ವಿಜಯವಾಡ: ಮೊದಲ ಇನಿಂಗ್ಸ್ ಹಿನ್ನಡೆಯ ಬಳಿಕ ಎರಡನೇ ಸರದಿಯಲ್ಲೂ ಆರಂಭಿಕ ಆಘಾತ ಎದುರಿಸಿರುವ ಹಾಲಿ ರನ್ನರ್ಅಪ್ ಕರ್ನಾಟಕ ತಂಡ ಪ್ರತಿಷ್ಠಿತ ರಣಜಿ ಟ್ರೋಫಿ ದೇಶೀಯ ಕ್ರಿಕೆಟ್ ಟೂರ್ನಿಯ ತನ್ನ ಮೊದಲ ಪಂದ್ಯದಲ್ಲಿ ಆತಿಥೇಯ ಆಂಧ್ರ ವಿರುದ್ಧ ಸೋಲಿನ ಭೀತಿಯಲ್ಲಿದೆ. ಪಂದ್ಯದ ಕೊನೇ ದಿನವಾದ ಬುಧವಾರ ಆರ್. ಸ್ಮರಣ್ ಬಳಗ ದಿಟ್ಟ ಬ್ಯಾಟಿಂಗ್ ನಿರ್ವಹಣೆ ತೋರದಿದ್ದರೆ ಸೋಲಿನಿಂದ ಪಾರಾಗುವುದು ಕಠಿಣವಾಗಲಿದೆ.
ಮುಲಪಾಡುವಿನ ಎಸಿಎ ಕ್ರಿಕೆಟ್ ಗ್ರೌಂಡ್ನಲ್ಲಿ ನಡೆಯುತ್ತಿರುವ ಪಂದ್ಯದಲ್ಲಿ ಮಂಗಳವಾರ 6 ವಿಕೆಟ್ಗೆ 331 ರನ್ಗಳಿಂದ ಮೂರನೇ ದಿನದಾಟ ಮುಂದುವರಿಸಿದ ಆಂಧ್ರ, ಮತ್ತೆ 87 ರನ್ ಸೇರಿಸಿ 121.5 ಓವರ್ಗಳಲ್ಲಿ 418 ರನ್ಗಳಿಗೆ ಆಲೌಟ್ ಆಯಿತು. 144 ರನ್ ಮೊದಲ ಇನಿಂಗ್ಸ್ ಹಿನ್ನಡೆಯೊಂದಿಗೆ 2ನೇ ಸರದಿ ಆರಂಭಿಸಿದ ಕರ್ನಾಟಕ, 43 ರನ್ಗಳಿಗೆ 3 ವಿಕೆಟ್ ಕಳೆದುಕೊಂಡು ಆಘಾತ ಎದುರಿಸಿತು. ಆಗ ಅನುಭವಿ ಬ್ಯಾಟರ್ ಕರುಣ್ ನಾಯರ್ (81*ರನ್, 130 ಎಸೆತ, 8 ಬೌಂಡರಿ, 2 ಸಿಕ್ಸರ್) ಆಸರೆಯಾಗಿ ನಿಂತರು. ಇದರಿಂದ ಕರ್ನಾಟಕ ದಿನದಂತ್ಯಕ್ಕೆ 60 ಓವರ್ಗಳಲ್ಲಿ 4 ವಿಕೆಟ್ಗೆ 176 ರನ್ ಕಲೆಹಾಕಿದ್ದು, ಸದ್ಯ 32 ರನ್ ಮುನ್ನಡೆಯಲ್ಲಿದೆ.
ಕೆಎಲ್ ರಾಹುಲ್ (1) ಮತ್ತು ಮಯಾಂಕ್ ಅಗರ್ವಾಲ್ (18) ಮತ್ತೊಮ್ಮೆ ಅಗ್ಗಕ್ಕೆ ಔಟಾದರೆ, 3ನೇ ಕ್ರಮಾಂಕಕ್ಕೆ ಬಡ್ತಿ ಪಡೆದು ಆಡಿದ ಮನ್ವಂತ್ ಕುಮಾರ್ (44) ಜತೆ ಕರುಣ್ 4ನೇ ವಿಕೆಟ್ಗೆ 94 ರನ್ ಸೇರಿಸುವ ಮೂಲಕ ಚೇತರಿಕೆ ಒದಗಿಸಿದರು. ಕರುಣ್ ಜತೆ ನಾಯಕ ಆರ್. ಸ್ಮರಣ್ (21*) ಕೊನೇ ದಿನಕ್ಕೆ ಬ್ಯಾಟಿಂಗ್ ಕಾಯ್ದುಕೊಂಡಿದ್ದಾರೆ.
