ವಿಜಯವಾಣಿ ಸುದ್ದಿಜಾಲ ಬೆಂಗಳೂರು
ಐಪಿಎಲ್ 17ನೇ ಆವೃತ್ತಿಗೆ 58 ದಿನಗಳ ಹಿಂದೆ ಚಾಲನೆ ದೊರೆತಾಗ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಮತ್ತು ಹಾಲಿ ಚಾಂಪಿಯನ್ ಚೆನ್ನೈ ಸೂಪರ್ಕಿಂಗ್ಸ್ ತಂಡಗಳು ಮುಖಾಮುಖಿ ಆಗಿದ್ದವು. ಆಗ ಟೂರ್ನಿಯಲ್ಲಿ ಶುಭಾರಂಭ ಕಾಣುವುದಷ್ಟೇ ಆರ್ಸಿಬಿ&ಸಿಎಸ್ಕೆ ಹಂಬಲವಾಗಿದ್ದರೆ ಇದೀಗ ಟೂರ್ನಿಯ 68ನೇ ಲೀಗ್ ಪಂದ್ಯದಲ್ಲಿ ಶನಿವಾರ ಮರುಮುಖಾಮುಖಿ ಆಗುವ ಸಮಯದಲ್ಲಿ ಉಭಯ ತಂಡಗಳು ಮಾಡು ಇಲ್ಲವೆ ಮಡಿ ಸವಾಲು ಎದುರಿಸುತ್ತಿವೆ. ಪ್ಲೇಆಫ್ ರೇಸ್ನಲ್ಲಿ ಬಾಕಿ ಉಳಿದಿರುವ ಕೊನೆಯ 4ನೇ ಸ್ಥಾನವನ್ನು ಒಲಿಸಿಕೊಳ್ಳಲು ಆರ್ಸಿಬಿ-ಸಿಎಸ್ಕೆ ಪಾಲಿಗೆ ಇದು ನಾಕೌಟ್ ಸಮರವೆನಿಸಿದೆ. ಉದ್ಘಾಟನಾ ಪಂದ್ಯದಲ್ಲಿ ಚೆನ್ನೈನಲ್ಲಿ ಅನುಭವಿಸಿದ ಸೋಲಿಗೆ ತವರಿನ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಸೇಡು ತೀರಿಸಿಕೊಳ್ಳುವ ಮೂಲಕ ಅಂಕಪಟ್ಟಿಯ ಅಗ್ರ 4 ತಂಡಗಳಲ್ಲಿ ಒಂದಾಗುವುದು ಫಾಫ್ ಡು ಪ್ಲೆಸಿಸ್ ಬಳಗದ ಕನಸಾಗಿದೆ. ಒಂದು ವೇಳೆ ಸಿಎಸ್ಕೆ ತಂಡ ಪ್ಲೇಆಫ್ ಹಂತಕ್ಕೇರದಿದ್ದರೆ, ಭಾರತೀಯ ಕ್ರಿಕೆಟ್ ಕಂಡ ಶ್ರೇಷ್ಠ ನಾಯಕ, ವಿಕೆಟ್ ಕೀಪರ್-ಬ್ಯಾಟರ್ ಎಂಎಸ್ ಧೋನಿ ಪಾಲಿಗೆ ಇದು ಐಪಿಎಲ್ನಲ್ಲಿ ಕೊನೆಯ ಪಂದ್ಯವಾಗಲಿದೆ.
