ಬೆಂಗಳೂರು: ಪ್ಯಾರಿಸ್ ಎಂಬ ಪ್ರೇಮನಗರಿಯಲ್ಲಿ ಭಾರತದ ಪದಕ ಗೆಲುವಿನ ಪ್ರೀತಿ ಲಿಸಿದ್ದಕ್ಕಿಂತ, ಭಗ್ನಗೊಂಡಿದ್ದೇ ಹೆಚ್ಚು. ಹೀಗಾಗಿ ಒಲಿಂಪಿಕ್ಸ್ ಇತಿಹಾಸದಲ್ಲಿ ಮೊದಲ ಬಾರಿಗೆ 10 ಅಥವಾ ಅದಕ್ಕಿಂತ ಹೆಚ್ಚಿನ ಪದಕ ಬೇಟೆಯಾಡುವ ಭಾರತದ ಕನಸು ಕೂಡ ನನಸಾಗಲಿಲ್ಲ. ಹಾಗೆಂದು ಭಾರತದ ನಿರ್ವಹಣೆ ತೀರಾ ಕಳಪೆಯಾಗಿಯೂ ಇರಲಿಲ್ಲ. ಮೊದಲ ಬಾರಿ 5 ಕಂಚಿನ ಪದಕ ಬೇಟೆಯಾಡಿರುವ ಭಾರತ, ನಿರ್ಣಾಯಕ ಟ್ಟದಲ್ಲಿ ಮುಗ್ಗರಿಸದೆ ಇನ್ನೊಂದಿಷ್ಟು ನಿರ್ವಹಣೆ ಸುಧಾರಿಸಿದ್ದರೆ ಶ್ರೇಷ್ಠ ಸಾಧನೆಯನ್ನೇ ಮಾಡಬಹುದಾಗಿತ್ತು. ಒಟ್ಟಾರೆ ಪ್ಯಾರಿಸ್ನಲ್ಲಿ 117 ಕ್ರೀಡಾಪಟುಗಳ ಭಾರತ ತಂಡ ಆರಕ್ಕೇರದೆ, ಮೂರಕ್ಕಿಳಿಯದಂಥ ನಿರ್ವಹಣೆಯನ್ನು ಪ್ರದರ್ಶಿಸಿತು.
ಖೇಲೋ ಇಂಡಿಯಾ, ಟಾರ್ಗೆಟ್ ಒಲಿಂಪಿಕ್ಸ್ ಪೋಡಿಯಂನಂಥ ಕೇಂದ್ರ ಸರ್ಕಾರದ ಪ್ರಮುಖ ಕ್ರೀಡಾ ಯೋಜನೆಗಳಿಂದ ಭಾರತ, ಪ್ರತಿಭಾವಂತ ಕ್ರೀಡಾಪಟುಗಳಿಗೆ ಅವಕಾಶ ಕಲ್ಪಿಸುವಲ್ಲಿ ಯಶಸ್ವಿಯಾಗಿದೆ. ಕಳೆದ ವರ್ಷ ಏಷ್ಯಾಡ್ನಲ್ಲಿ ಭಾರತ ಪದಕಗಳ ಶತಕ ಬಾರಿಸಿದ್ದು ಇದಕ್ಕೆ ಸಾ. ಆದರೆ ಜಾಗತಿಕ ಮಟ್ಟದ ಕ್ರೀಡಾ ವೇದಿಕೆಯಲ್ಲಿ ಸಿಗುವ ಪ್ರಚಾರ, ಎದುರಾಳಿಗಳ ಸ್ಟಾರ್ ಬಲ ಭಾರತದ ಕ್ರೀಡಾಪಟುಗಳಿಗೆ ಮಾನಸಿಕವಾಗಿ ಸ್ವಲ್ಪ ಒತ್ತಡ ಹೇರಿ ಹಿನ್ನಡೆ ತಂದಿದೆ. 2 ಕಂಚು ಗೆದ್ದಿದ್ದ ಮನು ಭಾಕರ್ 3ನೇ ಸ್ಪರ್ಧೆಯಲ್ಲಿ ಚಿನ್ನ ಅಥವಾ ಬೆಳ್ಳಿ ಗೆಲ್ಲುವ ಅವಕಾಶ ಹೊಂದಿದ್ದರೂ, ಕೊನೇಕ್ಷಣದಲ್ಲಿ ಮುಗ್ಗರಿಸಿ 4ನೇ ಸ್ಥಾನಕ್ಕೆ ತೃಪ್ತಿಪಟ್ಟಿದ್ದರು. ಆರ್ಚರಿಯಲ್ಲಿ ದಕ್ಷಿಣ ಕೊರಿಯಾ, ಕುಸ್ತಿಯಲ್ಲಿ ಜಪಾನ್ ಸಹಿತ ಆಯಾ ಕ್ರೀಡೆಯಲ್ಲಿ ಬಲಿಷ್ಠವಾಗಿರುವ ದೇಶದ ಸ್ಪರ್ಧಿಗಳು ಎದುರಾದಾಗ ಭಾರತೀಯರಲ್ಲಿ ಸ್ವಲ್ಪ ಅಳುಕು ಮೂಡಿದಂತಿತ್ತು. ಇದೇ ನಿರ್ವಹಣೆಯ ಮೇಲೂ ಪರಿಣಾಮ ಬೀರಿತು. ಹೀಗಾಗಿ ಭಾರತದ ಕ್ರೀಡಾಪಟುಗಳು ಮಾನಸಿಕವಾಗಿಯೂ ಬಲಿಷ್ಠರಾಗಬೇಕಿದೆ. ಕೆಲವೊಮ್ಮೆ ಭಾರತೀಯರಿಗೆ ಅಂಪೈರ್ಗಳ ಕೆಟ್ಟ ತೀರ್ಪು ಹಿನ್ನಡೆ ತಂದರೆ, ಕೆಲ ಬಾರಿ ಅದೃಷ್ಟ ಕೈಕೊಟ್ಟಿತು.
ಒಟ್ಟಾರೆ ಪ್ಯಾರಿಸ್ನಲ್ಲಿ ದಶ ಪದಕದ ಮೇಲೆ ಕಣ್ಣಿಟ್ಟಿದ್ದ ಭಾರತದ ಕ್ರೀಡಾಪ್ರೇಮಿಗಳ ಹೃದಯಭಗ್ನಗೊಂಡರೂ, ಅದೇ ಬೇಸರದಲ್ಲಿ ಉಳಿಯಬೇಕಾಗಿಲ್ಲ. ಈ ಸೋಲನ್ನೇ 4 ವರ್ಷಗಳ ಬಳಿಕ ಲಾಸ್ ಏಂಜಲಿಸ್ನಲ್ಲಿ ಗೆಲುವಿನ ಮೆಟ್ಟಿಲನ್ನಾಗಿ ಮಾಡಿಕೊಳ್ಳುವ ಅವಕಾಶ ಭಾರತದ ಮುಂದಿದೆ. ಮುಂದಿನ ಬಾರಿ ದಶ ಪದಕದ ಆಸೆ ಈಡೇರಿಸಿಕೊಳ್ಳುವ ಭರವಸೆಯ ಬೆಳಕು ಪ್ಯಾರಿಸ್ನಲ್ಲಿ ಮೂಡಿದೆ.
ಭಾರತ 15 ಪದಕ ಗೆಲ್ಲಬಹುದಿತ್ತು!
ಪ್ಯಾರಿಸ್ನಲ್ಲಿ ಎಲ್ಲವೂ ಅಂದುಕೊಂಡಂತೆ ಆಗಿದ್ದಿದ್ದರೆ ಭಾರತ ಒಟ್ಟು 15 ಪದಕಗಳನ್ನು ಗೆಲ್ಲಬಹುದಾಗಿತ್ತು! ಈಗ 6 ಪದಕ ಬಂದಿದ್ದರೆ, 6 ಸ್ಪರ್ಧೆಗಳಲ್ಲಿ ಭಾರತ 4ನೇ ಸ್ಥಾನಕ್ಕೆ ತೃಪ್ತಿಪಟ್ಟಿದ್ದರಿಂದ 6 ಪದಕಗಳು ತಪ್ಪಿದವು. ವಿನೇಶ್ ಅನರ್ಹಗೊಳ್ಳದಿದ್ದರೆ ಭಾರತಕ್ಕೆ ಇನ್ನೊಂದು ಪದಕ ಖಾತ್ರಿ ಇತ್ತು. ಬಾಕ್ಸಿಂಗ್ನಲ್ಲಿ ನಿಶಾಂತ್ ದೇವ್, ಲವ್ಲಿನಾ ಕಳಪೆ ಅಂಪೈರಿಂಗ್ನಿಂದಾಗಿ ಕ್ವಾರ್ಟರ್ೈನಲ್ನಲ್ಲಿ ಸೋಲದೆ ಸೆಮಿೈನಲ್ಗೇರಿದ್ದರೆ ಭಾರತಕ್ಕೆ ಮತ್ತೆರಡು ಪದಕ ಲಭಿಸುತ್ತಿದ್ದವು.
