ಲಂಡನ್: ಸ್ಟಾರ್ ಬ್ಯಾಟರ್ಗಳಾದ ರೋಹಿತ್ ಶರ್ಮ, ವಿರಾಟ್ ಕೊಹ್ಲಿ ನಂತರ ವೇಗಿ ಜಸ್ಪ್ರೀತ್ ಬುಮ್ರಾ ಕೂಡ ಟೆಸ್ಟ್ ಕ್ರಿಕೆಟ್ನಿಂದ ನಿವೃತ್ತಿ ಹೊಂದುವ ಸಾಧ್ಯತೆ ಕಾಣಿಸಿದೆ. ಮಾಜಿ ಕ್ರಿಕೆಟಿಗ ಮೊಹಮದ್ ಕೈಫ್ ಇಂಥದ್ದೊಂದು ಸುದ್ದಿಯ ಕಿಡಿ ಹೊತ್ತಿಸಿದ್ದಾರೆ. ಮ್ಯಾಂಚೆಸ್ಟರ್ ಟೆಸ್ಟ್ನಲ್ಲಿ ಬುಮ್ರಾ ಆಟವನ್ನು ಗಮನಿಸಿ ಕೈಫ್ ಈ ಭವಿಷ್ಯ ನುಡಿದಿದ್ದಾರೆ.
ಬುಮ್ರಾ ಟೆಸ್ಟ್ನಲ್ಲಿ ಆಡುವ ಉತ್ಸಾಹ ಹೊಂದಿದ್ದರೂ, ಅವರ ದೇಹ ಅದಕ್ಕೆ ಸಾಥ್ ನೀಡುತ್ತಿಲ್ಲ. ಅವರ ಬೌಲಿಂಗ್ ವೇಗವೂ ಕುಸಿತ ಕಾಣುತ್ತಿದೆ. ಇದರಿಂದಾಗಿ ಅವರಿಗೆ ತಂಡಕ್ಕೆ ನಿರೀತ ರೀತಿಯಲ್ಲಿ ಕೊಡುಗೆ ನೀಡಲು ಸಾಧ್ಯವಾಗುತ್ತಿಲ್ಲ. ಜತೆಗೆ ಅವರಿಗೆ ತಮ್ಮದೇ ಗುಣಮಟ್ಟವನ್ನು ತಲುಪಲು ಸಾಧ್ಯವಾಗುತ್ತಿಲ್ಲ ಎಂದು ಕೈಫ್ ವಿವರಿಸಿದ್ದಾರೆ. ಫಿಟ್ನೆಸ್ ಸಮಸ್ಯೆಯಿಂದಾಗಿ ಬುಮ್ರಾ ಪಂದ್ಯದ ನಡುವೆ ಆಗಾಗ ಮೈದಾನದಿಂದ ಹೊರಹೋಗಿಬರುತ್ತಿರುವುದು ಸಾಮಾನ್ಯವೆನಿಸಿದೆ. ಪಂದ್ಯದ 3ನೇ ದಿನ ಅವರು ಕೇವಲ 1 ವಿಕೆಟ್ ಗಳಿಸಲಷ್ಟೇ ಶಕ್ತರಾಗಿದ್ದರು.
ಈಗ ಬ್ಯಾಟಿಂಗ್ ಸುಲಭವೆಂದ ಪೀರ್ಟಸೆನ್
ಆಧುನಿಕ ಕ್ರಿಕೆಟ್ನಲ್ಲಿ ಬ್ಯಾಟಿಂಗ್ ಸುಲಭವಾಗಿದೆ. 20-25 ವರ್ಷ ಹಿಂದಿನಷ್ಟು ಕಷ್ಟ ಈಗಿಲ್ಲ. ಬೌಲಿಂಗ್ ಗುಣಮಟ್ಟ ಕುಸಿದಿರುವುದು ಕೂಡ ಇದಕ್ಕೆ ಕಾರಣವಾಗಿದೆ ಎಂದು ಇಂಗ್ಲೆಂಡ್ ಮಾಜಿ ಬ್ಯಾಟರ್ ಕೆವಿನ್ ಪೀರ್ಟಸೆನ್ ಅಭಿಪ್ರಾಯಪಟ್ಟಿದ್ದಾರೆ. ಇಂಗ್ಲೆಂಡ್ ಬ್ಯಾಟರ್ ಜೋ ರೂಟ್ ಟೆಸ್ಟ್ ಕ್ರಿಕೆಟ್ ರನ್ ಗಳಿಕೆಯಲ್ಲಿ ಬ್ಯಾಟಿಂಗ್ ದಿಗ್ಗಜರಾದ ರಿಕಿ ಪಾಂಟಿಂಗ್, ಜಾಕ್ಸ್ ಕಾಲಿಸ್, ರಾಹುಲ್ ದ್ರಾವಿಡ್ರನ್ನು ಹಿಂದಿಕ್ಕಿ ಸಚಿನ್ ತೆಂಡುಲ್ಕರ್ ಸನಿಹ ತಲುಪಿರುವ ಬೆನ್ನಲ್ಲೇ ಪೀರ್ಟಸೆನ್ ಸಾಮಾಜಿಕ ಜಾಲತಾಣದಲ್ಲಿ ಈ ಅಭಿಪ್ರಾಯವನ್ನು ಹಂಚಿಕೊಂಡಿದ್ದಾರೆ.
"ಈಗ 20-25 ವರ್ಷ ಹಿಂದಿಗಿಂತ ಎರಡು ಪಟ್ಟು ಬ್ಯಾಟಿಂಗ್ ಸುಲಭವಾಗಿದೆ. ಆಗ ವಕಾರ್, ಅಖ್ತರ್, ಅಕ್ರಮ್, ಮುಸ್ತಾಕ್, ಕುಂಬ್ಳೆ, ಶ್ರೀನಾಥ್, ಹರ್ಭಜನ್, ಡೊನಾಲ್ಡ್, ಪೊಲ್ಲಾಕ್, ಕ್ಲುಸ್ನರ್, ಗೋವ್, ಮೆಕ್ಗ್ರಾಥ್, ಲೀ, ವಾರ್ನ್, ಗಿಲೆಸ್ಪಿ, ಬಾಂಡ್, ವೆಟ್ಟೋರಿ, ಕೇರ್ನ್ಸ್, ವಾಸ್, ಮುರಳೀಧರನ್, ವಾಲ್ಶ್, ಆಂಬ್ರೋಸ್ರಂಥ ಬೌಲರ್ಗಳಿದ್ದರು. ಈಗ ಅವರೊಂದಿಗೆ ಹೋಲಿಸಬಲ್ಲಂಥ 10 ಬೌಲರ್ಗಳಾದರೂ ಇರುವರೇ?' ಎಂದು 104 ಟೆಸ್ಟ್, 136 ಏಕದಿನ ಮತ್ತು 37 ಟಿ20 ಪಂದ್ಯಗಳನ್ನು ಆಡಿರುವ ಪೀರ್ಟಸೆನ್ ಪ್ರಶ್ನಿಸಿದ್ದಾರೆ.