ಆರಂಭಿಕ 8 ಪಂದ್ಯಗಳಲ್ಲಿ 1ರಲ್ಲಿ ಮಾತ್ರ ಗೆದ್ದಿದ್ದ ಆರ್ಸಿಬಿ ನಂತರದಲ್ಲಿ ಸತತ 5 ಪಂದ್ಯ ಜಯಿಸುವ ಮೂಲಕ ಐಪಿಎಲ್ನಲ್ಲಿ ಅಮೋವಾಗಿ ಪುಟಿದೆದ್ದಿದೆ. ಆಡಿದ 13 ಪಂದ್ಯಗಳಲ್ಲಿ ಈಗ 6 ಜಯ, 7 ಸೋಲಿನೊಂದಿಗೆ 12 ಅಂಕ ಗಳಿಸಿರುವ ಆರ್ಸಿಬಿಗೆ ರನ್ರೇಟ್ ಸುಧಾರಣೆಯೂ ಪ್ಲೇಆಫ್ ರೇಸ್ನಲ್ಲಿ ಉಳಿದುಕೊಳ್ಳಲು ನೆರವಾಗಿದೆ. "ಹೊಸ ಅಧ್ಯಾಯ' ಎಂಬ ಜೋಶ್ನಲ್ಲಿ ಅಭಿಯಾನ ಆರಂಭಿಸಿದ್ದ ಆರ್ಸಿಬಿ ಈಗ ಸತತ 4 ಪಂದ್ಯ ಗೆದ್ದರೆ ಕಪ್ ಕನಸು ನನಸಾಗಿಸುವ ಅವಕಾಶ ಹೊಂದಿದೆ.
ಮತ್ತೊಂದೆಡೆ ಸಿಎಸ್ಕೆ ಆರಂಭಿಕ 2 ಪಂದ್ಯಗಳಲ್ಲಿ ಗೆದ್ದಿದ್ದರೂ, ನಂತರದಲ್ಲಿ ಅಸ್ಥಿರ ನಿರ್ವಹಣೆಯಿಂದಾಗಿ ಏಳು-ಬೀಳುಗಳನ್ನು ಕಂಡಿದೆ. ಆಡಿದ 13 ಪಂದ್ಯಗಳಲ್ಲಿ 7 ಜಯ, 6 ಸೋಲಿನೊಂದಿಗೆ 14 ಅಂಕ ಗಳಿಸಿ ಸದ್ಯಕ್ಕೆ 4ನೇ ಸ್ಥಾನದಲ್ಲಿರುವ ಸಿಎಸ್ಕೆ, ತಾನಾಡಿದ ಕೊನೇ 7 ಪಂದ್ಯಗಳಲ್ಲಿ 3ರಲ್ಲಿ ಮಾತ್ರ ಗೆದ್ದು, 4ರಲ್ಲಿ ಸೋತಿದೆ.
ಹಾಲಿ ಟೂರ್ನಿಯ ಉದ್ಘಾಟನಾ ಪಂದ್ಯ ಸೇರಿದಂತೆ ಒಟ್ಟಾರೆ ಐಪಿಎಲ್ ದಾಖಲೆ ಸಿಎಸ್ಕೆ ಪರವಾಗಿದ್ದರೂ, ಸತತ 5 ಜಯದೊಂದಿಗೆ ಬೀಗುತ್ತಿರುವ ಆರ್ಸಿಬಿ ಹಾಲಿ ಬಲಿಷ್ಠ ಫಾರ್ಮ್ನಲ್ಲಿದೆ. ಜತೆಗೆ ಆರ್ಸಿಬಿ ತವರಿನಲ್ಲಿ ಆಡುವ ಲಾಭವನ್ನೂ ಹೊಂದಿದೆ. ಹೀಗಾಗಿ ಪಂದ್ಯ ತೀವ್ರ ಕುತೂಹಲ ಕೆರಳಿಸಿದೆ.