3 ಬಂಗಾರದ ಬೇಟೆ ಮಿಸ್!
ಭಾರತಕ್ಕೆ ಕೆಲ ಅಡ್ಡಿ, ಹಿನ್ನಡೆಗಳು ಎದುರಾಗದಿದ್ದರೆ ಪ್ಯಾರಿಸ್ನಲ್ಲಿ 3 ಚಿನ್ನವನ್ನೂ ಗೆಲ್ಲಬಹುದಾಗಿತ್ತು. ಟೋಕಿಯೊ ಗೇಮ್ಸ್ ಸ್ವರ್ಣ ಸಾಧಕ ನೀರಜ್ ಚೋಪ್ರಾ ಮೇಲೆ ಈ ಸಲವೂ ಅದೇ ನಿರೀಕ್ಷೆ ಇದ್ದರೂ, ಗಾಯದ ಭೀತಿಯಿಂದಾಗಿ ಅವರಿಗೆ ಪೂರ್ಣ ಸಾಮರ್ಥ್ಯದ ನಿರ್ವಹಣೆ ತೋರಿಸಲಾಗಲಿಲ್ಲ. ಜತೆಗೆ ಪಾಕಿಸ್ತಾನದ ಅರ್ಷದ್ ನದೀಂ ಒಲಿಂಪಿಕ್ಸ್ ದಾಖಲೆ ಬರೆದಿದ್ದರಿಂದ, ನೀರಜ್ ಟೋಕಿಯೊಗಿಂತ (87.58 ಮೀ) ಉತ್ತಮ (89.45 ಮೀ) ನಿರ್ವಹಣೆ ತೋರಿದರೂ ಚಿನ್ನ ಸಿಗಲಿಲ್ಲ. ಫೈನಲ್ ದಿನ ವಿನೇಶ್ ಪೋಗಟ್ 100 ಗ್ರಾಂ ಅಧಿಕ ತೂಕದಿಂದ ಅನರ್ಹಗೊಳ್ಳದಿದ್ದರೆ ಮತ್ತೊಂದು ಚಿನ್ನ ಗೆಲ್ಲಬಹುದಿತ್ತು. ಇನ್ನು ಹಾಕಿ ಕ್ವಾರ್ಟರ್ಫೈನಲ್ನಲ್ಲಿ ಕೆಟ್ಟ ಅಂಪೈರಿಂಗ್ನಿಂದ ಅಮಿತ್ ರೋಹಿದಾಸ್ ಕೆಂಪು ಕಾರ್ಡ್ ಪಡೆದು ಸೆಮಿಫೈನಲ್ಗೂ ಅಲಭ್ಯರಾಗಿರದಿದ್ದರೆ, ಸೆಮಿಫೈನಲ್ನಲ್ಲಿ ಜರ್ಮನಿ ಎದುರು ರಕ್ಷಣಾ ವಿಭಾಗದ ವೈಫಲ್ಯದಿಂದ ಸೋಲುತ್ತಿರಲಿಲ್ಲ ಮತ್ತು ಫೈನಲ್ಗೇರಿ ಚಿನ್ನ ಗೆಲ್ಲುವ ಅವಕಾಶವಿರುತಿತ್ತು.
ಭಾರತಕ್ಕೆ 71ನೇ ಸ್ಥಾನ
ಪ್ಯಾರಿಸ್ ಒಲಿಂಪಿಕ್ಸ್ ಪದಕ ಪಟ್ಟಿಯಲ್ಲಿ ಭಾರತ 71ನೇ ಸ್ಥಾನಕ್ಕೆ ತೃಪ್ತಿಪಟ್ಟಿದೆ. ಇದು ಕಳೆದ 24 ವರ್ಷಗಳಲ್ಲೇ ಭಾರತಕ್ಕೆ ಕಡಿಮೆ ಸ್ಥಾನ ಎನಿಸಿದೆ. ಈ ಮುನ್ನ 1996 ಮತ್ತು 2000ದ ಒಲಿಂಪಿಕ್ಸ್ನಲ್ಲೂ ಭಾರತ 71ನೇ ಸ್ಥಾನಕ್ಕೆ ತೃಪ್ತಿಪಟ್ಟಿತ್ತು. ನಂತರದ 5 ಒಲಿಂಪಿಕ್ಸ್ಗಳಲ್ಲಿ ಭಾರತ ಕ್ರಮವಾಗಿ 65, 50, 55, 67, 48ನೇ ಸ್ಥಾನ ಗಳಿಸಿತ್ತು. ಈ ಬಾರಿ ಚಿನ್ನ ಅಥವಾ ಹೆಚ್ಚಿನ ಬೆಳ್ಳಿ ಪದಕ ಗೆಲ್ಲದಿರುವುದು ಭಾರತಕ್ಕೆ ಹಿನ್ನಡೆಯಾಗಿದೆ. ವಿನೇಶ್ಗೆ ಬೆಳ್ಳಿ ಸಿಕ್ಕರೆ ಭಾರತ ಪದಕಪಟ್ಟಿಯಲ್ಲಿ 68ನೇ ಸ್ಥಾನಕ್ಕೇರಲಿದೆ.
