ದುಬೈ: ಅಮೆಲಿಯಾ ಕೆರ್ (43 ರನ್, 38 ಎಸೆತ, 4 ಬೌಂಡರಿ, 24ಕ್ಕೆ 3) ಆಲ್ರೌಂಡ್ ಆಟದ ನೆರವಿನಿಂದ ನ್ಯೂಜಿಲೆಂಡ್ ತಂಡ ಮಹಿಳಾ ಟಿ20 ವಿಶ್ವಕಪ್ ಫೈನಲ್ನಲ್ಲಿ ದಕ್ಷಿಣ ಆಫ್ರಿಕಾ ಎದುರು 32 ರನ್ಗಳಿಂದ ಗೆಲುವು ಸಾಧಿಸಿದೆ. ಈ ಮೂಲಕ ಕಿವೀಸ್ ಮಹಿಳೆಯರು ಚೊಚ್ಚಲ ಟಿ20 ವಿಶ್ವಕಪ್ ಕಿರೀಟ ಒಲಿಸಿಕೊಂಡರೆ, ದಣ ಆಫ್ರಿಕಾದ ಮಹಿಳೆಯರು ಪುರುಷರಂತೆ ಫೈನಲ್ನಲ್ಲಿ ಮುಗ್ಗರಿಸಿ ಸತತ 2ನೇ ಬಾರಿ ರನ್ನರ್ ಅಪ್ ಸ್ಥಾನಕ್ಕೆ ತೃಪ್ತಿಪಟ್ಟರು. ಹಾಲಿ ವರ್ಷದ ಪುರುಷರ ಟಿ20 ವಿಶ್ವಕಪ್ನಲ್ಲೂ ದ. ಆಫ್ರಿಕಾ ತಂಡ ಫೈನಲ್ನಲ್ಲಿ ಭಾರತದ ಎದುರು ಮುಗ್ಗರಿಸಿತ್ತು.
ದುಬೈ ಕ್ರೀಡಾಂಗಣದಲ್ಲಿ ಭಾನುವಾರ ನಡೆದ ಪ್ರಶಸ್ತಿ ಕಾದಾಟದಲ್ಲಿ ಟಾಸ್ ಸೋತು ಮೊದಲು ಬ್ಯಾಟಿಂಗ್ಗೆ ಇಳಿದ ನ್ಯೂಜಿಲೆಂಡ್, ಅನುಭವಿ ಸುಜಿ ಬೇಟ್ಸ್ (32), ಕೆರ್ ಮತ್ತು ಬ್ರೂಕ್ ಹ್ಯಾಲಿಡೇ (38 ರನ್, 28 ಎಸೆತ, 3 ಬೌಂಡರಿ) ಉಪಯಕ್ತ ಆಟದಿಂದ 5 ವಿಕೆಟ್ಗೆ 158 ರನ್ ಕಲೆಹಾಕಿತು. ಅಂತಿಮ ಐದು ಓವರ್ಗಳಲ್ಲಿ ನ್ಯೂಜಿಲೆಂಡ್ 48 ರನ್ ಕಸಿಯಿತು. ಪ್ರತಿಯಾಗಿ ದ. ಆಫ್ರಿಕಾ ಪವರ್ಪ್ಲೇನಲ್ಲಿ 47 ರನ್ ಗಳಿಸಿ ಉತ್ತಮ ಆರಂಭ ಪಡೆಯಿತು. ಆದರೆ ನಂತರದಲ್ಲಿ ಕುಸಿತ ಕಂಡ ದಣ ಆಫ್ರಿಕಾ ಅಂತಿಮವಾಗಿ 9 ವಿಕೆಟ್ಗೆ 126 ರನ್ ಗಳಿಸಲಷ್ಟೇ ಶಕ್ತವಾಯಿತು. 3ನೇ ಮತ್ತು 14 ವರ್ಷಗಳ ಬಳಿಕ ಫೈನಲ್ಗೇರಿದ್ದ ಕಿವೀಸ್, ಮಹಿಳಾ ಟಿ20 ವಿಶ್ವಕಪ್ ಗೆದ್ದ 4ನೇ ತಂಡವೆನಿಸಿತು. ಆಸ್ಟ್ರೆಲಿಯಾ (6), ಇಂಗ್ಲೆಂಡ್, ವೆಸ್ಟ್ ಇಂಡೀಸ್ ಹಿಂದಿನ 3 ತಂಡಗಳು.
