ಟೋಕಿಯೊ: ಕರ್ನಾಟಕದ ಕುದುರೆ ಸವಾರ ಫವಾದ್ ಮಿರ್ಜಾ ಅವರ ಈಕ್ವೆಸ್ಟ್ರಿಯನ್ ಸ್ಪರ್ಧೆಯ ಜತೆಗಾರ ಕುದುರೆ ‘ಸೆನ್ಯೂಹ್ ಮೆಡಿಕಾಟ್’ ಆರೋಗ್ಯ ಪರೀಕ್ಷೆಯಲ್ಲಿ ಪಾಸ್ ಆಗಿದ್ದು, ಶುಕ್ರವಾರದಿಂದ ಸ್ಪರ್ಧೆಗಿಳಿಯಲು ಫಿಟ್ ಆಗಿದೆ. ಗುರುವಾರ ನಡೆದ ಇನ್ಸ್ಪೆಕ್ಷನ್ ರೌಂಡ್ನಲ್ಲಿ ತೀರ್ಪುಗಾರರ ಸಮಿತಿ ಫವಾದ್ ಅವರ ಕುದುರೆಗೆ ಆರೋಗ್ಯವಾಗಿದೆ ಎಂದು ಪ್ರಮಾಣಪತ್ರ ನೀಡಿದರು.
ಪ್ರತಿ ಈಕ್ವೆಸ್ಟ್ರಿಯನ್ ಸ್ಪರ್ಧೆಗೂ ಮುನ್ನ ಈ ರೀತಿ ಕುದುರೆಗಳನ್ನು ಪರೀಕ್ಷೆಗೆ ಒಳಪಡಿಸುವುದು ಸಾಮಾನ್ಯವಾಗಿದೆ. ಈ ಮೂಲಕ ಕುದುರೆ ಯಾವುದೇ ಗಾಯಗಳಿಲ್ಲದೆ, ಸ್ಪರ್ಧಿಸಲು ಫಿಟ್ ಆಗಿದೆಯೇ ಎಂಬುದನ್ನು ಪರೀಕ್ಷಿಸಲಾಗುತ್ತದೆ. ಕುದುರೆ ಸವಾರಿಯ ಸ್ಪರ್ಧೆಯಲ್ಲಿ ಸುಮಾರು 2 ದಶಕದ ಬಳಿಕ ಭಾರತೀಯರೊಬ್ಬರು ಒಲಿಂಪಿಕ್ಸ್ನಲ್ಲಿ ಭಾಗವಹಿಸುತ್ತಿದ್ದಾರೆ.
ಫವಾದ್ 2018ರ ಏಷ್ಯನ್ ಗೇಮ್ಸ್ನಲ್ಲಿ ಇದೇ ಕುದುರೆಯೊಂದಿಗೆ 2 ರಜತ ಪದಕ ಜಯಿಸಿದ್ದರು. ಟೋಕಿಯೊದಲ್ಲಿ ‘ದಜರ-4’ ಕುದುರೆ ಜತೆ ಸ್ಪರ್ಧಿಸಲು ಮುಂದಾಗಿದ್ದ ಫವಾದ್, ಕೊನೇಕ್ಷಣದಲ್ಲಿ ನಿರ್ಧಾರ ಬದಲಾಯಿಸಿ ‘ಸೆನ್ಯೂಹ್ ಮೆಡಿಕಾಟ್’ ಕುದುರೆಯನ್ನು ಆಯ್ಕೆ ಮಾಡಿಕೊಂಡಿದ್ದರು.