ನವದೆಹಲಿ: ಪ್ಯಾರಿಸ್ ಒಲಿಂಪಿಕ್ಸ್ 2024ರ ಪದಕದಾಟದಲ್ಲಿ ನಿಗದಿತ ತೂಕಕ್ಕಿಂತ 100 ಗ್ರಾಂ ಅಧಿಕವಿದ್ದಾರೆ ಎಂಬ ಒಂದೇ ಒಂದು ಕಾರಣಕ್ಕೆ ಭಾರತೀಯ ಕುಸ್ತಿಪಟು ವಿನೇಶ್ ಫೋಗಟ್ರನ್ನು ಫೈನಲ್ ಪಂದ್ಯದಿಂದ ಐಒಸಿ ಅನರ್ಹಗೊಳಿಸಿತು. ಇದರಿಂದ ವಿನೇಶ್ರಿಗೆ ಯಾವ ಪದಕವು ದೊರಕಲಿಲ್ಲ. ಪರಿಸ್ಥಿತಿ ನೆನೆದು ಕಣ್ಣೀರಿಟ್ಟ ಫೋಗಟ್ ಆ.7ರಂದು ಸಿಎಎಸ್ ನ್ಯಾಯಾಲಯದಲ್ಲಿ ತಾನು ಎರಡು ಬೆಳ್ಳಿ ಪದಕಕ್ಕೆ ಅರ್ಹ ಎಂದು ಮನವಿ ಸಲ್ಲಿಸಿದ್ದರು. ತೀರ್ಪನ್ನು ಆ.16ರಂದು ತಿಳಿಸುತ್ತೇವೆ ಎಂದಿದ್ದ ನ್ಯಾಯಾಲಯ ಇದೀಗ ಅನರ್ಹತೆ ವಿರುದ್ಧ ಪ್ರಶ್ನಿಸಿ, ವಿನೇಶ್ ಸಲ್ಲಿಸಿದ್ದ ಅರ್ಜಿಯನ್ನು ವಜಾಗೊಳಿಸಿದೆ. ಎರಡು ಪದಕ ಸಿಗದಿದ್ದರೂ ಒಂದು ಬೆಳ್ಳಿ ಪದಕ ಖಂಡಿತ ಅವರ ಪಾಲಾಗಲಿದೆ. ಫೋಗಟ್ರ ಶ್ರಮಕ್ಕೆ ನ್ಯಾಯ ಸಿಗುವುದು ಖಚಿತ ಎಂದೇ ಎಲ್ಲರೂ ನಿರೀಕ್ಷಿಸಿದ್ದರು. ಆದ್ರೆ, ಕೋರ್ಟ್ ಭಾರತೀಯರ ಲೆಕ್ಕಾಚಾರಗಳನ್ನು ತಲೆಕೆಳಗಾಗಿಸಿದೆ.
ವಿನೇಶ್ ಫೋಗಟ್ ಸಲ್ಲಿಸಿದ್ದ ಅರ್ಜಿಯನ್ನು ಸಿಎಎಸ್ ನ್ಯಾಯಾಲಯ ವಜಾಗೊಳಿಸುತ್ತಿದ್ದಂತೆ ಒಲಿಂಪಿಕ್ಸ್ನಲ್ಲಿ ಭಾರತಕ್ಕೆ ಬರಬೇಕಿದ್ದ 7ನೇ ಪದಕ ಆಸೆ ಕಡೆಗೂ ಭಗ್ನಗೊಂಡಿತು. ಈ ಆಘಾತಕಾರಿ ಸುದ್ದಿ ಕೇಳಿ ಭಾರತೀಯರು ತೀವ್ರ ಅಸಮಾಧಾನಗೊಂಡಿದ್ದಾರೆ. ಭಾರತದ ಹೆಮ್ಮೆಯ ಕುಸ್ತಿಪಟು ವಿನೇಶ್ರಿಗೆ ಬೆಳ್ಳಿ ಪದಕ ದೊರೆಯಲಿ, ಅವರು ಅದಕ್ಕೆ ಅರ್ಹರು ಎಂದು ಕ್ರೀಡಾಪಟುಗಳಿಂದ ಹಿಡಿದು ಸಿನಿಮಾ ತಾರೆಯರು ಆಶಿಸಿದ್ದರು. ಈಗ ಆ ಎಲ್ಲಾ ಭರವಸೆಗಳು ಹುಸಿಯಾಗಿವೆ. ಅಷ್ಟಕ್ಕೂ ಒಲಿಂಪಿಕ್ ಫೈನಲ್ ಹಿಂದಿನ ರಾತ್ರಿ ನಡೆದಿದ್ದೇನು? ಒಂದು ರಾತ್ರಿ ಕಳೆಯುವಷ್ಟರೊಳಗೆ ಫೋಗಟ್ ದೇಹದ ತೂಕದಲ್ಲಿ ದಿಢೀರ್ 2.7 ಕೆಜಿ ಹೆಚ್ಚಾಗಲು ಕಾರಣವೇನು? ಎಂಬ ಪ್ರಶ್ನೆಗಳಿಗೆ ಇಲ್ಲಿದೆ ನೋಡಿ ಉತ್ತರ.