ಭರ್ಜರಿ ಫಾರ್ಮ್ನಲ್ಲಿದೆ ಆರ್ಸಿಬಿ
ಆರಂಭಿಕ 8 ಪಂದ್ಯಗಳಲ್ಲಿ 7ರಲ್ಲಿ ಸೋತಾಗ, ಅದರಲ್ಲೂ ಸತತವಾಗಿ 6 ಪಂದ್ಯಗಳಲ್ಲಿ ಸೋತಾಗ ಆರ್ಸಿಬಿ ಪಾಲಿಗೆ ಐಪಿಎಲ್-17 ಬಹುತೇಕ ಮುಗಿದ ಅಧ್ಯಾಯ ಎನಿಸಿತ್ತು. ಜತೆಗೆ ತಂಡದ ಬೌಲಿಂಗ್ ವಿಭಾಗ ಅತ್ಯಂತ ದುರ್ಬಲವಾಗಿ ಕಂಡಿತ್ತು. ಆದರೆ ನಂತರದಲ್ಲಿ ಆರ್ಸಿಬಿ ಪುಟಿದೆದ್ದ ರೀತಿ ತನ್ನ ನೆಚ್ಚಿನ ಅಭಿಮಾನಿಗಳ ನಿರೀಕ್ಷೆಯನ್ನೂ ಮೀರಿಸುವಂತಿತ್ತು. ಬ್ಯಾಟಿಂಗ್ನಲ್ಲಿ ವಿರಾಟ್ ಕೊಹ್ಲಿಗೆ (661) ನಾಯಕ ಪ್ಲೆಸಿಸ್ (367) ಮತ್ತು 5 ಅರ್ಧಶತಕ ಬಾರಿಸಿರುವ ರಜತ್ ಪಾಟೀದಾರ್ (320) ಉತ್ತಮ ಬೆಂಬಲ ಒದಗಿಸಿದ್ದಾರೆ. ಬೌಲಿಂಗ್ ವಿಭಾಗದಲ್ಲಿ ಮೊಹಮದ್ ಸಿರಾಜ್ (12) ಬೌಲಿಂಗ್ ಸುಧಾರಣೆ ಬಲ ತುಂಬಿದ್ದರೆ, ಯಶ್ ದಯಾಳ್ (13) ಗರಿಷ್ಠ ವಿಕೆಟ್ ಟೇಕರ್ ಆಗಿದ್ದಾರೆ. ಸ್ಪಿನ್ ಬೌಲಿಂಗ್ನಲ್ಲಿ ಕರ್ಣ್ ಶರ್ಮ (6) ಮಿಂಚಿದ್ದರೆ, ಸ್ವಪ್ನಿಲ್ ಸಿಂಗ್ (6) ಉತ್ತಮ ಸಾಥ್ ನೀಡಿದ್ದಾರೆ. ಕ್ಯಾಮರಾನ್ ಗ್ರೀನ್ (8 ವಿಕೆಟ್, 190 ರನ್) ಆಲ್ರೌಂಡ್ ನಿರ್ವಹಣೆ ತೋರಲಾರಂಭಿಸಿದ್ದಾರೆ. ಇಂಗ್ಲೆಂಡ್ನ ವಿಲ್ ಜಾಕ್ಸ್ ತವರಿಗೆ ನಿರ್ಗಮಿಸಿರುವ ನಡುವೆ ಗ್ಲೆನ್ ಮ್ಯಾಕ್ಸ್ವೆಲ್ ಮರಳಿ ಕಣಕ್ಕಿಳಿಯಲಿದ್ದು, ಈ ಬಾರಿಯಾದರೂ ಆರ್ಸಿಬಿ ಅಭಿಮಾನಿಗಳ ನಿರೀೆಗೆ ತಕ್ಕ ಆಟವಾಡಿ ಗೆಲುವಿನ ರೂವಾರಿಯಾಗುವರೇ ಎಂಬ ಕೌತುಕವಿದೆ.
