ಕೇಪ್ಟೌನ್: ಸ್ಪಿನ್ನರ್ ಸೈಮನ್ ಹಾರ್ಮರ್ (16ಕ್ಕೆ 6) ಮಾರಕ ಬೌಲಿಂಗ್ ದಾಳಿಯ ನೆರವಿನಿಂದ ಆತಿಥೇಯ ಹಾಗೂ ವಿಶ್ವ ಚಾಂಪಿಯನ್ ದಕ್ಷಿಣ ಆಫ್ರಿಕಾ ತಂಡ 3ನೇ ಹಾಗೂ ಅಂತಿಮ ಟೆಸ್ಟ್ ಪಂದ್ಯದಲ್ಲಿ ಆಸ್ಟ್ರೆಲಿಯಾವನ್ನು 176 ರನ್ಗಳಿಂದ ಮಣಿಸಿದೆ. ಇದರೊಂದಿಗೆ ಟೆಂಬಾ ಬವುಮಾ ಪಡೆ 3 ಪಂದ್ಯಗಳ ಸರಣಿಯನ್ನು 2-1ರಿಂದ ವಶಪಡಿಸಿಕೊಂಡಿದೆ.
ನ್ಯೂಲ್ಯಾಂಡ್ಸ್ ಮೈದಾನದಲ್ಲಿ ಶನಿವಾರ ಮುಕ್ತಾಯಗೊಂಡ ಪಂದ್ಯದಲ್ಲಿ ಕೊನೇ ದಿನ 288 ರನ್ ಸವಾಲು ಬೆನ್ನಟ್ಟಲು ಆರಂಭಿಸಿದ ಆಸೀಸ್, ಭೋಜನ ವಿರಾಮದ ಬಳಿಕ 57.1 ಓವರ್ಗಳಲ್ಲಿ 111 ರನ್ಗಳಿಗೆ ಆಲೌಟ್ ಆಯಿತು. ತವರಿನ ಸರಣಿಯ ಮೊದಲ ಟೆಸ್ಟ್ ಸೋತಿದ್ದ ದಕ್ಷಿಣ ಆಫ್ರಿಕಾ ನಂತರದ 2 ಟೆಸ್ಟ್ಗಳಲ್ಲೂ ಗೆದ್ದು ದಿಟ್ಟ ತಿರುಗೇಟು ನೀಡಿತು.
ಪ್ಯಾಟ್ ಕಮ್ಮಿನ್ಸ್ ಪಡೆ ಭೋಜನ ವಿರಾಮದ ವೇಳೆ 60 ರನ್ಗಳಿಗೆ 7 ವಿಕೆಟ್ ಕಳೆದುಕೊಂಡು ಸೋಲಿನ ಸುಳಿಗೆ ಸಿಲುಕಿತು. ವೇಗಿ ಕಗಿಸೊ ರಬಾಡ (39ಕ್ಕೆ 3) ಮೊದಲ 3 ವಿಕೆಟ್ ಕಬಳಿಸಿ ಕಾಂಗರೂಗಳಿಗೆ ಆರಂಭಿಕ ಆಘಾತ ನೀಡಿದರೆ, ನಂತರ ಹಾರ್ಮರ್ ಸ್ಪಿನ್ ದಾಳಿಯಿಂದ ಕಂಗೆಡಿಸಿದರು. ಕ್ಯಾಮರಾನ್ ಗ್ರೀನ್ (27) ಮತ್ತು ನಾಥನ್ ಲ್ಯಾನ್ (33*) ಹೋರಾಟ ಹರಿಣಗಳ ಗೆಲುವನ್ನು ತುಸು ವಿಳಂಬಗೊಳಿಸಿತು.
ದಕ್ಷಿಣ ಆಫ್ರಿಕಾ: 329 ಮತ್ತು 387, ಆಸ್ಟ್ರೆಲಿಯಾ: 429 ಮತ್ತು 57.1 ಓವರ್ಗಳಲ್ಲಿ 111 (ಹೆಡ್ 14, ರೆನ್ಶಾ 0, ಲಬುಶೇನ್ 4, ಗ್ರೀನ್ 27, ಇಂಗ್ಲಿಸ್ 4, ಕ್ಯಾರಿ, 2, ಕೊನೊಲಿ 0, ಸ್ಟಾರ್ಕ್ 0, ಕಮ್ಮಿನ್ಸ್ 11, ಲ್ಯಾನ್ 33*, ಹಾರ್ಮರ್ 16ಕ್ಕೆ 6, ರಬಾಡ 39ಕ್ಕೆ 3). ಪಂದ್ಯಶ್ರೇಷ್ಠ: ಸೈಮನ್ ಹಾರ್ಮರ್, ಸರಣಿಶ್ರೇಷ್ಠ: ಮಾಕೋರ್ ಯಾನ್ಸೆನ್.
ವಿಶ್ವ ನಂ. 1 ಪಟ್ಟ ಕಳೆದುಕೊಂಡ ಆಸೀಸ್
ಕೇಪ್ಟೌನ್ ಟೆಸ್ಟ್ ಸೋಲಿನೊಂದಿಗೆ ಆಸ್ಟ್ರೆಲಿಯಾ ತಂಡ ಐಸಿಸಿ ಟೆಸ್ಟ್ ರ್ಯಾಂಕಿಂಗ್ ಮತ್ತು ಐಸಿಸಿ ವಿಶ್ವ ಟೆಸ್ಟ್ ಚಾಂಪಿಯನ್ಷಿಪ್ (ಡಬ್ಲ್ಯುಟಿಸಿ) ಅಂಕಪಟ್ಟಿ ಎರಡರಲ್ಲೂ ಅಗ್ರಸ್ಥಾನವನ್ನು ಕಳೆದುಕೊಂಡಿದೆ. ಟೆಸ್ಟ್ ರ್ಯಾಂಕಿಂಗ್ನಲ್ಲಿ ಈಗ ದಕ್ಷಿಣ ಆಫ್ರಿಕಾ ನೂತನ ವಿಶ್ವ ನಂ. 1 ಆಗಿದ್ದರೆ, ಆಸ್ಟ್ರೆಲಿಯಾ 2ನೇ ಸ್ಥಾನಕ್ಕಿಳಿದಿದೆ. ಡಬ್ಲ್ಯುಟಿಸಿ ಅಂಕಪಟ್ಟಿಯಲ್ಲಿ ಈಗ ನ್ಯೂಜಿಲೆಂಡ್ (ಶೇ.72.22) ಅಗ್ರಸ್ಥಾನಕ್ಕೇರಿದ್ದರೆ, ದಕ್ಷಿಣ ಆಫ್ರಿಕಾ (ಶೇ.71.43) 2ನೇ ಸ್ಥಾನಕ್ಕೇರಿದೆ. ಆಸೀಸ್ (ಶೇ.69.23) 3ನೇ ಸ್ಥಾನಕ್ಕಿಳಿದಿದೆ.