ಅಬರ್ಂಡೇಲ್ (ಅಮೆರಿಕ): ಭಾರತದ ಜ್ಯೋತಿ ಸುರೇಖಾ ವೆನ್ನಮ್ ಮತ್ತು ರಿಷಭ್ ಯಾದವ್ ಜೋಡಿ ಆರ್ಚರಿ ವಿಶ್ವಕಪ್ ಸ್ಟೇಜ್&1ರಲ್ಲಿ ಸ್ವರ್ಣ ಪದಕ ಗೆದ್ದುಕೊಂಡಿದ್ದಾರೆ. 2028ರ ಲಾಸ್ ಏಂಜಲೀಸ್ ಒಲಿಂಪಿಕ್ಸ್ಗೆ ಇತ್ತೀಚೆಗಷ್ಟೇ ಹೊಸದಾಗಿ ಸೇರ್ಪಡೆಯಾಗಿರುವ ಮಿಶ್ರ ಕಂಪೌಂಡ್ ವಿಭಾಗದ ಸ್ಪರ್ಧೆಯಲ್ಲಿ ಭಾರತ ಈ ಸಾಧನೆ ಮಾಡಿರುವುದು ವಿಶೇಷವೆನಿಸಿದೆ.
ಸುರೇಖಾ-ರಿಷಭ್ ಜೋಡಿ ಶನಿವಾರ ನಡೆದ ಫೈನಲ್ ಸ್ಪರ್ಧೆಯಲ್ಲಿ ಚೀನಾ ತೈಪೆಯ ಹ್ವಾಂಗ್ ಐ-ಜೌ ಮತ್ತು ಚೆನ್ ಚೆಹ್-ಲುನ್ ಜೋಡಿಯ ಎದುರು 153-151 ಅಂಕಗಳಿಂದ ರೋಚಕ ಗೆಲುವು ಸಾಧಿಸಿತು. ಮೊದಲ 2 ಸೆಟ್ಗಳಲ್ಲಿ 37-38, 38-39ರಿಂದ ಸೋತ ಭಾರತೀಯ ಜೋಡಿ ನಂತರದ 2 ಸೆಟ್ಗಳಲ್ಲಿ 39-38, 39-36ರಿಂದ ಗೆಲುವು ಸಾಧಿಸಿ ತಿರುಗೇಟು ನೀಡಿತು.
ಇದಕ್ಕೆ ಮುನ್ನ ಸೆಮೀಸ್ನಲ್ಲಿ ಸ್ಲೊವೇನಿಯಾವನ್ನು ಸೋಲಿಸುವ ಮೂಲಕ ಭಾರತ ಪದಕ ಖಾತ್ರಿಪಡಿಸಿಕೊಂಡಿತ್ತು. ಇದಕ್ಕೆ ಮುನ್ನ ಪುರುಷರ ಕಂಪೌಂಡ್ ತಂಡ ವಿಭಾಗದ ಕಂಚಿನೊಂದಿಗೆ ಭಾರತ ಕೂಟದಲ್ಲಿ ಪದಕದ ಖಾತೆ ತೆರೆದಿತ್ತು. ಪುರುಷರ ರಿಕರ್ವ್ ವಿಭಾಗದಲ್ಲಿ ಧೀರಜ್, ತರುಣ್ದೀಪ್, ಅತನು ದಾಸ್ ಒಳಗೊಂಡ ಭಾರತ ತಂಡ ಬೆಳ್ಳಿ ಪದಕ ಗೆದ್ದುಕೊಂಡಿತು.