ಆರ್ಸಿಬಿ-ಸಿಎಸ್ಕೆ ಪ್ಲೇಆಫ್ ಲೆಕ್ಕಾಚಾರ
ಆರ್ಸಿಬಿ-ಸಿಎಸ್ಕೆ ಪಾಲಿಗೆ ಇದು ನಿರ್ಣಾಯಕ ಸಮರ. ಆದರೆ ಸಿಎಸ್ಕೆ ತಂಡಕ್ಕೆ 18ಕ್ಕಿಂತ ಕಡಿಮೆ ರನ್ಗಳಿಂದ ಸೋತರೂ ಪ್ಲೇಆಫ್ಗೇರುವ ಅವಕಾಶವಿದ್ದರೆ, ಆರ್ಸಿಬಿ ಗೆಲುವಿನೊಂದಿಗೆ ರನ್ರೇಟ್ನಲ್ಲೂ ಸಿಎಸ್ಕೆ ತಂಡವನ್ನು ಹಿಂದಿಕ್ಕಲು ಕನಿಷ್ಠ 18 ರನ್ಗಳಿಂದ ಅಥವಾ 11 ಎಸೆತ ಬಾಕಿ ಇರುವಂತೆಯೇ ಗೆಲ್ಲುವುದು ಅಗತ್ಯವಾಗಿದೆ. ಇನ್ನು ಪಂದ್ಯಕ್ಕೆ ಮಳೆ ಭೀತಿಯೂ ಕಾಡುತ್ತಿದ್ದು, ಒಂದು ವೇಳೆ ಪಂದ್ಯ ರದ್ದುಗೊಂಡರೆ ಆರ್ಸಿಬಿ ಟೂರ್ನಿಯಿಂದ ಹೊರಬೀಳಲಿದೆ ಮತ್ತು ಸಿಎಸ್ಕೆ 4ನೇ ತಂಡವಾಗಿ ಪ್ಲೇಆಫ್ಗೇರಲಿದೆ.
18ರ ಅದೃಷ್ಟದ ನಿರೀಕ್ಷೆ
ಆರ್ಸಿಬಿ ತಂಡ ಬರೀ ಗೆಲ್ಲುವುದಕ್ಕಿಂತ 18 ಅಥವಾ ಅದಕ್ಕಿಂತ ಹೆಚ್ಚು ರನ್ ಅಂತರದಿಂದ ಗೆಲ್ಲುವುದೇ ಪ್ರಮುಖವೆನಿಸಿದೆ. ಇಲ್ಲದಿದ್ದರೆ ಆರ್ಸಿಬಿ ಗೆದ್ದರೂ, ರನ್ರೇಟ್ನಲ್ಲಿ ಸಿಎಸ್ಕೆ ತಂಡವನ್ನು ಹಿಂದಿಕ್ಕಲಾಗದೆ ಹೊರಬೀಳಬೇಕಾಗುತ್ತದೆ. ಹೀಗಾಗಿ ಸಂಪೂರ್ಣ 20 ಓವರ್ ಆಟ ನಡೆದರೆ ಆರ್ಸಿಬಿಗೆ ಲೆಕ್ಕಾಚಾರ ಸುಲಭವಾಗಿರಲಿದೆ. 20 ಓವರ್ಗಳಲ್ಲಿ ಆರ್ಸಿಬಿ 200 ರನ್ ಗಳಿಸಿದರೆ ಸಿಎಸ್ಕೆಯನ್ನು ಗರಿಷ್ಠ 182 ರನ್ಗಳಿಗೆ ನಿಯಂತ್ರಿಸಬಹುದು ಅಥವಾ ಸಿಎಸ್ಕೆ 200 ರನ್ ಗಳಿಸಿದರೆ 18.1 ಓವರ್ಗಳಲ್ಲಿ ಚೇಸಿಂಗ್ ಮಾಡಬಹುದು. ಮಳೆಯಿಂದಾಗಿ ಪಂದ್ಯ 15 ಓವರ್ಗಳಿಗೆ ಕಡಿತಗೊಂಡರೆ ಆರ್ಸಿಬಿ 170 ರನ್ ಗಳಿಸಿದರೂ, ಸಿಎಸ್ಕೆಯನ್ನು 