ನವದೆಹಲಿ: ಭಾರತದ ಅಗ್ರ ಡಬಲ್ಸ್ ಆಟಗಾರ ರೋಹನ್ ಬೋಪಣ್ಣ ಮುಂಬರುವ ಪ್ಯಾರಿಸ್ ಒಲಿಂಪಿಕ್ಸ್ನಲ್ಲಿ ಎನ್. ಶ್ರೀರಾಮ್ ಬಾಲಾಜಿ ಅಥವಾ ಯೂಕಿ ಭಾಂಬ್ರಿ ಜತೆಗೂಡಿ ಆಡಲಿದ್ದಾರೆ. ಒಲಿಂಪಿಕ್ಸ್ಗೆ ತಂಡ ಆಯ್ಕೆ ಸಂಬಂಧ ಆಯ್ಕೆ ಸಮಿತಿ ಚರ್ಚೆ ನಡೆಸಿದರೂ, ಕನ್ನಡಿಗ ಬೋಪಣ್ಣ ಆಯ್ಕೆ ಮಾಡಿಕೊಳ್ಳುವ ಆಟಗಾರನ ಜತೆಗೆ ಆಡಲು ಅಖಿಲ ಭಾರತ ಟೆನಿಸ್ ಸಂಸ್ಥೆ (ಎಐಟಿಎ) ಅವಕಾಶ ಕಲ್ಪಿಸುವ ನಿರೀಕ್ಷೆ ಇದೆ.
ಒಲಿಂಪಿಕ್ಸ್ ಟೆನಿಸ್ ಸ್ಪರ್ಧೆಯ ನಿಯಮಾವಳಿ ಪ್ರಕಾರ, ವಿಶ್ವ ರ್ಯಾಂಕಿಂಗ್ನಲ್ಲಿ ಅಗ್ರ 10 ಸ್ಥಾನದೊಳಗಿರುವ ಆಟಗಾರರಿಗೆ ತಮಗೆ ಬೇಕಾದ ದೇಶಬಾಂಧವ ಜತೆಗಾರರೊಂದಿಗೆ ಕಣಕ್ಕಿಳಿಯಲು ಅವಕಾಶವಿದೆ. ಆದರೆ ಈ ಜತೆಗಾರರ ರ್ಯಾಂಕ್ ಅಗ್ರ 300ರೊಳಗೆ ಇರಬೇಕಾಗುತ್ತದೆ. 44 ವರ್ಷದ ಬೋಪಣ್ಣ ಎಟಿಪಿ ಡಬಲ್ಸ್ ರ್ಯಾಂಕಿಂಗ್ನಲ್ಲಿ ಪ್ರಸಕ್ತ 4ನೇ ಸ್ಥಾನದಲ್ಲಿದ್ದಾರೆ. ಯೂಕಿ ಭಾಂಬ್ರಿ 54 ಮತ್ತು ಶ್ರೀರಾಮ್ ಬಾಲಾಜಿ 82ನೇ ರ್ಯಾಂಕ್ ಹೊಂದಿದ್ದಾರೆ. ಜೂನ್ 10ರಂದು ಅಂದರೆ ಫ್ರೆಂಚ್ ಓಪನ್ ಗ್ರಾಂಡ್ ಸ್ಲಾಂ ಟೂರ್ನಿ ಮುಗಿದ ಬೆನ್ನಲ್ಲೇ ರ್ಯಾಂಕಿಂಗ್ ಆಧಾರದಲ್ಲಿ ಒಲಿಂಪಿಕ್ಸ್ ಅರ್ಹತೆಯನ್ನು ನೀಡಲಾಗುತ್ತದೆ. ಪ್ಯಾರಿಸ್ ಒಲಿಂಪಿಕ್ಸ್ನಲ್ಲೂ ರೋಲ್ಯಾಂಡ್ ಗ್ಯಾರಸ್ನ ಕ್ಲೇಕೋರ್ಟ್ನಲ್ಲೇ ಜುಲೈ 27ರಿಂದ ಟೆನಿಸ್ ಸ್ಪರ್ಧೆಗಳು ನಡೆಯಲಿವೆ.
34 ವರ್ಷದ ಬಾಲಾಜಿ ಮತ್ತು 31 ವರ್ಷದ ಯೂಕಿ ಇಬ್ಬರೂ ಕ್ಲೇಕೋರ್ಟ್ನಲ್ಲಿ ಇತ್ತೀಚೆಗೆ ಉತ್ತಮ ಲಿತಾಂಶವನ್ನೇ ಕಂಡಿದ್ದಾರೆ. ಬಾಲಾಜಿ ಕಾಗ್ಲಿಯರಿ ಚಾಲೆಂಜರ್ನಲ್ಲಿ ಜರ್ಮನಿಯ ಆಂಡ್ರೆ ಬೇಗ್ಮನ್ ಜತೆಗೂಡಿ ಪ್ರಶಸ್ತಿ ಜಯಿಸಿದ್ದರೆ, ಯೂಕಿ ಮ್ಯೂನಿಚ್ನಲ್ಲಿ ಎಟಿಪಿ 250 ಟೂರ್ನಿಯಲ್ಲಿ ಫ್ರಾನ್ಸ್ನ ಅಲ್ಬನೋ ಒಲಿವೆಟ್ಟಿ ಜತೆ ಪ್ರಶಸ್ತಿ ಗೆದ್ದಿದ್ದರು.
