ಬೆಂಗಳೂರು: ಯುವ ಎಡಗೈ ಬ್ಯಾಟರ್ ರವಿಚಂದ್ರನ್ ಸ್ಮರಣ್ ಸಾರಥ್ಯದ ಕರ್ನಾಟಕ ತಂಡ ವಿಜಯವಾಡದಲ್ಲಿ ಆತಿಥೇಯ ಆಂಧ್ರ ವಿರುದ್ಧ ಅಭಿಯಾನ ಆರಂಭಿಸಲಿದೆ. ಯುವ-ಅನುಭವಿ ಆಟಗಾರರ ಬಲವನ್ನು ಹೊಂದಿರುವ ಕರ್ನಾಟಕಕ್ಕೆ ಈ ಬಾರಿ ಮಾಜಿ ನಾಯಕ ಹಾಗೂ ವೇಗಿ ಆರ್. ವಿನಯ್ಕುಮಾರ್ ಅವರ ಮಾರ್ಗದರ್ಶನವಿರುವುದು ಹೊಸ ನಿರೀಕ್ಷೆಗಳನ್ನು ಹುಟ್ಟುಹಾಕಿದೆ. ಕಳೆದ ವರ್ಷ ಹುಬ್ಬಳ್ಳಿಯಲ್ಲಿ ನಡೆದ ಫೈನಲ್ನಲ್ಲಿ ಪ್ರಶಸ್ತಿ ವಂಚಿತವಾಗಿದ್ದ ರಾಜ್ಯ ತಂಡ, 2014-15ರ ಬಳಿಕ ಮತ್ತೊಮ್ಮೆ ಪ್ರಶಸ್ತಿ ಜಯಿಸುವ ಮೂಲಕ 12 ವರ್ಷಗಳ ಪ್ರಶಸ್ತಿ ಬರ ನೀಗಿಸುವ ಮಹತ್ವಾಕಾಂಕ್ಷೆಯೊಂದಿಗೆ ಅಭಿಯಾನ ಆರಂಭಿಸಲಿದೆ.
ಕರ್ನಾಟಕ ತಂಡ: ಮಯಾಂಕ್ ಅಗರ್ವಾಲ್, ಕೆಎಲ್ ರಾಹುಲ್, ಅನೀಶ್ವರ್ ಗೌತಮ್, ಕರುಣ್ ನಾಯರ್, ಆರ್. ಸ್ಮರಣ್ (ನಾಯಕ), ಅನೀಶ್ ಕೆ.ವಿ, ಶ್ರೇಯಸ್ ಗೋಪಾಲ್, ಕೃತಿಕ್ ಕೃಷ್ಣ (ವಿ.ಕೀ), ಶಿಖರ್ ಶೆಟ್ಟಿ, ಅಭಿಲಾಷ್ ಶೆಟ್ಟಿ, ಎಲ್. ಮನ್ವಂತ್ ಕುಮಾರ್, ಎಲ್.ಆರ್. ಕುಮಾರ್, ರಿತೇಶ್ ಭಟ್ಕಳ್, ಕೆಎಲ್ ಶ್ರೀಜಿತ್ (ವಿ.ಕೀ), ಎಂ. ವೆಂಕಟೇಶ್.
ಬೌಲರ್ಗಳಿಗೆ ಗಾಯದ ಹಿನ್ನಡೆ
ಕರ್ನಾಟಕ ತನ್ನ ಮೊದಲ ಲೀಗ್ ಪಂದ್ಯದಲ್ಲಿ ನಾಯಕ ದೇವದತ್ ಪಡಿಕ್ಕಲ್ ಗೈರಿನ ನಡುವೆ, ಟೆಸ್ಟ್ ಆರಂಭಿಕ ಕೆಎಲ್ ರಾಹುಲ್ ಹಾಜರಿಯಿಂದ ಬಲ ಪಡೆದುಕೊಂಡಿದೆ. ಜತೆಗೆ ಅನುಭವಿ ಬ್ಯಾಟರ್ಗಳಾದ ಮಯಾಂಕ್ ಅಗರ್ವಾಲ್, ಕರುಣ್ ನಾಯರ್ ಮತ್ತು ಇರಾನಿ ಕಪ್ನಲ್ಲಿ ಶತಕ ಸಿಡಿಸಿ ಪಂದ್ಯಕ್ಕೆ ತಿರುವು ನೀಡಿದ್ದ ಹಂಗಾಮಿ ನಾಯಕ ಆರ್. ಸ್ಮರಣ್ ಬ್ಯಾಟಿಂಗ್ ವಿಭಾಗಕ್ಕೆ ಭರವಸೆ ತುಂಬಿದ್ದಾರೆ. ಆದರೆ ಬೌಲಿಂಗ್ ವಿಭಾಗದಲ್ಲಿ ವೇಗಿಗಳಾದ ಪ್ರಸಿದ್ಧಕೃಷ್ಣ, ವೈಶಾಖ್ ವಿಜಯಕುಮಾರ್ ಮತ್ತು ವಿದ್ವತ್ ಕಾವೇರಪ್ಪ ಗಾಯದಿಂದಾಗಿ ಅಲಭ್ಯರಾಗಿರುವುದು ಹಿನ್ನಡೆ ತಂದಿದೆ. ಹೀಗಾಗಿ ಅನನುಭವಿಗಳಾದ ಅಭಿಲಾಷ್ ಶೆಟ್ಟಿ, ಮನ್ವಂತ್ ಕುಮಾರ್, ಎಂ. ವೆಂಕಟೇಶ್ರನ್ನು ನೆಚ್ಚಿಕೊಳ್ಳಬೇಕಿದೆ. ಸ್ಪಿನ್ ಬೌಲಿಂಗ್ನಲ್ಲಿ ಅನುಭವಿ ಶ್ರೇಯಸ್ ಗೋಪಾಲ್ಗೆ ಯುವ ಸ್ಪಿನ್ನರ್ ಶಿಖರ್ ಶೆಟ್ಟಿ ಬೆಂಬಲ ಒದಗಿಸಲಿದ್ದಾರೆ.
