್ಕಿಳಿಯಲಿದೆ. ಕಳೆದ ಭಾನುವಾರವಷ್ಟೇ ಉಭಯ ತಂಡಗಳ ನಡುವೆ ಅಹಮದಾಬಾದ್ನಲ್ಲಿ ನಡೆದ ಪಂದ್ಯದಲ್ಲಿ ಗೆದ್ದ ವಿಶ್ವಾಸದಲ್ಲಿರುವ ಫಾಫ್ ಡು ಪ್ಲೆಸಿಸ್ ಪಡೆ ಅದೇ ಫಲಿತಾಂಶ ಪುನರಾವರ್ತಿಸುವ ಹರುಪಿನಲ್ಲಿದ್ದರೆ, ಗುಜರಾತ್ ಟೈಟಾನ್ಸ್ ತಂಡ ಸೇಡು ತೀರಿಸಿಕೊಳ್ಳುವ ಹಂಬಲದಲ್ಲಿದೆ.
ಆರಂಭಿಕ 8 ಪಂದ್ಯಗಳಲ್ಲಿ 7ರಲ್ಲಿ ಸೋತು ಪ್ಲೇಆ್ ಆಸೆಯನ್ನು ಬಹುತೇಕ ಕೈಚೆಲ್ಲಿರುವ ಆರ್ಸಿಬಿ ಕಳೆದೆರಡು ಪಂದ್ಯಗಳಲ್ಲಿ ಗೆದ್ದು ಟೂರ್ನಿಯಿಂದ ತನ್ನ ಅಧಿಕೃತ ನಿರ್ಗಮನವನ್ನು ಇನ್ನೂ ಕೆಲ ದಿನಗಳ ಕಾಲ ಮುಂದೂಡಿದೆ. ಇದೀಗ ಗೆಲುವಿನ ಹ್ಯಾಟ್ರಿಕ್ ಸಾಧಿಸುವುದು ಆರ್ಸಿಬಿ ಛಲವಾಗಿದೆ. ಈ ಬಾರಿ ತವರಿನ ಅನುಕೂಲವನ್ನೂ ಹೊಂದಿದೆ. ಆದರೆ ತವರಿನಲ್ಲಿ ಆಡಿದ ಆರಂಭಿಕ 4 ಪಂದ್ಯಗಳಲ್ಲಿ ಪ್ಲೆಸಿಸ್ ಪಡೆ 1ರಲ್ಲಿ ಮಾತ್ರ ಸೋತಿತ್ತು.
ಗುಜರಾತ್ ಟೈಟಾನ್ಸ್ ಆಡಿದ 10 ಪಂದ್ಯಗಳಲ್ಲಿ 4 ಜಯ, 6 ಸೋಲಿನೊಂದಿಗೆ ಪ್ಲೇಆ್ ರೇಸ್ನಲ್ಲಿ ತೂಗುಯ್ಯಾಲೆಯ ಮೇಲೆ ನಿಂತಿದೆ. ಇನ್ನೊಂದು ಪಂದ್ಯ ಸೋತರೂ, ಗುಜರಾತ್ಗೆ ಪ್ಲೇಆ್ ಪ್ರವೇಶದ ಬಾಗಿಲು ಬಹುತೇಕ ಮುಚ್ಚಿ ಹೋಗಲಿದೆ.
ವಿಶ್ವಾಸದಲ್ಲಿ ಆರ್ಸಿಬಿ
ಸನ್ರೈಸರ್ಸ್ ಮತ್ತು ಗುಜರಾತ್ ವಿರುದ್ಧ ಕಳೆದೆರಡು ಪಂದ್ಯಗಳಲ್ಲಿ ಕಂಡ ಜಯ ಆರ್ಸಿಬಿ ತಂಡದ ವಿಶ್ವಾಸ ವೃದ್ಧಿಸಿದೆ. ವಿರಾಟ್ ಕೊಹ್ಲಿ ಅವರ ಬ್ಯಾಟಿಂಗ್ ಹೋರಾಟಕ್ಕೆ ಕಳೆದ ಪಂದ್ಯದಲ್ಲಿ ವಿಲ್ ಜಾಕ್ಸ್ ಸ್ಫೋಟಕ ಆಟದ ಬೆಂಬಲವೂ ಲಭಿಸಿದೆ. ಗ್ಲೆನ್ ಮ್ಯಾಕ್ಸ್ವೆಲ್ ಕೂಡ ಕೆಲ ಪಂದ್ಯಗಳ ಬಿಡುವಿನ ಬಳಿಕ ಮರಳಿ ಕಣಕ್ಕಿಳಿದಿದ್ದರೆ, 17 ಕೋಟಿ ರೂ.ಗೆ ತಂಡಕ್ಕೆ ವರ್ಗಾವಣೆಗೊಂಡಿರುವ ಕ್ಯಾಮರಾನ್ ಗ್ರೀನ್ ಕೊನೆಗೂ ಆಲ್ರೌಂಡ್ ನಿರ್ವಹಣೆಯೊಂದಿಗೆ ತಂಡದ ಬಲ ಹೆಚ್ಚಿಸಲಾರಂಭಿಸಿದ್ದಾರೆ. ಆರ್ಸಿಬಿ ಪರ ನೀರಸ ನಿರ್ವಹಣೆಯ ನಡುವೆಯೂ ಟಿ20 ವಿಶ್ವಕಪ್ ತಂಡದಲ್ಲಿ ಸ್ಥಾನ ಪಡೆದಿರುವ ವೇಗಿ ಮೊಹಮದ್ ಸಿರಾಜ್ ಈ ಆಯ್ಕೆಯನ್ನೀಗ ಸಮರ್ಥಿಸಿಕೊಳ್ಳಬೇಕಿದೆ. ಯಶ್ ದಯಾಳ್, ಕರ್ಣ್ ಶರ್ಮ, ಸ್ವಪ್ನಿಲ್ ಸಿಂಗ್ ಸ್ಥಿರ ನಿರ್ವಹಣೆ ತೋರಬೇಕಿದೆ.
