ವಿಶಾಖಪಟ್ಟಣ: ಇಂಗ್ಲೆಂಡ್ ವಿರುದ್ದದ 2ನೇ ಟೆಸ್ಟ್ನಲ್ಲಿ ಭಾರತ 106 ರನ್ಗಳಿಂದ ಗೆದ್ದಿತು. ಈ ವೇಳೆ ಭಾರತೀಯ ಸಂಭ್ರಮವನ್ನು ದುಪ್ಪಟ್ಟುಗೊಳಿಸಬಹುದಾಗಿದ್ದ ಆರ್. ಅಶ್ವಿನ್ ಅವರ 500ನೇ ವಿಕೆಟ್ ಸಾಧನೆ ಸ್ವಲ್ಪದರಲ್ಲಿಯೇ ತಪ್ಪಿಹೋಯಿತು. ಇದಕ್ಕೆ ಡಿಆರ್ಎಸ್ ಪ್ರಮುಖ ಕಾರಣವಾಯಿತು!
ಅನುಭವಿ ಸ್ಪಿನ್ನರ್ ಆರ್. ಅಶ್ವಿನ್ ಸೋಮವಾರವೇ ಟೆಸ್ಟ್ ಕ್ರಿಕೆಟ್ನಲ್ಲಿ 500 ವಿಕೆಟ್ ಮೈಲಿಗಲ್ಲು ಸ್ಥಾಪಿಸುವತ್ತ ಮುನ್ನುಗ್ಗಿದರೂ 1 ವಿಕೆಟ್ ಕೊರತೆ ಎದುರಿಸಿದ್ದು, ಇನ್ನು ರಾಜ್ಕೋಟ್ ಟೆಸ್ಟ್ವರೆಗೆ ಕಾಯಬೇಕಾಗಿದೆ.
4ನೇ ದಿನದಾಟದಲ್ಲಿ 2 ವಿಕೆಟ್ ಕಬಳಿಸಿದ ಅಶ್ವಿನ್ ವಿಕೆಟ್ ಗಳಿಕೆಯನ್ನು 499ಕ್ಕೇರಿಸಿಕೊಂಡರು. ಅಶ್ವಿನ್ ಎಸೆದ ಇನಿಂಗ್ಸ್ನ 63ನೇ ಓವರ್ನಲ್ಲಿ ಟಾಮ್ ಹಾರ್ಟ್ಲಿ ರಿವರ್ಸ್ ಸ್ವೀಪ್ ಮಾಡಲು ಯತ್ನಿಸಿದಾಗ ಚೆಂಡು ಅವರ ಬ್ಯಾಟ್ಗೆ ಕನೆಕ್ಟ್ ಆಗದೆ ಕೈಗೆ ಬಡಿದು ಕೀಪರ್ ಹಿಂದಕ್ಕೆ ಹಾರಿದಾಗ ರೋಹಿತ್ ಶರ್ಮ ಓಡಿಬಂದು ಕ್ಯಾಚ್ ಹಿಡಿದರು. ಮೈದಾನದ ಅಂಪೈರ್ ಔಟ್ ತೀರ್ಪನ್ನು ನೀಡಿದಾಗ ಅಶ್ವಿನ್ 500ನೇ ವಿಕೆಟ್ ಪಡೆದರು ಎಂದೇ ಭಾವಿಸಲಾಯಿತು. ಆದರೆ ಹಾರ್ಟ್ಲಿ ಡಿಆರ್ಎಸ್ ಮೊರೆ ಹೋದಾಗ ತೃತೀಯ ಅಂಪೈರ್ ನಾಟೌಟ್ ತೀರ್ಪಿತ್ತರು. ಮೈದಾನದ ಅಂಪೈರ್ ಕ್ಯಾಚ್ ಔಟ್ ನೀಡಿದ್ದರೆ ತೃತೀಯ ಅಂಪೈರ್ ಎಲ್ಬಿಡಬ್ಲ್ಯು ಪರಾಮರ್ಶೆ ನಡೆಸಿದರು. ಈ ಬಗ್ಗೆ ರೋಹಿತ್ ಮೈದಾನದ ಅಂಪೈರ್ ಜತೆ ವಾಗ್ವಾದ ನಡೆಸಿದರೂ, ತೃತೀಯ ಅಂಪೈರ್ ಕ್ಯಾಚ್ ಪರಾಮರ್ಶೆ ಬಗ್ಗೆ ಹೆಚ್ಚಿನ ತಲೆಕೆಡಿಸಿಕೊಳ್ಳಲಿಲ್ಲ. ಇದರಿಂದ ಆರ್. ಅಶ್ವಿನ್ ಅವರ 500ನೇ ವಿಕೆಟ್ ಸಂಭ್ರಮವನ್ನು ಕಾಣಲು ವಿಶಾಖಪಟ್ಟಣದ ಪ್ರೇಕ್ಷಕರಿಗೆ ಅವಕಾಶ ಕೂಡಿಬರಲಿಲ್ಲ.
ಕನ್ನಡಿಗ ಅನಿಲ್ ಕುಂಬ್ಳೆ (619) ಭಾರತ ಪರ 500 ಟೆಸ್ಟ್ ವಿಕೆಟ್ ಪಡೆದ ಮೊದಲ ಸಾಧಕರಾಗಿದ್ದು, ಆರ್. ಅಶ್ವಿನ್ ಈ ಸಾಧನೆ ಮಾಡಿದ 2ನೇ ಭಾರತೀಯರೆನಿಸುವ ತವಕದಲ್ಲಿದ್ದಾರೆ.