152 ರನ್ಗಳಿಗೆ ನಿಯಂತ್ರಿಸಬೇಕು ಅಥವಾ ಸಿಎಸ್ಕೆ 170 ರನ್ ಗಳಿಸಿದರೆ 13.1 ಓವರ್ಗಳಲ್ಲಿ ಚೇಸಿಂಗ್ ಮಾಡಬೇಕು. ಪಂದ್ಯ 10 ಓವರ್ಗಳಿಗೆ ಕಡಿತಗೊಂಡರೆ ಆರ್ಸಿಬಿ 130 ರನ್ ಗಳಿಸಿದರೂ, ಸಿಎಸ್ಕೆಯನ್ನು 112ಕ್ಕೆ ನಿಯಂತ್ರಿಸಬೇಕು ಅಥವಾ ಸಿಎಸ್ಕೆ 130 ರನ್ ಗಳಿಸಿದರೆ 8.1 ಓವರ್ಗಳಲ್ಲೇ ಚೇಸಿಂಗ್ ಮಾಡಬೇಕು. ಪಂದ್ಯ ಕನಿಷ್ಠ 5 ಓವರ್ಗಳಿಗೆ ಕಡಿತಗೊಂಡರೆ ಆರ್ಸಿಬಿ 80 ರನ್ ಗಳಿಸಿದರೂ, ಸಿಎಸ್ಕೆಯನ್ನು 62ರೊಳಗೆ ನಿಯಂತ್ರಿಸಬೇಕು ಅಥವಾ ಸಿಎಸ್ಕೆ 80 ರನ್ ಗಳಿಸಿದರೆ 3.1 ಓವರ್ಗಳಲ್ಲೇ ಚೇಸಿಂಗ್ ಮಾಡಬೇಕಾಗುತ್ತದೆ. ಸಿಎಸ್ಕೆ 206 ರನ್ ಗಳಿಸಿದರೆ ಆರ್ಸಿಬಿ 18.4 ಓವರ್ಗಳಲ್ಲಿ ಚೇಸಿಂಗ್ ಮಾಡಬೇಕಾಗುತ್ತದೆ.
ಕಾಡುತ್ತಿದೆ ಮಳೆ ಭೀತಿ...
ಪಂದ್ಯಕ್ಕೆ ಮಳೆ ಕಾಡುವ ಭೀತಿ ಇದೆ. ಹವಾಮಾನ ಇಲಾಖೆಯ ಮುನ್ಸೂಚನೆಯ ಪ್ರಕಾರ ಶನಿವಾರ ಸಂಜೆಯ ವೇಳೆಗೆ ಬೆಂಗಳೂರಿನಲ್ಲಿ ಮಳೆ ಸುರಿಯುವ ಸಾಧ್ಯತೆ ಶೇ. 75ರಷ್ಟಿದೆ. ಆದರೆ ಚಿನ್ನಸ್ವಾಮಿ ಸ್ಟೇಡಿಯಂ ಸುಸಜ್ಜಿತವಾದ ಸಬ್ಏರ್ ಒಳಚರಂಡಿ ವ್ಯವಸ್ಥೆ ಹೊಂದಿದ್ದು, ಇದರಿಂದ ಮಳೆ ನೀರನ್ನು ಸುಲಭವಾಗಿ ಮತ್ತು ಬೇಗನೆ ಇಂಗಿಸಿ ಮೈದಾನ ಒಣಗಿಸಬಹುದಾಗಿದೆ. ಹೀಗಾಗಿ ಯಾವುದೇ ಕ್ಷಣ ಮಳೆ ನಿಂತರೂ 10 ನಿಮಿಷಗಳಲ್ಲೇ ಆಟವನ್ನು ಆರಂಭಿಸಬಹುದಾಗಿದೆ. ಫಲಿತಾಂಶ ನಿರ್ಧಾರಕ್ಕಾಗಿ ಕನಿಷ್ಠ 5 ಓವರ್ಗಳ ಪಂದ್ಯವಾದರೂ ನಡೆಯುವ ನಿರೀಕ್ಷೆ ಹುಟ್ಟಿಸಿದೆ.
ಧೋನಿ ಕೊನೇ ಪಂದ್ಯ?