ತನ್ನ ಪ್ಯಾರಿಸ್ ಒಲಿಂಪಿಕ್ಸ್ 2024ರ ಪಂದ್ಯಗಳನ್ನು ಪ್ರಾರಂಭಿಸುವ ಮೊದಲು 50 ಕೆಜಿ ತೂಕದ ಮಿತಿಯ ಅಡಿಯಲ್ಲಿ ದೇಹದ ತೂಕವನ್ನು ಸಮತೋಲನವಾಗಿರಿಸಿಕೊಂಡಿದ್ದ ವಿನೇಶ್, ಈ ಹಿಂದೆ 82 ಅಂತಾರಾಷ್ಟ್ರೀಯ ಪಂದ್ಯಗಳ ಪೈಕಿ ಒಂದು ಪಂದ್ಯವನ್ನು ಸೋಲದ ವಿಶ್ವದ ನಂಬರ್ ಒನ್ ಕುಸ್ತಿಪಟು, ಜಪಾನ್ನ ಯುಯಿ ಸುಸಾಕಿ ಅವರನ್ನು ಮಣಿಸಿ, ಮಹಿಳೆಯರ ಕುಸ್ತಿ ವಿಭಾಗದ ಫೈನಲ್ ಹಂತವನ್ನು ಅತ್ಯಂತ ಯಶಸ್ವಿಯಾಗಿ ತಲುಪಿದ್ದರು. ಫೋಗಟ್ರ ಈ ಸಾಧನೆಗೆ ಜಾಗತಿಕ ಮಟ್ಟದಲ್ಲಿ ಅಭಿನಂದನೆಗಳು ವ್ಯಕ್ತವಾಗಿತ್ತು. ಇನ್ನು ಫೈನಲ್ಗೆ ತಯಾರಿ ನಡೆಸಿದ್ದ ವಿನೇಶ್, ಹಿಂದಿನ ರಾತ್ರಿ ಸೇವಿಸಿದ ಆಹಾರಗಳೇ ಅವರ ದೇಹದ ತೂಕದಲ್ಲಿ ದಿಢೀರ್ 2.7 ಕೆಜಿ ಹೆಚ್ಚಳಕ್ಕೆ ಕಾರಣವಾಯಿತು ಎಂದು ವರದಿಯೊಂದು ಉಲ್ಲೇಖಿಸಿದೆ.
