ಮುಂಬೈ: ಭಾರತಕ್ಕೆ 2011ರ ಏಕದಿನ ವಿಶ್ವಕಪ್ ಫೈನಲ್ನಲ್ಲಿ ಭರ್ಜರಿ ಸಿಕ್ಸರ್ ಸಿಡಿಸುವ ಮೂಲಕ ಗೆಲುವು ತಂದುಕೊಟ್ಟ ವಾಂಖೆಡೆ ಕ್ರೀಡಾಂಗಣದಲ್ಲಿ ಎಂಎಸ್ ಧೋನಿ ಭಾನುವಾರ ಬಹುತೇಕ ಕೊನೇ ಪಂದ್ಯ ಆಡಲಿದ್ದಾರೆ.
42 ವರ್ಷದ ಧೋನಿಗೆ ಇದೇ ಕೊನೇ ಐಪಿಎಲ್ ಟೂರ್ನಿ ಎನ್ನಲಾಗಿದ್ದು, ಅದು ದೃಢವಾದರೆ ವಾಂಖೆಡೆಯಲ್ಲಿ ಮುಂಬೈ ಇಂಡಿಯನ್ಸ್ ವಿರುದ್ಧ ಭಾನುವಾರ ನಡೆಯಲಿರುವ ಪಂದ್ಯ ಅವರ ಪಾಲಿಗೆ ಇಲ್ಲಿ ಕೊನೇ ಪಂದ್ಯವಾಗಲಿದೆ. 2005ರ ನವೆಂಬರ್ನಲ್ಲಿ ಧೋನಿ ಭಾರತ ಪರ ಇಲ್ಲಿ ಚೊಚ್ಚಲ ಪಂದ್ಯವಾಡಿದ್ದರು. ಬಳಿಕ ಟೀಮ್ ಇಂಡಿಯಾ ಮಾತ್ರವಲ್ಲದೆ, ಸಿಎಸ್ಕೆ ಪರವೂ ಅವರು ವಾಂಖೆಡೆಯಲ್ಲಿ ಹಲವು ಸ್ಮರಣೀಯ ನೆನಪುಗಳನ್ನು ಹೊಂದಿದ್ದಾರೆ. ಇದರಿಂದ ಆತಿಥೇಯ ಪ್ರೇಕ್ಷಕರು ಮುಂಬೈ-ಧೋನಿ ನಡುವೆ ಯಾರನ್ನು ಬೆಂಬಲಿಸುವುದು ಎಂಬ ಗೊಂದಲವನ್ನೂ ಎದುರಿಸಲಿದ್ದಾರೆ.