ಹೈದರಾಬಾದ್: ಭಾರತದ ಅಗ್ರ ಬ್ಯಾಡ್ಮಿಂಟನ್ ತಾರೆ ಪಿವಿ ಸಿಂಧು ಮತ್ತು ಹೈದರಾಬಾದ್ ಉದ್ಯಮಿ ವೆಂಕಟ ದತ್ತ ಸಾಯಿ ಅವರ ನಿಶ್ಚಿತಾರ್ಥ ಶನಿವಾರ ನಡೆದಿದೆ. ಡಿಸೆಂಬರ್ 22ರಂದು ರಾಜಸ್ಥಾನದ ಉದಯಪುರದಲ್ಲಿ ಇವರಿಬ್ಬರು ವೈವಾಹಿಕ ಜೀವನಕ್ಕೆ ಕಾಲಿಡಲಿದ್ದಾರೆ.
"ಮಿಸ್ ಟು ಮಿಸ್ಸೆಸ್' ಎಂಬ ಲಕದ ಎದುರು ಕೇಕ್ ಕತ್ತರಿಸಿ ವೆಂಕಟ ದತ್ತಗೆ ತಿನ್ನಿಸುತ್ತಿರುವ ಚಿತ್ರದೊಂದಿಗೆ 29 ವರ್ಷದ ಸಿಂಧು, "ಪ್ರೀತಿಯು ಕರೆದಾಗ ಅದನ್ನು ಹಿಂಬಾಲಿಸು. ಏಕೆಂದರೆ ಪ್ರೀತಿಯು ತನ್ನನ್ನು ಬಿಟ್ಟು ಬೇರೇನನ್ನೂ ನೀಡುವುದಿಲ್ಲ' ಎಂಬ ಜನಪ್ರಿಯ ಲೆಬನನ್ ಕವಿ ಕಹ್ಲಿಲ್ ಗಿಬ್ರನ್ರ ಪ್ರೇಮಸಂದೇಶವನ್ನು ಪ್ರಕಟಿಸುವ ಮೂಲಕ ನಿಶ್ಚಿತಾರ್ಥವನ್ನು ಇನ್ಸ್ಟಾಗ್ರಾಂನಲ್ಲಿ ಪ್ರಕಟಿಸಿದ್ದಾರೆ.
2 ವಾರಗಳ ಹಿಂದೆ ಲಖನೌದಲ್ಲಿ ಪಿವಿ ಸಿಂಧು, ಸಯ್ಯದ್ ಮೋದಿ ಬ್ಯಾಡ್ಮಿಂಟನ್ ಟೂರ್ನಿ ಜಯಿಸುವ ಮೂಲಕ ಎರಡೂವರೆ ವರ್ಷಗಳ ಪ್ರಶಸ್ತಿ ಬರ ನೀಗಿಸಿಕೊಂಡಿದ್ದರು. ಅದರ ಬೆನ್ನಲ್ಲೇ ಸಿಂಧು ವಿವಾಹವಾಗುತ್ತಿರುವ ಸುದ್ದಿಯೂ ಖಚಿತಪಟ್ಟಿತ್ತು. ಅದ್ದೂರಿ ವಿವಾಹ ಸಮಾರಂಭಕ್ಕೆ ಪೂರ್ವಭಾವಿಯಾಗಿ ಡಿ. 20ರಿಂದಲೇ ಸಂಭ್ರಮೋತ್ಸವ ಶುರುವಾಗಲಿದೆ. ಪ್ರಧಾನಿ ನರೇಂದ್ರ ಮೋದಿ, ಗೃಹ ಸಚಿವ ಅಮಿತ್ ಷಾ, ವಿದೇಶಾಂಗ ಸಚಿವ ಜೈಶಂಕರ್, ಕ್ರಿಕೆಟ್ ದಿಗ್ಗಜ ಸಚಿನ್ ತೆಂಡುಲ್ಕರ್ ಸಹಿತ ಗಣ್ಯರನ್ನು ಸಿಂಧು ಈಗಾಗಲೆ ವಿವಾಹಕ್ಕೆ ಆಹ್ವಾನಿಸಿದ್ದಾರೆ. ಡಿಸೆಂಬರ್ 24ರಂದು ಹೈದರಾಬಾದ್ನಲ್ಲಿ ಆರತಕ್ಷತೆ ಕಾರ್ಯಕ್ರಮ ನಡೆಯಲಿದೆ.