ಶಿಖರ್ ಶೆಟ್ಟಿಗೆ 6 ವಿಕೆಟ್
ಎಡಗೈ ಸ್ಪಿನ್ನರ್ ಶಿಖರ್ ಶೆಟ್ಟಿ (115ಕ್ಕೆ 6) ಜೀವನಶ್ರೇಷ್ಠ ಬೌಲಿಂಗ್ ನಿರ್ವಹಣೆಯ ಮೂಲಕ ಆಂಧ್ರ ಮುನ್ನಡೆಗೆ ನಿಯಂತ್ರಣ ಹೇರಿದರು. 3ನೇ ದಿನ ಉರುಳಿದ ಆಂಧ್ರದ 4 ವಿಕೆಟ್ಗಳಲ್ಲಿ 3 ಶಿಖರ್ ಪಾಲಾದವು. 108 ರನ್ಗಳಿಂದ ದಿನದಾಟ ಆರಂಭಿಸಿದ ಶತಕವೀರ ಸೀರಂ ವೆಂಕಟ ರಾಹುಲ್ (119), ದಿನದ 12ನೇ ಓವರ್ನಲ್ಲಿ ರಿತೇಶ್ ಭಟ್ಕಳ್ಗೆ ವಿಕೆಟ್ ಒಪ್ಪಿಸಿದರು. ಬಳಿಕ ಕೆವಿ ಶಶಿಕಾಂತ್ (39) ಮತ್ತು ಸೌರಭ್ ಕುಮಾರ್ (24) ಕೆಲಕಾಲ ರಾಜ್ಯವನ್ನು ಕಾಡಿದರು. ಅಂತಿಮವಾಗಿ ಶಿಖರ್ 23 ರನ್ ಅಂತರದಲ್ಲಿ ಕೊನೇ 3 ವಿಕೆಟ್ ಕಬಳಿಸಿ ಆಂಧ್ರವನ್ನು ಸರ್ವಪತನಗೊಳಿಸಿದರು.
ಕರ್ನಾಟಕ: 274 ಮತ್ತು 60 ಓವರ್ಗಳಲ್ಲಿ 4 ವಿಕೆಟ್ಗೆ 176 (ಮಯಾಂಕ್ 18, ರಾಹುಲ್ 1, ಮನ್ವಂತ್ 44, ಕೆವಿ ಅನೀಶ್ 6, ಕರುಣ್ 81*, ಆರ್. ಸ್ಮರಣ್ 21*, ಸೌರಭ್ 40ಕ್ಕೆ 3, ಲಲಿತ್ 55ಕ್ಕೆ 1), ಆಂಧ್ರ: 121.5 ಓವರ್ಗಳಲ್ಲಿ 418 (ಸೀರಂ ರಾಹುಲ್ 119, ಶಶಿಕಾಂತ್ 39, ಸೌರಭ್ 24, ಲಲಿತ್ ಮೋಹನ್ 16*, ಶಿಖರ್ ಶೆಟ್ಟಿ 115ಕ್ಕೆ 6, ಮಾಧವ್ 94ಕ್ಕೆ 2, ರಿತೇಶ್ 109ಕ್ಕೆ 2).
*6: ಶಿಖರ್ ಶೆಟ್ಟಿ 115 ರನ್ಗಳಿಗೆ 6 ವಿಕೆಟ್ ಕಬಳಿಸಿ ಪ್ರಥಮ ದರ್ಜೆ ಕ್ರಿಕೆಟ್ನಲ್ಲಿ ತನ್ನ ಜೀವನಶ್ರೇಷ್ಠ ಬೌಲಿಂಗ್ ನಿರ್ವಹಣೆ ತೋರಿದರು. ಅವರಿಗೆ ಇದು 2ನೇ ಬಾರಿ 5 ವಿಕೆಟ್ ಗೊಂಚಲು ಆಗಿದೆ.