*ಹಾಲಿ ತಂಡದ ಆಟಗಾರರ ಅನುಭವದಲ್ಲಿ ಭಾರಿ ಅಂತರವಿದೆ. ಇದನ್ನು ಸರಿದೂಗಿಸುವ ಜವಾಬ್ದಾರಿ ನನ್ನ ಮೇಲಿದೆ. ಎಲ್ಲರಿಗೂ ಒತ್ತಡವಿಲ್ಲದೆ ಆಡುವ ವಾತಾವರಣ ಕಲ್ಪಿಸಲಿದ್ದೇನೆ.
| ಆರ್. ವಿನಯ್ಕುಮಾರ್, ರಾಜ್ಯ ತಂಡದ ಕೋಚ್
ಮುಂದಿನ ಪಂದ್ಯಕ್ಕೆ ಮತ್ತೆ ಹೊಸ ನಾಯಕ!
ಕಾಯಂ ನಾಯಕ ದೇವದತ್ ಪಡಿಕ್ಕಲ್ ಭಾರತ ಎ ತಂಡದಲ್ಲಿರುವ ಕಾರಣ ರಣಜಿ ಟ್ರೋಫಿಯ ಮೊದಲ ಪಂದ್ಯಕ್ಕೆ ಅಲಭ್ಯರಾಗಿದ್ದಾರೆ. ಹೀಗಾಗಿ ಆರ್. ಸ್ಮರಣ್ಗೆ ಹಂಗಾಮಿ ಸಾರಥ್ಯ ವಹಿಸಲಾಗಿದೆ. ಅಕ್ಟೋಬರ್ 18ರಿಂದ 21ರವರೆಗೆ ರಾಜ್ಯ ತಂಡ ತವರಿನ ಬೆಂಗಳೂರು ಹೊರವಲಯದ ಆಲೂರಿನಲ್ಲಿ ತನ್ನ 2ನೇ ಲೀಗ್ ಪಂದ್ಯ ಆಡಲಿದೆ. ಆದರೆ, ಅ.24ರಿಂದ ನ್ಯೂಜಿಲೆಂಡ್ನಲ್ಲಿ ಆಡಲಿರುವ ಚತುರ್ದಿನ ಪಂದ್ಯಗಳ ಸರಣಿಗೆ ಆರ್. ಸ್ಮರಣ್ ಕೂಡ ಭಾರತ ಎ ತಂಡದಲ್ಲಿ ಸ್ಥಾನ ಪಡೆದಿದ್ದಾರೆ. ಹೀಗಾಗಿ ಸ್ಮರಣ್ 2ನೇ ಲೀಗ್ ಪಂದ್ಯಕ್ಕೆ ಅಲಭ್ಯರಾಗುವ ಸಾಧ್ಯತೆ ಇದ್ದು, ಮತ್ತೆ ಹೊಸ ನಾಯಕನನ್ನು ಹುಡುಕುವ ಸವಾಲು ರಾಜ್ಯ ತಂಡದ ಮುಂದಿದೆ. ಈ ಬಾರಿ ಮತ್ತೆ ಯುವ ನಾಯಕನಿಗೆ ತಂಡದ ಸಾರಥ್ಯ ವಹಿಸುವ ಬದಲು, ಮಯಾಂಕ್ ಅಗರ್ವಾಲ್ ಅಥವಾ ಕರುಣ್ ನಾಯರ್ರಂಥ ಅನುಭವಿಗಳಿಗೆ ಹಂಗಾಮಿ ಜವಾಬ್ದಾರಿ ಒಪ್ಪಿಸುವ ಸಾಧ್ಯತೆ ಇದೆ.