ಒತ್ತಡದಲ್ಲಿ ಗುಜರಾತ್
ಕಳೆದ 2 ಪಂದ್ಯಗಳಲ್ಲಿ ಡೆಲ್ಲಿ ಮತ್ತು ಆರ್ಸಿಬಿ ವಿರುದ್ಧ 200 ಪ್ಲಸ್ ಮೊತ್ತ ಪೇರಿಸಿಯೂ ಸೋತಿರುವ ಗುಜರಾತ್ ತಂಡವೀಗ ಹ್ಯಾಟ್ರಿಕ್ ಸೋಲಿನ ಭೀತಿಯಲ್ಲಿದೆ. ಶುಭಮಾನ್ ಗಿಲ್ ಮತ್ತು ಸಾಯಿ ಸುದರ್ಶನ್ ಒಟ್ಟಾರೆ 700ಕ್ಕೂ ಅಧಿಕ ರನ್ ಬಾರಿಸಿದ್ದಾರೆ. ಆದರೆ ಇತರ ಯಾವ ಬ್ಯಾಟರ್ ಕೂಡ 200ಕ್ಕಿಂತ ಅಧಿಕ ರನ್ ಗಳಿಸಿಲ್ಲ. ಬೌಲಿಂಗ್ ವಿಭಾಗದಲ್ಲಿ ರಶೀದ್ ಖಾನ್ ಸಹಿತ ಎಲ್ಲರ ನಿರ್ವಹಣೆ ನೀರಸವೆನಿಸಿದೆ. ರಶೀದ್ 10 ಪಂದ್ಯಗಳಲ್ಲಿ 8 ವಿಕೆಟ್ ಮಾತ್ರ ಗಳಿಸಿದ್ದಾರೆ. ಅನುಭವಿ ವೇಗಿಗಳಾದ ಉಮೇಶ್ ಯಾದವ್, ಮೋಹಿತ್ ಶರ್ಮ ಕೂಡ ಇತ್ತೀಚೆಗೆ ದುಬಾರಿ ಎನಿಸಿದ್ದಾರೆ.
ಮಳೆ ಭೀತಿ
ಉದ್ಯಾನನಗರಿಯಲ್ಲಿ ಕಳೆದ 2 ದಿನಗಳಿಂದ ಮಳೆಯಾಗುತ್ತಿದ್ದು, ಶನಿವಾರವೂ ಮುಂದುವರಿಯುವ ನಿರೀೆ ಇದೆ. ಹೀಗಾಗಿ ಪಂದ್ಯ ಮಳೆ ಅಡಚಣೆಗೆ ಒಳಗಾಗುವ ಭೀತಿ ಇದೆ. ಆದರೆ, ಓವರ್ ಕಡಿತಗೊಂಡರೂ, ಪಂದ್ಯ ಸಂಪೂರ್ಣ ರದ್ದಾಗುವ ಸಾಧ್ಯತೆ ಇಲ್ಲ. ಒಂದು ವೇಳೆ ಪಂದ್ಯ ರದ್ದಾದರೆ ಆರ್ಸಿಬಿ 1 ಅಂಕ ಹಂಚಿಕೊಂಡರೂ, ಅಧಿಕೃತವಾಗಿ ಟೂರ್ನಿಯಿಂದ ಹೊರಬೀಳಲಿದೆ.
ಮುಖಾಮುಖಿ: 4
ಆರ್ಸಿಬಿ: 2
ಗುಜರಾತ್: 2
ಆರಂಭ: ರಾತ್ರಿ 7.30
ನೇರಪ್ರಸಾರ: ಸ್ಟಾರ್ ಸ್ಪೋರ್ಟ್ಸ್, ಜಿಯೋಸಿನಿಮಾ.