ಮೊಣಕಾಲು ಗಾಯದ ನಡುವೆ ಹೆಚ್ಚು ರನ್ ಓಡದೆ, ಸ್ಲಾಗ್ ಓವರ್ಗಳಲ್ಲಿ ಮಾತ್ರ ಬ್ಯಾಟಿಂಗ್ಗೆ ಬರುತ್ತಿರುವ 42 ವರ್ಷದ ಧೋನಿ ಮುಂದಿನ ವರ್ಷ ಐಪಿಎಲ್ನಲ್ಲಿ ಮತ್ತೆ ಆಡುವುದು ಅನುಮಾನ. ಹೀಗಾಗಿ ಸಿಎಸ್ಕೆ ತಂಡ ಪ್ಲೇಆಫ್ ಹಂತಕ್ಕೇರದಿದ್ದರೆ ಧೋನಿ ಪಾಲಿಗೆ ಇದುವೇ ಕಟ್ಟಕಡೆಯ ಐಪಿಎಲ್ ಪಂದ್ಯವಾಗಲಿದೆ. ಹೀಗಾಗಿ ಆರ್ಸಿಬಿ ಗೆಲುವಿನ ನಿರೀಕ್ಷೆಯ ಜತೆಗೆ ಧೋನಿ ಕೊನೇ ಇನಿಂಗ್ಸ್ ನೋಡಲು ಬೆಂಗಳೂರಿನ ಅಭಿಮಾನಿಗಳು ತುದಿಗಾಲಲ್ಲಿ ನಿಂತಿದ್ದಾರೆ. ಐಪಿಎಲ್ನಲ್ಲಿ ಇದುವರೆಗೆ 263 ಪಂದ್ಯ ಆಡಿರುವ ಧೋನಿ, ಈ ಪೈಕಿ 233 ಪಂದ್ಯಗಳನ್ನು ಸಿಎಸ್ಕೆ ಪರವೇ ಆಡಿದ್ದಾರೆ ಮತ್ತು ಸಿಎಸ್ಕೆ ನಾಯಕರಾಗಿ 5 ಬಾರಿ ಐಪಿಎಲ್ ಟ್ರೋಫಿ ಗೆದ್ದುಕೊಟ್ಟಿದ್ದಾರೆ.
ಒತ್ತಡದಲ್ಲಿ ಸೂಪರ್ಕಿಂಗ್ಸ್
ಟೂರ್ನಿಯ ಕಳೆದ 5 ಪಂದ್ಯಗಳ ಫಲಿತಾಂಶಗಳು ಸಿಎಸ್ಕೆಗೆ ಅನುಕೂಲಕರವಾಗಿಯೇ ಬಂದಿದ್ದು ಅದರ ಪ್ಲೇಆ್ ಆಸೆ ಜೀವಂತ ಉಳಿಸಿದೆ. ಆದರೆ ಆರ್ಸಿಬಿ ವಿರುದ್ಧ ಕೆಲ ಹಿನ್ನಡೆಗಳೊಂದಿಗೆ ಸಿಎಸ್ಕೆ ಕಣಕ್ಕಿಳಿಯಲಿದೆ. ನಾಯಕ ಋತುರಾಜ್ ಗಾಯಕ್ವಾಡ್ಗೆ (583) ಅಗ್ರ ಕ್ರಮಾಂಕದಲ್ಲಿ ಉತ್ತಮ ಬೆಂಬಲ ಲಭಿಸುತ್ತಿಲ್ಲ. ಶಿವಂ ದುಬೆ (389) ಕೂಡ ಕಳೆದ ಕೆಲ ಪಂದ್ಯಗಳಿಂದ ಪರದಾಡುತ್ತಿದ್ದಾರೆ. ಆರಂಭಿಕರಾಗಿ ರಚಿನ್ ರವೀಂದ್ರ ನಿರೀಕ್ಷಿತ ನಿರ್ವಹಣೆ ತೋರಿಲ್ಲ. ಅಜಿಂಕ್ಯ ರಹಾನೆ ಕೂಡ ವೈಫಲ್ಯ ಕಂಡಿದ್ದಾರೆ. ಡೆರಿಲ್ ಮಿಚೆಲ್ (314) ಲಯ ಕಂಡುಕೊಂಡಿದ್ದಾರೆ. ಬೌಲಿಂಗ್ನಲ್ಲಿ ಮುಸ್ತಾಫಿಜುರ್, ಮಥೀಶ ಪಥಿರಣ ಮತ್ತು ದೀಪಕ್ ಹೂಡಾ ಅಲಭ್ಯತೆ ದೊಡ್ಡ ಹೊಡೆತ ನೀಡಿದೆ. ಇದರಿಂದಾಗಿ ದೇಶೀಯ ವೇಗಿಗಳಾದ ಸಿಮ್ರಾನ್ಜೀತ್ ಸಿಂಗ್ ಮತ್ತು ತುಷಾರ್ ದೇಶಪಾಂಡೆ (16) ಅವರೇ ಪ್ರಮುಖ ಅಸ್ತ್ರವೆನಿಸಿದ್ದಾರೆ. ಸ್ಪಿನ್ ಬೌಲಿಂಗ್ನಲ್ಲಿ ಜಡೇಜಾ ವಿಕೆಟ್ ಬೇಟೆಯಲ್ಲಿ ಎಡವುತ್ತಿದ್ದರೆ, ಮೊಯಿನ್ ಅಲಿ ಅಲಭ್ಯರಾಗಿದ್ದಾರೆ.