ಒಲಿಂಪಿಕ್ ಸ್ಪರ್ಧೆಯಲ್ಲಿ ಭಾಗವಹಿಸುವ ಕುಸ್ತಿಪಟುಗಳು ತಮ್ಮ ದೇಹದ ತೂಕದ ಜತೆ ಹೋರಾಡುವುದೇ ಮೊದಲ ಗೆಲುವು. ಆನಂತರ ಎದುರಾಳಿ ವಿರುದ್ಧ ಗೆದ್ದು ಬೀಗುವುದು ಇತಿಹಾಸ. ಅದರಲ್ಲೂ ಫೈನಲ್ ಹಂತವನ್ನು ತಲುಪಿದ ಬಳಿಕ ತೂಕವನ್ನು ಸಮತೋಲನದಲ್ಲಿರಿಸಿಕೊಳ್ಳುವುದು ಬಹಳ ಕಷ್ಟಕರ. ಇದನ್ನು ಸವಾಲಾಗಿ ಸ್ವೀಕರಿಸುವ ಕುಸ್ತಿಪಟು, ಮಿತವಾದ ಆಹಾರಗಳನ್ನೇ ಸೇವಿಸಬೇಕು ಹಾಗೂ ಅಗತ್ಯ ವ್ಯಾಯಾಮ ಮಾಡಬೇಕು. ವರದಿಗಳ ಪ್ರಕಾರ, ಫೈನಲ್ ಹಿಂದಿನ ಬೆಳ್ಳಗ್ಗೆ 300 ಗ್ರಾಂ ಜ್ಯೂಸ್ ಸೇವಿಸಿದ ವಿನೇಶ್, ಅದಾದ ಬಳಿಕ ಒಂದಷ್ಟು ಲೀಟರ್ ದ್ರವವನ್ನು ಎನರ್ಜಿಗಾಗಿ ಕುಡಿದಿದ್ದರು. ಇದು ಮತ್ತಷ್ಟು ನಿರೀಕ್ಷಿತ 2000 ಗ್ರಾಂಗಳನ್ನು (2 ಕೆಜಿ) ಹೆಚ್ಚಿಸಿತು.
ಫೈನಲ್ ಸವಾಲಿನ ಹಾದಿಯಲ್ಲಿ ತೊಡಗಿದ್ದ ವಿನೇಶ್, ದೇಹದ ಶಕ್ತಿಯನ್ನು ಹೆಚ್ಚಿಸಿಕೊಳ್ಳಲು ಸಂಜೆ ವೇಳೆಗೆ ಕೆಲವು ಲಘು ತಿನಿಸುಗಳನ್ನು ಸೇವಿಸಿದ್ದಾರೆ. ಇದು ಸುಮಾರು 700 ಗ್ರಾಂಗಳ ಹೆಚ್ಚಳಕ್ಕೆ ದಾರಿ ಮಾಡಿಕೊಟ್ಟಿತು. ತೂಕ ಪರೀಕ್ಷಿಸಿಕೊಂಡ ಫೋಗಟ್ಗೆ ಆಘಾತವಾಗಿದ್ದು, ತಾನು 49.9ರಿಂದ 52.7 ಕೆಜಿ ಹೆಚ್ಚಳವಾಗಿದ್ದೀನಿ ಎಂಬ ಸಂಗತಿ. ತಕ್ಷಣವೇ ತೂಕ ಇಳಿಸಲು ರಾತ್ರಿಯಿಡೀ ನಾನಾ ರೀತಿಯಲ್ಲಿ ಕಸರತ್ತು ಮಾಡಿದ ವಿನೇಶ್, ಸತತ 6 ಗಂಟೆಗಳ ಕಾಲ ಥ್ರೇಡ್ಮಿಲ್ ಮೇಲೆ ಓಡಿದರು. ಒಂದು ಹನಿ ನೀರು ಕುಡಿಯದ ಫೋಗಟ್ರ ಕೂದಲನ್ನು ಕೂಡ ಕತ್ತರಿಸಲಾಯಿತು. ಆದ್ರೆ, ಅಂತಿಮವಾಗಿ 100 ಗ್ರಾಂ ಕರಗಿಸಲು ವಿಫಲವಾದ ಅವರನ್ನು ಐಒಸಿ ಒಲಿಂಪಿಕ್ ಫೈನಲ್ ಸ್ಪರ್ಧೆಯಿಂದ ಅರ್ನಹಗೊಳಿಸಿತು,(ಏಜೆನ್ಸೀಸ್).