*ಕ್ರೀಡೆಯಲ್ಲಿ ಸಾಧನೆ ತೋರಲು ಅದು ನಿಮ್ಮ ದಿನವಾಗಿರಬೇಕು. ಸ್ವಲ್ಪ ಅದೃಷ್ಟವೂ ನಿಮ್ಮ ಜತೆಗಿರಬೇಕಾಗುತ್ತದೆ. ಅದು ನಿಮ್ಮ ದಿನವಾಗಿರದಿದ್ದರೆ ಹಾದಿ ಕಠಿಣವಾಗಿರುತ್ತದೆ. ಆಗ ಕಠಿಣ ತರಬೇತಿಯನ್ನು ಮುಂದುವರಿಸಿ ಬಲಿಷ್ಠವಾಗಿ ಮರಳುವುದಷ್ಟೇ ಉಳಿದ ಆಯ್ಕೆಯಾಗಿರುತ್ತದೆ.
| ನೀರಜ್ ಚೋಪ್ರಾ
ಪದಕ ಸಾಧಕರು:
ನೀರಜ್ ಚೋಪ್ರಾ (ಜಾವೆಲಿನ್): 1 ಬೆಳ್ಳಿ
ಮನು ಭಾಕರ್ (ಶೂಟಿಂಗ್): 2 ಕಂಚು
ಸರಬ್ಜೋತ್ ಸಿಂಗ್ (ಶೂಟಿಂಗ್): 1 ಕಂಚು
ಸ್ವಪ್ನಿಲ್ ಕುಸಾಲೆ (ಶೂಟಿಂಗ್): 1 ಕಂಚು
ಪುರುಷರ ಹಾಕಿ ತಂಡ: 1 ಕಂಚು
ಅಮನ್ ಸೆಹ್ರಾವತ್ (ಕುಸ್ತಿ): 1 ಕಂಚು
ಪದಕದ ಸನಿಹ ನಿರಾಸೆ
*ಅರ್ಜುನ್ ಬಬುತಾ (ಶೂಟಿಂಗ್)
*ಧೀರಜ್ ಬಿ-ಅಂಕಿತಾ (ಆರ್ಚರಿ)
*ಲಕ್ಷ$್ಯ ಸೇನ್ (ಬ್ಯಾಡ್ಮಿಂಟನ್)
*ಅನಂತ್ಜೀತ್-ಮಹೇಶ್ವರಿ (ಶೂಟಿಂಗ್)
*ಮೀರಾಬಾಯಿ ಚಾನು (ವೇಯ್ಟ್ಲಿಫ್ಟಿಂಗ್)
*ನಿಶಾಂತ್ ದೇವ್ (ಬಾಕ್ಸಿಂಗ್)
*ಲವ್ಲಿನಾ ಬೋರ್ಗೋಹೈನ್ (ಬಾಕ್ಸಿಂಗ್)
*ವಿನೇಶ್ ಪೋಗಟ್ (ಕುಸ್ತಿ)
ಪದಕ ಗೆಲ್ಲದಿದ್ದರೂ ಮಿಂಚಿದವರು
*ಅವಿನಾಶ್ ಸಾಬ್ಲೆ (ಸ್ಟೀಪಲ್ಚೇಸ್)
*ಬಾಲರಾಜ್ ಪನ್ವರ್ (ಸೈಲಿಂಗ್)
*ರಮಿತಾ ಜಿಂದಾಲ್ (ಶೂಟಿಂಗ್)
*ಮನಿಕಾ ಬಾತ್ರಾ (ಟೇಬಲ್ ಟೆನಿಸ್)
*ಶ್ರೀಜಾ ಅಕುಲ (ಟೇಬಲ್ ಟೆನಿಸ್)
*ಅರ್ಚನಾ ಕಾಮತ್ (ಟೇಬಲ್ ಟೆನಿಸ್)
*ನಿಶಾ ದಹಿಯಾ (ಕುಸ್ತಿ)
ನಿರೀಕ್ಷೆ ಹುಸಿಗೊಳಿಸಿದವರು