ನ್ಯೂಜಿಲೆಂಡ್: 5 ವಿಕೆಟ್ಗೆ 158 (ಬೇಟ್ಸ್ 32, ಜಾರ್ಜಿಯಾ ಪ್ಲಿಮ್ಮರ್ 9, ಅಮೆಲಿಯಾ ಕೆರ್ 43, ಸೋಫಿ ಡಿವೈನ್ 6, ಬ್ರೂಕ್ ಹ್ಯಾಲಿ ಡೇ 38, ಗ್ರೀನ್ 12, ಇಸಾಬೆಲ್ಲಾ 3, ಮ್ಲಾಬಾ 31ಕ್ಕೆ 2, ಡಿ ಕ್ಲರ್ಕ್ 17ಕ್ಕೆ 1). ದ. ಆಫ್ರಿಕಾ: 9 ವಿಕೆಟ್ಗೆ 126 (ವೊಲ್ವಾರ್ಡ್ 33, ಬ್ರಿಟ್ಸ್ 17, ಬೋಷ್ 9, ಕಾಪ್ 8, ಡಿಕ್ಲರ್ಕ್ 6, ಟೆಆನ್ 14, ಕೆರ್ 24ಕ್ಕೆ 3, ಕರ್ಸನ್ 22ಕ್ಕೆ 1, ಮೈರ್ 25ಕ್ಕೆ 3).
ಸಮಾನ ಬಹುಮಾನ ಮೊತ್ತ
ದಣ ಆಫ್ರಿಕಾ ಮಹಿಳಾ ತಂಡ ಟಿ20 ವಿಶ್ವಕಪ್ನಲ್ಲಿ ಪುರುಷರಷ್ಟೇ ಬಹುಮಾನ ಮೊತ್ತ ಪಡೆದ ಮೊದಲ ತಂಡವೆನಿಸಿತು. ಐಸಿಸಿ ಇದೇ ಮೊದಲ ಬಾರಿಗೆ ಸಮಾನ ಬಹುಮಾನ ವಿತರಿಸಿದ್ದು, ವಿಜೇತ ತಂಡ ಒಟ್ಟು 19.59 ಕೋಟಿ ರೂ. ಬಹುಮಾನ ಮೊತ್ತ ಪಡೆದರೆ, ರನ್ನರ್ಅಪ್ ಕಿವೀಸ್ ತಂಡ 9.79 ಕೋಟಿ ರೂ. ಗಳಿಸಿತು.
2: ನ್ಯೂಜಿಲೆಂಡ್ ಮಹಿಳೆಯರ ಏಕದಿನ&ಟಿ20 ವಿಶ್ವಕಪ್ ಎರಡೂ ಗೆದ್ದ 3ನೇ ತಂಡವೆನಿಸಿದೆ. ಆಸೀಸ್, ಇಂಗ್ಲೆಂಡ್ ಮೊದಲೆರಡು ತಂಡಗಳಾಗಿವೆ. ಕಿವೀಸ್ 2000ದಲ್ಲಿ ಮಹಿಳಾ ಏಕದಿನ ವಿಶ್ವಕಪ್ ಗೆದ್ದಿತ್ತು.
3. ದ.ಆಫ್ರಿಕಾ ಒಂದೇ ವರ್ಷದಲ್ಲಿ ಪುರುಷರ ಹಾಗೂ ಮಹಿಳಾ ಟಿ20 ವಿಶ್ವಕಪ್ ಫೈನಲ್ ಆಡಿದ
3ನೇ ತಂಡ ಎನಿಸಿತು. ಆಸ್ಟ್ರೆಲಿಯಾ (2010), ವೆಸ್ಟ್ ಇಂಡೀಸ್ (2016) ಹಿಂದಿನ 2 ತಂಡಗಳು.
ಮಿಥಾಲಿ ಹಿಂದಿಕ್ಕಿದ್ದ ಬೇಟ್ಸ್
ಸುಜಿ ಬೇಟ್ಸ್ (334)ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಅತಿ ಹೆಚ್ಚು ಪಂದ್ಯಗಳನ್ನಾಡಿದ ಆಟಗಾರ್ತಿ ಎನಿಸಿದರು. ಇದರೊಂದಿಗೆ ಭಾರತದ ಮಾಜಿ ನಾಯಕಿ ಮಿಥಾಲಿ ರಾಜ್ (333) ದಾಖಲೆಯನ್ನು ಹಿಂದಿಕ್ಕಿದ್ದರು. 14 ವರ್ಷಗಳ ವೃತ್ತೀಜಿವನದಲ್ಲಿ 163 ಏಕದಿನ ಆಡಿರುವ ಸುಜಿ ಬೇಟ್ಸ್ 5,718 ರನ್ ಕಲೆಹಾಕಿದ್ದು, 171 ಟಿ20ಯಲ್ಲಿ 4,552 ರನ್ ಪೇರಿಸಿದ್ದಾರೆ. 2006ರಲ್ಲಿ ಭಾರತದ ವಿರುದ್ಧ ಅಂತಾರಾಷ್ಟ್ರೀಯ ಕ್ರಿಕೆಟ್ಗೆ ಪದಾರ್ಪಣೆ ಮಾಡಿದ 37 ವರ್ಷದ ಸುಜಿ ಬೇಟ್ಸ್, 2008ರ ಬೀಜಿಂಗ್ ಒಲಿಂಪಿಕ್ಸ್ನ ಬಾಸ್ಕೆಟ್ಬಾಲ್ನಲ್ಲಿಯೂ ನ್ಯೂಜಿಲೆಂಡ್ ತಂಡವನ್ನು ಪ್ರತಿನಿಧಿಸಿದ್ದಾರೆ.