ಕ್ರೖೆಸ್ಟ್ಚರ್ಚ್: ಭಾರತ ರಾಷ್ಟ್ರೀಯ ತಂಡ ನ್ಯೂಜಿಲೆಂಡ್ ನೆಲದಲ್ಲಿ ಗೆಲುವಿನ ಅಭಿಯಾನದಲ್ಲಿರುವ ನಡುವೆ ಭಾರತ ಎ ತಂಡ ಏಕದಿನ ಸರಣಿಯಲ್ಲಿ 1-2ರಿಂದ ಸೋಲು ಕಂಡಿದೆ. ಭಾನುವಾರ ನಡೆದ ಸರಣಿಯ ನಿರ್ಣಾಯಕ 3ನೇ ಏಕದಿನ ಪಂದ್ಯದಲ್ಲಿ ಭಾರತ ಎ ತಂಡ ಆತಿಥೇಯ ನ್ಯೂಜಿಲೆಂಡ್ ಎ ವಿರುದ್ಧ 5 ರನ್ಗಳಿಂದ ರೋಚಕ ಸೋಲು ಎದುರಿಸಿತು. ವಿಕೆಟ್ ಕೀಪರ್-ಬ್ಯಾಟ್ಸ್ಮನ್ ಇಶನ್ ಕಿಶನ್ (71*ರನ್, 84 ಎಸೆತ, 8 ಬೌಂಡರಿ) ಹೋರಾಟದ ನಡುವೆ 9 ಎಸೆತಗಳ ಅಂತರದಲ್ಲಿ ಕೊನೇ 4 ವಿಕೆಟ್ ಕಳೆದುಕೊಂಡು ಭಾರತ ಎ ತಂಡ ಎಡವಿತು.
ಟಾಸ್ ಸೋತು ಬ್ಯಾಟಿಂಗ್ಗೆ ಇಳಿದ ಕಿವೀಸ್ ಎ ತಂಡ ಒಂದು ಹಂತದಲ್ಲಿ 105 ರನ್ಗೆ 6 ವಿಕೆಟ್ ಕಳೆದುಕೊಂಡು ಸಂಕಷ್ಟದಲ್ಲಿತ್ತು. ಆಗ ಜತೆಗೂಡಿದ ಮಾರ್ಕ್ ಚಾಪ್ವುನ್ (110*) ಮತ್ತು ಟಾಡ್ ಆಸ್ಟಲ್ (56) 7ನೇ ವಿಕೆಟ್ಗೆ 136 ರನ್ ಕೂಡಿಸಿ ಕಿವೀಸ್ ತಂಡ 7 ವಿಕೆಟ್ಗೆ 270 ರನ್ಗಳ ಸ್ಪರ್ಧಾತ್ಮಕ ಮೊತ್ತ ಪೇರಿಸಲು ನೆರವಾದರು. ಪ್ರತಿಯಾಗಿ ಕನ್ನಡಿಗ ಮಯಾಂಕ್ ಅಗರ್ವಾಲ್ ಸಾರಥ್ಯದ ಭಾರತ ಎ ತಂಡ ಉತ್ತಮ ಆರಂಭ ಕಂಡರೂ, ಮಧ್ಯಮ ಸರದಿಯ ಕುಸಿತದಿಂದಾಗಿ 49.4 ಓವರ್ಗಳಲ್ಲಿ 265 ರನ್ಗೆ ಆಲೌಟ್ ಆಯಿತು.
ಇನ್ನು ಜನವರಿ 30ರಿಂದ ಉಭಯ ತಂಡಗಳ ನಡುವೆ 2 ಪಂದ್ಯಗಳ ಚತುರ್ದಿನ ಟೆಸ್ಟ್ ಸರಣಿ ನಡೆಯಲಿದೆ. ಇದು ಭಾರತ ತಂಡದ ಕೆಲ ಆಟಗಾರರಿಗೆ ಟೆಸ್ಟ್ ಸರಣಿಗೆ ಪೂರ್ವಸಿದ್ಧತೆಯೂ ಆಗಿರಲಿದೆ.
ನ್ಯೂಜಿಲೆಂಡ್ ಎ: 7 ವಿಕೆಟ್ಗೆ 270 (ವರ್ಕರ್ 6, ಫಿಲಿಪ್ಸ್ 35, ಬ್ಲಂಡೆಲ್ 37, ಚಾಪ್ವುನ್ 110*, ಟಾಡ್ ಆಸ್ಟಲ್ 56, ಪೊರೆಲ್ 64ಕ್ಕೆ 3, ರಾಹುಲ್ ಚಹರ್ 49ಕ್ಕೆ 2). ಭಾರತ ಎ: 49.4 ಓವರ್ಗಳಲ್ಲಿ 265 (ಪೃಥ್ವಿ ಷಾ 55, ಋತುರಾಜ್ 44, ಮಯಾಂಕ್ 24, ಕಿಶನ್ 71*, ಅಕ್ಷರ್ 32, ಜೇಮಿಸನ್ 49ಕ್ಕೆ 4, ಅಜಾಜ್ 44ಕ್ಕೆ 3, ರಚಿನ್ ರವೀಂದ್ರ 43ಕ್ಕೆ 2). -ಪಿಟಿಐ/ಏಜೆನ್ಸೀಸ್
ಕೊನೇ ಓವರ್ನಲ್ಲಿ ಭಾರತದ ಗೆಲುವಿಗೆ 7 ರನ್ ಬೇಕಿತ್ತು ಮತ್ತು 2 ವಿಕೆಟ್ ಕೈಯಲ್ಲಿತ್ತು. ಆದರೆ ವೇಗಿ ಕೈಲ್ ಜೇಮಿಸನ್ (49ಕ್ಕೆ 4) ಓವರ್ನ ಮೊದಲ ಎಸೆತದಲ್ಲಿ ರನ್ ಗಳಿಸದ ಇಶನ್ ಕಿಶನ್, 2ನೇ ಎಸೆತದಲ್ಲಿ ಸಿಂಗಲ್ಸ್ ಕಸಿದು ಬಾಲಂಗೋಚಿಗಳಿಗೆ ಸ್ಟ್ರೈಕ್ ಬಿಟ್ಟುಕೊಟ್ಟರು. ಮುಂದಿನೆರಡು ಎಸೆತಗಳಲ್ಲಿ ಸಂದೀಪ್ ವಾರಿಯರ್ ಮತ್ತು ಇಶನ್ ಪೊರೆಲ್ ವಿಕೆಟ್ ಕಬಳಿಸುವ ಮೂಲಕ ಜೇಮಿಸನ್ ಕಿವೀಸ್ಗೆ ಗೆಲುವು ತಂದರು. ಇದಕ್ಕೆ ಮುನ್ನ ಇನಿಂಗ್ಸ್ನ 49ನೇ ಓವರ್ನಲ್ಲಿ ಅಕ್ಷರ್ ಪಟೇಲ್ (32) ಮತ್ತು ರಾಹುಲ್ ಚಹರ್ (0) ಔಟಾಗಿದ್ದರು.