ಮೇ 18ಕ್ಕೆ ಆರ್ಸಿಬಿ ಸೋತಿಲ್ಲ!
ಆರ್ಸಿಬಿ ತಂಡ ಐಪಿಎಲ್ನಲ್ಲಿ ಮೇ 18ರಂದು ಇದುವರೆಗೆ 4 ಪಂದ್ಯಗಳನ್ನು ಆಡಿದ್ದು, ಈ ಪೈಕಿ ಎಲ್ಲವನ್ನೂ ಗೆದ್ದುಕೊಂಡಿದೆ. ಇದರಲ್ಲಿ 2013 ಮತ್ತು 2014ರಲ್ಲಿ 2 ಗೆಲುವು ಸಿಎಸ್ಕೆ ವಿರುದ್ಧವೇ ಬಂದಿದ್ದರೆ, 2016ರಲ್ಲಿ ಪಂಜಾಬ್ ಮತ್ತು 2023ರಲ್ಲಿ ಸನ್ರೈಸರ್ಸ್ ವಿರುದ್ಧ ಗೆದ್ದಿತ್ತು. ಇನ್ನು ವಿರಾಟ್ ಕೊಹ್ಲಿ ಕೂಡ ಮೇ 18ರಂದೇ 2 ಶತಕ ಸಿಡಿಸಿದ ಬಲಿಷ್ಠ ದಾಖಲೆ ಹೊಂದಿದ್ದಾರೆ ಎಂಬುದು ಗಮನಾರ್ಹ.
ಲಕ್ ತಂದ ಸ್ವಪ್ನಿಲ್!
ಆರ್ಸಿಬಿ ಪಾಲಿಗೆ ಸ್ವಪ್ನಿಲ್ ಸಿಂಗ್ ಲಕ್ಕಿ ಚಾರ್ಮ್ ಎನಿಸಿದ್ದಾರೆ. ಏಪ್ರಿಲ್ 25ರಂದು ಸನ್ರೈಸರ್ಸ್ ವಿರುದ್ಧ ಸ್ವಪ್ನಿಲ್ ಇಂಪ್ಯಾಕ್ಟ್ ಪ್ಲೇಯರ್ ಆಗಿ ಟೂರ್ನಿಯಲ್ಲಿ ಮೊದಲ ಬಾರಿ ಕಣಕ್ಕಿಳಿದ ಬಳಿಕ ಆರ್ಸಿಬಿ ಆಡಿದ ಎಲ್ಲ 5 ಪಂದ್ಯಗಳಲ್ಲೂ ಗೆದ್ದಿದೆ. ಉಪಯುಕ್ತ 28 ರನ್ ಮತ್ತು 6 ವಿಕೆಟ್ನೊಂದಿಗೆ ಉತ್ತಮ ಇಂಪ್ಯಾಕ್ಟ್ ಕೂಡ ಮಾಡಿದ್ದಾರೆ.
ಮುಖಾಮುಖಿ: 32
ಆರ್ಸಿಬಿ: 10
ಸಿಎಸ್ಕೆ: 21
ರದ್ದು: 1
ಆರಂಭ: ರಾತ್ರಿ 7.30
ನೇರಪ್ರಸಾರ: ಸ್ಟಾರ್ ಸ್ಪೋರ್ಟ್ಸ್, ಜಿಯೋಸಿನಿಮಾ.