ವಿಶ್ವ ಚೆಸ್ನಲ್ಲಿ ಹಂಪಿ, ಅರ್ಜುನ್ಗೆ ಪ್ರಧಾನಿ ನರೇಂದ್ರ ಮೋದಿ ಅಭಿನಂದನೆ
ನವದೆಹಲಿ: ಫಿಡೆ ವಿಶ್ವ ರ್ಯಾಪಿಡ್ ಚೆಸ್ ಚಾಂಪಿಯನ್ಷಿಪ್ನಲ್ಲಿ (FIDE World Rapid Championships) ಕ್ರಮವಾಗಿ ಮಹಿಳಾ ಮತ್ತು ಮುಕ್ತ ವಿಭಾಗದಲ್ಲಿ ಕಂಚಿನ ಪದಕ ಗೆದ್ದುಕೊಂಡ ಭಾರತದ ಗ್ರಾಂಡ್ ಮಾಸ್ಟರ್ಗಳಾದ ಕೊನೆರು ಹಂಪಿ (Koneru Humpy) ಮತ್ತು ಅರ್ಜುನ್ ಇರಿಗೈಸಿ (Arjun Erigaisi) ಅವರನ್ನು ಪ್ರಧಾನಿ ನರೇಂದ್ರ ಮೋದಿ (Narendra Modi) ಸೋಮವಾರ ಅಭಿನಂದಿಸಿದ್ದಾರೆ.
ಚೆಸ್ ಆಟದ ಬಗೆಗಿನ ಹಂಪಿ ಸಮರ್ಪಣೆ ಶ್ಲಾನೀಯವಾದುದು. ಅರ್ಜುನ್ ಅವರ ಸಾಧನೆಯೂ ಹೆಮ್ಮೆ ತಂದಿದೆ. ಅವರ ದಿಟ್ಟತನ ಗಮನಾರ್ಹವಾದುದು ಎಂದು ಮೋದಿ ಸಾಮಾಜಿಕ ಜಾಲತಾಣ ಎಕ್ಸ್ನಲ್ಲಿ ಪ್ರಶಂಸಿಸಿದ್ದಾರೆ. ಜತೆಗೆ ಭವಿಷ್ಯದ ಟೂರ್ನಿಗಳಿಗೆ ಶುಭ ಹಾರೈಸಿದ್ದಾರೆ.
38 ವರ್ಷದ ಕೊನೆರು ಹಂಪಿ ವಿಶ್ವ ರ್ಯಾಪಿಡ್ ಚಾಂಪಿಯನ್ಷಿಪ್ನಲ್ಲಿ 4ನೇ ಬಾರಿ ಪದಕ ಗೆದ್ದ ಸಾಧನೆ ಮಾಡಿದರು. ಅವರು ಈ ಮುನ್ನ 2019, 2024ರಲ್ಲಿ ಚಾಂಪಿಯನ್ ಆಗಿದ್ದರೆ, 2012ರಲ್ಲಿ ಬೆಳ್ಳಿ ಜಯಿಸಿದ್ದರು. 22 ವರ್ಷದ ಅರ್ಜುನ್ ವಿಶ್ವ ರ್ಯಾಪಿಡ್ ಮುಕ್ತ ಚಾಂಪಿಯನ್ಷಿಪ್ನಲ್ಲಿ ಪದಕ ಗೆದ್ದ 2ನೇ ಭಾರತೀಯರಾಗಿದ್ದಾರೆ. ವಿಶ್ವನಾಥನ್ ಆನಂದ್ 2 ಬಾರಿ (2003, 2017) ಚಾಂಪಿಯನ್ ಪಟ್ಟಕ್ಕೇರಿದ್ದರು.