ಕೋಲ್ಕತ: ಗೌತಮ್ ಗಂಭೀರ್ ಸಾರಥ್ಯದಲ್ಲಿ 2 ಬಾರಿ ಐಪಿಎಲ್ ಪ್ರಶಸ್ತಿ ಗೆದ್ದುಕೊಂಡಿರುವ ಕೋಲ್ಕತ ನೈಟ್ರೈಡರ್ಸ್ ತಂಡ ಅವರ ನಿರ್ಗಮನದ ಬಳಿಕ ಉತ್ತಮ ಯಶಸ್ಸನ್ನು ಕಂಡಿಲ್ಲ. ಕಳೆದ ವರ್ಷ ದಿನೇಶ್ ಕಾರ್ತಿಕ್ ಸಾರಥ್ಯದಲ್ಲಿ ಆಡಿದ ತಂಡ ಸಾಧಾರಣ ಯಶಸ್ಸು ಕಂಡಿತ್ತು. ಇದೀಗ ಭವಿಷ್ಯದ ನಾಯಕನನ್ನು ರೂಪಿಸುವ ಕೆಲಸ ಆರಂಭಿಸಿರುವ ಕೆಕೆಆರ್ ಫ್ರಾಂಚೈಸಿ, ಪಂಜಾಬ್ನ ಯುವ ಬ್ಯಾಟ್ಸ್ಮನ್ ಶುಭಮಾನ್ ಗಿಲ್ ಅವರನ್ನು ಈ ಪಾತ್ರಕ್ಕೆ ಆರಿಸಿದೆ.
ಶುಭಮಾನ್ ಗಿಲ್ ಮುಂಬರುವ ಐಪಿಎಲ್ನಲ್ಲಿ ಕೆಲ ನಾಯಕತ್ವ ಪಾತ್ರಗಳನ್ನು ಪಡೆದುಕೊಳ್ಳಲಿದ್ದಾರೆ ಎಂದು ತಂಡದ ಕೋಚ್ ಬ್ರೆಂಡನ್ ಮೆಕ್ಕಲಂ ಬುಧವಾರ ತಿಳಿಸಿದ್ದಾರೆ. 20 ವರ್ಷದ ಗಿಲ್ ಕಳೆದ ಐಪಿಎಲ್ ಆವೃತ್ತಿ ಕೆಲ ಉತ್ತಮ ಇನಿಂಗ್ಸ್ ಆಡುವ ಮೂಲಕ ಗಮನ ಸೆಳೆದಿದ್ದರು.
'ಶುಭಮಾನ್ ಗಿಲ್ ಪ್ರತಿಭಾನ್ವಿತ ಆಟಗಾರ. ಅವರು ಈ ವರ್ಷ ನಮ್ಮ ಲೀಡರ್ಶಿಪ್ ಗ್ರೂಪ್ನ ಭಾಗವಾಗಿರುತ್ತಾರೆ. ಅವರು ಯುವ ಆಟಗಾರ. ಆದರೆ ನಾಯಕರಾಗಲು ದೀರ್ಘಕಾಲ ಆಡಿದ ಅನುಭವ ಬೇಕಾಗಿಲ್ಲ ಎಂದು ನಂಬಿದವನು ನಾನು. ಅವರಲ್ಲಿನ ನಾಯಕತ್ವ ಗುಣಗಳನ್ನು ನಾವು ಈಗಾಗಲೆ ಗುರುತಿಸಿದ್ದೇವೆ' ಎಂದು ನ್ಯೂಜಿಲೆಂಡ್ನ ಮಾಜಿ ವಿಕೆಟ್ ಕೀಪರ್-ಬ್ಯಾಟ್ಸ್ಮನ್ ಹೇಳಿದ್ದಾರೆ.
ನಾಯಕ ದಿನೇಶ್ ಕಾರ್ತಿಕ್ ಜತೆಗೆ ಆಸ್ಟ್ರೇಲಿಯಾದ ವೇಗಿ ಪ್ಯಾಟ್ ಕಮ್ಮಿನ್ಸ್ ಮತ್ತು ಇಂಗ್ಲೆಂಡ್ ನಾಯಕ ಇವೊಯಿನ್ ಮಾರ್ಗನ್ ಕೂಡ ಈ ಲೀಡರ್ಶಿಪ್ ಗ್ರೂಪ್ನ ಭಾಗವಾಗಿರುತ್ತಾರೆ ಎಂದು ಮೆಕ್ಕಲಂ ಹೇಳಿದ್ದಾರೆ. ವ್ಯಕ್ತಿಯಾಗಿ ದಿನೇಶ್ ಕಾರ್ತಿಕ್ ಅವರನ್ನು ನಾನು ಇಷ್ಟಪಡುತ್ತೇನೆ. ನಾವು ತಂಡದಲ್ಲಿ ಅವರಿಗೆ ಉತ್ತಮ ಬೆಂಬಲವನ್ನು ಒದಗಿಸಬೇಕಾಗಿದೆ. ನಾಯಕತ್ವಕ್ಕೆ ಅವರು ಸಾಕಷ್ಟು ಪಕ್ವ ಆಗಿದ್ದಾರೆ ಎಂದು ಮೆಕ್ಕಲಂ ತಿಳಿಸಿದ್ದಾರೆ. ಇಂಗ್ಲೆಂಡ್ ವಿಶ್ವಕಪ್ ವಿಜೇತ ನಾಯಕ ಮಾರ್ಗನ್ ಮೈದಾನದಲ್ಲಿ ಕಾರ್ತಿಕ್ಗೆ ಉಪನಾಯಕರಾಗಿ ನೆರವಾಗಲಿದ್ದಾರೆ ಎಂದೂ ಅವರು ಹೇಳಿದ್ದಾರೆ.