ಬ್ಯಾಂಕಾಕ್: ಭಾರತದ 4/400 ಮೀ. ಮಿಶ್ರ ರಿಲೇ ತಂಡ ಚೊಚ್ಚಲ ಆವೃತ್ತಿಯ ಏಷ್ಯನ್ ರಿಲೇ ಚಾಂಪಿಯನ್ಷಿಪ್ನಲ್ಲಿ ರಾಷ್ಟ್ರೀಯ ದಾಖಲೆಯೊಂದಿಗೆ ಸ್ವರ್ಣ ಪದಕ ಗೆದ್ದುಕೊಂಡಿದೆ. ಆದರೆ ಮುಂಬರುವ ಪ್ಯಾರಿಸ್ ಒಲಿಂಪಿಕ್ಸ್ ಅರ್ಹತೆಯಿಂದ ವಂಚಿತವಾಗಿದೆ.
ಮುಹಮ್ಮದ್ ಅಜ್ಮಲ್, ಜ್ಯೋತಿಕಾ ಶ್ರೀ ದಂಡಿ, ಅಮೋಜ್ ಜೇಕಬ್ ಮತ್ತು ಶುಭಾ ವೆಂಕಟೇಶನ್ ಒಳಗೊಂಡ ತಂಡ ಸೋಮವಾರ ನಡೆದ ಸ್ಪರ್ಧೆಯಲ್ಲಿ 3 ನಿಮಿಷ, 14.12 ಸೆಕೆಂಡ್ಗಳಲ್ಲಿ ಓಟ ಮುಗಿಸಿ ಅಗ್ರಸ್ಥಾನ ಪಡೆಯಿತು. ಕಳೆದ ವರ್ಷ ಹಾಂಗ್ರೆೌ ಏಷ್ಯನ್ ಗೇಮ್ಸ್ನಲ್ಲಿ 3 ನಿಮಿಷ, 14.34 ಸೆಕೆಂಡ್ಗಳಲ್ಲಿ ಸ್ಪರ್ಧೆ ಮುಗಿಸಿದ್ದು ಹಿಂದಿನ ರಾಷ್ಟ್ರೀಯ ದಾಖಲೆಯಾಗಿತ್ತು.
ರಿಲೇ ಓಟದ ಎಲ್ಲ 4 ಚರಣಗಳಲ್ಲಿ ಭಾರತ ತಂಡ ಅಗ್ರಸ್ಥಾನ ಕಾಯ್ದುಕೊಂಡರೆ, ಶ್ರೀಲಂಕಾ (3ನಿ, 17.00 ಸೆ) ದ್ವಿತೀಯ ಮತ್ತು ವಿಯೇಟ್ನಾಂ (3ನಿ, 18.45 ಸೆ) ತೃತೀಯ ಸ್ಥಾನ ಪಡೆಯಿತು.
ಭಾರತದ ಮಿಶ್ರ ರಿಲೇ ತಂಡ ಈಗ ವಿಶ್ವ ಅಥ್ಲೆಟಿಕ್ಸ್ನ ರೋಡ್ ಟು ಪ್ಯಾರಿಸ್ ರ್ಯಾಂಕಿಂಗ್ನಲ್ಲಿ 21ನೇ ಸ್ಥಾನಕ್ಕೇರಿದೆ. 15 ಅಥವಾ 16ನೇ ಸ್ಥಾನಕ್ಕೇರಿದರೆ ಮಾತ್ರ ಭಾರತಕ್ಕೆ ಒಲಿಂಪಿಕ್ಸ್ ಸ್ಪರ್ಧೆ ಅವಕಾಶ ಲಭಿಸಲಿದೆ. 14 ತಂಡಗಳು ಈಗಾಗಲೆ ನೇರಅರ್ಹತೆ ಸಂಪಾದಿಸಿದ್ದು, ಉಳಿದ 2 ಸ್ಥಾನಗಳಿಗೆ ಜೂನ್ 30ರ ಅಂತಿಮ ಗಡುವಿನೊಂದಿಗೆ ಶ್ರೇಷ್ಠ ಸಮಯದ ಸಾಧನೆಯ ಆಧಾರದಲ್ಲಿ ಅರ್ಹತೆ ನೀಡಲಾಗುತ್ತದೆ. ಸದ್ಯ ಜೆಕ್ ಗಣರಾಜ್ಯ (3ನಿ, 11.98 ಸೆ) ಮತ್ತು ಇಟಲಿ (3ನಿ, 13.56) ಕ್ರಮವಾಗಿ 15, 16ನೇ ಸ್ಥಾನದಲ್ಲಿವೆ. ಹೀಗಾಗಿ ಕನಿಷ್ಠ 3 ನಿಮಿಷ, 13.56 ಸೆಕೆಂಡ್ನೊಳಗೆ ಸ್ಪರ್ಧೆ ಮುಗಿಸಿದರಷ್ಟೇ ಭಾರತಕ್ಕೆ ಒಲಿಂಪಿಕ್ಸ್ ಅರ್ಹತೆ ಅವಕಾಶವಿದೆ.
ಈಗಾಗಲೆ ಒಲಿಂಪಿಕ್ಸ್ ಅರ್ಹತೆ ಸಂಪಾದಿಸಿರುವ ಭಾರತದ 4/400 ಮೀ. ಪುರುಷರ ಮತ್ತು ಮಹಿಳಾ ರಿಲೇ ತಂಡಗಳು ಕೂಟದ 2ನೇ ದಿನವಾದ ಮಂಗಳವಾರ ಸ್ಪರ್ಧಿಸಲಿವೆ.