ಭಾರತ-ಬಾಂಗ್ಲಾದೇಶ ಪಂದ್ಯದ ನೋಟ. ಏಜೆನ್ಸಿ
ಕ್ರೀಡೆ

ಅಂಧರ ಟಿ20 ಏಷ್ಯಾಕಪ್​ನಲ್ಲೂ ಭಾರತ-ಪಾಕ್​ ಫೈನಲ್​

ಕೊನೇ ಲೀಗ್​ ಪಂದ್ಯದಲ್ಲಿ ಬಾಂಗ್ಲಾದೇಶ ವಿರುದ್ಧ ಜಯಭೇರಿ

ಬೆಂಗಳೂರು: ಕಿರಿಯರ ಕ್ರಿಕೆಟ್​ ಏಷ್ಯಾಕಪ್​ ಮತ್ತು ಸ್ಯಾಫ್​ ಫುಟ್​ಬಾಲ್​ ಚಾಂಪಿಯನ್​ಷಿಪ್​ ಬಳಿಕ ಅಂಧರ ಟಿ20 ಏಷ್ಯಾಕಪ್​ನಲ್ಲೂ ಸಾಂಪ್ರದಾಯಿಕ ಎದುರಾಳಿಗಳಾದ ಭಾರತ-ಪಾಕಿಸ್ತಾನ ನಡುವೆ ಫೈನಲ್​ ಮುಖಾಮುಖಿ ನಡೆಯಲಿದೆ. ಢಾಕಾದಲ್ಲಿ ನಡೆಯುತ್ತಿರುವ ಟೂರ್ನಿಯಲ್ಲಿ ಬುಧವಾರ ನಡೆದ ತನ್ನ 3ನೇ ಹಾಗೂ ಕೊನೇ ಲೀಗ್​ ಪಂದ್ಯದಲ್ಲಿ ಆತಿಥೇಯ ಬಾಂಗ್ಲಾದೇಶವನ್ನು 8 ವಿಕೆಟ್​ಗಳಿಂದ ಸೋಲಿಸುವ ಮೂಲಕ ಭಾರತ ಪ್ರಶಸ್ತಿ ಸುತ್ತಿಗೇರಿದೆ. ಶುಕ್ರವಾರ ಭಾರತ-ಪಾಕ್​ ನಡುವೆ ಫೈನಲ್​ ಪಂದ್ಯ ನಡೆಯಲಿದೆ.

ಭಾರತ ಟಾಸ್​ ಗೆದ್ದು ಬೌಲಿಂಗ್​ ಆಯ್ದುಕೊಂಡರೆ, ಬಾಂಗ್ಲಾ 7 ವಿಕೆಟ್​ಗೆ 123 ರನ್​ ಗಳಿಸಲಷ್ಟೇ ಶಕ್ತವಾಯಿತು. ಭಾರತ 3 ರನೌಟ್​ ಮೂಲಕ ಫೀಲ್ಡಿಂಗ್​ನಲ್ಲೂ ಗಮನಸೆಳೆಯಿತು. ಭಾರತ 13.2 ಓವರ್​ಗಳಲ್ಲೇ 2 ವಿಕೆಟ್​ಗೆ 124 ರನ್​ ಗಳಿಸಿ ಜಯ ಸಾಧಿಸಿತು. ಕನ್ನಡಿಗ ಸುನೀಲ್​ ರಮೇಶ್​ 41 ಎಸೆತಗಳಲ್ಲಿ 63 ರನ್​ ಸಿಡಿಸಿ ಚೇಸಿಂಗ್​ ಸುಲಭಗೊಳಿಸಿದರು.

ಕಳೆದ ಪಂದ್ಯದಲ್ಲಿ ಪಾಕ್​ ಎದುರು 1 ವಿಕೆಟ್​ ಸೋಲು ಕಂಡಿದ್ದ ಭಾರತ, ಫೈನಲ್​ನಲ್ಲಿ ಸೇಡು ತೀರಿಸಿಕೊಳ್ಳುವ ಅವಕಾಶ ಪಡೆದಿದೆ.