ಮೀರ್ಪುರ: ವೇಗಿ ಕಗಿಸೊ ರಬಾಡ (39ಕ್ಕೆ 6) ಮಾರಕ ಬೌಲಿಂಗ್ ದಾಳಿ ನೆರವಿನಿಂದ ದಕ್ಷಿಣ ಆಫ್ರಿಕಾ ತಂಡ ಬಾಂಗ್ಲಾದೇಶ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದಲ್ಲಿ 7 ವಿಕೆಟ್ಗಳಿಂದ ಗೆಲುವು ದಾಖಲಿಸಿದೆ. ಈ ಮೂಲಕ ದ. ಆಫ್ರಿಕಾ ತಂಡ ಏಷ್ಯಾದಲ್ಲಿ 10 ವರ್ಷಗಳ ಬಳಿಕ ಟೆಸ್ಟ್ ಪಂದ್ಯ ಗೆದ್ದ ಸಾಧನೆ ಮಾಡಿದೆ. 2014ರಲ್ಲಿ ಕೊನೆಯದಾಗಿ ಗಾಲೆಯಲ್ಲಿ ಶ್ರೀಲಂಕಾ ವಿರುದ್ಧ ಹರಿಣಗಳ ಪಡೆ ಗೆಲುವು ಸಾಧಿಸಿತ್ತು.
7 ವಿಕೆಟ್ಗೆ 283 ರನ್ಗಳಿಂದ 4ನೇ ದಿನದಾಟ ಆರಂಭಿಸಿದ ಬಾಂಗ್ಲಾ 307 ರನ್ಗಳಿಗೆ ಸರ್ವಪತನ ಕಂಡಿತು. ಪ್ರತಿಯಾಗಿ 106 ರನ್ ಸವಾಲು ಪಡೆದ ದ. ಆಫ್ರಿಕಾ 22 ಓವರ್ಗಳಲ್ಲಿ 3 ವಿಕೆಟ್ ನಷ್ಟದಲ್ಲಿ ಗುರಿ ತಲುಪಿತು. ಈ ಮೂಲಕ ಏಡನ್ ಮಾರ್ಕ್ರಮ್ ಪಡೆ 2 ಪಂದ್ಯಗಳ ಸರಣಿಯಲ್ಲಿ 1-0 ಮುನ್ನಡೆ ಸಾಧಿಸಿದೆ. 2ನೇ ಟೆಸ್ಟ್ ಮಂಗಳವಾರದಿಂದ ಚಟ್ಟೋಗ್ರಾಮ್ನಲ್ಲಿ ನಡೆಯಲಿದೆ.
ಬಾಂಗ್ಲಾದೇಶ: 106 ಮತ್ತು 307 (ಮೆಹಿದಿ ಹಸನ್ 97, ರಬಾಡ 46ಕ್ಕೆ 6, ಕೇಶವ್ 105ಕ್ಕೆ 3), ದ. ಆಫ್ರಿಕಾ: 308 ಮತ್ತು 3 ವಿಕೆಟ್ಗೆ 106 (ಜಾರ್ಜಿ 41, ಸ್ಟಬ್ಸ್ 30*, ಮಾರ್ಕ್ರಮ್ 20, ತೈಜುಲ್ 43ಕ್ಕೆ 3). ಪಂದ್ಯಶ್ರೇಷ್ಠ: ಕೈಲ್ ವೆರೇಯ್ನ್
ಡಬ್ಲ್ಯುಟಿಸಿಯಲ್ಲಿ 4ನೇ ಸ್ಥಾನಕ್ಕೇರಿದ ಹರಿಣಗಳ ಪಡೆ
ಮೀರ್ಪುರ ಟೆಸ್ಟ್ ಜಯದೊಂದಿಗೆ ದ. ಆಫ್ರಿಕಾ ತಂಡ 3ನೇ ಆವೃತ್ತಿಯ ಐಸಿಸಿ ವಿಶ್ವ ಟೆಸ್ಟ್ ಚಾಂಪಿಯನ್ಷಿಪ್ (ಡಬ್ಲ್ಯುಟಿಸಿ) ಅಂಕಪಟ್ಟಿಯಲ್ಲಿ 4ನೇ ಸ್ಥಾನಕ್ಕೇರಿದೆ. ದ. ಆಫ್ರಿಕಾ ಈಗ ಶೇ. 47.62 ಅಂಕ ಕಲೆಹಾಕಿದ್ದು, ಫೈನಲ್ಗೇರುವ ಅವಕಾಶ ವೃದ್ಧಿಸಿಕೊಂಡಿದೆ. ನ್ಯೂಜಿಲೆಂಡ್ (ಶೇ. 44.44) 5ನೇ ಸ್ಥಾನಕ್ಕಿಳಿದಿದೆ. ಭಾರತ (ಶೇ.68.06), ಆಸ್ಟ್ರೆಲಿಯಾ (ಶೇ.62.50), ಶ್ರೀಲಂಕಾ (ಶೇ. 55.56) ಮೊದಲ 3 ಸ್ಥಾನದಲ್ಲಿವೆ.