*ಚಿರಾಗ್ ಶೆಟ್ಟಿ-ಸಾತ್ವಿಕ್ (ಬ್ಯಾಡ್ಮಿಂಟನ್)
*ಪಿವಿ ಸಿಂಧು (ಬ್ಯಾಡ್ಮಿಂಟನ್)
*ರೋಹನ್ ಬೋಪಣ್ಣ (ಟೆನಿಸ್)
*ದೀಪಿಕಾ ಕುಮಾರಿ (ಆರ್ಚರಿ)
*ಅಂತಿಮ್ ಪಾಂಗಲ್ (ಕುಸ್ತಿ)
*ಐಶ್ವರಿ ಪ್ರತಾಪ್ (ಶೂಟಿಂಗ್)
*ಅದಿತಿ ಅಶೋಕ್ (ಗಾಲ್ಫ್)
*ನಿಖತ್ ಜರೀನ್ (ಬಾಕ್ಸಿಂಗ್)
*ಜ್ಯೋತಿ ಯರಾಜಿ (ಹರ್ಡಲ್ಸ್)
ಪ್ಯಾರಿಸ್ನಲ್ಲಿ ಭಾರತದ ಪ್ರಥಮಗಳು
*ಮಹಿಳಾ ಶೂಟರ್ಗೆ ಪದಕ (ಮನು ಭಾಕರ್)
*ಓರ್ವ ಕ್ರೀಡಾಪಟುವಿಗೆ 2 ಪದಕ (ಮನು ಭಾಕರ್)
*ಮಿಶ್ರ ವಿಭಾಗದಲ್ಲಿ ಪದಕ ಸಾಧನೆ (ಶೂಟಿಂಗ್)
*ಒಂದೇ ಕ್ರೀಡೆಯಲ್ಲಿ 3 ಪದಕ (ಶೂಟಿಂಗ್)
*50 ಮೀ. ರೈಫಲ್ನಲ್ಲಿ ಪದಕ (ಕುಸಾಲೆ)
*ವೈಯಕ್ತಿಕ ಚಿನ್ನ, ಬೆಳ್ಳಿ ಪದಕ (ನೀರಜ್ ಚೋಪ್ರಾ)
*ಐದು ಕಂಚಿನ ಪದಕ ಗೆಲುವು
*5: ಭಾರತ ಸತತ 5ನೇ ಬಾರಿ ಒಲಿಂಪಿಕ್ಸ್ ಕುಸ್ತಿಯಲ್ಲಿ ಪದಕ ಜಯಿಸುವಲ್ಲಿ ಯಶಸ್ವಿಯಾಯಿತು.
*12: ಬ್ಯಾಡ್ಮಿಂಟನ್ನಲ್ಲಿ 12 ವರ್ಷಗಳ ಬಳಿಕ ಮೊದಲ ಬಾರಿ ಭಾರತಕ್ಕೆ ಪದಕವಿಲ್ಲ.
*52: ಭಾರತ ಹಾಕಿಯಲ್ಲಿ 52 ವರ್ಷಗಳ ಬಳಿಕ ಸತತ 2 ಒಲಿಂಪಿಕ್ಸ್ಗಳಲ್ಲಿ ಪದಕ ಜಯಿಸಿತು.
*4: ಮನು ಭಾಕರ್ ಮತ್ತು ನೀರಜ್ ಚೋಪ್ರಾ ಒಲಿಂಪಿಕ್ಸ್ನಲ್ಲಿ ಅವಳಿ ವೈಯಕ್ತಿಕ ಪದಕ ಗೆದ್ದ ಭಾರತದ 3 ಮತ್ತು 4ನೇ ಕ್ರೀಡಾಪಟು ಎನಿಸಿದರು.
*12: ಭಾರತದ ಶೂಟರ್ಗಳು ಸತತ 2 ಒಲಿಂಪಿಕ್ಸ್ಗಳ ಬಳಿಕ ಅಂದರೆ 12 ವರ್ಷಗಳ ಬಳಿಕ ಪದಕ ಗೆಲುವು ಸಾಧಿಸಿದರು.