ನವದೆಹಲಿ: ಕಳೆದ ದೇಶೀಯ ಕ್ರಿಕೆಟ್ ಋತುವಿನಲ್ಲಿ ರನ್ಮಳೆ ಹರಿಸಿದ್ದರೂ, ಐಪಿಎಲ್ 18ನೇ ಆವೃತ್ತಿಯ ಮೊದಲ 4 ಪಂದ್ಯಗಳಲ್ಲಿ ಬೆಂಚು ಕಾಯಿಸಿದ್ದ ಕರ್ನಾಟಕದ ಬ್ಯಾಟರ್ ಕರುಣ್ ನಾಯರ್, ಇಂಪ್ಯಾಕ್ಟ್ ಪ್ಲೇಯರ್ ಆಗಿ 5ನೇ ಪಂದ್ಯದಲ್ಲಿ ಕೊನೆಗೂ ಸಿಕ್ಕ ಅವಕಾಶವನ್ನು ಭರ್ಜರಿಯಾಗಿ ಬಳಸಿಕೊಂಡರು. ಈ ಅವಕಾಶಕ್ಕಾಗಿ ನಾನು ಕಾದು ಕುಳಿತಿದ್ದೆ. ಮಾನಸಿಕವಾಗಿ ಪಂದ್ಯ ಆಡಲು ಸಿದ್ಧನಾಗಿದ್ದೆ ಎಂದು ಕರುಣ್ 2022ರ ನಂತರ ಐಪಿಎಲ್ನಲ್ಲಿ ಮೊದಲ ಪಂದ್ಯವಾಡಿದ ಕರುಣ್ ಹೇಳಿದರು.
40 ಎಸೆತಗಳಲ್ಲಿ 12 ಬೌಂಡರಿ, 5 ಸಿಕ್ಸರ್ ಸಹಿತ 89 ರನ್ ಗಳಿಸಿದ ಕರುಣ್, ಪಂದ್ಯವನ್ನು ಡೆಲ್ಲಿಗೆ ಬಹುತೇಕ ಗೆದ್ದುಕೊಟ್ಟಿದ್ದರು. ಆದರೆ ಇತರರ ವೈಲ್ಯದಿಂದಾಗಿ ಡೆಲ್ಲಿ ನಿರಾಸೆ ಅನುಭವಿಸುವಂತಾಯಿತು. "ಐಪಿಎಲ್ನಲ್ಲಿ ಈ ಹಿಂದೆಯೂ ಆಡಿದ್ದರಿಂದ ಆತ್ಮವಿಶ್ವಾಸದಲ್ಲಿದ್ದೆ. ಆರಂಭಿಕ ಕೆಲ ಎಸೆತಗಳ ಬಳಿಕ ಲಯ ಕಂಡುಕೊಂಡೆ. ನನ್ನ ಬ್ಯಾಟಿಂಗ್ ಖುಷಿ ನೀಡಿತು. ಆದರೆ ತಂಡ ಗೆದ್ದಿದ್ದರೆ ಈ ಆಟ ಇನ್ನಷ್ಟು ಸಂತಸ ತರುತಿತ್ತು' ಎಂದು ಕರುಣ್ ಹೇಳಿದರು.