ಒಲಿಂಪಿಕ್ಸ್ಗೆ ಭಾರತ ಟೆನಿಸ್ ತಂಡದ ಆಯ್ಕೆ ಇತ್ತೀಚೆಗಿನ ವರ್ಷಗಳಲ್ಲಿ ಹೆಚ್ಚಿನ ವಿವಾದ ಸೃಷ್ಟಿಸುತ್ತ ಬಂದಿದೆ. 2012ರಲ್ಲಿ ಲಿಯಾಂಡರ್ ಪೇಸ್ ಜತೆಗೂಡಿ ಆಡಲು ಮಹೇಶ್ ಭೂಪತಿ ಮತ್ತು ರೋಹನ್ ಬೋಪಣ್ಣ ಇಬ್ಬರೂ ನಿರಾಕರಿಸಿದ್ದರು. ಅಲ್ಲದೆ ಸಾನಿಯಾ ಮಿರ್ಜಾರನ್ನು ಮಿಶ್ರ ಡಬಲ್ಸ್ನಲ್ಲಿ ಪೇಸ್ ಜತೆ ಆಡಿಸಿದ್ದರಿಂದ ಎಐಟಿಎ ಟೀಕೆಗೆ ಗುರಿಯಾಗಿತ್ತು. ಹೀಗಾಗಿ ಎಐಟಿಎ ಈ ಬಾರಿ ವಿವಾದಗಳನ್ನು ತಡೆಯಲು ಬೋಪಣ್ಣಗೆ ಜತೆಗಾರನ ಆಯ್ಕೆಯನ್ನು ನೀಡಲಿದೆ ಎನ್ನಲಾಗಿದೆ.
ನಗಾಲ್ಗೆ ಅರ್ಹತೆ ಅವಕಾಶ
ಹಾಲಿ ವಿಶ್ವ ನಂ. 94 ಸಿಂಗಲ್ಸ್ ಆಟಗಾರ ಸುಮಿತ್ ನಗಾಲ್ ಫ್ರೆಂಚ್ ಓಪನ್ನಲ್ಲಿ ಉತ್ತಮ ನಿರ್ವಹಣೆ ತೋರುವ ಮೂಲಕ ಒಲಿಂಪಿಕ್ಸ್ಗೆ ಅರ್ಹತೆ ಸಂಪಾದಿಸುವ ಅವಕಾಶ ಹೊಂದಿದ್ದಾರೆ. ಒಲಿಂಪಿಕ್ಸ್ನ ಸಿಂಗಲ್ಸ್ ವಿಭಾಗದಲ್ಲಿ ಒಟ್ಟು 64 ಆಟಗಾರರು ಕಣಕ್ಕಿಳಿಯುತ್ತಾರೆ. ಈ ಪೈಕಿ 56 ಆಟಗಾರರಿಗೆ ಮಾತ್ರ ರ್ಯಾಂಕಿಂಗ್ ಆಧಾರದಲ್ಲಿ ನೇರಅರ್ಹತೆ ನಿಡಲಾಗುತ್ತದೆ. ಆದರೆ ಒಂದು ದೇಶದಿಂದ ಗರಿಷ್ಠ 4 ಆಟಗಾರರಿಗೆ ಮಾತ್ರ ಪ್ರವೇಶ ನೀಡಲಾಗುತ್ತದೆ. ಉಳಿದ 6 ಸ್ಥಾನಗಳಿಗೆ ಏಷ್ಯನ್ ಗೇಮ್ಸ್, ಆಫ್ರಿಕನ್ ಗೇಮ್ಸ್ ಮತ್ತು ಪಾನ್&ಅಮೆರಿಕನ್ ಗೇಮ್ಸ್ನ ವಿಜೇತರನ್ನು ಆಯ್ಕೆ ಮಾಡಲಾಗುತ್ತದೆ. ಹೀಗಾಗಿ ನಗಾಲ್ ಅಗ್ರ 100ರೊಳಗಿನ ರ್ಯಾಂಕ್ ಕಾಯ್ದುಕೊಂಡರೂ ಒಲಿಂಪಿಕ್ಸ್ ಅರ್ಹತೆ ಅವಕಾಶವಿರುತ್ತದೆ. ಜೂನ್ 10ರಂದು ಅರ್ಹತೆ ಸ್ಪಷ್ಟವಾಗಲಿದೆ.